Bya Kuyuka Mpopwelo Ya Kine
BUPOPWESHI bwavula bwamba’mba bintu byo bufunjisha bifuma kwi Lesa. Onkao mambo, twafwainwa kumvwina byambo bya mutumwa wa kwa Yesu aye Yoano wanembele’mba: ‘Anweba batemwe, kechi mwitabe [byambo, NW] byonse ne, nanchi esekai byambo kana byo bya kwa Lesa; mambo bangauzhi ba bubela bavula bapalañena panopantanda.’ (1 Yoano 4:1) Pano twakonsha kweseka byepi kintu ne kumona kana kyafuma kwi Lesa?
Kintu kyonse kyafuma kwi Lesa kimwesha byubilo byanji, kikatakata kyubilo kyanji kyakilamo, butemwe. Kya kumwenako, bulume bwa kununsha bwema bwitulengela kununsha bwema bwawama bufuma ku bichi, maluba, nangwa shinkwa ye basokatu katataka. Bino byonse bimwesha butemwe bwa Lesa. Bulume bwetu bwa kumona bizhika juba, kumona kipupulwa, nangwa kumona mwana saka aseka bimwesha butemwe bwa Lesa bo etutemwa. Byo byo kiji ne ku bulume bwetu bwa kuteleka ku nyimbo ya kimenge, kwimba kwa kañonyi, nangwa jiwi ja mutemwe wetu. Nangwatu kulengwa kwetu kwa bumbulwakoloka kumwesha butemwe bwa Lesa. O ene mambo javula o tumwena byambo bya kwa Yesu saka bifikizhiwa byaamba’mba: “Lusekelo lo bamona aba bapana lwakila lo bamona aba batambula.” (Byubilo 20:35) Tutemwa bingi kumwesha butemwe mambo twalengwa ‘mu kipasha kya Lesa.’ (Ntendekelo 1:27) Nangwa kya kuba Yehoba uji na byubilo bikwabo byavula, butemwe kyo kyubilo kyanji kikatampe.
Byambo byafuma kwi Lesa byafwainwa kumwesha butemwe bwanji. Bupopweshi bwa panopantanda buji na mabuku avula bingi anembelwe kala. Pano nga ano mabuku aambapo byepi pa mambo a kumwesha butemwe bwa Lesa?
Bukine ke bwa kuba’mba, mabuku avula a kala aji mu bupopweshi aambapotu pacheche pa mambo a Lesa byo etutemwa nangwa byo twakonsha kutemwa Lesa. Kino kyo kilengela bantu bavula kubula kukumbulwa umvwe baipuzha’mba, “Mambo ka o tumwena butemwe bwa Lesa kupichila mu bilengwa, bino lumanamo ne bubi saka bitwajijilatu?” Bino Baibolo ye buku wa bupopweshi wanembelwe kala walondolola bulongo butemwe bwa Lesa. Kabiji witufunjisha ne byo twakonsha kumwesha butemwe.
Buku Waamba pa Butemwe
Mambo a Lesa, Baibolo, aamba pe Yehoba amba ye “Lesa wa butemwe.” (2 Kolinda 13:11) Baibolo waamba pa butemwe byo bwalengejile Yehoba kupana ku bantu batanshi bumi bwa kubula kubela ne kufwa. Pano bino bunsatuki bwa kusatukila Lesa bwaletele lumanamo ku bantu. (Mpitulukilo ya mu mizhilo 32:4, 5; Loma 5:12) Yehoba waingijijilepo ne kubwezha kyaelelwe. Mambo a Lesa aamba’mba: “Lesa byo ebatemwisha ba panopantanda, wapaine Mwananji yenkawa umo amba, bonse bamwitabila kechi bonaike ne, poso amba bekale na bumi bwa myaka.” (Yoano 3:16) Kabiji Binembelo Byazhila byatwajijila na kulondolola butemwe bwa Lesa kupichila mu kwamba pe Lesa byo apana kafulumende walumbuluka kwi Yesu, wa kuleta mutende ku bantu ba lukokelo.—Danyela 7:13, 14; 2 Petelo 3:13.
Pa mambo a mutembo uji na bantu, Baibolo wapezhako kwamba bino byambo amba: ‘Ukamutemwa Nkambo Lesa wobe na muchima wobe yense, ne na mweo wobe yense, ne na maana obe onse. Awo ye mukatampe, ye mukambizho mutanshi. Wa bubiji waesakana nanji ye ye uno amba, Ukatemwa mukwenu pamo byonka byo witemwa obe mwine. Pa yo yino mikambizho ibiji po pa kishina kya mu buku yense wa Mizhilo.’ (Mateo 22:37-40) Baibolo wanembeshiwa kwi Lesa. Byo aamba pa byubilo byanji, twakonsha kusumininwa’mba wafuma kwi “Lesa wa butemwe.”—2 Timoti 3:16.
Umvwe ke twingijishe uno muzhilo umo, twakonsha kuyuka mabuku anembelwe kala afuma kwi Lesa. Kabiji butemwe buyukanyikisha bapopweshi bakine, mambo bamwesha butemwe bwa Lesa.
Bya Kuyuka Bantu Batemwa Lesa
Aba batemwa Lesa kya kine bayukanyikwa, kikatakata kino kimye kyo tubena kwikalamo kyatelwa mu Baibolo amba ‘moba apelako.’ Bantu babena kuyilakotu palutwe na “kwitemwa abo bene, ba kutemwa mali, . . . ba kutemwa bya lusangajiko, ne kutemwa Lesa ne.”—2 Timoti 3:1-4.
Mwakonsha kuyuka byepi bantu batemwa Lesa? Baibolo waamba’mba: “Kutemwa Lesa ko ko kuno, amba, tulame mikambizho yanji.” (1 Yoano 5:3) Kutemwa Lesa kulengela bantu kunemeka byubilo byawama byanembwa mu Baibolo. Kya kumwenako, Mambo a Lesa aji na mizhilo yaamba pa kwilaala ne masongola. Kwilaala kwaswishiwatu monka mu masongola, kabiji masongola afwainwa kwikala a kikupu. (Mateo 19:9; Bahebelu 13:4) Mwanamukazhi umo mu Spain wafunjile bya bupopweshi byo atainwe ku kupwila kwa Bakamonyi ba kwa Yehoba ko bafunjilenga byubilo byawama byanembwa mu Baibolo, waambile’mba: “Kupwila kwantundaikile bingi, kechi na majashitu aambiwenga kufuma mu Binembelo ne, bino ne pa kumona bano bantu byo bakwatankana, ne byubilo byabo byakilamo kuwama.”
Kununga pa byo batemwa Lesa, bena Kilishitu bakine bafikena kuyukanyikwa na byo bamwesha butemwe ku bo bekala nabo kinkalankulo. Mwingilo wabo wakilamo kunema ke wa kubulako bantu kuba’mba baketekele mu Bufumu bwa Lesa. (Mateo 24:14) Kafwako nangwa kimo kyakonsha kuleta mfweto ya myaka ku bakinkalankulo ne, kanatu kwibakwasha kuyuka Lesa. (Yoano 17:3) Kabiji bena Kilishitu bakine bamwesha butemwe bwabo mu mashinda akwabo. Bakwasha boba bamanama. Kya kumwenako, mu Italy byo mwaponene kitentanshi, pepala wa byambo wa monkamwa washimwine’mba Bakamonyi ba kwa Yehoba “bengila bingi bulongo, bakwasha boba bamanama, kwa kubula kuta muchima ku bupopweshi bo bayamo ne.”
Kununga pa kutemwa Lesa ne bantu, bena Kilishitu bakine betemwa bene na bene. Yesu waambile’mba: ‘Mukambizho mupya nemupa anweba, namba mwitemwe anwe bene na bene; byonka byo nemutemwa amiwa, ne anweba mwitemwe anwe bene na bene. Pa kyo kino po po bakayukila bonse amba anweba mwi baana bami ba bwanga, inge mwitemwe anwe bene na bene.’—Yoano 13:34, 35.
Nanchi butemwe bwitemwa bena Kilishitu bakine bumwekana kupusanako nyi? Mwanamukazhi umo wingila nkito ya bukaboyi byo byo ekimwene. Wingijila ku La Paz, Bolivia, kuji misalululo ya mishobo kya kuba banonshi kechi batanwa pamo na bayanji ne. Waambile’mba: “Kimye kitanshi kyo naile na kutanwa ku kupwila kwa Bakamonyi ba kwa Yehoba, namwene mwanamulume wavwajile bingi bulongo saka aikala na kwisamba na mwanamukazhi mwina India. Monka nsemekelwa nkyangye kumonapo kino ne. Ponkapotu, nayukile namba bano bafwainwa kwikala bantu ba Lesa.” Mu Brazil namo, nsongwakazhi umo wa jizhina ja Miriam waambile’mba: “Kechi nayukile bya kwikala wa lusekelo nangwatu mu kisemi kyami ne. Kimye kitanshi kyo namwene butemwe saka bumweshiwa ke mu Bakamonyi ba kwa Yehoba.” Mu United States, mukulumpe utala pa kishimikwa mutangiwa byambo bya pa televizhonyi wanembele’mba: “Umvwe bantu bavula baikalanga byonka biji bupopweshi bwenu, kino kyalo inge kechi kiji bibye byo kiji ne. Amiwa ne umo ukonkanya masawakya wayuka’mba jibumba jenu jaimena pa butemwe ne lwitabilo lwakosa mwi Mulenga.”
Kebai Mpopwelo ya Kine
Butemwe bo buyukanyikisha mpopwelo ya kine. Yesu wapashañenye kukeba mpopwelo ya kine ku kukeba jishinda jawama kwendamo. Jo jishindatu jitangijila ku bumi bwa myaka. Yesu waambile’mba: ‘Twelai pa kibelo kyakepa: mambo kibelo kyabaya ne jishinda japela kwendamo biya ku lonaiko, ne batwelamo bo bavula. Mambo kibelo kyakepa ne jishinda jakatazha biya ku bumi, kabiji bebimona bo bacheche.” (Mateo 7:13, 14) Jibumba jimotu ja bena Kilishitu bakine bakwatankana bo benda na Lesa mu jishinda ja mpopwelo ya kine. Onkao mambo, kyanema bingi kusala bulongo bupopweshi. Umvwe mwatana jino jishinda ne kwendamo, ko kuba’mba mwatana jishinda jakilamo kuwama ja bumi, mambo jo jishinda ja butemwe.—Efisesa 4:1-4.
Akilangulukai lusekelo lo mwakonsha kwikala nalo umvwe ke mwende mu jishinda ja mpopwelo ya kine! Kiji nobe mubena kwendela pamo na Lesa. Mwakonsha kufunda kwi Lesa bya kwikala na milangwe ne butemwe pa kuba’mba mwiyowe bulunda bwawama na bakwenu. Mwakonsha kufunda kwi aye pa mambo a nkebelo ya bumi, kabiji mwakonsha kuyuka milaye ya Lesa ne kwikala na luketekelo lwa kimye kya kulutwe. Umvwe mwakeba mpopwelo ya kine, kechi mukelangulushapo nangwa pachechetu ne.
[Kipikichala pa peja 3]
Pa mabuku onse anembelwe kala, Baibolo bunketu ye waamba pa butemwe bwa Lesa
[Bipikichala pa peja 5]
Bena Kilishitu bakine bayukanyikwa mambo bamwesha butemwe