Mepuzho Kufuma Kubatanga
Ki ka kibena kulengela ‘bya buneme bya ba mu mikoka yonse’ kwiya mu “nzubo” ya mpopwelo ya kine?
Kupichila mwi ngauzhi Hagai, Yehoba waambijile jimo amba: “Nkatenkenya ba mu mikoka yonse, ne bya buneme byabo bakebileta, ne amiwa nkayuzha ino nzubo na lukumo.” (Hagai 2:7) Nanchi kutenkenya “ba mu mikoka yonse” ko kubena kulengela “bya buneme” bya ba mu mikoka nangwa amba bantu bakishinka kwiya mu mpopwelo ya kine nyi? Ine.
Akilangulukai pa kine kintu kitenkenya ba mu mikoka ne kifumamo. Baibolo waamba’mba “ba mu mikoka ya bantu i ki ka kyo babukila bukaji? Ba mu mitundu ya bantu i ki ka kyo balangulukila kyatu?” (Salamo 2:1) “Kyatu” kyo ‘balanguluka’ ke kutwajijila na kulama bufumu bwabo. Bachina kwibafumyapo pa bufumu.
Mwingilo wa kusapwila Bufumu bwa Lesa bwaikajikwa ubena kwingila Bakamonyi ba kwa Yehoba panopantanda ponse walengela ba mu mikoka kuba moyo. Bufumu bwa Lesa bwa Bumesiasa bubena kulamwa na Yesu Kilishitu “bukalalaula buno bufumu [bwa bantu] bonse ne kwibupwishatu shata!” (Danyela 2:44) Byo twingila mwingilo wetu wa kusapwila ne kwamba pa juba ja Lesa ja kushinkanya, kubena kutenkenya ba mu mikoka yonse. (Isaya 61:2) Mwingilo wa kusapwila byo abena kwingijiwa kyabaya bingi, kutenkenya nako po kubakilemo ne kukilamo. Kutenkenya kwaambijilwe jimo pa Hagai 2:7 ke kiyukilo kya byepi?
Pa Hagai 2:6 tutangapo amba: “Yehoba waamba bino amba: Pano kwashala kimye kicheche ne amiwa nkatenkenya jibiji bya mwiulu ne ntanda ne kalunga ka mema ne mushiji wauma.” Mutumwa Paulo byo anembulwilenga byambo bya pa kino kyepelo, wanembele’mba: “Pakuba pano aye walaya’mba, Kwashala jimo jonka jo nkatenkenya byonse, kechi ntanda yonka ine, ne jiulu jine najo pamo. Kabiji kino kyambo kya kwamba’mba, Kwashala jimo jonka, kitubula mambo a kufumya kwa byobya bintu bitenkena, byonkabya byalengelwe, amba abya bintu bibula kutenkena, bikale kikupu.” (Bahebelu 12:26, 27) Ee, ino ntanda yonse ikonaunwa, kepo pakapingizhiwa ntanda ipya ya Lesa.
Bantu bakishinka babena kwiya mu mpopwelo ya kine, pano bino kechi na mambo a ba mu mikoka bo babena kutenkenya ne. Kibena kwibalengela kwiya kwi Yehoba ne kutendeka kumupopwela kyo kibena kutenkenya ne ba mu mikoka yonse, ko kuba’mba mwingilo wa ntanda yonse wa kusapwila Bufumu bwa Lesa bwaikajikwa. Kusapwila “mambo awama a myaka ne myaka” kwalengela bantu bakishinka kutendeka kupopwela Lesa wa kine.—Lumwekesho 14:6, 7.
Mambo awama a Bufumu o mambo a juba ja kushinkanya ne kupokololwa. (Isaya 61:1, 2) Mu kusapwila mambo awama mwaya ntanda yonse mufuma bintu bibiji: kutenkenya ba mu mikoka ne kwiya kwa bya buneme bya ba mu mikoka na kumuletela Yehoba lukumo.