Kwashai Bakwenu Kwenda Mwafwainwa Yehoba

“Kechi tuzhikilwa kwimulombela ne. Twimusakila namba . . . mwendenga mwafwainwa [Yehoba, NW] mwakumutokeshesha ku muchima to, kasa mupanga bipangwa mu mingilo yonse yawama.”—KOLOSE 1: 9, 10.

1, 2. Kikatakata kika kyakonsha kuleta lusekelo?

BAMULUME ne mukazhi bamo bengila mwingilo wa kimye kyonse mu South Africa baambile’mba: “Twikala mu nzubo ya kalavwanyi pa fwamu, na mambo a kupeezhako bwikalo bwetu pa kuba’mba tusapwilenga bantu bavula. Onkao mambo, tuji na jishuko jikatampe ja kukwasha bavula kwipana kwi Yehoba.”

² Abya kuba mwaswa kuba’mba kukwasha bakwenu kuleta lusekelo nenyi? Bamo batana lusekelo kupichila mu kweseka kimye kyonse kukwasha balwazhi, balanda, ne bapopomenwa. Bena Kilishitu bakine bashiinwa kuba’mba kubulako bakwabo maana a kuyuka Yehoba Lesa ne Yesu Kilishitu bo bukwasho bukatampe bo bakonsha kupana. Kino, kyo kyonka kyakonsha kukwasha bakwabo kwitabila mu nkuulo ya kwa Yesu ne kwikala na bulunda bwawama ne Lesa pa kuba’mba bakatambule bumi bwa myaka.— Byubilo 3:19-21; 13:48.

3. Ñanyi mutundu wa bukwasho ye twafwainwa kubula kulubako?

³ Nangwa kikale byonkabyo, ibyepi ku bantu babena kwingijila kala Lesa kabiji babena kulondela “Jishinda”? (Byubilo 19:9) Kwa kubula nangwa kuzhinaukatu ne, mwibatemwa bingi byonka byo mukelwa kuba, bino kimye kimo kikatazha kumonapo mumo momwakonsha kwibakwashisha, ne kutwajijila na kuba byonkabyo. Nangwa kimye kimo bwikalo bwenu kechi bwakonsha kwimuswisha kwibakwasha ne, mu jo jo jishinda bwimukepeshesha lusekelo lo mwakonsha kwikala nalo. (Byubilo 20:35) Mu buku wa Kolose, twakonsha kufunjilamo ino mbaji yonse ibiji.

4. (a) Kimye Paulo kyo anembejile nkalata ku bena Kolose wajinga mu ñanyi bwikalo? (b) Nga Epafalasa watainwe byepi mu buno bwikalo?

⁴ Kimye mutumwa Paulo kyo anembejile nkalata ku bena Kilishitu ba mu Kolose, wajinga mu kaleya mu nzubo ya bunke mu Loma, nangwatu umvwe kwaiya benyi na kumupempula. Byonka byo mwakonsha kuketekela, Paulo waingijishe kano ka kimye kusapwila Bufumu bwa Lesa nangwa kya kuba’mba wakashilwe. (Byubilo 28:16-31) Bena Kilishitu bamo baishilenga na kupempula Paulo, nabo kimye kimo bebatailenga pa kaleya. (Kolose 1:7, 8; 4:10) Umo ye bataile pa kaleya wajinga musapwishi wabambakana aye Epafalasa wafumine mu muzhi wa Kolose ku Filigya kyalo kya mitumba (kitelwa ano moba amba Turkey) kumusela wa Efisesa mu Asia Minor. Epafalasa wakwashishe bingi pa kulenga kipwilo mu Kolose, kabiji wasebezejile bingi na ngovu bipwilo byajinga pa bwipi mu Laodikea ne mu Hilapolisa. (Kolose 4:12, 13) Mambo ka Epafalasa kyo aijile na kumona Paulo ku Loma, kabiji twakonsha kufunjilako ka ku byambo byamukumbwile Paulo?

Bukwasho Bwa Kine ku Bena Kolose

5. Mambo ka Paulo kyo anembejile ku bena Kolose?

⁵ Pa kuba’mba esambe ne Paulo pa byajinga mu kipwilo kya bena Kolose, Epafalasa waendele lwendo lwalepa lwa kuya ku Loma. Byo afikile kokwa, wamubujile pa mambo a lwitabilo, butemwe, ne byo bebikilengako mu busapwishi aba bena Kilishitu. (Kolose 1:4-8) Kechi byonka binotu ne, kampe waambilepo ne pa kijikila kyoajinga nakyo pa mambo a byubilo byatama byachiinyenga bena Kolose ku mupashi. Paulo wakumbwile mu nkalata moanembele byambo bya kulengulula milanguluko imo ya kumbenyenga bafunjishi ba bubela. Kikatakata washinkamene pa mwingilo mukatampe wa kwa Yesu Kilishitu.a Abya bukwasho bwanji bwapelejiletu mukukonkomwena pa bishinka bikatampe bya bukine bwa mu Baibolo? Mu ñanyi jishinda jikwabo moakwashijile bena Kolose, kabiji kika kyotwakonsha kufundamo pa kukwasha bakwetu?

6. Kika Paulo kyo akonkomwejilepo mu nkalata yanji ku bena Kolose?

⁶ Mu byambo biji kuntendekelo ya nkalata ya kwa Paulo, mwanembwa byambo byo tubula kutako muchima javula. Pano bino byo byambo byo apanyijilemo bukwasho kufuma kwalepa, mambo Paulo ne Epafalasa bajinga kwalepa na muzhi wa Kolose. Paulo waambile’mba: “Tusanta kwi Lesa, Shanja Nkambo yetu Yesu Kilishitu, moba onse pa kwimulombela anweba [kimye kyonse, NW tubyambo tuji panshi].” Ee, ino yajinga milombelo yakushinkamika ya kulombelako bena Kilishitu mu Kolose. Paulo wanungilepo’mba: ‘Na onkao mambo ne atweba netuwa, kufuma ku aja juba jo twikyumvwine, kechi tuzhikilwa kwimulombela ne. Twimusakila, namba, muyule maana a kuyukisha kyaswa muchima wanji mu maana onse ne milangwe ya bumupashi.’—Kolose 1:3, 9.

7, 8. Mu milombelo yetu ya pa bunke ne ya mu kipwilo mwambiwa ñanyi bintu javula?

⁷ Twayuka kuba’mba Yehoba ‘Umvwa milombelo,’ onkao mambo twafwainwa kuketekela kuba’mba kimye kyonse kyo twakonsha kulomba monka mwayila kyaswa muchima wanji, aye witumvwa. (Masalamo 65:2; 86:6; Byambo bya Mana 15:8, 29; 1 Yoano 5:14) Nanchi ndombelo yetu ikala byepi kimye kyo tulombelako bakwetu?

⁸ Javula tulombelakotu ‘balongo betu bonse baji panopantanda.’ (1 Petelo 5:9) Nangwa kulomba Yehoba kuba’mba akwashe bena Kilishitu baji mu mpunzha mwapona bya malwa. Kimye bana ba bwanga ba mu kitota-myaka kitanshi bajinga mu mapunzha akwabo kyo baumvwine kipowe kya nzala kyaponene mu Yudea, apo kampe balombejilengako balongo babo milombelo yavula saka bakyangye ne kwibatumina bya bupe. (Byubilo 11:27-30) Mu ano moba etu a lelo, milombelo ya kulombelako balongo betu bonse, nangwa ya kulombelako bonse bapwila pamo ilombewa pa kupwila kwa bwina Kilishitu, bavula po bakonsha kwiumvwina byo ibena kulombewa ne kwamba’mba “Amena.”— 1 Kolinda 14:16

Shinkamikainga Milombelo Yenu

9, 10. Bya kumwenako ka bimwesha kuba’mba kulombelako bantu bamo kukebewa? (b) Paulo bamulombejilengako byepi mu kushinkamika?

⁹ Baibolo iji na byakumwenako bya bantu balombejileko bakwabo kasa babena kwibatongola pa mazhina. Akilangulukai pa byambo byaambile Yesu byanembwa pa Luka 22:31 ne 32. Wajinga na batumwa bakishinka 11. Bano bonse bakebelenga ngovu ya Lesa yakonsheshe kwibakwasha mu bimye byakatazha byajinga kulutwe yabo, ne Yesu wibalombejileko. (Yoano 17:9-14) Bino nangwa kyajinga byonkabyo, Yesu wasalulwilepotu mwana wa bwanga umo aye Petelo ne kumulombelako bunke bwanji. Bya kumwenako bikwabo: Elisha walombele Lesa kuba’mba akwashe kalume wanji. (2 Bamfumu 6:15-17) Mutumwa Yoano walombele kuba’mba Ngayusa ashukwe mu bintu byonse ne kutwajijila kwikala wakosa ku mupashi. (3 Yoano 1, 2) Kabiji milombelo ikwabo yakonkomwejilenga pa kulombelako mabumba amo a bantu. —Yoba 42:7, 8; Luka 6:28; Byubilo 7:60; 1 Timoti 2:1, 2.

¹⁰ Makalata anembele Paulo akonkomwena bingi pa milombelo ya kushinkamika. Waambile’mba bamulombelengako aye nangwa, aye pamo ne boajinga nabo. Pa Kolose 4:2, 3 patangiwa kuba’mba: “Kasa mukosela mu lulombelo, mulabenga ne kukenkenta monka na kusanta; ne kwitulombela ne atweba pamo, namba Lesa aketushinkwile kibelo kya mambo, tukambe akya kyafyamika kya Kilishitu, kyo nakashilwa mfungwa amiwa.” Kabiji akilangulukaipo ne pa bino bya kumwenako bikwabo biji mu: Loma 15:30; 1 Tesalonika 5:25; 2 Tesalonika 3:1 ne Bahebelu 13:18.

11. Kimye Epafalasa kyo ajinga mu Loma, walombejilengako bañanyi?

¹¹ Po pamotu ne mulunda nanji Paulo yeajinga nanji mu Loma. “Epafalasa wa kwenu, . . . wimwimuna; aye ukelwa kwimulukuchila mu milombelo yanji.” (Kolose 4:12) Kyambo kya ‘kulukuta’ kyatuntululwa pano kilumbulula “kukosakana,” byonkatu byaubanga bantu bakayanga makayo a kufutuzhuka mu moba akala. Abya Epafalasa walombejilengako na mukoyo bonse baitabila pano pa ntanda nangwa bapopweshi ba kine bajinga mwaya Asia Minor yense nyi? Paulo wamwesheshe kuba’mba Epafalasa walombejilengakotu bena Kolose kwapwa. Epafalasa wayukile bwikalo bwabo. Atweba kechi twibayuka bonse pa mazhina ne, nangwa makatazho obajinga nao kechi twiayuka ne. Bino, akifwanyikizhai makatazho amo obafwainwe kwikala nao. Apo kampe Linusa wibikilengako kuchinuzhuka butemwamaana bwasampukilemo, kabiji ne Lufusa naye wakebelenga ngovu ya kukana kubwela jibiji ku bisho bya mu bupopweshi bwa bena Yuda moajinga kala. Na mambo a kwikala na mulume wabula kwitabila, Pelesisi naye wakebelenga maana ne kuchinchika pa kuba’mba akomeshe baana banji mwi Nkambo. Kabiji ne Asinikilitusa wajinga mu misongo ya kafwe-kafwe, wakebelenga kutekeneshiwa. Ee, Epafalasa wibayukile bajinga mu kipwilo kyoajingamo, kabiji wibalombejilengako na mukoyo mambo a kuba aye ne Paulo bakebelenga bano bakwabo baitabila kwenda mwafwainwa Yehoba.

12. Twakonsha kwikala byepi bashinkamana mu milombelo yetu ya pa bunke?

¹² Abya mwimwena motwakonsha kukwashisha bakwetu nyi? Byonka byo kimweka, milombelo ya mvula-bantu ilombewa pa kupwila kwa bwina Kilishitu kechi ikala ya kushinkamika pa kintu kimo ne, mambo a kupusana-pusana kwa baji mu luonde. Bino milombelo yetu ya pa bunke nangwa ya mu kisemi yakonsha kushinkamana pa kimo. Kimye kimo twakonsha kulomba Lesa kuba’mba atangijile ne kukwasha bapaina benda nangwa bakafunga ba bwina Kilishitu, nanchi kuba twashinkamika milombelo yetu pa umo nenyi? Kya kumwenako, mu milombelo yenu abya kuba mwalombelako paina wingijila kijiiji ubena kufwakashisha kipwilo kyenu saka mumutongola pa jizhina, nangwa utangijila Lufunjisho lwa Buku pa Kipwilo nenyi? Pa Filipai 2:25-28 ne 1 Timoti 5:23 pamwesha kuba’mba Paulo watongwele kijikila kyo ajinga nakyo pa mambo a misongo ya kwa Timoti ne Epafolodita. Nanchi ne atweba kuba twamwesha butemwe bwa yenka uno mutundu bwakutongola balwazhi botwayuka pa mazhina nenyi?

13. Ñanyi makatazho amo otwafwainwa kwambapo mu milombelo yetu ya pa bunke?

¹³ Nangwa kikale byonkabyo, twafwainwa kuchinuzhuka kwikala bakalokwete mu byambo bya bene bya ku mbaji. Milombelo yetu yafwainwa kumwesha butemwe bwa kine mu botwayuka botubena kulombelako. (1 Timoti 5:13; 1 Petelo 4:15) Kimye kimo mulongo nkito yakonsha kupwa, kabiji kuba twamukebela ingi ne. Onkao mambo twafwainwa kumutongola pa jizhina ne kwambapo pa buyanji bwanji mu milombelo yetu ya pa bunke. (Masalamo 37:25; Byambo bya Mana 10:3) Nanchi twayukapo nyenga umo wakoma wafwainwa kusongolwa wabula mulume ne baana na mambo a kuba ukeba kusongolwa “kana monka mwi Nkambo” nyi? (1 Kolinda 7:39) Mambo ka o mwabula kumulombelako kwi Yehoba mu milombelo yenu ya pa bunke kuba’mba amupeshe ne kumukwasha kutwajijila kwikala wa kishinka mu mwingilo wanji? Kya kumwenako kikwabo, bakulumpe mu kipwilo babiji apo kampe bajimunapo mulongo umo wauba kilubo. Nga mambo ka abo umo umo ne kumutongolapo pa jizhina mu milombelo yabo ya pa bunke pa kimye ne pa kimye?

14. Milombelo yakushinkamika yalamata byepi ku kukwasha bakwetu?

¹⁴ Kuji makatazho avula o mwakonsha kwambapo mu milombelo yenu ya pa bunke mu kulombelako bantu bo mwayuka babena kukeba bukwasho bwa Yehoba, lutekenesho, maana nangwa bipangwa biji byonse bya mupashi wazhila. Na mambo a bula bwa misinso nangwatu bintu bikwabo, mwakonsha kwiumvwa kupelelwa mu bintu bya ku mubiji byo mwakonsha kupana nangwa byo mwakonsha kukwashañana. Bino kechi mwakonsha kuvulama kulombelako balongo ne banyenga yenu ne. Mwayuka byo bakeba pa kuba’mba bende mwafwainwa Yehoba, onkao mambo bakeba bukwasho bwakonsha kwibakwasha kutwajijila kuba byonkabyo kikupu. Milombelo yenu bo bukwasho bukatampe bomwakonsha kwibakwasha. —Masalamo 18:2; 20:1, 2; 34:15; 46:1; 121:1-3.

Koseshai Bakwenu

15. Mambo ka otwafwainwa kukebesha kuyuka lubaji lwapelako lwa buku wa Kolose?

¹⁵ Kya kine, kutenkamena mu milombelo ne kushinkamenamo kechi jo jonka jishinda jakukwashishamo bakwenu, bo mwatemwa bo mwikala nabo kipi-kipi ne. Buku wa Kolose walumbulula bulongo kino. Bakaimbi bamo mu bya lufunjisho bamba’mba Paulo byo apwishishe kunemba mikambizho ya lufunjisho ne lujimuno mu nkalata yanji, wabikilemotu mitende yanji mwine. (Kolose 4:7-18) Bino, twatana kala kuba’mba lubaji lwapelako mu uno buku luji na lujimuno lwawama, kabiji luji na bya kufunda byavula.

16, 17. Twakonsha kwambapo’mba ka pa balongo batongolwa pa Kolose 4:10 ne 11.

¹⁶ Paulo wanembele’mba: “Alisatakusa mukwetu kaili, wimwimuna, ne Mako, muvyala wanji Banabasa, (yenkaye ye mwatambwijile milaye; umvwe waiya ko muji, mutambulai,) ne Yesu ye batela’mba, Yusutusa bemwimuna. Bano bo bonka bakwetu ba mukanda bengila ne amiwa na mambo a bufumu bwa Lesa, bo banabalume bankosesha muchima.”—Kolose 4:10, 11.

¹⁷ Pa kino kinembelo Paulo watongolapo balongo bamo basalululwa botwafwainwa kutako muchima. Waambile kuba’mba nabo bajinga bantu bapita mu kisela kya mukanda wa Bayudea. Mu Loma mwajinga Bayudea ba mukanda bavula, kabiji bamo baalukile ke bena Kilishitu. Nangwa kyajinga byonkabyo, abo Paulo boatongwele bo baishile na kumukwasha. Byonkabyo kechi bakankazhamine kupwañana na bena Kilishitu bajinga kala Bagentila ne, kabiji basangalele kusapwila pamo ne Paulo ku Bagentila.—Loma 11:13; Ngalatiya 1:16; 2:11-14.

18. Paulo watakaikile byepi bamo boajinga nabo?

¹⁸ Umvwai byaambile Paulo: bano “bo banabalume bankosesha muchima.” Waambile kyambo kya Kingiliki kimotu kiji mu Baibolo. Batuntulula ma Baibolo bavula banemba kino kyambo’mba “kutekenesha.” Nangwa kikale byonkabyo, paji kyambo kikwabo kya Kingiliki kya kuba’mba (pa·ra·ka·le’o) kinembewa javula’mba “bankosesha muchima.” Paulo wikyambilepo kino kyambo pakwabo mu yonka ino nkalata, bino kechi pa Kolose 4:11 ne. —Mateo 5:4; Byubilo bya Batumwa 4:36; 9:31; 2 Kolinda 1:4; Kolose 2:2; 4:8.

19, 20. Kyambo kyaambile Paulo ku balongo bamukwashishenga mu Loma kyalumbulula ka?

¹⁹ Kibena kumweka nobe bano bantu Paulo boatongwele pa mazhina bamukwashishe bingi, kechi kumutekeneshatu mu byambo ne. Kyambo kya Kingiliki kyatuntululwa’mba “bankosesha muchima” pa Kolose 4:11 kyanembewenga kimye kimo mu mabuku abula a bwina Lesa kutongola muchi utontolola misongo. Baibolo ya New Life Version itangiwa kuba’mba: “Byo bankwashishepo!” Baibolo ya Today’s English Version ayo yaamba’mba “Bankwashishe bingi.” Ikika kyo bamukwashishe Paulo, bano balongo ba bwina Kilishitu baikalanga pepi ne aye?

²⁰ Nangwa kya kuba’mba Paulo bamufwakashishanga ku bantu, kuji bintu bimo byo abulanga kuba nabiji kupota bintu bya kwikwashishamo, ko kuba’mba bya kuja ne bya kuvwala kimye kya mashika. Pano wafwainwe kuba byepi pa kuba’mba ekale na mabuku a kufundamo ne binembesho? (2 Timoti 4:13) Akikilangulukai, bano balongo bakwashishenga Paulo mu bino byonse byoakajilwe, nabiji kumupotelako bya kupota-pota ne kumutwajilako makalata? Kimye kimo wakebanga kuya na kumona ne kukosesha bipwilo bimo. Bino na mambo a kukaswa kechi wailengako ne. Onkao mambo, bano balongo bamuijilengako Paulo, kutwala byambo byanji ne kumuletela masawakya. Byo kyamukoseshengapo!

21, 22. (a)Mambo ka otwafwainwa kutesha muchima ku byambo biji pa Kolose 4:11? (b) Ñanyi mashinda amo motwakonsha kumweshesha byajinga bantu bajinga ne Paulo?

²¹ Paulo byoanembele pa mambo a ‘kumukosesha muchima’ bitupa maana otwafwainwa kukwashishamo bakwetu. Bafwainwa kwikala bantu benda mwafwainwa Yehoba kwesakana na mafunde anji a byubilo byawama, batanwa ku kupwila kwa bwina Kilishitu, kabiji bengila mwingilo wa busapwishi. Twafwainwa kwibasanchila. Abya ne atweba twakosha kwikala bantu ‘bakosesha michima’ byonka byajinga boba bajinga ne Paulo?

²² Umvwe mwayukapo nyenga wilama bulongo mwayila byambo byanembwa pa 1 Kolinda 7:37 wabula balongo pa bwipi, abya mwakonsha kumuvwangamo mu bimo bya kisemi, nobe kuja nanji kya kuja nangwa kukaila nanji pamo mu bwanabwankazhi na bakwenu nangwa na balongo benu nyi? Nga kumusenda kuba’mba endele pamo na kisemi kyenu pa kuya ku kupwila kwa nkambi nangwa kimye kya kukokoloka? Nangwa kumwita mwaendela pamo kimye kyo mubena kuya na kupota kajo? Twakonsha kuba byonkabyo ne ku bafwilwa nangwa ku bakikulumpe. Mwakonsha kusangalala bingi umvwe kebemushimikiizhe byo bapitamo nangwa umvwe ke bemubuleko bintu byo bayuka byubiwa byonkatu byo kikala pa kusala bipangwa byawama nangwa pa kusajila baana bivwalo. (Bena Levi 19:32; Byambo bya Mana 16:31) Mu kuba bino mwakonsha kufuma bulunda bwa kine kine. Umvwe mwipilwa nabo mu jino jishinda, bakekala bakasuluka kwi anweba kabiji bakonsha ne kwimulomba kuba’mba mwibakwasheko, kampe kwibatambwilako muchi ku mapunzha kobatambwila michi, nangwa bikwabotu. Balongo bajinga ne Paulo mu Loma bamukwashishenga bingi ne kumukosesha, byonkatu byo mwafwainwa kuba ne anweba. Kutendekatu ku kala ne lelo jino, mu kuba bino mufuma mapesho akosesha mfungwa ya butemwe ne kusakisha kwingijila Yehoba pamo mu bukishinka.

23. Atweba bonse pa muntu pa muntu kyakonsha kwituwamina kwikalapo na kimye saka tubena kuba ka?

²³ Atweba bonse pa muntu pa muntu twakonsha kulangulukapo pa bintu byaambiwapo mu uno mutwe. Byambo byaambiwapo byakumwenakotu, pano bino byakonsha kwituvululako bimo byubiwa mu bwikalo byotwakonsha ‘kukosesheshamo michima’ ya balongo ne banyenga yetu. Kishinka kijimo kechi kya kuba’mba tulonde mulanguluko wa bantu bakeba kuwamisha bwikalo bwabo kuba’mba bayukanwe ne. Akyo kechi kyo kyajinga kikonkwanyi kya balongo batongolwa pa Kolose 4:10 ne 11 ne. Bajinga ‘bakwabo bamwingilo wa bufumu bwa Lesa.’ Ko kuba’mba kukosesha kwa muchima wanji kwajingako mambo a kino. Ne atweba kikale byonkabyo.

24. Ñanyi mambo ene otwafwainwa kulombelako bakwetu ne kukeba kwibakosesha?

²⁴ Kyo tutongwela bakwetu pa mazhina mu milombelo yetu ya pa bunke ne kweseka kwibakosesha ke na mambo a kuba, twaketekela kuba’mba balongo ne banyenga yetu bakeba “kwenda mwafwainwa [Yehoba, NW] mwa kumutokeshesha ku muchima to.” (Kolose 1:10) Kino kishinka kyalamata ku kintu kikwabo kyaambilepo Paulo kimye kyo anembele byalombele Epafalasa mu milombelo ya kulombelako bena Kolose ya kuba’mba ‘bekale balumbuluka ne bakosatu mu lwitabilo monse mwaswila muchima wa Lesa.’ (Kolose 4:12) Pano nanchi atweba pa bunke bwetu twakonsha kuba byepi kino? Twayai tumone.

[Tubyambo twa mushi]

Mwajikumvwisha nyi?

• Nanchi twakonsha kukwasha byepi bakwetu mu milombelo yetu ya pa bunke?

• Mu ñanyi jishinda bena Kilishitu bamo ‘mobamukoseshenga muchima’ Paulo?

• Mu bwikalo bwa ñanyi mutundu motwakonsha ‘kukoseshesha michima’?

• Kika kyo twafwainwa kwikala nakyo mu milanguluko pa kulombela ne kukeba kukosesha balongo ne banyenga yetu?

[Kipikichala pa peja 11]

Abya mwakonsha kwitako mwina Kilishitu mukwenu kuya na kufwakasha nanji nyi?

[Credit line]

Pa kukopa kino kipikichala, twalombele lūsa ku bene bena fwamu abo ba Green Chimney