Mepuzho Kufuma Kubatanga

Twayuka byepi kuba’mba byambo byalondolola maana byo aji biji pa Byambo bya Mana 8:22-31 byaamba pe Yesu Kilishitu byo ajinga saka akyangye kwiya panopantanda?

Byambo byalondolola maana byo aji biji mu buku wa Byambo bya Mana bitangiwa amba: “Amiwa najinga na Yehoba byo atatwile kuba byo afukwijile jimo, kasa akyangye kwingila mingilo yanji itanshi kala kene. . . . Mitumba ne tutumbatumba tonse sa bikyangye kumweka, amiwa saka nasololwa kala . . . Kabiji byo aikajikilenga bya mwiulu, amiwa kasa njipo; . . . amiwa saka nji nanji pamo nobe sendwe mwine. Kabiji najinga wanji ye amwenejilemo lusekelo pa juba pa juba, saka nsekela ku meso anji moba onse, . . . ne kusekela mu bantu bekalapo.”

Bino byambo kechi byaamba pa maana a Lesa nangwa maana onkae ne. Mambo ka? Mambo kinembelo kyaamba’mba ano maana ajinga na Yehoba saka akyangye kwingila mingilo yanji itanshi. Yehoba ye Lesa kufuma ku kala ne kala ne kufika ku myaka ya pe kabiji ye wa maana. (Masalamo 90:1, 2) Maana anji kechi aji na ntendekelo ne. Kechi alengelwe ne. Pano bino, maana aambiwapo ao asansula jiwi ne kuba bintu, ko kuba’mba kechi maanatu onkae ne, ke muntu.—Byambo bya Mana 8:1.

Buku wa Byambo bya Mana waamba’mba kala kene maana ajinga pamo na Yehoba, Mulenga, nobe “sendwe mwine.” Ko kumvwa’mba uno ke Yesu. Saka akyangye kwiya panopantanda ne, Yesu waingijilanga pamo ne Yehoba, mambo byo byaamba ne Byambo bya Lesa amba: “Bintu byonse byo byaji bikyangye kulengwa aye kasa ajipo, kabiji mwi aye mo mo byaikela byonse.”—Kolose 1:17; Lumwekesho 3:14.

Kyailamo bingi kumulondolola Mwana Lesa mu bumaana, mambo ye wayukanyikishe nkebelo ya Yehoba ne byatongolwa. Byo aji ukyangye kwikala mu bumuntu, Yesu ye wajinga Mambo a Lesa, nangwa amba Wakumwambilako. (Yoano 1:1) Walondololwa amba ‘bo bulume bwa Lesa ne maana a Lesa.’ (1 Kolinda 1:24, 30) Bino byambo byalondolola Mwana Lesa byo byawamapo! Aye usekela mu bantu kabiji kyo kyalengejile’mba ebelele ne mweo wanji ke bukuzhi bwa kwibakula.—Yoano 3:16.