Mepuzho Kufuma Kubatanga

Yesu watazhizhe mwepi byo aambile’mba kalume wanji wa kishinka ukekala ‘wa maana’?

Yesu waipwizhe bwipuzho bwa kuba’mba: ‘Lelo awa kalume wa kishinka ne wa maana ye ñanyi, ye apa nkambo yanji bukulumpe bwa bantu ba ku nzubo yanji, amba apanenga kajo pa kimye pafwainwa?’ (Mateo 24:45) Uno “kalume” upana “kajo” ka ku mupashi ke kipwilo kya bena Kilishitu bashingwa na mupashi. Mambo ka Yesu o ebatelejile’mba ba maana?a

Twakonsha kumvwisha kino kishinka bulongo mu byafunjishanga Yesu mwine kwesakana na mo atazhizhe pa kutongola kyambo kya ‘maana.’ Kya kumwenako, byo atongwele ‘kalume wa kishinka ne wa maana,’ Yesu waambile kishimpi kya bazhike jikumi bapembelejilenga kwiya kwa musongoshi. Bano bazhike betuvululamo bena Kilishitu bashingwa bajingako mwaka wa 1914 saka akyangye kufika bapembelejilenga kwiya kwa Musongoshi mukatampe, Yesu Kilishitu. Kimye kyaishile musongoshi, pa boba bazhike jikumi, batanu kechi bajinga na manyi avula ne, kino kyalengejile’mba babule kutanwa ku kijiilo kya masongola. Bakwabo batanu bajinga na maana. Bajinga na manyi avula akonsheshe kutwajijila na kutema kufikatu ne kimye kyafikile musongoshi ne kwibatwezha mwajinga kijiilo.—Mateo 25:10-12.

Kimye Yesu kyo aikele pa Bufumu mu 1914, bena Kilishitu bashingwa bavula baketekejile kuya ponkapotu na kwikala nanji mwiulu. Nangwa byonkabyo, kwajinga mingilo yavula bingi ya kwingila panopantanda, kabiji bamo kechi benengezhezhe kwingila ino mingilo ne. Byonka byajinga boba bazhike bakosamine, ne boba bashingwa kechi benengezhejile jimo ku mupashi ne, onkao mambo, bakankelwe kutwajijila na kusamisha kyeya. Nangwa byonkabyo, bavula bajinga na maana, ko kuba’mba baingijishe milangwe ne kumwena jimo bya kulutwe, kabiji bakoseshiwe ku mupashi. Byo bayukile’mba bajinga na mingilo yavula ya kwingila, bajinga bingi na lusekelo lwa kukeba kwingila. Onkao mambo, baikele ke ‘kalume wa kishinka ne wa maana.’

Kabiji monai Yesu byo aingijishe kyambo kya ‘maana’ mu Mateo 7:24. Yesu waambile’mba: ‘Aye umvwa bino byambo byami, ne kwibyuba, bakamupashañanya no muntu wa maana, watungile nzubo yanji pa jibwe.’ Muntu wa maana ushimika kishimikwa kyakosa na mambo a mvula wa mukwe. Pano muntu wakosama ushimika kishimikwa pa busenga ne nzubo yanji yakonsha kukunduka. Onkao mambo, mwana wa bwanga wa maana wa kwa Yesu ke yewa umwena jimo malwa aji mu kulondela maana a bantu. Milangwe ne maana anji a kupima bintu bimulengela kwitabila, kuba, ne kufunjisha byafunjishenga Yesu. ‘Kalume wa kishinka ne wa maana’ naye byo byo oba byonkabye.

Kabiji monai byaingijishiwa kyambo kya ‘maana’ mu ma Baibolo avula a Binembelo bya Kihebelu. Kya kumwenako, Felo watongwele Yosefwa kuba’mba atalenga pa kajo ka bena Ijipita. Luno lwajinga lunengezho lwa Yehoba lwa kupainamo kajo ku bantu banji. Mambo ka Yosefwa kyo asajijilwe? Felo wamwambijile’mba: ‘Ka paji nangwa mukwabo umo wajimuka, wa maana, byonka byo uji obewa ne.’ (Ntendekelo 41:33-39; 45:5) Popamotu, ne Baibolo naye waamba’mba Abigaila wajinga na ‘maana alumbuluka.’ Wapaine kajo ku mushingwa wa Yehoba, aye Davida ne bantu banji. (1 Samwela 25:3, 11, 18) Yosefwa ne Abigaila bakonsha kutelwa’mba ba maana, mambo bayukile kyaswa muchima wa Lesa kabiji baubile bintu bulongo ne na maana a kupima bintu.

Onkao mambo, Yesu byo atelele kalume wa kishinka amba wa maana, wamwesheshenga amba uno kalume ukekala na milangwe ne na maana a kupima bintu mambo lwitabilo, byubilo, ne mafunjisho abo biji mu bukine bwa mu Mambo a Lesa.

[Tubyambo twa mushi]