Taiko Muchima ku Kusapwila!
1. Lufunjisho ka lwa kwa Paulo lo twafwainwa kutako muchima?
1 “Sapwila mambo; kasa utengelela jimo.” (2 Timo. 4:2) Mambo ka byambo bya kwa Paulo o byanemena mu ano moba etu? Bino byambo byakonsha kwitukwasha byepi atweba bene ne bakwetu?
2. Mambo ka o tukebela bantu babula kumvwapo kala mambo awama?
2 Po Paimena Bumi: Bantu bavula mwaya ntanda bafwainwa kumvwa mambo awama akebalengela kupuluka. (Loma 10:13-15; 1 Timo. 4:16) Bantu bavula bakishinka twibatana mu nyaunda mo twingijila javula. Umvwe twabwelako juba jikwabo nangwa kimye kikwabo twakonsha kutanapo muntu mukwabo. Kukeba bantu mu jino jishinda kukalengela jiwi jetu ja mu muchima kwikala jatoka ne kubinga ku mambo a mashi.—Byu. 20:26.
3. Twakonsha kwingijisha byepi bulongo kimye mu mwingilo?
3 Bena Kilishitu ba mu myaka kitota kitanshi ‘bakumbenye Yelusalema na mafunjisho abo’ nangwa kya kuba bebamanyikilenga. (Byu. 5:28) Nanchi tubena “kushimuna” bulongo mambo awama nyi? (Byu. 10:42) Abya tubena kwingijisha bulongo kimye kyetu mu mwingilo nyi? Umvwe tubena kupembela bakwetu babena kwisamba na muntu ye besambile nanji, abya tusapwila ku bantu babena kukinsankana po tuji nyi?
4. Kuta muchima ku kusapwila kwitulengela byepi kutwajijila na kulaba ne kukenkenta?
4 Kwitulengela Kulaba ne Kukenkenta: Mpelo ya buno bwikalo byo yafwenya kala pepi, twafwainwa kulabanga ne kukenkenta. (1 Tesa. 5:1-6) Kwamba pa bikaleta Bufumu kwitulengela kubula kuvuzha bya kutabataba bya mu buno bwikalo. (Luka 21:34-36) ‘Kusakisha’ kwiya kwa juba ja Lesa nako kwitulengela kwingilako pakatampe mu mwingilo wetu wa kupulusha bantu.—2 Pe. 3:11, 12.
5. Kunemeka bumi kwitutundaika byepi mu mwingilo?
5 Umvwe twatako muchima ku mwingilo wa kusapwila tumwesha’mba tumona bumi byonka bibumona Yehoba ‘ubula kusaka nangwa umo onaike ne, poso amba, bonse balapile.’ (2 Pe. 3:9; Ezi. 33:11) Twayai atweba bonse twibikeko kusapwila bantu baji mu nyaunda yetu. Kuba bino kuleta lukumo kwi Yehoba.—Sala. 109:30.