KIPUNGU 4
Kwizhachisha—‘Ntokeshai ku Mambo Ami’
“Nkito yo naingilanga yalengejile kisemi kyetu kwikala bingi bulongo, pano bino yandengelanga kwivwanga mu bintu byatama. Natendekele kusekelelako moba a kukokoloka, kwivwanga mu bya bumulwila ntanda ne kuya ku chechi. Najinga Kamonyi wa kwa Yehoba, pano bino nalekele kupwila pa myaka 40. Na mambo a kupitapo myaka yavula, nalangulukilenga’mba Yehoba kechi ukandekelako mambo ne. Nezhachishenga bingi. Mambo nayukile bukine saka nkyangye kutendeka kuba bintu byatama.”—Martha.
KWIZHACHISHA kwatama bingi. Mfumu Davida wanembele’mba, “Mambo bubi bwami buji pa mutwe wami; bwannemenatu nobe kipe kyanema.” (Salamo 38:4) Bena Kilishitu bamo bakizhamo kwikala na bulanda kya kuba balanguluka’mba Yehoba kechi wakonsha kwibalekelako mambo ne. (2 Kolinda 2:7) Nanchi kulanguluka bino kwawama nyi? Nangwatu mwalenga mambo akatampe, nanchi Yehoba kechi wakonsha kwimulekelako mambo nenyi? Wakonsha kwimulekelako!
“Iyai Twisambe Kabiji Nsakwimukwasha Kwikala na Bulunda Bwawama ne Amiwa”
Yehoba kechi ukana bantu balapila ne. Ukeba bingi kwibakwasha. Mu kishimpi kya mwana walubile, Yesu waesakenye Yehoba ku shetu wa butemwe wajinga na mwana wafumine mu kisemi ne kutendeka kwikala bwikalo buncha. Mu kuya kwa kimye, uno mwana wafuukwilepo kubwela ku nzubo. “[Mwana] byo akijinga palepa byobya, shanji wamumwene ne kumubila lusa, kabiji wamunyemejile lubilo ne kumupakachilamo ne kumufyompa.” (Luka 15:11-20) Nanchi mukeba kufwenya kwipi ne Yehoba, bino mubena kulanguluka’mba ‘muji kwalepa’ ne aye nyi? Byonkatu biji shetu wa mu kishimpi kyaambile Yesu, Yehoba ukemubila lusa. Wakebesha bingi kwimutambwila.
Mwakonsha kuba byepi inge mubena kulanguluka’mba mambo enu akilamo kubaya nangwa avujisha kya kuba Yehoba kechi wakonsha kwimulekelako mambo ne? Monai Yehoba byo abena kwimwambila pa Isaya 1:18 amba: “Iyai twisambe kabiji nsakwimukwasha kwikala na bulunda bwawama ne amiwa. Nangwa kya kuba mambo enu achilatu ngee nobe mashi, akatokatu too nobe mabebe.” Nangwa kya kuba mambo etu achilatu ngee nobe mashi aji pa kivwalo kitoka, Yehoba uketulekelako mambo.
Yehoba kechi ukeba’mba jiwi ja mu muchima wenu jitwajijile na kwimukatazha ne. Lesa wakonsha kwimulekelako byepi mambo ne kwimukwasha kwikala na jiwi ja mu muchima jawama? Monai bintu bibiji byaubile Mfumu Davida. Kitanshi, waambile’mba: “Nsakusolola mizhilulwila yami kwi Yehoba.” (Salamo 32:5) Yukai’mba Yehoba wimwambila kulomba kwi aye ne ‘kwisamba’ nanji. Swai byo abena kwimwambila. Sololai mambo enu kwi Yehoba ne kumubuula bintu bibena kwimukatazha ku muchima. Davida walombele kufuma panshi ya muchima wanji amba: “Ngovwai bulongo ku bubi bwami. . . . Anweba Lesa, kechi mukakana muchima walajika kabiji wa bulanda ne.”—Salamo 51:2, 17.
Kya bubiji, Davida bamukwashishe kwi ngauzhi Natana ye batumine kwi Lesa. (2 Samwela 12:13) Lelo jino, Yehoba wabikako bakulumpe mu kipwilo bo afunjisha bya kukwasha bandengamambo balapila kwikala jibiji na bulunda bwawama ne Yehoba. Umvwe mwabuula bakulumpe mu kipwilo, bakengijisha Binembelo ne kulomba kufuma panshi ya muchima kuba’mba bemukwashe, nangwa kukana milanguluko yatama, ne kwimukwasha kuwamisha bulunda bwenu ne Lesa.—Yakoba 5:14-16.
Yehoba wakeba’mba mwikale na jiwi ja mu muchima jawama
“Ye wa Lusekelo awa ye Balekelako Mizhilulwila”
Kwambatu kine, kechi kyapela kusolola mambo enu kwi Yehoba Lesa ne kubuula bakulumpe mu kipwilo ne. Ne Davida naye kyamukatezhe. Byo alengele mambo ‘wazhindamine.’ (Salamo 32:3) Byo papichile kimye, wamwene buwame buji mu kusolola mambo anji ne kubula kubwezhapo.
Kintu kyawama kyamwenejilemo Davida, ke kya kuba’mba waikele na lusekelo jibiji. Wanembele’mba: “Ye wa lusekelo awa ye balekelako mizhilulwila, kabiji ye balekelako mambo anji.” (Salamo 32:1 tubyambo twa munshi) Kabiji walombele’mba: “Anweba Yehoba, nswishai ñambe, kuba’mba kanwa kami kemutote.” (Salamo 51:15) Byo alekele kwizhachisha, ne Lesa byo amulekejileko mambo, kyamutundaikile Davida kwamba pe Yehoba ku bakwabo.
Yehoba wakeba’mba mwikale na jiwi ja mu muchima jawama. Kabiji ubena kukeba’mba mubuuleko bantu pe aye ne byo akooba, kechi na kwizhachisha ne, bino kwamba na lusekelo. (Salamo 65:1-4) Vulukai byo emwambila’mba “mambo enu beazhimañanye, ne Yehoba ukemukokolosha.”—Byubilo 3:19.
Akino kyo kyamwekejile ne Martha. Waamba’mba: “Mwanami wa mulume wantuminanga Kyamba kya Usopa ne Labainga! Natendekele pachepache kubwela kwi Yehoba. Kintu kikatampe kyankatezhe ke kulomba lulekelo lwa mambo pa bintu byatama byo naubilenga. Pano bino, nalombele kwi Lesa namba andekeleko mambo. Papichile myaka 40 pa kuba’mba mbwele kwi Yehoba. Bintu byo napichilemo, bimwesha’mba nangwa papite myaka yavula byepi, muntu wakonsha kutendeka kwingijila Lesa ne kumutemwa.”