Tai Muchima ku Mupashi pa Kuba’mba Mwikale Bomi!

“Kuta muchima ku Mupashi bo bumi.”—LOMA 8:6.

1, 2. Ñanyi lupusano lwatongola Baibolo luji pakachi ka “buntunshi” ne “Mupashi”?

KECHI kyapela kwikala na byubilo byawama kwi Lesa byo tuji na bantu babi batumbijika bya lwiso lwa buntunshi ne. Nangwa kiji byonkabyo, Binembelo bimwesha lupusano luji pakachi ka “buntunshi” ne “mupashi.” Bimwesha malwa afumamo umvwe muntu mwine wilekelela kulamwa na bya buntunshi ne lusekelo lufumamo umvwe muntu ke alondele bisaka mupashi wazhila wa Lesa.

² Kya kumwenako Yesu waambile’mba: “Mupashi ye upana bumi; buntunshi bo bwatupu: byambo byo nemwambila byo bya mupashi, kabiji byo bya bumi.” (Yoano 6:63) Mutumwa Paulo wanembejile bena Kilishitu bajinga mu Ngalatiya amba: “Buntunshi bulwañana ne Mupashi, ne Mupashi naye ulwañana ne buntunshi; mambo bino biikosakena bine na bine.” (Ngalatiya 5:17) Kabiji Paulo waambile’mba: “Awa ubyajila buntunshi bwanji mwine ukanowa bubole konka ku buntunshi; kabiji awa ubyajila Mupashi ukanowa bumi bwa myaka konka ku Mupashi.”—Ngalatiya 6:8.

3. Kika kikebewa pa kuba’mba tufume ku bya kusakasaka kubi?

³ Mupashi wazhila wa Yehoba—ko kuba’mba ngovu yanji yakonsha kwitufumya ku bya “lwiso lwa buntunshi” ne ku bya kulamwa na mubiji wa bundengamambo. (1 Petelo 2:11) Pa kuba’mba tufume ku bya kusakasaka kubi, twafwainwa kwikala na bukwasho bwa mupashi wa Lesa. Paulo kyo kyo anembejile kuba’mba: “Kuta muchima ku buntunshi lo lufu; pakuba kuta muchima ku Mupashi bo bumi ne mutende.” (Loma 8:6) Nanchi kuta muchima ku mupashi kwalumbulula ka?

“Kuta Muchima ku Mupashi”

4. “Kuta muchima ku mupashi” kulumbulula ka?

⁴ Paulo byo anembele pa mambo a “kuta muchima ku mupashi,” waingijishe kyambo kya Kingiliki kilumbulula “ndangulukilo, byubilo, . . . patewa muchima, kusakisha kintu.” Kyambo kikwabo kyapashako kilumbulula’mba “kulanguluka, kukebesha.” Onkao mambo, kuta muchima ku mupashi kilumbulula kulamwa, kutangijilwa ne kutundaikwa na ngovu ya Yehoba. Kilumbulula’mba tubena kukeba ndangulukilo yetu, byubilo byetu ne byo tusaka kuba bitangijilwenga na mupashi wazhila wa Lesa.

5. Twafwainwa kukokela bisaka mupashi wazhila kufika ku ñanyi kipimo?

⁵ Kipimo kyo twafwainwa kufikapo pa kunekenena bisaka mupashi wazhila kyo kyakonkomwenepo ne Paulo byo aambile’mba twafwainwa kwikala ‘bazha ba mupashi.’ (Loma 7:6, NW) Na mambo a lwitabilo lwabo mu kitapisho kya nkuulo ya kwa Yesu, bena Kilishitu bakasululwa ku bundengamambo kabiji ‘bafwa’ ku mingilo yabo yakala ya kwikala bazha ba bundengamambo. (Loma 6:2, 11) Abo bafwa mu jino jishinda ja kifwanyikizho ku mubiji bakiji bomi, kabiji bakasuluka kulondela Kilishitu ne kwikala “bazha ba bololoke.”—Loma 6:18-20.

Kwaluluka Kwawama

6. Kwaluluka ka kuji na “bazha ba bololoke”?

⁶ Kwaluluka kufuma ku “bazha ba bundengamambo” ne kwikala “bazha ba bololoke” ba kwingijila Lesa, ke kintu kyawama bingi. Pa mambo a bamo baalulukile, Paulo wibanembele’mba: ‘Bemovwa, bemuzhijika ne kwi mubingisha monka mu jizhina ja Nkambo Yesu Kilishitu, ne mu Mupashi wa Lesa wetu.’—Loma 6:17, 18; 1 Kolinda 6:11.

7. Mambo ka o kyanemena kuyuka Yehoba byo amona bintu?

⁷ Pa kuba’mba twalulukile mu jino jishinda jawama, patanshi twafwainwa kuyuka Yehoba byo amona bintu. Kala keene, nyimbi wa masalamo Davida wasashijile Lesa’mba: “Mbulai ñendelo yenu, anweba Yehoba; . . . Ntangijilai mu bukine bwenu, ne kumfunjisha.” (Masalamo 25:4, 5) Yehoba waumvwine byalombele Davida kabiji wakonsha ne kumvwa lulombelo lwa byonkabyo lulomba bakalume banji ba ano moba. Pa kuba ñendelo ne bukine bwa Lesa byo byatoka ne kuzhila, kwibilanguluka-langulukapo kwakonsha kwitukwasha kuchiina bya kusakasaka kubi kwa buntunshi.

Mwingilo Wanema wa Byambo bya Lesa

8. Mambo ka o twafwainwa kufunjila Baibolo?

⁸ Byambo bya Lesa biji mu Baibolo byanembeshiwe na mupashi wazhila. Jishinda jimo ja kuswishishamo uno mupashi kwingila motuji ke ja kutanga ne kufunda Baibolo, pa juba pa juba umvwe kyakonsheka. (1 Kolinda 2:10, 11; Efisesa 5:18) Kuyuzha milanguluko ne michima yetu na bukine ne mafunde a Baibolo kwitukwasha kushinda byubilo byakonsha konauna bu mupashi bwetu. Umvwe lweseko lwa kukeba kuba byubilo byatama lwaiya, mupashi wa Lesa uketuvulula mafunde a mu Binembelo akosesha milanguluko yetu yakuba kyaswa muchima wa Lesa. (Masalamo 119:1, 2, 99; Yoano 14:26) Onkao mambo kechi tujimbaikwa kuba byubilo byatama ne.—2 Kolinda 11:3.

9. Kufunda Baibolo kukosesha byepi milanguluko yetu ya kusunga bulunda bwetu kwi Yehoba?

⁹ Byotutwajijila kufunda Binembelo na bukwasho bwa mabuku alumbulula Baibolo, mupashi wa Lesa utangijila milanguluko ne michima yetu kabiji ubaisha mushingi ye tuji naye ku mafunde a Yehoba. Bulunda bwetu na Lesa ke kintu kikatampe mu bwikalo bwetu. Umvwe twaesekwa kuba byubilo byatama, kechi tulanguluka jibiji muyowelenge watama uji mu byubilo byabula kufwainwa ne. Twikala na kijikila kya kusunga bulumbuluke bwetu kwi Yehoba. Kusanchila bulunda bwetu ne aye kwitukosesha kushinda bya kusakasaka kubi byakonsha kwibonauna.

‘Mizhilo Yenu byo Neitemwapo’

10. Mambo ka kyo twafwainwa kumvwina mizhilo ya Yehoba pa kuba’mba tute muchima ku mupashi?

¹⁰ Umvwe tubena kukeba kuta muchima ku mupashi, kechi twafwainwa kupelelatu monka mu kuyuka Byambo bya Lesa ne. Mfumu Solomone wayukile bingi mizhilo ya Yehoba, bino wakankelwe kwiisunga kimye kya mu bukulumpe bwanji. (1 Bamfumu 4:29, 30; 11:1-6) Umvwe twata muchima ku mupashi, kechi tukayukatu byamba Baibolo ne, bino tukayuka ne ene mambo o twafwainwa kumvwina mizhilo ya Lesa na muchima yense. Kino kibena kulumbula’mba twafwainwa kubalaula-balaula bulongo mizhilo ya Yehoba ne kwiilondela kya kine kine. Uno mulanguluko ye wajingapo na nyimbi wa masalamo byo aimbile’mba: “Kine, buku wenu wa mizhilo byo namutemwisha! I ye ye ndanguluka juba jonse.” (Masalamo 119:97) Umvwe kine twatemwisha kulondela mizhilo ya Lesa, iketutundaikanga kumwesha byubilo bya Lesa. (Efisesa 5:1, 2) Mukifulo kya kukebaulwa ku byubilo byatama, tukamweshanga bipangwa bya mupashi, kabiji tukasakishanga kutokesha Yehoba pa muchima ne kufuma ku “mingilo ya buntunshi” incha.—Ngalatiya 5:16, 19-23; Masalamo 15:1, 2.

11. Mwakonsha kulumbulula byepi mizhilo ya Yehoba ikanya bulalelale byo ituzhikijila?

¹¹ Twakosha kubaisha byepi mushingi ne butemwe bwa kutemwa mizhilo ya Yehoba? Jishinda jimo ke ja kuyuka buneme bwayo. Akilangulukai pa mizhilo ya Lesa ikanya bulalelale ne bukende. (Bahebelu 13:4) Nanchi kusunga ino mizhilo kwitutaisha bintu byawama nyi? Abya Shetu wa butemwe wa mwiulu wakonsha kwitupa mizhilo itukanya kuba bintu byawama nyi? Ine kechi ibyo ne! Akimonai makatazho aji na bantu bavula babula kusunga mizhilo ya Yehoba ya byubilo byawama. Bamo bekala na memi akubula kukeba ebalengela kwiafumya nangwa kwibakanjikizha kutwela mu masongola kwakubula kwikokozha bulongo. Bavula basunga bunke mwana kwakubula mukwabo wa mu masongola. Kabiji aba boba bulalelale beletelela bene mashiki. (1 Kolinda 6:18) Umvwe kalume wa Yehoba wauba bulalelale, wikala na binyenge. Kuba’mba eseke kulubako ku byo auba, muchima munda kechi wikalamo ne, kino kimulengela kubula kulaala tulo ne bulanda bukatampe. (Masalamo 32:3, 4; 51:3) Nanchi ke mwamona’mba mizhilo ya Yehoba ikanya bulalelale yalengwa kuba’mba ituzhikijilenga nenyi? Ee, tumwenamo pakatampe umvwe satusunga mizhilo ya byubilo byawama!

Lombai Yehoba Kwimukwasha

12, 13. Mambo ka o twafwainwa kulombela umvwe ke tulanguluke bya lwiso lwa buntunshi?

¹² Kuta muchima ku mupashi kwitulengela kulomba na muchima yense. Twafwainwa kulomba mupashi wa Lesa kuba’mba etukwashe mambo Yesu waambile’mba: ‘Umvwe anweba . . . mwayuka kupana byawama ku baana benu, nanchi aye Shenu wa mwiulu kechi emukile kupana Mupashi Wazhila ku bamulomba nenyi?’ (Luka 11:13) Twakonsha kumwesha byo twaketekela bukwasho bwa mupashi pa mambo a bukoke bwetu mu lulombelo. (Loma 8:26, 27) Umvwe twayuka’mba tubena kulanguluka bya lwiso lwa buntunshi nangwa mukwetu waitabila witubulako kino, twafwainwa kushinkamika luno lukatazho mu lulombelo kuba’mba Lesa etukwashe kushinda ino milanguluko incha.

¹³ Yehoba wakosha kwitukwasha kuta muchima pa bintu byaoloka, byawamisha, bya buwame ne bya lutotelo. Kabiji byo kyawamapo kumusashijila na mukoyo kuba’mba “mutende wa Lesa” alame michima yetu ne milanguluko yetu! (Filipai 4:6-8) Onkao mambo, twayai tulombe Yehoba kwitukwasha “kulonda bololoke, ne munema wa kunemeka Lesa, ne lwitabilo, ne butemwe, ne butekanye, ne bukimote.” (1 Timoti 6: 11-14) Na bukwasho bwa Shetu wa mwiulu, bijikila ne meseko kechi bikabaya kyakuba twakankalwa kwibishinda ne. Mukifulo kya byo byo, tukekala na mutende upana Lesa mu bwikalo bwetu.

Kange Mumufichishe ku Muchima Mupashi Ne

14. Mambo ka mupashi wa Lesa kyo etulengela kwikala batoka?

¹⁴ Bakalume ba Yehoba bafikapo balondela lujimuno lwa kwa Paulo lwa kuba’mba: “Kechi muzhime Mupashi ne.” (1 Tesalonika 5:19) Mupashi wa Lesa byo aji “mupashi wa buzhile,” watokatu too kabiji wazhila. (Loma 1:4) Uno mupashi byo engila mwi atweba, witulengela kwikala bazhila babula kaneneno. Witukwasha kwikala na byubilo byawama bya kukokela Lesa mu bwikalo bwetu. (1 Petelo 1:2) Kuba byubilo byatama, kumwesha kulengulula uno mupashi kabiji kino kyakonsha kwituletela bya malwa. Mambo ka?

15, 16. (a) Twakonsha kumufichisha byepi ku muchima mupashi wa Lesa? (b) Twakonsha kuchiina byepi kumufichisha ku muchima mupashi wa Yehoba?

¹⁵ Paulo wanembele’mba: “Kechi mumufichishe ku muchima aye mupashi Wazhila wa Lesa ne; mwi aye mo mwabikilwe kayukilo ka kufika ne ku juba ja bukuzhi.” (Efisesa 4: 30) Binembelo byamba amba mupashi wa Yehoba ko katetesho nangwa’mba ‘kayukilo ka kyaishilenga’ ku bena Kilishitu bashingwa. Kino kyajinga bumi bwa bumbulwakufwa mwiulu. (2 Kolinda 1:22, NW; 1 Kolinda 15:50-57; Lumwekesho 2: 10) Mupashi wa Lesa wakonsha kutangijila bashingwa ne balunda nabo baji na luketekelo lwa kwikala pano pa ntanda kwikala bakishinka ne kwibakwasha kushinda mingilo ya buntunshi.

¹⁶ Mutumwa wasopeshe’mba twafwainwa kuchinuzhuka bubela, bwivi, byubilo bya bunya ne bikwabotu. Umvwe twalekelela bino bintu kwitongola, ko kuba’mba tubena kulengulula lujimuno lwa mupashi wa Byambo bya Lesa. (Efisesa 4:17-29; 5: 1-5) Ko kumufichisha ku muchima mupashi wa Lesa, kabiji bintu bya uno mutundu twafwainwa kwibichiina. Onkao mambo, umvwe ketulengulule lujimuno lwa Byambo bya Lesa, twakonsha kutendeka kuba byubilo bya kulengelamotu mambo kya nshiji ne kutaya bibusa bya Lesa. (Bahebelu 6: 4-6) Nangwa kya kuba kechi tubena kuba bubi pa kino kimye ne, kuba bino kumwesha’mba tubena kunankama ku bubi. Umvwe twatwajijila na kulengulula lutangijilo lwa mupashi, ko kuba’mba tubena kumufichisha ku muchima. Kabiji kilumbulula’mba tubena kukana ne kusula Yehoba, nsulo ya mupashi wazhila. Byo tuji bantu batemwa Lesa, kechi tubena kukeba kuba byo byo ne. Twayai tulombe Yehoba kwitutangijila kuba’mba tubulenga kumufichisha ku muchima mupashi wanji, twikale ba kukinjika jizhina janji jazhila kupichila mu kutwajijila na kuta muchima ku mupashi.

Twajijilai Kuta Muchima ku Mupashi

17. Ñanyi bikonkwanyi bimo bya ku mupashi byo twafwainwa kwibikila, kabiji mambo ka o kyaikela kya maana kwibingila?

¹⁷ Jishinda jimo jawamisha ja kutwajijilamo kuta muchima ku mupashi ke ja kwibikila bikonkwanyi bya ku mupashi ne kwibingila. Kwesakana na kukajilwa kwetu ne bwikalo bwetu, bikonkwanyi byetu byafwainwa kuvwangamo kwingila na ngovu mu mwingilo wa busapwishi nangwa kukanamina mashuko amo a mwingilo nabiji bupainiya bwa kimye kyonse, mwingilo wa pa Betele nangwa bumishonale. Kino kikalengela milanguluko yetu kupayankana na bintu bya ku mupashi ne kwitukwasha kushinda bukoke bwa mubiji nangwa kukumpulwa na bintu bya ku mubiji byaseeka mu buno bwikalo. Jino jo jishinda ja maana mambo ne Yesu waambile’mba: “Kechi mwibikila anwe bene nsabo pano panshi ne, paji bilongolo ne ndalabwa byonauna, paji ne bangivi basaba mazubo ne kwiba: Kabiji ibikilai nsabo mwiulu, mwabula bilongolo ne ndalabwa byonauna, ne bangivi kechi basaba mazubo ne kwiba ne: mambo paji nsabo yonse, ne muchima wobe naye uji ponka.”—Mateo 6:19-21.

18. Mambo ka o kyanemena kuta muchima ku mupashi mu ano moba apelako?

¹⁸ Kuta muchima ku mupashi ne kukana bya lwiso lwa pano pa ntanda ke mulanguluko wa maana mu ano ‘moba apelako.’ (2 Timoti 3:1-5) “Pano pa ntanda pakapita ne lwiso lwapo: pakuba aye uba kyaswa muchima wa Lesa ukekala myaka ne myaka.” (1 Yoano 2: 15-17) Kya kumwenako, umvwe mwanyike wa bwina Kilishitu wibikila kikonkwanyi kya kwingila mwingilo wa kimye kyonse, kino kikamulamawizhanga kimye kya bwanyike bwanji nangwa kya bukulumpe. Umvwe muntu wa uno mutundu waesekwa, weseka na ngovu yonse ne kushinda mambo wayuka kikonkwanyi kyo ebikila kuba mu mwingilo wa Yehoba. Muntu wa uno mutundu uyuka’mba kulusa mingilo ya ku mupashi na mambo a kusakasaka bya ku mubiji nangwa muyowelenge wa bundengamambo bo bumbulwamaana ne kukosama. Vulukai’mba Mosesa watele muchima ku mupashi “wasalulwileko kumanama pamo ne bantu ba Lesa, ne kukana wakaine kumona lusekelo lwa bundengamambo lwa myaka imo.” (Bahebelu 11:24, 25) Nangwa twi kale banyike nangwa bakulumpe kyawama kusalapo kuba byonkabyo umvwe tukeba kutwajijila kuta muchima ku mupashi ne kubula kuta muchima ku buntunshi.

19. Twakonsha kwikala na ñanyi mapesho umvwe twatwajijila kuta muchima ku mupashi?

¹⁹ “Kuta muchima ku buntunshi lo lufu; pakuba kuta muchima ku Mupashi bo bumi ne mutende.” (Loma 8:6, 7) Umvwe twatwajijila na kuta muchima ku mupashi, tukekala na mutende. Michima yetu ne milanguluko yetu ikavimbilwa ku byubilo bya bundengamambo. Tukekala bakosa bakonsha kushinda lweseko lwa kukeba kuba byatama. Kabiji Lesa uketukwasha kutwajijila na kushinda nkondo iji pakachi ka buntunshi ne mupashi.

20. Mambo ka o twashiinwa’mba twakonsha kushinda nkondo iji pakachi ka buntunshi ne mupashi?

²⁰ Kupichila mu kutwajijila na kuta muchima ku mupashi, tukekala balunda na Yehoba, aye nsulo ya bumi ne mupashi wazhila. (Masalamo 36:9; 51:11) Satana Diabola ne mabumba anji babena kwingila na ngovu yonse kukeba konauna bulunda bwetu ne Yehoba Lesa. Beseka kutangijila milanguluko yetu saka bayuka kuba’mba umvwe twibomvwina, mu kupita kwa kimye kiketuletela bulwanyi kwi Lesa ne kufwa. Bino nangwa byonkabyo, tushinda ino nkondo iji pakachi ka buntunshi ne mupashi. Byo byajinga ne Paulo mambo pa kunemba pa mambo a nkondo yanji, patanshi wakipwizhe’mba: “I ñanyi ukampokolola ku uno mubiji wa lufu?” Kepo byo amwene’mba wakonsha kupokololwa, wakuwile’mba: “Sante ekale kwi Lesa monka mwi Yesu Kilishitu Nkambo yetu.” (Loma 7:21-25) Ne atweba twafwainwa kusanchila Lesa monka mwi Kilishitu pa kwitupa mwa kubila na bukoke bwa bumuntu ne kutwajijila na kuta muchima ku mupashi satuji na luketekelo lwawamisha lwa bumi bwa myaka ne myaka.—Loma 6: 23.

Mukivuluka Nyi?

• Nanchi kuta muchima ku mupashi kwalumbulula ka?

• Twakonsha kuswisha byepi mupashi wa Yehoba kwingila mo tuji?

• Lumbululai ene mambo o kyanemena kufunda Baibolo, kulondela mizhilo ya Yehoba ne kulomba kwi aye byo tubena kulwa na bundengamambo.

• Kwibikila bikonkwanyi bya ku mupashi kwakonsha kwitukwasha byepi kwikala mu jishinda ja bumi?

[Kipikichala pa peja 14]

Kufunda Baibolo kwitukwasha kushinda lweseko lwa bumupashi bwetu

[Kipikichala pa peja 15]

Kyawama kulomba kwi Yehoba kwitukwasha kushinda bya kusakasaka kubi

[Bipikichala pa peja 16]

Bikonkwanyi bya ku mupashi byakonsha kwitukwasha kutwajijila na kuta muchima ku mupashi