Kufunda Bantu Bulongo

BAKULUMPE mu kipwilo ba bwina Kilishitu bafwainwa ‘kufunda bantu na lufunjisho lwalumbuluka.’ (Titu. 1:9) Kimye kimo kino bakonsha kwikyuba kimye bintu po byakatazha. Kyanema bingi kufundako bantu kwesakana na mwayila mikambizho ya mu Binembelo. Byonkabyo, bakulumpe mu kipwilo bafwainwa kumvwina luno lujimuno lwa kuba’mba: ‘Teshai muchima . . . mu kwibakosesha.’ (1 Timo. 4:13) Nangwa kya kuba uno mwisambo wetu ubena kwamba kikatakata ku bakulumpe mu kipwilo nangwa ku boba babena kukanamina uno mwingilo, kwikala bimye bimo bansemi byo bafwainwa kufundako baana babo nangwa aba babena kufunjisha mafunjisho a Baibolo po bafwainwa kufundako bantu bo bafunjisha. Mu bimye bya uno mutundu, ino mikambizho intutu imo ingila ne kwiabo.

Kimye kya Kufunjilamo Bantu. Pa kuba’mba tuyuke kimye kyo twafwainwa kufunjilamo bantu, kikwasha bingi kumona bintu byanembwa mu Baibolo bibena kumwesha kimye kyo bafunjilengako bobo bantu. Mutumwa Petelo wafunjileko bakulumpe mu kipwilo kuteshako muchima ku mwingilo wabo wa kulama mikooko ya Lesa. (1 Pe. 5:1, 2) Paulo wafunjileko Titusa kutundaika bansongwalume kwikala na “michima yatekanya.” (Titu. 2:6) Paulo wakambizhe bakwabo bena Kilishitu kwamba na “jiwi jimo jonka” ne kuvundamina ku bonse baletanga mepatulo mukachi ka balongo. (1 Ko. 1:10; Loma 16:17; Fili. 4:2) Nangwa kya kuba Paulo watakaikile ba mu kipwilo kya mu Tesalonika na mambo a bintu byawama byo baubilenga, wibafunjileko kukijishamo kulondela mikambizho yo bebakambizhe. (1 Tesa. 4:1, 10) Petelo wasashijile balongo banji bena Kilishitu ‘kuzhila bya lwiso lwa buntunshi.’ (1 Pe. 2:11) Yuda wafunjileko balongo banji ‘kwibilwila na muchima yense abya byaitabilwa’ na mambo a kuba kwajinga bantu bamo babulanga kwakamwa Lesa bajinga na byubilo bincha. (Yuda 3, 4) Bena Kilishitu bonse bebakambizhe kwifundako bene na bene kuba’mba kafwako nangwa umo wafwainwe kukosesha muchima ku bujimbijimbi bwa bundengamambo ne. (Hebe. 3:13) Petelo wafunjileko Bayudea bakibujile kwikala na lwitabilo mwi Kilishitu amba: “Ipulushai ku kyo kino kisemi kyaluwankana.”—Byu. 2:40.

Byubilo bya mutundu ka bikebewa pa kuba’mba mufundeko bantu mu bimye bya uno mutundu? Nga awa ubena kufundako bakwabo wakonsha kwibafundako byepi kwa kubula kwibobila bukaji?

‘Na Butemwe.’ Umvwe twabula kufundako bakwetu na “butemwe,” bakonsha kumvwa nobe tubena kwibakalukila. (File. 9) Ee kuba’mba umvwe paji kintu kyo bafwainwa kuba bukiji, ñambilo ya ñambi yafwainwa kumwesha’mba akyo kintu bafwainwa kwikyuba bukiji. Kwamba na jiwi jakoka kwakonsha kumwesha nobe ubena kulomba lulekelo lwa mambo. Pa kimye kimotu, mukambizho wafwainwa kwambiwa na jiwi jakosa bino saka jumvwanyika ja lusa. Kusashijila bantu na butemwe kwakonsha kwibatundaika kuba kintu kyo mubena kwambapo. Byo aambilenga pe aye mwine ne mu kwimenako balunda nanji, Paulo wabujile bena Tesalonika amba: ‘Mwayuka mo twimubijile anweba bonse, pa muntu pa muntu, monka mo obila shabo ne baana banji mwine, kasa twimufunda.’ (1 Tesa. 2:11) Aba bakulumpe bena Kilishitu basashijile balongo na butemwe. Ne anweba byambo byenu byumvwanyikenga’mba mubena kwibomvwina lusa banteleki benu.

Yukai mwa kwambila. Kufichishanga ku muchima bantu bo mubena kutundaika kuba bintu byo mubena kwamba ne. Kabiji pa kimye kimotu, kange muchine kwibabula bantu “monse mwasakila Lesa ne.” (Byu. 20:27) Aba baji na michima ya lusanchilo kechi kikebafita ku michima nangwa kwimushikwa na mambo a kwibatundaika kuba bintu byaoloka ne.—Sala. 141:5.

Saka mukyangye kutendeka kufunda bantu, kyanema patanshi kukibatakaika mo babena kuba bulongo. Langulukai pa bintu byawama balongo benu byo babena kuba—bintu bibena kutokesha Yehoba pa muchima nabiji: lwitabilo lo babena kumwesha mu mingilo yabo, butemwe bubena kwibatundaika kwibikishako, kabiji ne byo babena kuchinchika makatazho o babena kupitamo. (1 Tesa. 1:2-8; 2 Tesa. 1:3-5) Kino kikalengela balongo benu kwiumvwa’mba banemekwa bingi, kabiji kikebalengela ne kukeba kumvwa misashijilo isakulondelapo.

“Na Kukokamuchima Konse.” Kufunda bantu kwafwainwa kubiwa “na kukokamuchima konse.” (2 Timo. 4:2) Kino kyavwangamo ka? Kukoka muchima kwavwangamo kutekanya pa kuchinchika bintu byatama nangwa umvwe bakufichisha ku muchima. Muntu uji na muchima wakoka uketekela’mba banteleki banji bakengijisha bintu byo abena kwamba. Kufundako bantu mu jino jishinda kukebalengela kubula kwimumona’mba mwibalengulula. Luketekelo lwenu lwa kuba’mba balongo ne banyenga yenu bakeba kwingijila Yehoba papelela bulume bwabo, lukebalengela kukeba kuba kintu kyawama.—Hebe. 6:9.

“Na Lufunjisho Lwalumbuluka.” Nga mukulumpe mu kipwilo wakonsha ‘kufundako’ byepi bantu ‘na lufunjisho lwalumbuluka’? Wakonsha kuba bino kupichila mu ‘kukwachisha ku mambo a kishinka, a mwayila lufunjisho.’ (Titu. 1:9) Mu kifulo kya kwamba milanguluko yenu, ingijishainga Mambo a Lesa kukoseshamo bakwenu. Baibolo ye wafwainwa kwimukwasha kuyuka bintu byo mwafwainwa kwamba. Tongaulai buwame buji mu kulondela byaamba Baibolo pa kintu kyo mubena kwisambapo. Yukishai bulongo bintu byatama bifumamo—pa kino kimye ne kulutwe—mu kubula kulondela byaamba Mambo a Lesa, kabiji bingijishai kushiinamo bantu bo mubena kwambako kumona buneme buji mu kuba bintu byo mubena kwambapo.

Monai kuba’mba mwibalumbulwila bantu bulongo kintu kyo bafwainwa kuba kabiji ne byo bafwainwa kwikyuba. Kabiji monai’mba baumvwisha kuba’mba bintu byonse byo mubena kwamba byafuma mu Binembelo. Umvwe Binembelo byapana bwana bwa bene bwa kwifuukwila bintu bimo, lumbululai bulongo pafwainwa kupelela bobo bwana bwa bene. Kepo pa kupezhako, ambai byambo bisakukosesha banteleki benu kuba bintu byo mwaamba.

“Na kuchinchika Kukatampe.” Pa kuba’mba muntu akoseshe bakwabo, wafwainwa “kuchinchika” nangwa’mba kukasuluka ‘pakatampe mu lwitabilo.’ (1 Timo. 3:13) Ki ka kilengela muntu kwamba saka akasuluka? Kimulengela, ke na mambo a kuba’mba ‘kya kumwenako kyanji kya mingilo yawama’ kyayilamo na byo abena kutundaika balongo banji kuba. (Titu. 2:6, 7; 1 Pe. 5:3) Aba bo babena kukosesha kuba byobyo bintu bakonsha kumona’mba, awa ubena kwibafundako kechi ubena kukeba abo kuba bintu aye byo abula kuba ne. Bakamona’mba bakonsha kulondela lwitabilo lwanji byonka aye byo abena kwibikako kulondela Kilishitu.—1 Ko. 11:1; Fili. 3:17.

Kufundako bantu mu butemwe kuba bintu byafuma mu Mambo a Lesa kulengela bantu kuba bintu byo mwaamba. Aba bo bapa uno mutembo wa kufundako bakwabo, bafwainwa kwibikishako kwibafundako bulongo.—Loma 12:8.