“Kalume wa Kishinka” Bamutaine Waingila Bulongo byo Bamupempwile!

“Kimye kyafika’mba, buchibamambo butatwile konka ku nzubo ya Lesa.” —1 Petelo 4:17.

1. Bika Yesu byo ataine kimye kyo apempwile “kalume”?

PA Pentekosta 33 C.E., Yesu watongwele “kalume” wa kupana kajo pa kimye pafwainwa ku “bantu ba ku nzubo yanji.” Mu 1914, Yesu bamwikezhe ke Mfumu, kabiji kechi pabanjile ne kubandatu ne kimye kya kumupempula uno “kalume” kyafikile. Wataine kuba’mba bavula ba mu uno “kalume” bajinga ‘ba kishinka ne ba maana.’ Mu jino jishinda, ‘wamupele bukulumpe bwa bintu byanji byonsetu.’ (Mateo 24:45-47) Bino nangwa kikale byonkabyo, kwajinga ne kalume watama, wabujile kwikala wa kishinka ne wa maana.

“Kalume Watama”

2, 3. Nanchi uno “kalume watama” wafumine kwepi, kabiji waishile kwikalako byepi?

² Yesu waambilepo pe kalume watama panyumatu ya kupwisha kwamba pe ‘kalume wa kishinka ne wa maana.’ Waambile’mba: “Umvwe kalume watama wiambila mu muchima wanji amba, Nkambo yami wabanda; kapume bakalume bakwabo, kaje ne kutoma pamo na bashetwa; nkambo ya yewa kalume ukeya mu juba jo abula kuketekela ne mu kimye kyo abula kuyuka, kamututaule bingi, ne kumutongwela panji pamo ne bakamfutumfutu: po pakekala kujila ne kwisuma ku meno.” (Mateo 24:48-51) Byambo bya kuba’mba, ‘kalume watama,’ bituvululako byambo bya kwa Yesu byo aambile patanshi pa mambo a kalume wa kishinka ne wa maana. Kya kine, “kalume watama” wafumine mu jibumba ja kalume wa kishinka.a Mu ñanyi jishinda?

³ Mwaka wa 1914 saka akyangye kufika ne, bavula ba mu jibumba ja kalume wa kishinka bajinga na luketekelo lwakosa bingi lwa kusambakana na Musongoshi mwiulu mu yenka uno mwaka, pakuba luketekelo lwabo kechi lwafikizhiwe ne. Ne kyafuminemo na mambo a bino ne bintutu bikwabo, bavula babwelele panyuma kabiji bakwabo bacheche kibakolele bingi kuwankuji. Bamo ba mwi abo batendekele ‘kupuma’ bakwabo bakalume na byambo byaluwankana ne ‘kutomena pamo na bashetwa,’ mabumba a bupopweshi bwa Kilishitendomu.—Isaya 28:1-3; 32:6.

4. Yesu wamubile byepi yewa “kalume watama” ne boba bonse bamwesha byubilo bintutu bimo?

⁴ Bano bafumine mu bwina Kilishitu, baishile kuyukanyikwa amba “kalume watama,” kabiji Yesu wibakambwile bingi na ‘kwibatutaula.’ Mu ñanyi jishinda? Wibakaine, kabiji bapusumwine ne jishuko jabo ja luketekelo lwa kuya mwiulu. Pano bino kechi baonawinwe ponkapotu ne. Patanshi bakimanamine mu kimye kya kujila ne kwisuma ku meno mu “mfishi ya pangye,” ya kipwilo kya bwina Kilishitu. (Mateo 8:12) Kutatulatu kyonkakya kimye, bantu bakwabo bacheche ba mu bashingwa nabo bamwesha byubilo bintutu bimo kabiji baiya kwiyukanyikisha’mba “kalume watama.” Kabiji bamo ba mu jibumba ja ‘mikooko ikwabo’ nabo balondela byubilo byabo byabula bukishinka. (Yoano 10:16) Bonse bano balwanyi ba kwa Kilishitu ba byonkabye, nabo bekala mu “mfishi ya pangye” ya ku mupashi.

5. Kalume wa kishinka ne wa maana waubile byepi mu kupusanako na “kalume watama”?

⁵ Nangwa byonkabyo, kalume wa kishinka ne wa maana wapichile mu meseko onka apichilemo “kalume watama.” Bino mu kifulo kya kuba’mba bazhingile ne kulefulwa, abo bakoseshiwe kwikala balumbuluka. (2 Kolinda 13:11) Butemwe bwabo bwa kutemwa Yehoba ne balongo babo bwakosejileko. Ne kyafumamo ke kya kuba’mba babaikale ke “jipanda ne jikinko ja bukine” mu bino bimye byakatazha bya ‘moba apelako.’—1 Timoti 3:15; 2 Timoti 3:1.

Bazhike ba Maana ne Bakosama

6. (a) Yesu wapaine byepi kishimpi kya jibumba ja kalume wanji wa kishinka? (b) Mwaka wa 1914 saka akyangye kufika ne, bena Kilishitu bashingwa basapwijile ñanyi byambo?

⁶ Panyuma ya kwamba pe “kalume watama,” Yesu waelele bishimpi bibiji kumwesha ene mambo bena Kilishitu bashingwa bamo o bakatwajijila kwikala bakishinka ne ba maana, bino bakwabo ne.b Kupana kya kumwenako kya ba maana, waambile’mba: ‘Bufumu bwa mwiulu bukapashañana no bazhike jikumi, basendele malampi abo, balupukile ke baye na kumutundaila Musongoshi. Kabiji batanu bajinga bakosama, bakwabo batanu bajinga ba maana. Mambo bakosama basendele malampi abo, kabiji kechi basendele manyi ne: pakuba ba maana basendele manyi mu misashi yabo pamo ne malampi abo.’ (Mateo 25:1-4) Bano bazhike jikumi, betuvululako bena Kilishitu bashingwa mwaka wa 1914 saka akyangye kufika ne. Bayukile kuba’mba Musongoshi, aye Yesu Kilishitu, waya amwekanyike. Onkao mambo, “balupukile” ke baye na kumutundaila saka basapwila na kuchinchika kuba’mba, ‘myaka ya Bagentila ikapwa’ mu 1914.—Luka 21:24.

7. Kimye ka, kabiji mambo ka bena Kilishitu bashingwa kyo ‘balajijile mu tulo,’ kwesakana na ñambilo ya ku mupashi?

⁷ Baambile kine. Myaka ya Bagentila yapwile mu 1914, kabiji Bufumu bwa Lesa na bukalama bwa Kilishitu Yesu bwaikajikilwe. Bino kino kyaubiwe mwiulu mukubula kumwekanyika. Panopantanda, bantu batendekele kumanama “malwa” atongwejilwe jimo. (Lumwekesho 12:10, 12) Kino kyaishile kwikala kimye kya lweseko. Mukubula kumvwisha bintu bulongo, bena Kilishitu bashingwa balangulukile kuba’mba ‘Musongoshi wabanda.’ Na mambo a kuvulañana ne kupatwa ku ino ntanda, babwelele panyuma kabiji kwashajiletu pacheche kukeba kwikileka kwingila mwingilo wa kusapwila. Byonka byajinga bazhike ba mu kishimpi, mu ñambilo ya ku mupashi, batendekele ‘kukunuka ne kulaala tulo,’ byonka byaubile bena Kilishitu babujile bukishinka panyuma ya kufwa kwa batumwa ba kwa Yesu.—Mateo 25:5; Lumwekesho 11:7, 8; 12:17.

8. Ki ka kyalengejile kwita mbila ya kuba’mba: “Musongoshi uno wiya,” kabiji ku bena Kilishitu bashingwa kino kyajinga kimye kyabo kya kubapo ka?

⁸ Pakuba, mu 1919 kwamwekele kintu kya kukumya. Tutanga amba: “Kabiji pakachi ka bufuku kwaiya mbila’mba, Musongoshi uno wiya, lupukai, mumutundaile. Ponkapo abo bazhike bonse baimene, ke kunengezha malampi abo.” (Mateo 25:6, 7) Kyonka kimye bintu kyo byakijishemo kutama, kyo kimye kyo kwaikele mbila ya kuba’mba bapayankane jibiji. Mu 1918, Yesu, “muluwe wa lulayañano,” waishile mu nzubo ya Yehoba ya ku mupashi na kupempula ne kuwamisha kipwilo kya Lesa. (Malakai 3:1) Pano, pa kino kimye, bena Kilishitu bashingwa bakebewenga kulupuka ne kuya na kumutundaila mu lubanza lwa ino nzubo. Kino kyajinga kimye kya kuba’mba ‘basamishe kyeya.’—Isaya 60:1; Filipai 2:14, 15.

9, 10. Mu 1919, mambo ka bena Kilishitu bamo o baikejile ba ‘maana’ kabiji bakwabo “bakosama”?

⁹ Bino aki pembelelai! Mu kishimpi, bazhike bamo bajinga na lukatazho. Yesu watwajijile amba: ‘Kepo bakosama bebambile ba maana amba, tupaipo tumanyi; mambo malampi etu asaka kuzhima.’ (Mateo 25:8) Kwakubula manyi, malampi kechi akonsha kutema ne. Manyi a mu lampi mu jino jishinda etuvululako ku Byambo bya Lesa bya bukine ne mupashi wanji wazhila, ukosesha bapopweshi bakine kusamisha kyeya. (Masalamo 119:130; Danyela 5:14) Mwaka wa 1919 saka akyangye kufika ne, bena Kilishitu bashingwa ba maana bakebeshe kuyuka kyaswa muchima wa Lesa kwi abo kechi na mambo a kukoka kwabo kwa pa ka kimye kacheche ne. Onkao mambo, byo kyafikile kimye kya mbila ya kusamisha kyeya, abo bajinga benengezha.—2 Timoti 4:2; Bahebelu 10:24, 25.

¹⁰ Nangwa byonkabyo, bashingwa bamo kechi benengezhe kupana milambo ne kwingijisha bulume bwabo bulongo nangwa kyakuba bakebeshenga kwikala na Musongoshi ne. Mu jino jishinda, byo kyafikile kimye kya kupayankana mu kusapwila mambo awama, kechi benengezhe ne. (Mateo 24:14) Baesekele ne kulefula bakwabo baingijilenga na mukoyo, kampe kupichila mu kwibalomba amba bebapepo manyi. Mu kishimpi kya kwa Yesu, bazhike ba maana baubilepo byepi? Baambile’mba: “Kampe kechi akumbane kwi atweba ne anweba pamo ne: yainga ku bapotesha, mukepotele enu.” (Mateo 25:9) Byonkabyo, mu 1919, bena Kilishitu bakishinka bakaine kuba kintu kiji kyonse kyafwanyijilwe kwibapwishisha bulume bwabo bwa kusamishishamo kyeya. Onkao mambo, baubile bingi bulongo.

11. Kika kyamwekejile bazhike bakosama?

¹¹ Yesu wapezhako amba: ‘[Bazhike bakosama] byo bakikapotelenga, Musongoshi wafikile; abo ba kumutengela batwelele nanji na kuja kijiilo kya masongola: bashinkile ne kibelo. Pa nyuma aba bakwabo bazhike nabo baishile, amba, Nkambo, Nkambo, betushinkwileko. Kumvwa aye amba, kine nemwambila namba, kechi nemuyuka ne.’ (Mateo 25:10-12) Ee kine, bamo kechi benengezhezhe pa kufika kwa Musongoshi ne. Onkao mambo, kechi baingijile bulongo ne, kabiji bapusumwine jishuko jabo ja kutanwa ku kijiilo kya masongola mwiulu. Kino byo kyataminepo!

Kishimpi kya Matalenta

12. (a) Yesu waingijishe ka pa kupana kya kumwenako kya bukishinka? (b) Nga muntu ‘wayile ku ntanda ingi’ ye ñanyi?

¹² Panyuma ya kupana kishimpi kya ba maana, Yesu wapaine kikwabo kya bukishinka. Waambile’mba: ‘Buji pamo no muntu waimene na kuya ku ntanda ingi, wibechile bakalume banji ne kwibashila bintu byanji. Kabiji umo wamushijile matalenta atanu, mukwabo abiji, mukwabo umotu: monka mwayila maana abo; kepo kaye.’ (Mateo 25:14, 15) Muntu watongolwa mu kino kishimpi ke Yesu mwine, ‘wayile ku ntanda ingi’ kimye kyo ayile mwiulu mu mwaka wa 33 C.E. Bino saka akyangye kuya mwiulu, Yesu wapaine “bintu byanji” ku baana banji ba bwanga bakishinka. Mu ñanyi jishinda?

13. Yesu wanengezhezhe byepi bujimi bukatampe bwa kwingijilamo mwingilo ne kupa “bakalume” banji lūsa lwa kwingila mwingilo?

¹³ Mu kimye kya mwingilo wanji panopantanda, Yesu watendekele kunengezha bujimi bukatampe bwa kwingijilamo mwingilo wa kusapwila mambo awama a Bufumu mu ntanda yonse ya bena Isalela. (Mateo 9:35-38) Saka akyangye “kuya ku ntanda ingi,” wapaine buno bujimi ku baana banji ba bwanga ba kishinka, ne kwamba’mba: ‘Onkao mambo yainga na kwibasambisha ba mu mikoka yonse ya bantu baluke ke baana ba bwanga, ne kwibabatiza mu jizhina ja Tata ne ja Mwana ne ja mupashi wazhila: ne kwibafunjisha balamenga byonse byo nemukambizhe.’ (Mateo 28:18-20) Na bino byambo, Yesu wapele “bakalume” banji lūsa lwa kwingila mwingilo kufikizhatu ne kimye kya kubwelelamo kwanji, uji yense wamupele ‘monka mwayila maana anji.’

14. Mambo ka o kyabujilwe kuketekelwa kuba’mba muntu yense wafwainwa kwingila mwingilo umo yenka ubena kwingilapo bakwabo?

¹⁴ Byambo bya kuba’mba, ‘monka mwayila maana anji,’ bibena kulumbulula kuba’mba bena Kilishitu bonse ba mu myaka kitota kitanshi bwikalo bwabo kechi bwaesakene nangwa kwingila mingilo imo ne. Bamo, nabiji ba Paulo ne Timoti, bajinga na kimye kya kwingila pakatampe mwingilo wa kusapwila ne kufunjisha. Bwikalo bwa bantu bakwabo kampe kechi bwakonsheshe kwibaswisha kwingila mwingilo pakatampe ne. Kya kumwenako, bena Kilishitu bamo bajinga bazha, bakwabo babelabelanga, bakwabo bajinga bakote, kabiji bakwabo nabo basunganga kisemi. Nangwatu mingilo imo ya mu kipwilo kechi yapainwe ku baana ba bwanga bonse ne. Banabakazhi bashingwa ne banabalume bamo bashingwa kechi bafunjishanga mu kipwilo ne. (1 Kolinda 14:34; 1 Timoti 3:1; Yakoba 3:1) Pano nangwa kya kuba bwikalo bwabo bwajinga bwa byepi nangwa byepi, baana ba bwanga bonse bashingwa ba kwa Kilishitu, banabalume ne banabakazhi, bapewe kwingila mwingilo, kwingijisha bulongo mashuko abo ne bimye byabo mu mwingilo wa bwina Kilishitu. Baana ba bwanga ba kwa Kilishitu ba ano moba nabo boba kintutu kimo.

Kimye kya Lupempu Kyatendeka!

15, 16. (a) Kimye ka kyajinga kya buchibamambo? (b) Mashuko ka akwabo a ‘kwingila’ mwingilo apainwe ku bakishinka?

¹⁵ Kishimpi kyatwajijila kuba’mba: “Kabiji pa kupitapo moba avula nkambo wa aba bakalume waishile na kwibabalulwilao.” (Mateo 25:19) Mu 1914, panyuma ya kupitapo myaka yavula kufuma mu 33 C.E., Kilishitu Yesu waikele pa Bufumu. Panyuma ya kupitapo myaka isatu ne kichika, mu 1918, waishile mu nzubo ya Lesa ya ku mupashi ne kufikizha byambo byaambile Petelo amba: “Kimye kyafika’mba, buchibamambo butatwile konka ku nzubo ya Lesa.” (1 Petelo 4:17; Malakai 3:1) Kino kyajinga kimye kya buchibamambo.

¹⁶ Nga bakalume, balongo bashingwa ba kwa Yesu, baubilepo byepi pa “matalenta” a Mfumu? Kutendeka mu 33 C.E. kuya kulutwe, kuvwangakotu ne myaka ya kunangijila ku mwaka wa 1914, bavula baingijilenga bingi na ngovu “kwiengijisha” matalenta a kwa Yesu. (Mateo 25:16) Nangwatu kimye kya nkondo itanshi ya ntanda yonse, bamwesheshe kizaku kikatampe kya kukeba kwingijila Nkambo yabo. Pano kino kyajinga kimye kyafwainwa kupelamo ba bukishinka mashuko akwabo a ‘kwingila mwingilo.’ Moba a kupelako a buno bwikalo afikile. Mambo awama afwanyijilwe kusapwilwa mwaya ntanda yonse. “Kunowa bya panopantanda” kwafwanyijilwe kubiwa. (Lumwekesho 14:6, 7, 14-16) Bantu ba kupezhako mu jibumba japashañanyishiwa ku wichi bafwanyijilwe kukonkanyiwa pamo kabiji “jibumba jikatampe” ja mikooko ikwabo najo jatendekele kukonkanyiwa.—Lumwekesho 7:9; Mateo 13:24-30.

17. Bena Kilishitu bashingwa bakishinka ‘batwelele byepi mu lusekelo lwa nkambo yabo’?

¹⁷ Kimye kya kunowa ke kimye kimo kya lusekelo bingi. (Masalamo 126:6) Kyafwainwa bingi nanchi kuba’mba kimye mu 1919 Yesu kyo apele balongo banji bashingwa bakishinka mwingilo mukwabo, waambile’mba: ‘Waikala wa kishinka pa tuchuchu, nkakupa bukalama bwa pa byavula; twela mu lusekelo lwa nkambo yobe.’ (Mateo 25:21, 23) Bino lusekelo lo aji nalo Nkambo lwa kwikajikwa ke Mfumu wa mu Bufumu bwa Lesa lwakila byo twakonsha kufwanyikizha. (Masalamo 45:1, 2, 6, 7) Jibumba ja kalume wa kishinka jisangalela pamo luno lusekelo kupichila mu kwimenako Mfumu ne kunungulula bintu byanji bya panopantanda. (2 Kolinda 5:20) Lusekelo lwabo lumwekela mu byambo bya bungauzhi biji mu Isaya 61:10 bya kuba’mba: “Amiwa nkasekela mwi Yehoba, ne muchima wami ukasangalela mwi Lesa wami; mambo aye wamvwikile bivwalo bya lupulukilo.”

18. Mambo ka bamo o bebatanyijile kwakubula kwingila bulongo kimye kyo bebapempwile, kabiji ki ka kyafuminemo?

¹⁸ Kya bulandatu ke kya kuba’mba, bamo kechi baingijile bulongo ne. Tutanga amba: “Aye watambwile lutalenta umotu waishile’mba, Nkambo, nemuyukile namba, Abo bashinta, banowa po babujile kukusa, ne kubungizha po babujile kupujila; kabiji naubile moyo, kepo nakafile lutalenta wenu panshi: talai lutalenta wenu’we.” (Mateo 25:24, 25) Popamotu, bena Kilishitu bashingwa bamo kechi baingijilengako ‘mwingilo’ ne. Mwaka wa 1914 saka akyangye kufika, kechi baingijile na bakwabo kukosesha luketekelo lwabo pamo ne, kabiji kechi bakebelenga kutendeka mu 1919 ne. Nga Yesu waubilepo byepi pa misula yabo? Wibangachile mashuko abo onse. Kabiji ‘bebelele mu mfishi ya pangye: muji majilo ne kwisuma ku meno.’—Mateo 25:28, 30.

Lupempu Lwatwajijila

19. Mu ñanyi jishinda lupempu mo lwatwajijila, kabiji bena Kilishitu bonse bashingwa bakebesha kutwajijila na kuba ka?

¹⁹ Bavula baishile kwikala bashingwa ba kwa Yesu mu moba a kupelako, bakijinga saka bakyangye kutendeka kwingijila Yehoba kimye Yesu kyo apempwile mu 1918. Nanchi abo lupempu lwibapichile nyi? Ine. Lupempu lwatatwile mu 1918/19 kimye kalume wa kishinka ne wa maana pamo nobe jibumba kyo atainwe saka aingila bulongo. Bena Kilishitu bashingwa pa muntu pa muntu batwajijila kwibapempula kufikizhatu kimye kya kupwisha kwibabika kayukilo. (Lumwekesho 7:1-3) Byo bekiyukishatu bulongo kino, balongo ba kwa Kilishitu bashingwa bakebesha bingi kutwajijila ‘kwingila’ mu bukishinka. Bakebesha bingi kutwajijila kwikala ba maana, saka basungijila manyi avula kuba’mba kyeya kisamishe. Bayuka’mba umvwe yense wafika ku mpelo ya bumi bwanji na bukishinka, Yesu ukamutambwila mu bwikalo bwa mwiulu.—Mateo 24:13; Yoano 14:2-4; 1 Kolinda 15:50, 51.

20. (a) Mikooko ikwabo lelo jino yakebesha kutwajijila na kuba ka? (b) Kika bena Kilishitu bashingwa kyo balabijila?

²⁰ Jibumba jikatampe ja mikooko ikwabo jalondela mungayo ya balongo babo bashingwa. Bayuka kuba’mba byo bayuka nkebelo ya Lesa, baji na mutembo mukatampe bingi. (Ezikyo 3:17-21) Onkao mambo, na bukwasho bwa Byambo bya Yehoba ne mupashi wanji wazhila, ne abo batwajijila kusungijila manyi abo avula kupichila mu kufunda ne kupwila pamo kwa bwina Kilishitu. Kabiji basamisha kyeya kyabo kupichila mu kwingila mwingilo wa kusapwila ne kufunjisha, mu jino jishinda ‘bengijila’ pamo na balongo babo bashingwa. Bino nangwa kikale byonkabyo, bena Kilishitu bashingwa bayukishatu amba matalenta apanyiwe mu maboko abo. Bafwainwa kutotolola byo batangijila bintu bya Nkambo bya panopantanda. Nangwa kyakuba bakepa, kechi bakonsha kwisulwa nangwatu pacheche kupana mutembo wabo ku jibumba jikatampe ne. Kalume wa kishinka ne wa maana byo alabijila kino, utwajijila kutangijila mwingilo wa Mfumu, ne kusanchila bukwasho bufuma ku ba mu jibumba jikatampe bepana. Bano ba mu jibumba jikatampe bayuka mwingilo wapewa ku balongo babo bashingwa, kabiji bayuka’mba ke jishuko bingi pa kwibatangijila mu mwingilo.

21. Ñanyi lutundaiko lwaingijilenga ku bena Kilishitu bonse mwaka wa 1919 saka akyangye kufika ukingila ne mu moba etu a lelo?

²¹ Onkao mambo, nangwa kyakuba bino bishimpi bibiji bibena kumwesha bintu byamwekele mu 1919 nangwa pepi na uno mwaka, bino mafunde abyo engila ku bena Kilishitu bonse bakine baji mu ano moba a kupelako. Mu jino jishinda, nangwa kyakuba byambo bya kupezhako bya lutundaiko lwa kwa Yesu byo aambile mu kishimpi kya bazhike jikumi byafikizhiwe kimye kitanshi ku bena Kilishitu bashingwa mwaka wa 1919 saka akyangye kufika, bino ne lelo jino bibena kufikizhiwa ku mwina Kilishitu yense. Onkao mambo, twayai atweba bonse tulabijile byambo bya kwa Yesu bya kuba’mba: “Byonkabyo ne anweba labainga mukenkentenga, mambo kechi mwayuka nangwa juba ka nangwa juba pi ne.”—Mateo 25:13.

[Tubyambo twa mushi]

Mwakonsha Kulumbulula Nyi?

• Ñanyi kimye Yesu kyo apempwile baana banji ba bwanga, kabiji wataine ka?

• Mambo ka bena Kilishitu bashingwa bamo o baishijile kwikala na byubilo byajingapo na “kalume watama”?

• Twakonsha kumwesha byepi atweba bene kwikala ba maana ku mupashi?

• Kulonda byaubilenga balongo ba kwa Yesu bashingwa bakishinka, mu ñanyi jishinda mo twakonsha kutwajijila ‘kwingila mwingilo’?

[Kitenguluzha pa peja 29]

YESU WIYA BYEPI?

Mu Mateo byapitala 24 ne 25, Yesu watongolwa “kwiya” mu mashinda apusana pusana. Kechi ‘wiya’ mu bumuntu ne. Pakuba, ‘wiya’ mu jishinda ja kuba’mba uta muchima wanji ku bantu nangwa ku baana banji ba bwanga, javula wiya na kuzhachisha. Onkao mambo, mu 1914 ‘waishile’ kumwekanyika kimye kyo bamwikezhe ke Mfumu. (Mateo 16:28; 17:1; Byubilo 1:11) Mu 1918 ‘waishile’ nobe muluwe wa lulayañano ne kutendeka kuzhachisha boba bebepekezhenga kwingijila Yehoba. (Malakai 3:1-3; 1 Petelo 4:17) Pa Amagedonyi, ‘ukeya’ na kuzhachisha balwanyi ba kwa Yehoba.—Lumwekesho 19:11-16.

Kwiya (nangwa kufika) kwatongolwa javula mu Mateo 24:29-44 ne 25:31-46 ke kwiya kwa mu kimye kya “malwa akatampe.” (Lumwekesho 7:14) Kabiji kwiya kwatongolwa bimye byavula mu Mateo 24:45 kufika ku 25:30 kwatazha ku luzhachisho lwa boba bebepekezha kwikala baana banji ba bwanga kutendeka mu 1918 kufikizha ne lelo jino. Kya kumwenako, kechi kyakonsha kuyilamo kwamba’mba, mfweto ya kalume wa kishinka, luzhachisho lwa bazhike bakosama, ne luzhachisho lwa kalume wazenzalala wafile lutalenta wa Nkambo, kukobiwa kimye Yesu kyo ‘akeya’ pa malwa akatampe ne. Kino kyakonsha kulumbulula amba bashingwa bavula bakatanyiwa babula bukishinka pa kyokya kimye, onkao mambo pakakebewanga bakupingizhapo. Pakuba, Lumwekesho 7:3 walumbulula amba bakalume bashingwa bonse ba kwa Kilishitu bakapwisha “kwibabika kayukilo” ka kupelako pa kimye kya malwa akatampe.

[Kipikichala pa peja 27]

“Kalume wakosama” kechi watambwijile mapesho mu 1919 ne

[Kipikichala pa peja 28]

Bazhike ba maana benengezhezhe kimye kyafikile Musongoshi

[Kipikichala pa peja 30]

Bakalume ba kishinka baingijile ‘mwingilo’

Kalume wazenzalala kechi waingijileko ne

[Bipikichala pa peja 31]

Bashingwa ne ba “jibumba jikatampe” batwajijila kusamisha kyeya kyabo