Muntu Wachinchikile

BANTU byo bayilenga na kuvula panopantanda, bavula baubilenga bintu byatama byonka byajinga Kaina. Bino muntu umo wapuseneko. Uno muntu wajinga Enoka. Enoka wachinchikile bingi. Bantu bajingako kyokya kimye baubilenga bintu byatama bingi, bino Enoka aye watwajijiletu na kwingijila Lesa.

Abya wayuka ene mambo bantu bajingako kyokya kimye kyo baubijilenga bintu byatama nyi? Akilanguluka pa kino, Ñanyi walengejile ba Adama ne Evwa kuba’mba basatukile Lesa ne kuja ku kipangwa kyo ebambijile Lesa amba kechi bakajeko ne? Ee, wajinga malaika watama. Baibolo wamutela amba Satana. Kabiji ye ubena kulengela bonse kwikala batama.

Juba jimo Yehoba Lesa waambijile Enoka kwambila bantu byambo byo babujilenga kukeba kumvwa. Bino byambo byajinga bya kuba’mba: ‘Juba jimo Lesa ukonauna bantu bonse batama.’ Kyamweka bantu bazhingijile bingi pa kumvwa bino byambo. Kampe bakebelenga ne kumwipaya Enoka. Onkao mambo, Enoka wafwainwe kuchinchika pa kuba’mba ambile bantu pa mambo a Lesa byo alayile kuba.

Lesa kechi wamulekele Enoka kuba’mba ekale myaka yavula mu boba bantu batamine ne. Enoka waikeletu myaka 365 kwapwa. Mambo ka o twaambila’mba “myaka 365 kwapwa”? Mambo bantu bajingako kyokya kimye bakosele kukila ano moba kabiji baikalanga myaka yavula bingi. Mwana wa mulume wa kwa Enoka aye Metusela waikele myaka 969!

Enoka byo afwile, bantu bakijilemo kuba byatama. Baibolo waamba’mba, ‘milanguluko yonse ya mu michima yabo yajingatu yatama kikuputu,’ kabiji amba ‘ntanda yonse yakumbene na malwañano.’

Nanchi wayuka kishinka kimo kyalengejile’mba panopantanda pekale makatazho avula mu oa moba nyi? Ke na mambo a kuba’mba Satana wamwenepo jishinda jipya ja kutundaikilamo bantu kubanga byatama. Tusa kukafunda pa kino.