Tubena Kukundula Masakwa Akosa
1 Pa myaka yavula, Satana ubena kwingijisha mafunjisho a bubela ne bujimbijimbi kupofwelamo michima ne milanguluko ya bantu bavula. Wakosesha bingi mafunjisho a bubela nabiji a kwitabila mu Balesa basatu, kwitabila’mba mweo kechi ufwa ne, kabiji ne mu mujilo wa helo. Kabiji ubena kulengela bantu kuzhinauka pe Mulenga kabiji ne kuba’mba kechi ye mwine mwina Baibolo ne. Ubena kwingijisha misalululo ne kutumbijika byalo kukangikilamo bantu kubula kuyuka bukine. (2 Ko. 4:4) Pano twakonsha kukundula byepi mafunjisho akosa a bubela?—2 Ko. 10:4, 5.
2 Milanguluko Yavwangiwamo: Bintu javula bantu byo bafunjishiwa kuba’mba byo bya kine, bijimbwa bingi mu michima yabo. Bamo bakyuminatu popolo ku mafunjisho o bafunda kufumatu ku bwanyike bwabo. Pa kukwasha bantu ba uno mutundu, twafwainwa kwambanga nabo mu jishinda ja mushingi pa byo baitabilamo.—1 Pe. 3:15.
3 Twakonsha kunemeka bantu ba uno mutundu kupichila mu kwibaswisha kwiambila bene pa byo baitabilamo ne ene mambo o bebitabila. (Yako. 1:19) Kampe bakakachilatu ku lufunjisho lwa kuba’mba mweo kechi ufwa ne, mambo a kuba bafwisha balongo babo kabiji babena kutonga bingi kwibamona jibiji. Nangwa kampe basekelela moba a kukokoloka na mambo a kuba’mba bino bimye bibalengela kusangalela pamo na kisemi kyabo. Kutelekesha ku byo babena kwamba, kuketulengela kuyuka biji mu michima yabo kabiji ne kwitukwasha kwisamba nabo mu jishinda jawama.—Mana. 16:23.
4 Londainga Yesu: Yesu witupa kya kumwenako kyawama pa byo akumbwile muntu wayukile bingi Mizhilo. Yesu kechi wamubujile bya kuba ne, umvwe wa mubujile bya kuba, kampe awa muntu inge wakaine kumvwa na mambo a bintu byo aitabijilemo. Onkao mambo, Yesu waingijishe Binembelo ne kumwipuzha kwambapo mo ebyumvwijile kabiji kupichila mu kwingijisha kya kumwenako, wamukwashishe kuba’mba aye mwine ayuke bya kuba.—Luka 10:25-37.
5 Mambo a Lesa akonsha kukwasha bantu kusankilapo mafunjisho a bubela. (Hebe. 4:12.) Kupichila mu kulumbulula bulongo, twakonsha kulengela bukine kufika banteleki betu pa muchima, kabiji twakonsha ne kukwasha bantu kukana mafunjisho a bubela ne kwitaba bukine bwakonsha kwibalengela kukasuluka ne kwikala baana ba bene.—Yoa. 8:32.