LUFUNJISHO 3
Byo Mwakonsha Kupwisha Makatazho
“Itemwishai anwe bene na bene, mambo butemwe buvweta pa mambo avula.”—1 Petelo 4:8
Byo mwatwela mu masongola, mupitanga mu makatazho apusana pusana. Amo eyanga na mambo a kupusenamo mu ndangulukilo, bintu byo mwatemwa ne mo mubila bintu bimo bya mu bwikalo. Makatazho akwabo akonsha kufumatu kukwabo ne ku bintu byo mwabula kuketekela.
Kimye kimo twakonsha kulanguluka’mba kijitu bulongo kuvulamako ku makatazho. Bino Baibolo witubula’mba kyawama kwiapwisha. (Mateo 5:23, 24) Kulondela mafunde a mu Baibolo kwakonsha kwimukwasha kupwisha bulongo makatazho.
1 ISAMBAI PA LUKATAZHO
BYAMBA BAIBOLO: “Kuji . . . kimye kya kwamba.” (Musapwishi 3:1, 7) Mwafwainwa kwisamba pa lukatazho. Bulai benakwenu byo mubena kulanguluka pa kyo kyo kintu. Kimye kyonse “iambilainga bya kine” na benakwenu. (Efisesa 4:25) Nangwa kya kuba mwazhingila kechi mwafwainwa kulwa ne. Kukumbula na jiwi jakoka kulengela mwisambo kubula kukolomona lutobo.—Byambo bya Mana 15:4; 26:20.
Nangwa kya kuba mwapusenamo, mwi ubilenga lusa, kabiji mumweshenga butemwe ne kushingika benakwenu. (Kolose 4:6) Pwishai makatazho bukiji, kabiji kange muleke kwisamba ne.—Efisesa 4:26.
BYO MWAKONSHA KUBA:
Salai kimye kyawama kya kwisamba pa lukatazho
Inge mubena kuteleka, kuchibikizha benakwenu ne. Pembelai kimye kyenu kya kwamba
2 TELEKAINGA NE KUMVWISHA
BYAMBA BAIBOLO: “Itemwainga anwe bene na bene. Ikalainga batanshi kunemeka bakwenu.” (Loma 12:10) Ntelekelo yenu yanema bingi. Kwatakanyai kibena kwamba bena kwenu ne na “lusa . . . ne kwipelula.” (1 Petelo 3:8; Yakoba 1:19) Kange mubepenga nobe mu bena kuteleka ne. Inge kyakonsheka, lekai byo mubena kuba. Telekai bibena kwamba benakwenu nangwa babulai’mba musakwisamba kimye kikwabo. “Kechi mwafwainwa kuzhingilanga bukiji ne,” mambo benakwenu balunda nenu, kechi balwanyi benu ne.—Musapwishi 7:9.
BYO MWAKONSHA KUBA:
Telekai bibena kwamba benakwenu nangwa kya kuba byo babena kwamba bimufichisha ku muchima
Telekai ne kukwatakanya kyo babena kwamba. Yukai benakwenu inge bazhingila
3 UBILAINGA MONKA MO MWAFUUKWILA
BYAMBA BAIBOLO: “Mu kwingila na ngovu mufuma byawama, bino mu kwabauka mufumatu buyanji.” (Byambo bya Mana 14:23) Mwafwainwa kwitabunzhana mwa kupwishisha lukatazho. Kabiji bonse babiji mwafwainwa kubilanga monka mo mwafuukwila. Kechi kyapela kuba bino ne, bino mufuma byawama. (Byambo bya Mana 10:4) Umvwe saka mwingijila pamo na benakwenu mu ‘kamwenamo byawama.’—Musapwishi 4:9.
BYO MWAKONSHA KUBA:
Fuukulai byo musa kuba pa muntu pa muntu pa kuba’mba mupwishe lukatazho
Kabiji mumonenga byo mubena kuba pa kimye pa kimye