Lūsa Lwenu lwa Kwitabila kyo Mukeba
Munemeka bingi lūsa lo muji nalo lwa kwitabila kyonse kyo mwakeba. Kechi anweba yenkatu ne, bantu bonse banemeka bingi lūsa lo baji nalo lwa kwitabila kyonse kyo bakeba. Na mambo a luno lūsa, bantu bavula pano pa ntanda baitabila mu bintu byavula bingi. Byonkatu byapusana-pusana bilengwa mu misombelo, mbailo, mwekelo, ntobelo, nunkilo ne ñumvwanyikilo, byo biji ne bintu byavula byaitabila bantu, bibaletela lusekelo. Kya kine, kupusana-pusana kwa bintu byaitabila bantu kwakonsha kwibasangajika mu bwikalo bwabo.—Masalamo 104:24.
PANO bino twafwainwa kujimuka, mambo bintu bimo bitabila bantu kechi byapusanatu ne, bino bya bubela. Kya kumwenako, kuntendekelo ya kitota-myaka kya bu 20, bantu bamo baitabijile’mba Bayudea ne kabungwe kabumbela-mbela ka bantu batelwa’mba ba Freemasons, bajinga na mulanguluko wa “kuzhiisha bwina Kilishitu ne kulama ntanda yonse abo bonkatu.” Luno lwitabilo lwafumine mu talakiti mwanembelwe byambo bya boba babujile Bayudea, yajinga na mutwe wa kuba’mba Protocols of the Learned Elders of Zion. Mu ino talakiti mwajinga bubela bwa kuba’mba, bano bantu balangulukilenga kukasonkeshanga mali avula, kulenga bilwilo bya nkondo byavula, ne kunyanchijila bakwabo mu bya busulu pa kuba’mba ‘bapwishe bunonshi bwa Bagentila.’ Kabiji ne kwalula lufunjisho pa kuba’mba ‘Bagentila bekaletu ke bibanyama bibula kulanguluka,’ ne kulenga ngyangi ya panshi ikafuma ku muzhi umo mukatampe ne kukakinka ku muzhi mukwabo, amba kikebapelelengako Bayudea bakulumpe ‘kuvizha boba bebapachile.’
Buno bwajingatu bubela bwalengelwe kuba’mba buzhingijishe boba babujile Bayudea. Mark Jones wa mu British Museum waambile’mba, buno bubela patanshi ‘bwakumbene mu Russia’ mobwanembelwe pa kibaba kimo mu pepala wa byambo mu 1903. Kepo pa May 8, 1920, bwamwekele ne mu pepala wa byambo wa The Times mu London. Byo papichile mwaka umo, uno pepala wa byambo walumbulwile amba bino byambo byajinga bya bubela. Walumbulwile bino saka byajimbwa kala mu milangwe ya bantu. Jones waamba’mba ‘bubela bwa uno mutundu bwakatazha bingi pa kubatu’mba buzhimañane.’ Bantu umvwe bebwitabilatu, nabo balengamo ne lwitabilo lwabo lwa bubela, luleta malwa akatampe ne lufu, byonka byotwamona mu jino jishimikila ja mu kitota-myaka kya bu 20.—Byambo bya Mana 6:16-19.
Lwitabilo ne Bukine
Lwitabilo lwa bubela lwakonsha kupangwa nangwa kya kuba kafwapo bubela ne. Kimo kimye mambo a kubula kumvwisha bintu. Bantu banga bafwa mambo a kuba bintu byo baitabila amba bya kine? Kikwabo, twitabila bintu mambo a kukebatu kwibitabila. Pulofesa umo washimwine’mba: “Nangwatu ba sayantisiti nabo batemwa bingi bintu byabo byo basomba abo bene ne kwibinemeka.” Lwitabilo lwabo lwibalengela ne kubula kulangulukapo bulongo pa bintu. Bataya kimye kyabaya mu bwikalo bwabo na kukosesha lwitabilo lwa bubela.—Yelemiya 17:9.
Lwitabilo lwa uno mutundu luji ne mu bupopweshi muji bintu byapusana-pusana. (1 Timoti 4:1; 2 Timoti 4:3, 4) Muntu umo wakonsha kwikala na lwitabilo lwa kine kine mwi Lesa. Mukwabo naye amba bantu kechi bajipo na kishinka kya kine kya kuyukilako lwitabilo lwabo mwi Lesa ne. Umo waitabila’mba muntu uji na mupashi ubula kufwa. Mukwabo naye amba inge muntu wafwa, wafwijijila kechi ushalako ne. Kya kine, lwitabilo lwapusana-pusana nabiji luno kechi lonse lwa kine ne. Nanchi kechi kya maana, patanshi kushiinwa amba byo mwaitabila bya kine, kechi mwibitabilatu mambo a kuba’mba byo mukeba nenyi? (Byambo bya Mana 1:5) Pano mwakonsha kushiinwa byepi? Mutwe walondelapo walumbulula kino.
[Kipikichala pa peja 3]
Kibaba kyamwesheshe “Protocols of the Learned Elders of Zion mu 1921”