Tai Muchima Pa Buwame Bwa Jibumba Ja Yehoba

“Tukatondwa na byawama bya ku nzubo yenu.”—MASALAMO 65:4.

1, 2. (a) Lunengezho lwa kushimika nzubo ya Lesa lwafwainwe kulengela bantu ba Lesa kuba ka? (b) Davida wapaine ka mu kukwasha mwingilo wa kushimika nzubo ya Lesa?

DAVIDA ke muntu umo waambiwapo bingi mu Binembelo bya Kihebelu. Uno kafunga, nyimbi, ngauzhi, kabiji mfumu waketekejile bingi mwi Yehoba Lesa na muchima wanji yense. Bulunda bwanji na Yehoba bo bwamulengejile kuba’mba atendeke mulanguluko wa kushimika nzubo ya Lesa. Ino nzubo ya Lesa yo yafwanyijilwe kwikala mpunzha pa kupopwela Lesa wa kine mu Isalela. Davida wayukishetu amba nzubo ya Lesa ne mwingilo yensetu wafwainwe kulengela bantu ba Lesa kusekela kabiji ne kubilwa bibusa. Onkao mambo, Davida waimbile amba: “Ye mwine wa lusekelo ye mwasalulula, ne kumufikizha ko muji, Ekalenga mu bipango byenu: Tukatondwa na byawama bya ku nzubo yenu, Nzubo yenu yazhila.”—Masalamo 65:4.

² Davida kechi bamwitabizhe kutangijila mwingilo wa kushimika nzubo ya Yehoba ne. Uno mwingilo wapainwe ku mwananji Solomone. Davida kechi wanyinyichilenga mambo a kuba’mba uno mwingilo ye akebeshe kwingila wapainwe ku muntu mukwabo ne. Aye watelepotu muchima amba nzubo ya Lesa ishimikwe. Watundaikile uno mwingilo na muchima wanji yense kabiji wamupele Solomone kifwanyikizho kyonse kya nzubo kwesakana na bya mubujile Yehoba. Davida wanengezhezhe ne biumbi bya bena Levi mu mabumba kabiji wapaine ngolode ne siliva yavula ya kushimikila nzubo ya Lesa.—1 Byambo bya Moba 17:1, 4, 11, 12; 23:3-6; 28:11, 12; 29:1-5.

3. Ñanyi muchima ye bajipo nanji bakalume ba Lesa ano moba pa mambo a lunengezho lwa mpopwelo ya kine?

³ Bena Isalela bakishinka batundaikilenga luno lunengezho lwa kushimika nzubo ya Lesa. Atweba ba kalume ba Yehoba ano moba netuwa tutundaika lunengezho lubiwa mu jibumba ja Yehoba ja panopantanda. Mu kuba bino tumweshatu patoka muchima wajingapo ne Davida. Atweba kechi twijizhañanya ne. Twamba pa bintu byawama byubiwa mu jibumba ja Lesa. Nanchi mwayukapo bintu bimo byubiwa mu jibumba ja Lesa byakonsha kwitulengela kwikala ba lusekelo nyi? Akitwayai twisambepo pa bimo.

Kusanchila Boba Batangijila

4, 5. (a) Jibumba ja ‘kalume wa kishinka ne wa maana’ jingila ñanyi mwingilo? (b) Bakamonyi bamo beumvwa byepi pa kajo ka ku mupashi ko batambwila?

⁴ Kyanema bingi kumusanchilanga ‘kalume wa kishinka ne wa maana’ watongolwa na Yesu Kilishitu kuba’mba alamenga ba mu nzubo yanji panopantanda. Jibumba ja kalume wa kishinka, ke jibumba ja bena Kilishitu bashingwa na mupashi batangijila mwingilo wa kusapwila mambo awama, kunengezha kupwila, ne kunemba mabuku alumbulula Baibolo mu milaka kukila pa 400. Bantu bavula mwaya ntanda batambwila kano kajo ka ku mupashi “pa kimye pafwainwa.” (Mateo 24:45-47) Uno mwingilo kechi twakonsha nangwa kumunyinyitatu ne.

⁵ Pa myaka yavula, Kamonyi wa kwa Yehoba umo wakikulumpe aye Elfi, utekeneshiwa bingi byo engijisha lujimuno lwa mu Binembelo lunembwa mu mabuku a jibumba ja kalume wa kishinka. Kino kyamulengejile Elfi kunemba amba: “Umvwe ne jibumba ja Yehoba ne, ki ka kyo nakonsha kuba?” Bamulume ne mukazhi abo ba Peter ne Irmgard nabo ke bakalume baingijila Lesa myaka yavula. Ba Irmgard basanta bingi pa mabuku onse anembwa na “jibumba ja Yehoba jata bantu muchima.” Ano mabuku avwangamo ne oa a bampofu ne bashinka matwi.

6, 7. (a) Mingilo ingijiwa na bipwilo mwaya ntanda itangijilwa byepi? (b) Bantu bamo bambapo amba ka pa jibumba ja Yehoba ja panopantanda?

⁶ Jibumba Jitangijila ja Bakamonyi ba kwa Yehoba jalengwa na banabalume bashingwa na mupashi jiji pa maofweshi akatampe a Bakamonyi ba kwa Yehoba ku Brooklyn, New York, jo jimenako ‘kalume wa kishinka.’ Jibumba Jitangijila jitongola bakalume ba Yehoba bapijilwa kuba’mba bengijilenga pa maofweshi a misampi atangijila mwingilo wingila bipwilo byakila pa 98,000 mwaya ntanda. Banabalume bafikizha byaambiwa mu Baibolo batongolwa kwikala bakulumpe ne bankwasho mu bino byonka bipwilo. (1 Timoti 3:1-9, 12, 13) Bakulumpe mu bipwilo batangijila kabiji ne kulama jitanga ja Lesa jo bebatongwelapo bukulumpe. Byo kisangajikapo kwikala mu jitanga ja mikooko jitangijilwa mu butemwe kabiji jakwatankana!—1 Petelo 2:17; 5:2, 3.

⁷ Mu kifulo kya kwijizhañanya, muntu yense usanta bingi pa mwingilo wanema wa ku mupashi wingila bakulumpe mu kipwilo. Akimonai kya kumwenako kya kwa Birgit, mwina Kilishitu wasongolwa uji na myaka kukila pa 30. Byo akijingatu nsongwakazhi, watendekele kwendañana na babi kabiji kwashajiletu tiki kulenga mambo. Pano bino lujimuno lwa mu Binembelo lo bamujimwineko ku bakulumpe mu kipwilo ne balunda nanji ba ku mupashi lwamukwashishe bingi. Nga luno Birgit wiumvwa byepi? Mwine washimikizha’mba: “Nji bingi na lusekelo mambo a kuba’mba ne luno nkiji mu jibumba ja Yehoba jawama.” Andreas, nsongwalume wa myaka 17 waamba’mba: “Kine jino ke jibumba ja Yehoba, kabiji jo jonkatu jibumba jawama panopantanda.” Nanchi kechi twakonsha kutemwa pa buwame bwa jibumba ja Yehoba ja panopantanda nenyi?

Aba Batangijila Bambulwakoloka

8, 9. Balunda nanji Davida bamo baubilenga ka, kabiji Davida waubilepo byepi?

⁸ Aba batongolwa amba batangijilenga mu kipwilo kya bwina Kilishitu bambulwakoloka. Bonsetu boba bilubo, kabiji bebikako bingi mu kukeba kuba byawama. Abya twakonsha kulefulwa umvwe batamisha nyi? Ine. Nangwatu mu Isalela aba bajinga na mingilo yavula ya kwingila balenganga bilubo. Kya kumwenako, Davida byo akijingatu mwanyike, bamwichile amba amwimbilenga Mfumu Saulo nyimbo ya kumwikizha muchima. Palutwe kacheche, Saulo wakebelenga amba amwipaye Davida, bino Davida wanyemene.—1 Samwela 16:14-23; 18:10-12; 19:18; 20:32, 33; 22:1-5.

⁹ Nangwatu bena Isalela bakwabo nabo baubanga bintu byabula kufwainwa. Kya kumwenako, Yoaba mukulumpe wa nzhita ya kwa Davida, waipaile Abina mulongo wa kwa Saulo. Abisalomo wamusatukijile Davida shanji kuba’mba aje bufumu. Kabiji ne Ahitofela, mwanamulume wamubulangako maana Davida naye wamusolwele. (2 Samwela 3:22-30; 15:1-17, 31; 16:15, 21) Bino Davida kechi wijizhañenyengapo ne, kabiji kechi wasankijilepo bupopweshi bwa kine ne. Waubile kintu kyawama bingi. Lumanamo lwamulengejile Davida kuketekela mwi Yehoba ne kutwajijila kwikala na byubilo byawama kimye kyo amunyemene Saulo. Pa kyokya kimye, Davida waimbile’mba: “Bangubileko lusa, anweba Lesa, bangubileko lusa; mambo mweo wami wafyama mwi anweba: Kine, monka mu kimfute kya byapi byenu mo nkafyama, poso bya malwa byapita.”—Masalamo 57:1.

10, 11. Byo akijingatu nsongwakazhi, mwina Kilishitu wa jizhina ja Gertrud wapichile mu ñanyi bintu, kabiji waambilepo’mba ka pa bilubo byaubanga bakwabo ba mu lwitabilo?

¹⁰ Lelo jino kechi twafwainwa kunyinyita amba mu jibumba ja Lesa muji bubi ne. Yehoba, bamalaika, ne bakafunga ba ku mupashi nabo kechi bomvwa bulongo ne, umvwe mu kipwilo kya bwina Kilishitu mwaikala babi. Pano bino, atweba bonse bakalume ba Lesa tuba bilubo.

¹¹ Mupopweshi wa Yehoba umo waingila myaka yavula wa jizhina ja Gertrud byo akijingatu nsongwakazhi bamubepejile amba ke muntu wabujimbijimbi kechi musapwishi wa Bufumu wa kimye kyonse ne. Waubilepo byepi? Abya Gertrud wanyinyichilenga nyi? Ine. Saka akyangye kufwa mu 2003, wajinga na myaka ya kusemwa 91, walangulukile pa bwikalo bwanji bwa kunyuma ne kwamba’mba: “Mu bwikalo bwami bonsetu nangwa kya kuba bakwetu baubanga bilubo, nayuka kuba’mba Yehoba ye utangijila mwingilo wanji kabiji wingijisha atweba bantu bambulwakoloka.” Umvwe kya kuba bakalume ba Lesa bakwabo bamwambila bintu byabula kufwainwa, Gertrud walombanga kwi Yehoba.

12. (a) Ñanyi kya kumwenako kimo kyatama kya bena Kilishitu ba mu kitota kya myaka kitanshi? (b) Twafwainwa kuta muchima pa ka?

¹² Byo kiji kuba’mba nangwatu bena Kilishitu bakishinka nabo bambulwakoloka, umvwe kalume watongolwa walenga kilubo, twafwainwa kubanga “bintu byonse kwa kubula kunyinyita.” (Filipai 2:14) Byo kyakonsha kutamapo umvwe twalonda bya kumwenako bincha bya mu kipwilo kya bena Kilishitu ba mu kitota kya myaka kitanshi! Mwana wa bwanga Yuda waambile’mba, bafunjishi babubela ba mu oa moba basujilenga “ba lūsa, ne kwibanena bya mwenga ba lukumo.” Kabiji aba bantu babi bajinga “ba kunyinyita, ne ba kutamauka.” (Yuda 8, 16) Mwane kine atweba kechi twafwainwa kwikala ba kunyinyita ne ba kutamauka ne. Atweba twafwainwatu kuta muchima pa bintu byawama bitunengezhezha ‘kalume wa kishinka.’ Twayai twambenga pa buwame bwa jibumba ja Yehoba ne kubanga “bintu byonse kwakubula kunyinyita.”

“Ano Mambo Akatazha”

13. Bantu bamo baubilepo byepi pa mafunjisho a kwa Yesu Kilishitu?

¹³ Bantu bamo ba mu kitota kya myaka kitanshi banyinyichilenga boba batangijilanga, kabiji bakwabo nabo banyinyichilenga mafunjisho a kwa Yesu. Byonka byo kyanembwa pa Yoano 6:48-69, Yesu waambile’mba: “Awa uja ku mubiji wami, ne kutoma mashi ami, ye uji na bumi bwa myaka.” Bino byambo byo byafikiletu mu matwi abo tebele, ‘baana banji ba bwanga bavula baambile’mba: Ano mambo akatazha; ñanyi wakonsha kwiatambula?’ Yesu wayukile amba ‘baana banji ba bwanga babena kunyinyita ano mambo.’ Kabiji ‘baana banji ba bwanga bavula babwelele mu nyuma, ne kwenda nanji jibiji ne.’ Bino kechi baana ba bwanga bonsetu banyinyichilenga ne. Akimonai kyamwekele kimye Yesu kyo aipwizhe batumwa 12. Wibepwizhe amba: ‘Ne anweba nenuwa musaka kufumako nyi?’ Mutumwa Petelo wakumbwile amba: “Nkambo, tukaya kwi ñanyi? Byambo bya bumi bwa myaka muji nabyo anweba. Kabiji atweba twaitabila ne kuyuka namba, anweba mwi Wazhila wa kwa Lesa.”

14, 15. (a) Mambo ka bamo kyo bafichishiwa kuwankuji na mafunjisho amo a bwina Kilishitu? (b) Ki ka kyo twakonsha kufunjilako kwi Emanuel?

¹⁴ Ano moba, bantu ba Lesa bamo kibafita bingi kuwankuji na mambo a mafunjisho amo a bwina Kilishitu kabiji bejinyinyita bingi jibumba ja Yehoba ja panopantanda. Mambo ka? Javula kilengela kunyinyita ke na mambo a kubula kumvwisha jishinda Lesa jo obilamo bintu. Mulenga usolola bukine ku bantu banji pachepache. Onkao mambo, monka muya moba po po tumvwisha mwatala Binembelo. Bantu ba Lesa bavula basekela bingi pa luno lupimpu lubiwa. Bino bamo ‘bekizhapo mu koloka’ kabiji basula luno lupimpu lubiwa. (Musapwishi 7:16) Bwitote javula bo bulengela, kabiji bamo batendeka kwikala na ndangulukilo yabula kufwainwa. Kunyinyita kechi kwawama ne, mambo kwakonsha kwitubwezha ku byubilo byatama bya ino ntanda.

¹⁵ Kya kumwenako, Emanuel ke Kamonyi waumvwine bingi kutama ku muchima na mambo a bintu byo atangile mu mabuku anembwa na ‘kalume wa kishinka ne wa maana.’ (Mateo 24:45) Walekele kutanga mabuku etu a bwina Kilishitu kabiji waambijile bakulumpe mu kipwilo mo ayanga amba kechi ubena kukeba kutwajijila kwikala Kamonyi wa kwa Yehoba ne. Pano bino kechi papichile ne kimye ne, Emanuel waishile kutana kuba’mba mafunjisho afunjisha jibumba ja Yehoba ajitu bulongo. Wakamonañene jibiji na Bakamonyi ne kwamba amba watamishe, kabiji bamubwezhezhe waikala ke Kamonyi wa kwa Yehoba. Wabwelele waikala jibiji na lusekelo.

16. Ki ka kyakonsha kwitukwasha kubula kuzhinauka mafunjisho amo a bwina Kilishitu?

¹⁶ Ibyepi pano umvwe twatendeka kunyinyita na mambo a mafunjisho afunjishiwa mu jibumba ja Yehoba? Kechi twafwainwa kuja kabakubaku ne. Mu kuya kwa moba ‘kalume wa kishinka’ wakonsha kunemba bibaba bimo byakonsha kukumbula mepuzho etu. Kyanema bingi kulomba bukwasho bwa bakulumpe mu Kipwilo. (Yuda 22, 23) Lulombelo, lufunjisho lwa pa bunke, ne kupwanañena pamo na bakwetu ba mu lwitabilo bakosa ku mupashi byakonsha kwitukwasha bingi kumvwisha bukine bwa mu Baibolo bo twafunda mu jibumba ja Yehoba.

Ikalai Bakwitundaika

17, 18. Mu kifulo kya kunyinyitanga, ñanyi muchima ye twafwainwa kwikala nanji, kabiji mambo ka?

¹⁷ Atweba bantu bambulwakoloka javula twendatu na kulenga mambo, kabiji bamo nabo batemwa bingi kunyinyita. (Ntendekelo 8:21; Loma 5:12) Pano bino umvwe twaalulatu kunyinyita ke kisela, kyakonsha kupwisha bulunda bwetu na Yehoba Lesa. Onkao mambo, kechi twafwainwa kunyinyitanga ne.

¹⁸ Mu kifulo kya kunyinyita bintu bibena kubiwa mu kipwilo, twafwainwa kwitundaikanga ne kwikala bapayankana, balusekelo, kabiji bakosa, batekanya, bashikimanatu, kabiji bakosa mu lwitabilo. (1 Kolinda 15:58; Titusa 2:1-5) Yehoba ye ubena kutangijila byonse bibena kubiwa mu jibumba janji, kabiji Yesu wayuka bibena kubiwa mu bipwilo byonse, byonkatu byo ayukile byaubiwenga mu myaka kitota kitanshi. (Lumwekesho 1:10, 11) Ikalaitu batekanya mupembelelenga Lesa ne Kilishitu, Mutwe wa kipwilo. Bakafunga bo baji na mutembo wa kolola bintu bikebewa kupimpulwa.—Masalamo 43:5; Kolose 1:18; Titusa 1:5.

19. Kino kimye twafwainwa kuta muchima pa ka kufikatu ne Bufumu byo bukatendeka kulama bantu?

¹⁹ Bukumotu ino ntanda ibi ikonaunwe, kabiji Bufumu bwa Bumesiasa bo bukalamanga bantu. Byo tubena kutengela jino juba, atweba bonsetu twayai twikale bakwitundaika! Kino kiketulengela kuta muchima pa bintu byawama byuba bakwetu ba mu lwitabilo, kukila kuta muchima pa bilubo byo boba. Kuta muchima pa bintu byawama byo boba ko kwitusangajika. Mu kifulo kya kukokatu zubulu na mambo a kutamauka, tutundaikwa kabiji tukosa ku mupashi.

20. Kwikala na muchima wawama kuketulengela kwiyowa ñanyi mapesho?

²⁰ Kabiji kwikala na muchima wawama kwitulengela kuvuluka bintu byavula byo twiyowa mambo a kwikala mu jibumba ja Yehoba ja panopantanda. Jino jo jonkatu jibumba ja Yehoba panopantanda ja kishinka kwi Nkambo walengele bintu byonse. Mwiumvwa byepi byo mwayuka kino kabiji ne byo mupopwela Lesa yenka wa kine, Yehoba? Mwane kine ikalai byonka byajinga Davida waimbile’mba: “Anweba mumvwa milombelo, kwi anweba ko bakeya bantu bonse. Ye mwine wa lusekelo ye mwasalulula, ne kumufikizha ko muji, ekalenga mu bipango byenu. Tukatondwa na byawama bya ku nzubo yenu.”—Masalamo 65:2, 4.

Mubena Kukivuluka Nyi?

• Mambo ka o twafwainwa kusanchilanga bakulumpe mu kipwilo?

• Twafwainwa kubapo byepi umvwe bakulumpe mu kipwilo balenga bilubo?

• Twafwainwa kubapo byepi pa lupimpu lubiwa lwa kumvwisha mwatala Binembelo?

• Pa kuba’mba mwina Kilishitu abulenga kuzhinauka, ki ka kyakonsha kumukwasha?

[Kipikichala pa peja 14]

Davida wapele Solomone kifwanyikizho kya nzubo ya Lesa kabiji watundaikile mpopwelo ya kine na muchima wanji yense

[Kipikichala pa peja 17]

Bakulumpe mu kipwilo bakwashañana bingi ku mupashi