Lufunjisho 11
Mafunde a mu Baibolo Etukwasha Byepi?
1. Mambo ka o tukebela lutangijilo?
Mafunde a mu Baibolo etulengela byepi kubula kuba bintu byakonsha kwitubika mu kizumba?—SALAMO 36:9.
Mulenga wetu uji na maana kwitukila. Shetu witutemwa kabiji wituta bingi muchima. Kabiji kechi witulengele’mba tuketangijilenga atweba bene ne. (Yelemiya 10:23) Byonkatu mwana mucheche byo bamutangijila ku bansemi, ne atweba tukeba kwitutangijila kwi Lesa. (Isaya 48:17, 18) Mafunde a mu Baibolo bo bupe bwitupa Lesa bwa kwitutangijila.—Tangai 2 Timoti 3:16.
Mafunde ne mizhilo ya Yehoba bitufunjisha mwakwikela mwafwainwa ne kwitubula bya kuba pa kuba’mba tukekale na bumi bwa myaka ne myaka kulutwe na lwendo. Twafwainwa kulondelanga lutangijilo lwanji na muchima yense mambo Lesa ye witulengele.—Tangai Salamo 19:7, 11; Lumwekesho 4:11.
2. Mafunde a mu Baibolo o a ka?
Mafunde a mu Baibolo etubula bikeba Lesa. Pakuba Mizhilo ingilatu mu bintu byatongolwa. (Mpitulukilo ya mu mizhilo 22:8) Twafwainwa kwikala na maana a kupima bintu pa kuba’mba tuyuke bingila jifunde pa bintu bimo. (Byambo bya Mana 2:10-12) Kyakumwenako, Baibolo itufunjisha kuba’mba bumi kya bupe kyafuma kwi Lesa. Jino jifunde jitutangijila pa nkito, pa nzubo ne pa lwendo. Jitulengela kubula kuba bintu byakonsha kwitubika mu kizumba.—Tangai Byubilo 17:28.
3. Ñanyi mafunde abiji akilamo kunema?
Yesu watongwele mafunde abiji anema bingi. Jitanshi jitubula kyakilamo kunema mu bumi bwetu, kuyuka Lesa, kumutemwa ne kumwingijila mu bukishinka. Jino jifunde jitanshi twafwainwa kwijilangulukangapo mu byonse byo tufuukula kuba. (Byambo bya Mana 3:6) Bonse balondela jino jifunde bekala na bulunda bwawama ne Lesa ne na lusekelo lwa kine kine, kabiji bakekala na bumi bwa myaka ne myaka.—Tangai Mateo 22:36-38.
Jifunde ja bubiji jakonsha kwitulengela kwikala mutende na bakwetu. (1 Kolinda 13:4-7) Kulondela jino jifunde kwavwangamo kumona bantu byonka Lesa byo ebamona.—Tangai Mateo 7:12; 22:39, 40.
4. Mafunde a mu Baibolo etukwasha byepi?
Mafunde a mu Baibolo alengela bisemi kukwatankana ne kwitemwa abo bene na bene. (Kolose 3:12-14) Mambo a Lesa azhikijila bisemi na jifunde ja kuba’mba masongola afwainwa kwikala kikupu.—Tangai Ntendekelo 2:24.
Kwikela mwayila mafunde a mu Baibolo kwitulengela kuzhikijila bipe ne muchima wetu. Kyakumwenako, batwezha nkito batemwa bantu balondela mafunde a mu Baibolo aamba pa bukishinka ne pa kwingila na ngovu. (Byambo bya Mana 10:4, 26; Bahebelu 13:18) Mambo a Lesa etufunjisha kusekela na byonka byo tuji nabyo ne kunemeka Lesa kukila bya mu bwikalo.—Tangai Mateo 6:24, 25, 33; 1 Timoti 6:8-10.
Kabiji kwikela mwayila mafunde a mu Baibolo kulengela ne kwikala na butuntulu bwa mubiji bwawama. (Byambo bya Mana 14:30; 22:24, 25) Kyakumwenako, kulondela muzhilo wa Lesa wakanya kupendwapendwa kwituzhikijila ku bikola bipayañana ne mapuso. (Byambo bya Mana 23:20) Yehoba kechi wakanya kutoma maalwa mu kwesakanya ne. (Salamo 104:15; 1 Kolinda 6:10) Mafunde a Lesa etukwasha kupichila mu kwitufunjisha byubilo byawama ne kulamawizha milanguluko yetu. (Salamo 119:97-100) Nangwa byonkabyo, bena Kilishitu bakine kechi bakokela mizhilo ya Lesa na mambo a kukebatu kumwenamo ne. Beilondela mambo bakebesha kunemeka Yehoba.—Tangai Mateo 5:14-16.