Mambo ka o Tuyanjila, Kukota ne Kufwa?

Tubena Kuyanda na Mambo a Kintu Kyaubile Bansemi Betu Batanshi

“Bundengamambo byo bwatwelele pano pa ntanda mu muntu umo, ne lufu nalo lwaishijile mu bundengamambo, byonkabyo lufu lwakumbene ku bantu bonse.”—LOMA 5:12.

Lesa walengele bansemi betu batanshi ba Adama ne Evwa na milanguluko ne mibiji yawama. Kabiji wibabikile mu paladisa pano pa ntanda nangwa’mba bujimi bwa Edena. Lesa wibabuujile’mba bafwainwa kuja ku bipangwa byonse bya mu bujimi kufumyakotu kipangwa kimo. Pakuba Adama ne Evwa basajilepo kuja ku kino kipangwa kyo bebakainye kujako, ano ajinga mambo. (Ntendekelo 2:15-17; 3:1-19) Byo basatukile, Lesa wapangile bano ba mulume ne mukazhi mu bujimi. Kabiji bwikalo bwibakatezhe bingi. Byo basemene baana, kine bwikalo bwibapezhezhe maana. Bonse bakotele ne kufwa. (Ntendekelo 3:23; 5:5) Onkao mambo, atweba tubena kukolwa, kukota ne kufwa na mambo a ba Adama ne Evwa.

Tubena Kuyanda na Mambo a Bamalaika Basatukile

“Pano pa ntanda ponse paji mu bulume bwa kwa aye mubi.”—1 YOANO 5:19.

Uno “mubi” ke Satana. Ke malaika wasatukijile Lesa. (Yoano 8:44; Lumwekesho 12:9) Mu kuya kwa kimye, bamalaika bakwabo balondejile Satana. Abano bamalaika batelwa’mba bandemona. Bandemona bengijisha bulume bwabo kujimbaika bantu kuba’mba babulenga kukookela Lesa. Batundaika bantu bavula kuba bintu byatama. (Salamo 106:35-38; 1 Timoti 4:1) Satana ne bandemona batemwa bingi kumanyika bantu.

Kimye Kimo Tuyanda na Mambo a Kubula Kufuukula Bintu Bulongo

“Kyonka muntu kyo abyala, kyo kyo akanowa.”—NGALATIYA 6:7.

Bino tubena kuyanda na mambo a bundengamambo bo twaswana ne na mambo a kuba’mba Satana ye ubena kutangijila ino ntanda. Pakuba bimye bimo, bantu bene beletelela. Mu ñanyi jishinda? Inge bantu bauba bintu byatama nangwa babula kufuukula bulongo, banowa bintu byatama. Kabiji inge bauba bintu byawama, banowa bintu byawama. Nsemi wamulume wasongola kabiji wakishika, wingila na ngovu kabiji watemwa kisemi kyanji, ukanowa bintu byavula byawama bingi ne kisemi kyanji kikekala na lusekelo. Pakuba awa watemwa bya kisangajimbwe, kutomesha maalwa nangwa nkope wakonsha kwiletelela aye mwine ne kulengela kisemi kyanji kuyanda. Onkao mambo, twafwainwa kumvwinanga bitubuula Mulenga wetu. Yehoba ukeba atweba kunowa bintu byawama byavula kuvwangakotu ne kwikala na “mutende wavula.”—Salamo 119:165.

Tubena Kuyanda Mambo Tuji mu “Moba a Kupelako”

“Mu moba a kupelako . . . , bantu bakekala betemwatu abo bene, batemwa mali, . . . babula kukookela bansemi, . . . babula kwikanya, bashinta, babula kutemwa kyawama.”—2 TIMOTI 3:1-5.

Ano moba, bantu bavula baji na byubilo byaambapo kino kinembelo. Binembelo byaambijile jimo kala amba mu moba a kupelako kukekala makondo, bipowe bya nzala, bitentanshi ne myalo. (Mateo 24:3, 7, 8; Luka 21:10, 11) Mu bino byubilo mubena kufumatu makatazho ne lufu.