LUFUNJISHO 20
Yehoba Utangijila Byepi Kipwilo?
Yehoba kechi Lesa wa bimvulañanya ne. (1 Kolinda 14:33) Onkao mambo, twafwainwa kuketekela’mba bantu banji bafwainwa kukwatankana. Nanchi kipwilo kya bena Kilishitu kingila byepi? Twafwainwa kuba byepi pa kuba’mba kipwilo kingilenga bulongo?
1. Ñanyi mutwe wa kipwilo?
“Kilishitu ye mutwe wa kipwilo.” (Efisesa 5:23) Yesu wikala mwiulu bino ye ubena kutangijila mingilo ibena kwingila bantu ba Yehoba ntanda yonse. Yesu watongwele “kalume wa kishinka kabiji wa maana.” Abano ke jibumba ja bakulumpe mu kipwilo bapita mu byavula kabiji batelwa ne kuba’mba Jibumba Jitangijila. (Tangai Mateo 24:45-47.) Byonkatu byaubanga batumwa ne bakulumpe mu kipwilo mu Yelusalema, Jibumba Jitangijila najo jipana mikambizho mu bipwilo byonse ntanda yonse. (Byubilo 15:2) Pano bino, bano banabalume kechi bo babena kutangijila jino jibumba jetu ne. Batanga Baibolo kuba’mba bayuke Yehoba byo abena kukeba abo kuba kabiji bakookela bibabuula Yesu.
2. Ñanyi mwingilo wa bakulumpe mu kipwilo?
Bakulumpe mu kipwilo ke bena Kilishitu baingijila Lesa mu bukishinka pa myaka yavula. Bafunjisha, kukwasha ne kutundaika bantu ba Yehoba kwingijisha Baibolo. Kechi bafola mali pa kwingila ino mingilo ne. Pakuba abo bengila “na muchima wa kwipana kwi Lesa; kechi na muchima wa kukeba kumwenamo mali ne, bino na muchima yense.” (1 Petelo 5:1, 2) Bankwasho mu kipwilo bakwashako bakulumpe mu kipwilo. Mu kuya kwa kimye, bankwasho nabo bafikilamo kwikala bakulumpe mu kipwilo.
Jibumba Jitangijila jitongola bakulumpe bamo mu kipwilo kwikala bakalama ba mwanzo. Abano bakalama ba mwanzo bafwakesha bipwilo byapusana pusana kuba’mba bakoseshe ne kutundaika balongo ne banyenga. Bakalama ba mwanzo bengijisha mikambizho iji mu Baibolo kuba’mba bayuke inge bafwainwa kutongola mulongo kwikala nkwasho nangwa mukulumpe mu kipwilo.—1 Timoti 3:1-10, 12; Titusa 1:5-9.
3. Ñanyi mwingilo uji na Kamonyi yense wa kwa Yehoba?
Bonse mu kipwilo ‘batota jizhina ja Yehoba’ kupichila mu kukumbulapo pa kupwila, kwambako majashi ne kusapwila ponka papelela bulume bwabo.—Tangai Salamo 148:12, 13.
FUNJILAIPO BIKWABO
Yukai biji ntangi wetu Yesu ne bakulumpe mu kipwilo byo bebikako kwikala byajinga Yesu ne byo twafwainwa kukookela Yesu ne kwingijila pamo na bakulumpe mu kipwilo.
4. Yesu ke ntangi wawama bingi muchima
Tuswa bitubuula Yesu amba ye ntangi wetu. Tangai Mateo 11:28-30, ne kwisamba buno bwipuzho:
Yesu ukeba’mba atweba tumonenga byepi buntangi bwanji?
Nga bakulumpe mu kipwilo balondela byepi byajinga Yesu? Tambai VIDYO.
Baibolo walumbulula byonse bakulumpe mu kipwilo byo bafwainwa kwingila mwingilo wabo.
Tangai Isaya 32:2 ne 1 Petelo 5:1-3, ne kwisamba ano mepuzho:
Mubena kumvwa byepi ku muchima kuyuka’mba Yesu ne bakulumpe mu kipwilo bebikako kukokolosha bantu?
Mu ñanyi mashinda amo bakulumpe mu kipwilo mo balondela Yesu?
5. Bakulumpe mu kipwilo bafwainwa kwikala na byubilo byawama
Yesu ukeba’mba bakulumpe mu kipwilo bengilenga byepi mwingilo ye ebapa? Tambai VIDYO.
Yesu wapaine mikambizho ya kulondela aba batangijila mu kipwilo. Tangai Mateo 23:8-12, ne kwisamba buno bwipuzho:
Ñanyi bintu byo mwatemwa bingi pa lupusano luji pa mikambizho ya mu Baibolo yaamba pa bakulumpe mu kipwilo ne byuba bantangi ba mu bupopweshi?
Bakulumpe mu kipwilo bakosesha bulunda bwabo ne Yehoba. Kabiji bakwasha ne bisemi byabo nabyo kwikala na bulunda bwakosa ne Yehoba
Bakulumpe mu kipwilo bata bingi muchima balongo ne banyenga bonse baji mu kipwilo
Bakulumpe mu kipwilo basapwila kimye kyonse
Bakulumpe mu kipwilo bafunjishi. Nabo bengilako mwingilo wa kuwamisha pa nzubo ya Bufumu ne mingilotu ikwabo
6. Twafwainwa kwingijilanga pamo na bakulumpe mu kipwilo
Baibolo witubuula bishinka byanema bingi biitulengela kwingijila pamo na bakulumpe mu kipwilo. Tangai Bahebelu 13:17, ne kwisamba ano mepuzho:
Mambo ka Baibolo o aambila’mba twafwainwa kukookelanga ne kunekenena babena kwitutangijila? Mwalangulukapo’mba ka pa kino?
Tangai Luka 16:10, ne kwisamba ano mepuzho:
Mambo ka o twafwainwa kukookelanga bakulumpe mu kipwilo kimye kyonse nangwatu mu bintu byo twamona’mba kechi byanema ne?
BANTU BAMO BAMBA’MBA: “Twakonsha kupopwela Lesa monsetu mo tubena kukebela.”
Ñanyi bintu byawama byo mwalangulukapo muntu byo afwainwa kumwenamo inge ke apopwele Lesa pamo na bakwabo mu kipwilo?
ÑANYI BISHINKA BYO MWAFUNDA?
Yesu ye mutwe wa kipwilo. Tukookela na muchima yense bakulumpe mu kipwilo bo babena kutangijila kwi Yesu mambo betukwasha ne kwitufunjisha na byubilo byabo byawama.
Mepuzho a kupitulukamo
Ñanyi mutwe wa kipwilo?
Bakulumpe mu kipwilo bakwasha byepi balongo ne banyenga?
Ñanyi mwingilo uji na mupopweshi yense wa Yehoba?
KEBAI BISHINKA BIKWABO
Iumvwinai anweba bene Jibumba Jitangijila ne bakulumpe mu kipwilo byo bata muchima bakwabo bena Kilishitu lelo jino.
Kukosesha Balongo Baji mu Byalo mo Bakanya Mwingilo Wetu (4:22)
Yukai mwingilo wingila bakalama ba mwanzo.
Bwikalo bwa Bakalama Bamwanzo Bengijila mu Mapunzha a ku Muzhi (4:51)
Tangai bino bishinka muyuke mwingilo wingila bakulumpe mu kipwilo wa kutundaika balongo ne banyenga.