Kukebakeba Mikumbu Yafwainwa

Nakonsha kulamawizha byepi butuntulu bwami bwa mubiji?

Ki ka kyo nakonsha kuba pa kuba’mba kisemi kyami kikale kya lusekelo?

Ki ka kyakonsha kunkwasha kutwajijila pa nkito?

NANCHI mwakishikishapo kala ano mepuzho nyi? Abya mwataine mikumbu yaingijile bulongo nyi? Pa mwaka pa mwaka, mabuku apusana pusana pepi nobe 2,000 anembwa aamba pa bya kufundañanako pa ino mitwe ne mitwetu ikwabo yanema. Mu Britain monkatu, bantu batanga mabuku, bataya mali afika ku $150 milyonyi pa mwaka ku ano mabuku afundañana bya kuyuka mwakubila na makatazho a mu bwikalo. Mu mwakatu umo, mu United States mali afika ku $600 milyonyi ataiwa ku mabuku aamba pa muntu byo akonsha kwikwasha mwine. Anweba kechi yenu yenka mubena kukeba bukwasho bwawama bwakuyuka mwakubila na bwikalo bwa juba ne juba ne.

Pa mambo a kufundañanako kutanwa mu ano mabuku avula, nembi umo waambile amba: “Mabuku avula a katataka abwezhapotu bintutu bimo byanembelwa kala jimo.” Ee, kufundañana kutanwa mu ano mabuku kubwezha bwezhapotu maana aji mu buku waikala myaka nobe kajo panopantanda. Uno buku ye wakumbanamo mwaya ntanda kukila buku uji yense. Watuntululwa yense nangwa kichika mu milaka nobe 2,400. Yense pamo, makope akila pa 4.6 bilyonyi, apulintwa ntanda yonse. Uno buku ke Baibolo.

Baibolo waambamotu amba: “Binembelo byonse byanembeshiwa kwi Lesa, kabiji byo byawamina mu kwibafunjisha bantu, ne mu kwibalengulula ne mu kwibolola, ne mu kwibafunda mu bololoke.” (2 Timoti 3:16) Kwambatu byo kiji, Baibolo kechi buku wanembelwe kuba’mba muntu ekwashishengamo aye mwine ne. Nkebelo yanji ikatampe keya kusolola kyaswa muchima wa Lesa ku bantu. Nangwa byonkabyo, Baibolo waamba mabulañano avula bingi a kuyuka mwakubila na makatazho avula ku bantu, kabiji walaya kuba’mba aba balondela lutangijilo lwayo bakamwenangamo. (Isaya 48:17, 18) Umvwe waingijishiwa, mafunde ajimo engila kimye kyonse alengela muntu kumwenamo, kechi na mambo a kisho, kisemwa, nangwa mfunjilo yanji ne.