Butemwe Bwenu Bwabaya Byepi?

“Ukatemwa mukwenu pamo byonka byo witemwa obe mwine.”—MATEO 22:39.

1. Inge twamutemwa Yehoba, mambo ka otwafwainwa kutemenwa ne bakwetu?

YESU byo bamwipwizhe kuba’mba mukambizho mukatampe imuka, wakumbwile’mba: “Ukamutemwa [Yehoba, NW] Lesa wobe na muchima wobe yense, ne na mweo wobe yense, ne na mana obe onse.” Kepo, atongwele mukambizho mukwabo waesakana na uno: “Ukatemwa mukwenu pamo byonka byo witemwa obe mwine.” (Mateo 22:37, 39) Ee, butemwe bwa kutemwa bakwetu kyo kiyukilo kya mwina Kilishitu. Kinetu inge twamutemwa Yehoba, twafwainwa kutemwa ne bakwetu. Mambo ka? Mambo tumwesha byotwatemwa Lesa kupichila mu kumvwina Byambo byanji, ne Byambo byanji bitukambizha kutemwa bakwetu. Onkao mambo, inge twashikwa balongo ne banyenga yetu, butemwe bwetu bwa kutemwa Lesa bwikala ke bwatu.—Loma 13:8; 1 Yoano 2:5; 4:20, 21.

2. Butemwe bwa ñanyi mutundu botwafwainwa kutemwa bakwetu?

² Yesu byo aambile’mba tutemwe bakwetu, kechi walumbulwilenga kwikalatu bamulunda na muntu ne. Waambilenga pa butemwe bwapusana na butemwa bwa kisemwa bwikala mu bisemi nangwa pakachi ka mwanamulume ne mwanamukazhi. Waambilenga pa butemwe buji na Yehoba bo atemwa bakalume banji bepana ne byo bamutemwa. (Yoano 17:26; 1 Yoano 4:11, 19) Munembeshi wa Kiyudea umo Yesu ye ayukijile jimo amba ubena kwipuzha saka ayuka, waitabile byambo bya kwa Yesu kuba’mba muntu wafwainwa kutemwa Lesa na ‘muchima wanji yense ne na mana anji onse ne na bulume bwanji bonse.’ (Mako 12:28-34) Walangulukile bulongo. Mwina Kilishitu wafwainwa kutemwa Lesa ne bakwabo na milanguluko yonse ne na mana anji onse. Butemwe bwikala mu muchima wa muntu kabiji butangijilwa na milangwe.

3. (a) Yesu wafunjishe byepi “mufunjishi wa mizhilo” kumuyukisha wafwainwa kwikala mukwabo? (b) Kishimpi kya kwa Yesu kyalamata byepi ku bena Kilishitu lelo jino?

³ Byonka byashimwine Luka, Yesu byo aambile’mba twafwainwa kutemwa bakwetu, “umo mufunjishi wa mizhilo” waipwizhe’mba: “Nanchi mukwetu ye ñanyi?” Yesu wamukumbwijile mu kishimpi. Waambile’mba muntu umo, bamututawile ku batupondo ne kumusha kunsa ya jishinda pepi na kufwa. Mutanshi kusolomokapo wajinga ñanga wa Lesa, wakasansawilatu, kepo ne mwina Levi naye waubile byonkabyo. Bonse babiji bamushiletu byonkabyo. Kepo kwaishile ne mwina Samaliya, byo amwene uno muntu ye bakozhezhe , wamubile lusa. Pa bano bantu basatu, ñanyi wajinga mukwabo ku uno muntu ye bakozhezhe? Mukumbu kechi wakuzhinauka ne. (Luka 10:25-37) Mufunjishi wa mizhilo wakuminye bingi pa kumvwa byaambile Yesu amba mwina Samaliya ye wajinga mukwabo wawama kechi ñanga wa Lesa nangwa mwina Levi ne. Kwa kubula nangwa kuzhinaukatu ne, Yesu wakwashishenga yewa mufunjishi wa mizhilo kwikala na butemwe bwabaya bwa kutemwa bakwabo. Ne bena Kilishitu nabo baji na butemwe bwa yenka uno mutundu. Akilangulukai pa bantu bonse bo batemwa.

Butemwe mu Kisemi

4. Ba ñanyi mwina Kilishitu boakonsha kutemwa patanshi?

⁴ Bena Kilishitu batemwa ba mu bisemi byabo, ko kuba’mba banabakazhi batemwa bamwata wabo, banabalume batemwa bakazhi babo ne bansemi nabo batemwa bana babo. (Musapwishi 9:9; Efisesa 5:33; Titusa 2:4) Kya kine, mfungwa ya butemwe bwa kisemwa iji mu bisemi byavula. Pano bino nangwa kiji byonkabyo, masawakya a kupwa kwa masongola, kwimanyika kwa bamukazhi ne mulume, kulekelela nangwa kukabisha bana, amwesha kuba’mba bisemi lelo jino biji mu lukabisho, kabiji butemwe bwa kisemwa kechi bwawana kya kukonsha kukwatankanya pamo bisemi ne. (2 Timoti 3:1-3) Pa kuba’mba bekale bulongo mu bisemi byabo, bena Kilishitu bafwainwa kwikala na butemwe bujipo na Yehoba ne Yesu. —Efisesa 5:21-27.

5. Bansemi baketekela kutambwila bukwasho kwi ñanyi pa kukomesha bana babo, kabiji bika byafumamo ku bavula?

⁵ Bansemi ba bwina Kilishitu bamona bana babo kuba’mba ke kintu kya munema kyafuma kwi Yehoba, kabiji baketekela kutambwila bukwasho kwi aye pa kwibakomesha. (Masalamo 127:3-5; Byambo bya Mana 22:6) Mu jino jishinda bamwesha butemwe bwa bwina Kilishitu, bwibakwasha kuvimbila bana babo ku byubilo byatama bitanwamo bakyanyike. Na mambo a kino, bansemi bavula ba bwina Kilishitu baji na lusekelo lwajingapo na inetu umo mu Netherlands. Pa nyuma ya kushinkwa pa lubatizhilo lwa mwananji wa mulume wajinga pa bantu 575 babatizwe mu Netherlands mwaka wapwa, wanembele’mba: “Pa kino kimye, kijikila kyo najinga nakyo pa myaka 20 yapita, kyandamuka. Kimye kyami kyonse ne ngovu yami yonse yonaingijile kuvwangakotu ne bulanda ne binyenge byonse byo najinga nabyo, pano byamfuma.” Byo atemwapo kuba’mba mwananji wisajilapo aye mwine kwingijila Yehoba. Kibelengelo kipya kya basapwishi 31,089 baingijile mwingilo mu Netherlands mwaka wapwa kyavwangamo ne bavula bafunjishiwe na bansemi yabo kutemwa Yehoba.

6. Butemwe bwa bwina Kilishitu bwakonsha kukosesha byepi mukwato wa masongola?

⁶ Paulo watongwele butemwe amba ye “mukwato ulumbulula byonse,” kabiji wakonsha kuvimbila buumo bwa mu masongola nangwatu mu bimye bya makatazho. (Kolose 3:14, 18, 19; 1 Petelo 3:1-7) Mwanamulume umo wikala pa kajikuji ka Rurutu kajiko palepa mamailoshi 450 kufuma ku jikuji ja Tahiti byo atendekele kufunda Baibolo na Bakamonyi ba kwa Yehoba, mukazhanji kechi wakebelenga ne. Ko kyakayanga, uno mwanamukazhi washile mwatawanji ne kusenda bana bonse, ne kuya wayile na kwikala ku Tahiti. Bino nangwa kyajinga byonkabyo, mwatawanji kechi wamushikilwe ne, wamutumijilenga mali kimye kyonse ne kwisamba nanji pa foni kukeba kuyuka umvwe paji byakajilwa bana nangwa aye mwine. Mu jo jo jishinda, waingijile na ngovu pakuba’mba afikizhe mwingilo wanji wa bwina Kilishitu. (1 Timoti 5:8) Wakelwanga mu lulombelo kuba’mba kisemi kyanji kikakwatankane jibiji, ne mukupita kwa kimye mukazhanji wabwelele. Byo abwelele, wamulamine na ‘butemwe, na butekanye ne na bukimote.’ (1 Timoti 6:11) Kufika mu 1998, wabatizwe. Kabiji mukupita kwa kimye wasangalele bingi pa kumona mukazhanji waswa kufunda Baibolo. Luno lufunjisho lwajinga pa mafunjisho 1,351 atangijilwe mu nyaunda ya musampi wa Tahiti mwaka wapwa.

7. Kwesakana na byaambile mwanamulume umo mu Germany, ikika kyakoseshe masongola anji?

⁷ Mu Germany mwajinga mwanamulume umo wakainyenga mukazhanji kufunda bukine bwa mu Baibolo, kabiji wapwishishetu ne mu muchima wanji amba Bakamonyi ba kwa Yehoba bakebelenga kongola mukazhanji. Nangwa kyajinga byonkabyo, pa kupitapo kimye, wanembejile Kamonyi mutanshi wisambile na mukazhanji bino byambo’mba: “Nasanta bingi pa kusolomona mukazhami ku Bakamonyi ba kwa Yehoba. Patanshi, naakaminwe bingi mambo naumvwinenga bintu byatama byaambiwenga pa mambo a abo. Pano luno, byo ngya na mukazhami na kupwila, mvuluka namba byo nalangulukanga kechi bya kine ne. Nayuka kuba’mba mbena kumvwa bya bukine, kabiji bukine bwakosesha masongola etu.” Mu Bakamonyi ba kwa Yehoba 162,932 baji mu Germany ne bakwabo 1,773 baji mu makuji atangijilwa na musampi wa Tahiti muji bisemi byavula byakwatankana mu butemwe bwa Lesa.

Butemwe bwa Kutemwa Balongo Betu ba Bwina Kilishitu

8, 9. (a) Ñanyi witufunjisha kutemwa balongo betu, kabiji butemwe bwitutundaika kuba ka? (b) Tongolai kya kumwenako kya butemwe byo bwakonsha kukwasha balongo kwikala na muchima wa kwikwasha?

⁸ Paulo waambile ku bena Kilishitu ba mu Tesalonika kuba’mba: “Anwe bene mwafunjishiwa kwi Lesa kwitemwa bene na bene.” (1 Tesalonika 4:9) Ee, aba ‘bafunjishiwa kwi Yehoba’ betemwa bene na bene. (Isaya 54:13) Butemwe bwabo bumwekela mu byubilo byabo byonka byaambile Paulo’mba: “Mu butemwe mwikale ba kwiingijila anwe bene na bene.” (Ngalatiya 5:13; 1 Yoano 3:18) Kya kumwenako, boba bino umvwe ke bapempule balongo ne banyenga bakolwa, kutundaika bapopomenwa ne kukosesha bakoka. (1 Tesalonika 5:14) Butemwe bwetu bwa kine bwa bwina Kilishitu bo bukomesha paladisa wetu wa ku mupashi.

⁹ Mu kipwilo kya Ancón kiji pa bipwilo 544 mu Ecuador, balongo bamwesheshe butemwe bwabo kupichila mu kukwashañana. Bano balongo bajinga na lukatazho lwa mali. Onkao mambo, basapwishi balangulukile mwakutaina mali kupichila mu kupotesha bya kuja ku bamfunji ba masabi kimye kyo babwelelenga ku mazubo abo pa nyuma ya kwipaya masabi bufuku. Bonse bakwatankene, wakacheche-wakacheche kuvwangakotu ne banyike. Batatulanga kunengezha bya kuja pa 1:00 wa bufuku, pa kuba’mba kifikenga 4:00 wa kumakya kimye bamfunji ba masabi kyo babwelanga, batanatu byapila jimo. Mali obamwenangamo beabananga mulwabo bene kwesakana na kukajilwa kwabo. Kwikwasha mu jino jishinda kwamwesheshe butemwe bwa kine bwa bwina Kilishitu.

10, 11. Twakonsha kumwesha byepi butemwe ku balongo botwabula kuyuka?

¹⁰ Nangwa kiji byonkabyo, butemwe bwetu kechi bujitu ku bena Kilishitu bonka botwayuka ne. Mutumwa Petelo waambile’mba: “Temwai balongo [bonse, NW].” (1 Petelo 2:17) Twatemwa balongo ne banyenga yetu mambo ke bakwetu bapopweshi ba Yehoba Lesa. Mu bimye bya makatazho mo motumweshesha buno butemwe. Kya kumwenako, mu mwaka wa mwingilo wa 2000, mwajinga miyulo mu kyalo kya Mozambique. Kabiji ne nkondo ya mulwabo ibula kupwa mu Angola yalengejile bavula kuyanda. Pa balongo 31,725 mu Mozambique ne 41,222 mu Angola, bavula baponenwa mu ano makatazho. Onkao mambo, Bakamonyi baji kipi-kipi mu South Africa batuma bukwasho bwavula bwa kukwasha balongo babo baponena mu ano makatazho mu byobya byalo. Bamwesheshe butemwe bwabo ku balongo bakajilwa pa kupanapo bipe byabo ‘bimo.’ —2 Kolinda 8:8, 13-15, 24.

¹¹ Kabiji butemwe bumweka umvwe balongo mu byalo byavula bapana bupe bwa kushimikila Mazubo a Bufumu ne Mazubo Akatampe a Kupwilamo mu byalo biyanji. Kya kumwenako ke mwingilo ubena kwingijiwa pa makuji a Solomon. Nangwa kya kuba’mba pajinga malwañano pa makuji a Solomon, mwaka wapwa basapwishi bavujileko na mapesenti 6, ko kuba’mba kibelengelo kipya kya basapwishi kyajinga 1,697. Bakebelenga kushimika Nzubo Ikatampe ya Kupwilamo. Nangwa kya kuba bangikazhi bavula banyemenengapo pa ano makuji mambo a malwañano ajingapo, balongo bepaine kufuma ku Australia kwiya na kukwasha mu mwingilo wa kushimika. Pa kupitapo kimye, bano bepaine babwelele, bino saka basha bafunjisha balongo ba kuyoya mpunzha bya kupwisha kwala kitendekesho. Mashiki a byela aletelwe kufuma ku Australia akupwishisha kino kishimikwa kyawama kya kupopwelamo. Kimye kikapwa kino kishimikwa aku bishimikwa byavula saka byapomonwa, bukekala busapwishi bwawama bingi ku jizhina ja Yehoba ne butemwe bwa balongo.

Byonka Biji Lesa, Twatemwa ba Pano pa Ntanda

12. Tulonda byepi Yehoba mu bwikalo bwetu na bantu botwabula kwitabila nabo?

¹² Abya twatemwatu ba mu kisemi kyetu ne balongo betu nyi? Ine, mambo twi bantu ‘balonda Lesa.’ Yesu waambile’mba: “Lesa byo ebatemwisha ba panopantanda, wapaine Mwananji yenkawa umo amba, bonse bamwitabila kechi bonaike ne, poso amba bekale na bumi bwa myaka.” (Efisesa 5:1; Yoano 3:16) Byonka biji Yehoba Lesa twatemwa bonse, kuvwangakotu ne botwabula kwitabila nabo. (Luka 6:35, 36; Ngalatiya 6:10) Tuba bino kikatakata, mu kwibasapwila mambo awama a Bufumu ne kwibabula kyubilo kya Lesa kikatampe kya butemwe. Kino kyakonsha kuleta lupulukilo ku bonse bateleka.—Mako 13:10; 1 Timoti 4:16.

13, 14. Mankumanya ka a balongo bamwesheshe butemwe ku bantu babula Bakamonyi, nangwa kya kuba’mba bakatazhiwenga?

¹³ Akilangulukai byaubile bapainiya beikajila bana, mu Nepal. Bano bapainiya batuminwe kwingijila mu muzhi uji ku kabeta ka buyeke-muzhika ka kino kyalo. Pa myaka itanu, bamwesha butemwe bwabo mu kusapwila mu uno muzhi ne mizhitu ikwabo yazhokoloka saka batekanya . Pa kuba’mba bapwishe kusapwila mu nyaunda yabo yonse, bakyofwa makinga pa miseke yalepa mu maawala avula. Benda mu ino mpunzha yatwa kyuya kukila pa 40°C. Butemwe bwabo ne ‘kutekanya mu kuba byawama’ mwafumine byawama kimye jibumba ja kufunda buku jatatwilwe pa muzhi umo. (Loma 2:7) Mu ñondo wa Kisaka 2000, bantu 32 baishile na kumvwa jashi ja mvula-bantu jaambile paina wingijila kijiiji wibafwakashijile. Mwaka wapwa kyalo kya Nepal, kyajinga na kibelengelo kipya kya basapwishi 430, ko kuba’mba bavujilako na mapesenti 9. Kya kine Yehoba ubena kupesha kubambakana ne butemwe bwabo mu kyokya kyalo.

¹⁴ Kimye kimo bapainiya beikajila ba mu Colombia baile na kusapwila mu nyaunda ya bamwenye batelwa’mba ba Wayuu. Pa kuba’mba bobe bino, patanshi bakifunjile mulaka wa bano bantu. Bamwenejilemo mu butemwe bwabo bwa kusakisha kwisamba nabo. Kyafuminemo, bantu 27 batainwe ku jashi ja mvula-bantu nangwa kya kuba’mba kwanokelenga mvula mukatampe. Kubambakana kwa butemwe kwamwesheshepo bano bapainiya nako kwanungako ku mapesenti 5 avujilako mu Colombia ne kibelengelo kipya kya basampwishi 107,613. Mu Denmark mwajinga nyenga wasakishenga kusapwila mambo awama ku bakwabo, bino saka alemana. Mu kwikoseshako kwanji, wisambilepo na bantu bamo kupichila mu makalata. Pa kino kimye, wisamba mu makalata na bantu 42 kabiji utangijila mafunjisho a Baibolo 11. Uno nyenga naye wabalwa pamo na basapwishi 14,885 baingijile mwingilo mu Denmark mwaka wapwa.

Temwai Balwanyi Benu

15, 16. (a) Yesu waambile’mba butemwe bwetu bwakonsha kubaya byepi? (b) Balongo baji na mwingilo baingijile byepi na muntu wanembele bya bubela pa Bakamonyi ba kwa Yehoba?

¹⁵ Yesu wabujile mufunjishi wa Mizhilo kuba’mba mwina Samaliya yewajinga mukwabo. Mu Jashi janji pa Mutumba, Yesu wanungilepo ne kwamba’mba: “Mwaumvwine byo kyaambilwe’mba, Ukamutemwa mukwenu, ne mulwanyi wobe ukamushikwa: pakuba amiwa nemwambila namba, Sa mwibatemwa balwanyi benu ne kwibalombela bemupata; namba mwikale bana ba Shenu wa mwiulu.” (Mateo 5:43-45) Nangwa kya kuba umo witukabisha, tweseka ‘kushinda bubi na byawama.’ (Loma 12:19-21) Umvwe kyakebewa, tushilañana nanji kipe kyetu kya buneme akyo kyaikala bukine.

¹⁶ Mu nyunshipepala wa Kremenchuk Herald wa mu Ukraine mwanembelwe kibaba kimo kyaambile’mba Bakamonyi ba kwa Yehoba ke bantu batama. Kino kyambo kyabaile bingi mu Europe, mambo bavula bamba pa Bakamonyi ba kwa Yehoba byonkabyo pa kuba’mba bongole bantu’mba bakanenga mingilo ya Bakamonyi nangwatu kwibalekesha. Nangwa kyaambiwe byonkabyo, wanembele bino byambo bamusolomokele ne kumwambila’mba anembe byambo bikwabo bukiji-bukiji bya kulumbulula’mba byambo byanembwa mu kino kibaba bya bubela. Waswiletu bulongo kuba bino, pano kabiji wanembatu byonka byoanembele mu kibaba moabepele bubela. Onkao mambo, balongo batala pa uno mwingilo bamunangile jikwabo ne kwisamba nanji bulongo. Kepo, nembi wavulukile’mba byambo byoanembele mu kibaba kitanshi byatamine, apa bino wanemba ne byambo bikwabo byakololapo. Kwisamba na uno muntu kwakubula kupita mu mbaji kabiji na butemwe, jo jonka jishinda jafwainwe kupwishishamo luno lukatazho, kabiji mwafumine byawama.

Twakonsha Kubaisha Byepi Butemwe Bwetu?

17. Kika kimwesha kuba’mba javula kechi kyapela kubila bakwetu butemwe ne?

¹⁷ Mwana inge wasemwa, bukiji-bukiji bansemi bamutemwa bingi. Pano ku bakoma kala kechi kyubiwa javula ne. O ene mambo Baibolo mukubwezha-bwezhapo kyo itubujila kwitemwa atwe bene na bene. Kyo kintu kyo twakonsha kwingijilapo. (1 Petelo 1:22; 4:8; 1 Yoano 3:11) Yesu wayukile’mba butemwe bwetu bukesekwa, kyo kyo aambijile’mba twafwainwa kulekelangako balongo betu mambo bimye “makumi atanu na abiji ne jitanu na jibiji.” (Mateo 18:21, 22) Kabiji Paulo naye witusashijila amba “kasa mwitekenya anwe bene na bene.” (Kolose 3:12, 13) Kyo kyo betubujila kuba’mba: “Londai butemwe”! (1 Kolinda 14:1) Twafwainwa kuba byepi bino?

18. Kika kyakonsha kwitukwasha kubaisha butemwe bwetu na bakwetu?

¹⁸ Patanshi, twafwainwa kuvulukanga butemwe botuji nabo ne Yehoba Lesa. Buno butemwe bo bwitutundaika kutemwa bakwetu. Mambo ka? Mambo kuba bino, kumwesha biji Shetu wa mwiulu ne kumuletela lukumo ne lutakaiko. (Yoano 15:8-10; Filipai 1:9-11) Kya bubiji, kitukwasha kweseka kumona bintu moebimwena Yehoba. Kimye kyonse kyo tulenga mambo, tulenga mambo kwi Yehoba; pano bino monka etulekela mambo etu kabiji monka etutemenwa. (Masalamo 86:5; 103:2, 3; 1 Yoano 1:9; 4:18) Umvwe twabaisha mweno ya bintu monka moebimwena Yehoba, tukatemwa bakwetu ne kwibalekelako mambo obetulenga. (Mateo 6:12) Kya busatu, tukobila bakwetu byonka byo tusaka kuba’mba betubile. (Mateo 7:12) Twi bambulwakoloka, kimye kyonse twafwainwa kwilekelangako mambo. Kya kumwenako, inge twaposomona byambo bya kukozha bakwetu ku muchima, twafwainwa kwiketekelanga’mba mukwetu usakuvuluka amba yensetu kimye kyonse ulenga mambo na lujimi. (Yakoba 3:2) Inge tukeba bakwetu kwitumwesha butemwe, twafwainwa kwibatemwa.

19. Twakonsha kukeba byepi bukwasho bwa mupashi wazhila mu kubaisha butemwe bwetu?

¹⁹ Kya buna, twakonsha kulomba bukwasho bwa mupashi wazhila mambo butemwe ke kimo kya bipangwa bya mupashi. (Ngalatiya 5:22, 23) Bulunda, kwitemwa mu kisemi, kwifwalama bamulume ne mukazhi, ke butemwe botuji nabo. Pano bino, pafwainwa kwikala bukwasho bwa mupashi wa Yehoba pa kuba’mba tubaishe butemwe bujipo na Yehoba, butemwe ye mukwato ulumbulula byonse. Twakonsha kukeba bukwasho bwa mupashi wazhila kupichila mu kutanga Baibolo yanembeshiwa. Kya kumwenako, inge twafunda bwikalo bwa Yesu, twakonsha kumona byoaingilanga na bantu ne kufunda byotwafwainwa kumulonda. (Yoano 13:34, 35; 15:12) Kabiji, twakonsha kulomba Yehoba kwitupa mupashi wazhila, kikatakata mu byubilo byashupa kumwesheshamo butemwe. (Luka 11:13) Kyapelako, twafwainwa kumwesha butemwe byo tuji mu kipwilo kya bwina Kilishitu. Kwikala na balongo ne banyenga baji na butemwe kwitukwasha kubaisha butemwe.—Byambo bya Mana 13:20.

20, 21. Bakamonyi ba kwa Yehoba bamwesheshe byepi butemwe bwabaya mu mwaka wa mwingilo wa 2000?

²⁰ Kuzhokoloka ntanda yonse, mwaka wapwa wajinga na kibelengelo kipya kya basapwishi 6,035,564. Bakamonyi ba kwa Yehoba baingijile maawala 1,171,270,425 mu kubulako bantu mambo awama. Butemwe bo bwibalengejile kuchinchika ku kyuya, ku mvula ne ku mashika pa kwingila uno mwingilo. Butemwe bo bwibatundaikile kwisamba na bakwabo mobafunjila sukulu, bakwabo mobengijila mingilo ne kusolomoka bantu bobabula kuyuka mu mikwakwa ne mu mapunzhatu akwabo. Bantu bavula Bakamonyi bobafwakashijile kechi batambwijile mambo awama na maboko abiji ne, kabiji bacheche beakaine. Nangwa kyajinga byonkabyo, bamo beatemenwe. Babweleleko bimye 433,454,049 ne kutangijila mafunjisho a Baibolo 4,766,631.a

²¹ Kino byo kyamwesheshepo butemwe Bakamonyi ba kwa Yehoba byo batemwa Lesa wabo ne bakwabo! Abwa butemwe kechi bukapwa ne. Twaketekela kuba’mba mu mwaka wa mwingilo wa 2001 tukasapwila ku bantu bavula. Mapesho a Yehoba atwajijile kwikala na bapopweshi banji bakishinka kabiji bapayankana byo ‘babena kubila byonse mu butemwe’! (1 Kolinda 16:14).

[Tubyambo twa mushi]

Mwakonsha Kulumbulula Nyi?

• Ñanyi ye tulonda inge twatemwa bakwetu?

• Butemwe bwetu bwakonsha kubaya byepi?

• Mankumanya ka amo abena kumwesha butemwe bwa bwina Kilishitu?

• Twakonsha kubaisha byepi butemwe bwa bwina Kilishitu?

[Chati pa peja 28-31]

SAWAKYA WA MWAKA WA MWINGILO WA 2000 WA BAKAMONYI BA KWA YEHOBA MWAYA NTANDA YONSE

(Monai buku wa Kyamba wa 2001)

[Bipikichala pa peja 25]

Butemwe bwa bwina Kilishitu bwakonsha kukwatankanya kisemi pamo

[Bipikichala pa peja 26]

Butemwe bwitutundaika kubulako bakwetu luketekelo lwetu