Nanchi Mubena Kutengelela Jimo Juba Ja Yehoba Nyi?
“Aja juba jikatampe ja Yehoba jijitu pepi, jiji pepi kabiji jibenakupelawizha’mba: Mfike.”—ZEFWANIYA 1:14.
1-3. (a) Baibolo waambapo’mba ka pa juba ja Yehoba? (b) Ñanyi “juba ja Yehoba” jo twatalañana najo?
JUBA jikatampe ja Yehoba kechi ke juba jimotu ne. Ke kimye kyabaya Lesa kyo akonawinamo babi. Aba babula kumwakamwa Lesa bachina jino juba ja mfishi, ja bukaji, ja kupelelwa ne ja malwa, kabiji juba ja kwalwilamo ntanda ke yatu yabulamo kintu. (Isaya 13:9; Amosi 5:18-20; Zefwaniya 1:15) Bungauzhi bwa kwa Yoela bwaamba’mba: ‘Mama! lelo twafwa! mambo juba ja Yehoba jafwenya kala ke pepi, jibena kwiya, jo juba ja lonaiko jibena kufuma kwi yewa Wa bulume bonse.’ (Yoela 1:15) Bino mu joja juba jikatampe, Lesa Ukapulusha “baoloka michima.”—Salamo 7:10.
2 Ñambilo ya kuba’mba “juba ja Yehoba” itazha ku lonaiko lwa Lesa lubiwa pa bimye byapusana pusana. Kya kumwenako, “juba ja Yehoba” jaishijile bangikazhi ba mu Yelusalema kimye Yehoba kyo aingijishe bena Babilona kwibonauna mu 607 B.C.E. (Zefwaniya 1:4-7) Kabiji Bayudea byo bakaine Mwana Lesa, waingijishe bena Loma kwibonauna mu 70 C.E. (Danyela 9:24-27; Yoano 19:15) Baibolo waambapo ne pa “juba ja Yehoba” jo ‘akalwishishamo ba mu mikoka yonse.’ (Zekaliya 14:1-3) Mutumwa Paulo wakwatankenye aja juba na kwikalapo kwa kwa Kilishitu, ako kwatatwile kimye Yesu kyo aikajikilwe ke Mfumu mu 1914 mwiulu. (2 Tesalonika 2:1, 2) Kinembelo kya mwaka kya Bakamonyi ba kwa Yehoba kya mu 2007 kyafwainwa bingi mambo bintu byo tubena kumona bibena kumwesha kuba’mba juba ja Yehoba jafwenya kala pepi. Byambo byafuma mu buku wa Zefwaniya 1:14, ke bya kuba’mba: “Juba jikatampe ja Yehoba jijitu pepi.”
3 Juba jikatampe ja Lesa byo jafwenya kala pepi, kimufwainwa lonka luno kwijitengelela jimo. Mwakonsha kwijitengelela jimo byepi? Bi ka bikwabo byo mwakonsha kuba pa kutengelela jimo juba ja Yehoba?
Tengelelainga Jimo
4. Lweseko ka lukatampe Yesu lo atengelejile jimo?
4 Mu bungauzhi bwanji bwaamba pa mpelo ya buno bwikalo, Yesu Kilishitu waambijile baana banji ba bwanga amba: “Mwikale ba kutengelela jimo.” (Mateo 24:44) Yesu byo aambile bino byambo, aye mwine watengelele jimo lweseko lwanji lukatampe, ko kuba’mba lufu lwanji lwa kitapisho kya bukuzhi. (Mateo 20:28) Ki ka kyo twakonsha kufunjilako ku kutengelela jimo kwa kwa Yesu?
5, 6. (a) Kutemwa Lesa ne bakwetu kwitulengela byepi kutengelela jimo juba ja Yehoba? (b) Yesu wajinga byepi wa kumwenako mu kutemwa bantu?
5 Yesu watemenwe bingi Yehoba ne mizhilo yanji yaoloka. Bahebelu 1:9 baambapo pe Yesu amba: “Obewa watemwa bololoke, pakuba bubi wibushikwa; Onkao mambo Lesa, Lesa wobe, wakushinga Manyi a lusekelo kukila bakwenu.” Yesu walamine bulumbuluke bwanji mambo watemenwe Shanji wa mwiulu. Netuwa Lesa uketulama umvwe twatemwa ne kulondela byo akeba. (Salamo 31:23) Buno butemwe ne lukokelo biketukwasha kutengelela jimo juba jikatampe ja Yehoba.
6 Yesu watemenwe bingi bantu. ‘Wibobile lusa, mambo basubakene ne kupelelwa, pamo no mikooko ya kubula kafunga.’ (Mateo 9:36) Onkao mambo Yesu wasapwijile mambo awama ku bantu, byonka ne atweba butemwe byo bwitulengela kusapwila mambo a Bufumu ku bakwetu. Kutemwa Lesa ne bakwetu kwitulengela kwikala bena Kilishitu ba mukoyo ne mu jino jishinda tukwashiwa kwikala ba kutengelela jimo juba jikatampe ja Yehoba.—Mateo 22:37-39.
7. Mambo ka o twakonshesha kwikela na lusekelo kimye kyo tubena kupembelela juba jikatampe ja Yehoba?
7 Yesu watemenwe bingi kuba kyaswa muchima wa Yehoba. (Salamo 40:8) Umvwe ne atweba ketube byonka bino, tukekala balusekelo mu mwingilo wazhila wa Lesa. Nobe Yesu ne atweba tukekala bampanyi bawama, kabiji kino kiketuletela lusekelo lwa kine. (Byubilo 20:35) Kya kine, “lusekelo lwa Yehoba bo bulume [bwetu].” Ne na luno lusekelo tukatengelelanga jimo juba jikatampe ja Lesa.—Nehemiya 8:10.
8. Mambo ka o twafwainwa kufwenyenya kwipi ne Yehoba mu lulombelo?
8 Kulomba na mukoyo kwi Lesa kwakwashishe Yesu mu meseko a lwitabilo lwanji. Walombelenga kimye Yoano kyo amubatizhe. Yesu walombele bufuku bonse saka akyangye kusala batumwa banji. (Luka 6:12-16) Nanchi muntu yense utanga Baibolo kechi wakonsha kumwenamo mu milombelo ya kufuma panshi ya muchima Yesu yo alombele bufuku bwapeleleko mu bwikalo bwanji panopantanda nenyi? Abya muji na muchima wa kulomba byonka Yesu byo ajinga nyi? Musolomokainga Yehoba kimye kyonse, saka mwisamba nanji kimye kyabaya, kulomba bukwasho bwa mupashi wazhila, ne kwitabila bukwasho bo mwatambwila. Bulunda bwakosa na Shetu wa mwiulu bwanema bingi mu kino kimye kyakatazha juba jikatampe byo jibena kupelawizha amba jifike. Onkao mambo, kechi mukankazhamenga kufwenya kwipi ne Yehoba mu lulombelo ne.—Yakoba 4:8.
9. Kuta muchima jizhina jazhila ja Yehoba kwanema byepi?
9 Kuta muchima jizhina jazhila ja Yehoba nako kwakwashishe Yesu kutengelela jimo meseko o apichilemo. Kabiji wafunjishe baana banji ba bwanga kulomba mu milombelo yabo kwi Lesa amba: “Jizhina jenu jizhile.” (Mateo 6:9) Umvwe ne atweba tukeba’mba jizhina ja Yehoba jizhile, tukebikangako kuchinuzhuka kuba bintu byakonsha kwijiletela bumvu. Kikafumamo ke kya kuba’mba tukatengelelanga jimo juba jikatampe ja Yehoba.
Abya Mwafwainwa Kupimpula Byubilo Byenu Nyi?
10. Mambo ka o kyawamina kwitalatala bulongo mu bwikalo bwetu?
10 Umvwe juba ja Yehoba jauba’mba jikeye kesha, jikemutana mwinengezhezha jimo nyi? Atweba bonse pa muntu pa muntu twafwainwa kwitalatala bulongo ne kumona umvwe byubilo byetu bimo byafwainwa kupimpulwa. Kulabijila kuba’mba bwikalo bwetu bwa mu ano moba bwaipipa ne bintu bitusolomokelatu bitufikila bonse, atweba bonse umo umo twafwainwa kwikala balaba ku mupashi kimye kyonse. (Musapwishi 9:11, 12; Yakoba 4:13-15) Onkao mambo twayai twisambepo bintu bimo byo twakonsha kutapo muchima mu bwikalo bwetu.
11. Ñanyi kikonkwanyi kya kutanga Baibolo kyo mwibikila?
11 Kintu kimo kyanema ke lujimuno lwa kwa ‘kalume wa kishinka’ lwa kutanga Baibolo moba onsetu. (Mateo 24:45) Mwakonsha kwibikila kikonkwanyi kya kutanga ne kulanguluka langulukangapo pa Binembelo pa mwaka pa mwaka, kutatwila mu Ntendekelo kukafikatu ne ku Lumwekesho. Umvwe saka mutanga bitango bina pa juba, mwakonsha kutanga bitango byonse 1,189 bya mu Baibolo mu mwaka umo. Mfumu yense wa mu Isalela watanganga Mizhilo ya Yehoba “moba onse a bumi bwanji.” Ne Yoshua byo byo aubile. (Mpitulukilo ya mu mizhilo 17:14-20; Yoshua 1:7, 8) Kyanema bingi bakafunga ba ku mupashi kutanganga Byambo bya Lesa moba onse, mambo kino kikebakwasha kufunjishanga “lufunjisho lwalumbuluka.”—Titusa 2:1.
12. Kufwenya pepi kwa juba ja Lesa kwafwainwa kwimulengela kuba ka?
12 Juba ja Yehoba jafwenya kala pepi, kabiji kino kyafwainwa kwimulengela kutanwanga ku kupwila kwa bwina Kilishitu kimye kyonse ne kwikalamo na lubaji papelela bulume bwenu. (Bahebelu 10:24, 25) Kuba bino kukemukwasha kwikala basendwe mu mwingilo wa Bufumu wa kukeba ne kukwasha baji na michima ya bukishinka ya kukeba bumi bwa myaka ne myaka. (Byubilo 13:48) Apo kampe mwakonsha kwikala na muchima wa kukwashañana mu mashinda akwabo mu kipwilo, nabiji kukwasha bakikulumpe ne kutundaika banyike. Kino byo kyakonsha kwimuletela lusekelo!
Bulunda Bwenu na Bakwenu
13. Ñanyi mepuzho o twakonsha kwishikisha pa mambo a kuvwala bumuntu bupya?
13 Juba ja Yehoba byo jafwenya kala pepi, abya mwafwainwa kwibikishako “kuvwala bumuntu bupya bwalengwa mu bololoke ne buzhile bwa bukine monka mwaikajila Lesa” nyi? (Efisesa 4:20-24) Umvwe saka mwikalapo na byubilo bijipo na Lesa, bakwenu bakayuka’mba mubena ‘kwenda monka mu mupashi’ ne kumwesha bipangwa bya mupashi. (Ngalatiya 5:16, 22-25) Abya pajipo bintu bimo anweba ne kisemi kyenu byo mwauba bibena kumwesha kuba’mba mwavwala bumuntu bupya nyi? (Kolose 3:9, 10) Kya kumwenako, abya mubila lusa bakwenu ba mu lwitabilo ne bantu bakwabotu nyi? (Ngalatiya 6:10) Lufunjisho lwa mu Binembelo lwa kimye kyonse lukemukwasha kwikala na byubilo bya Lesa abyo bikemulengela kutengelela jimo juba ja Yehoba.
14. Mambo ka muntu kyo afwainwa kulombela mupashi wazhila umvwe ubena kukeba kwikala na muchima wa kwikanya?
14 Ibyepi inge kya kuba muzhingila bukiji kabiji mwavuluka kuba’mba mukebewa kwikanya? Kyubilo kya kwilama ke kipangwa mupashi wazhila kyo akonsha kwimulengela kwikala nakyo. Onkao mambo, lombai mupashi wazhila monka mwayila byambo bya kwa Yesu bya kuba’mba: ‘Lombainga, kikemupewa; sakainga, mukamona; kokaulainga, bakemushinkwilako. . . . Umvwe anweba, byo muji babi, mwayuka kupana byawama ku baana benu, nanchi aye Shenu wa mwiulu kechi emukile kupana mupashi wazhila ku bamulomba nenyi?’—Luka 11:9-13.
15. Mwafwainwa kuba byepi umvwe kya kuba kechi mubena kumvwañana na mukwenu wa mu lwitabilo ne?
15 Kimo kimye kampe kechi mumvwañana na mukwenu wa mu lwitabilo ne. Umvwe byo byo kiji, ibikaiko mupwanañane, kabiji kino kikaleta mutende ne kukwatankana mu kipwilo. (Salamo 133:1-3) Ingijishainga lufunjisho lwa kwa Yesu lwanembwa mu Mateo 5:23, 24 nangwa luji mu Mateo 18:15-17. Umvwe muleka juba jazhika saka mwakizhingilatu, kange mukankazhame kuwamisha bintu ne. Javula kikebewa ke kwikala na muchima wa kulekelañanako mambo. Paulo wanembele’mba: “Kasa mwiubila lusa anwe bene na bene, mwikale ba michima yanekena, ne kwilekela mambo anwe bene na bene, byonka byo emulekejile mambo aye Lesa mwi Kilishitu.”—Efisesa 4:25, 26, 32.
16. Ñanyi mashinda lusa mo lwakonshesha kubiwa mu masongola?
16 Mu masongola mukebewa kwiubila lusa ne kwilekelako mambo. Umvwe mukeba kumwesha butemwe bwabaya ne lusa ku mukwenu wa mu masongola, ibikaingako kwingijisha bukwasho bwa Lesa ne Byambo byanji. Abya mwafwainwa kubapo kimo pa kuba’mba mulondele byaamba 1 Kolinda 7:1-5 pa kuba’mba mukepesheko bijikila ne kuchinuzhuka kubula kwikala bakishinka nyi? Ee, pa bimye bya uno mutundu mulume nangwa mukazhi po po afwainwa ‘kubila lusa.’
17. Muntu walenga mambo wafwainwa kuba byepi?
17 Ibyepi inge mwalenga mambo akatampe? Kechi mwafwainwa kukankazhama kolola mashinda enu ne. Esekai na ngovu kukeba bukwasho ku bakulumpe mu kipwilo. Milombelo yabo ne lujimuno bikemukwasha kwikala jibiji batuntulu ku mupashi. (Yakoba 5:13-16) Lombai kwi Yehoba na muchima wa lulapilo. Umvwe ne kuba bino ne, muchima ukemuzhachishanga ne kuyanda na milanguluko kikupu. Davida naye wajinga na luno lukatazho, bino waumvwinetu bulongo panyuma ya kwisolola kwi Yehoba. Davida wanembele’mba: “Ye mwine wa lusekelo, mwina mizhilulwila yalekelwa, Mwina mambo avwetwapo. Ye mwine wa lusekelo wabulwa kutelelwa bubi kwi Yehoba, Wa muchima wabulwa bujimbijimbi.” (Salamo 32:1-5) Yehoba ulekelako mambo boba balenga mambo ne kulapila kya kine.—Salamo 103:8-14; Byambo bya Mana 28:13.
Kechi Mwikale ba Panopantanda Ne
18. Ino ntanda mwafwainwa kwiimonanga byepi?
18 Kwakubula nangwa kuzhinaukatu ne, mubena kutengelela jimo ntanda ipya yawama yalaya Shetu wa mwiulu. Pano bino mumona byepi bambulwakoloka betolwela kufuma kwi Lesa? Satana “mfumu wa panopantanda” kechi wamongwele Yesu Kilishitu ne. (Yoano 12:31; 14:30) Kya kine, ne anweba kechi mukeba kuba’mba Diabola ne ntanda yanji bimongole ne. Onkao mambo, saka muvuluka byambo bya mutumwa Yoano bya kuba’mba: “Inge mutemwe panopantanda nangwa bya panopantanda ne.” Kino kyanema bingi, mambo “panopantanda pakapita ne lwiso lwapo: pakuba aye uba kyaswa muchima wa Lesa ukekala myaka ne myaka.”—1 Yoano 2:15-17.
19. Banyike ba bwina Kilishitu batundaikwa kwibikila ñanyi bikonkwanyi?
19 Abya mubena kukwasha baana benu ‘kwilama abo bene ku biko bya panopantanda’ nyi? (Yakoba 1:27) Satana ukeba kuloba baana benu byonka muntu byo aloba masabi. Tubungwe ne bipamo byongola banyike kuba’mba batemwe bya ino ntanda. Bino bakalume ba Yehoba baji mu jibumba jikapuluka mpelo ya buno bwikalo. Onkao mambo banyike ba bwina Kilishitu bafwainwa kutundaikwa ‘kukelwa kwingijisha mwingilo wa Nkambo.’ (1 Kolinda 15:58) Bansemi ba bwina Kilishitu bafwainwa kukwasha baana babo kwibikila bikonkwanyi bikebalengela kwikala balusekelo ne kunemeka Lesa mu bwikalo bwabo kabiji bikebakwasha kutengelela jimo juba ja Yehoba.
Tai Muchima ku Bikobiwa Panyuma ya Juba Jikatampe ja Yehoba
20. Mambo ka o twafwainwa kulangulukilanga pa bumi bwa myaka ne myaka?
20 Mukakonsha kupembelelanga juba ja Yehoba mu butekanye umvwe saka mulanguluka pa bumi bwa myaka ne myaka. (Yuda 20, 21) Mubena kupembelela kimye kya kulutwe kyo mukatambula bumi bwa myaka ne myaka mu Paladisa, kabiji kino kimulengela kwikala na luketekelo lwa kukekala na bulume ne kimye kyabaya kya kuba bintu byawama ne kufunda byavula pe Yehoba. Mukakonsha kutwajijila na kufunda pe Lesa kikupu mambo bantu luno bayuka “bya kutendekelakotu bya mu byubilo byanji.” (Yoba 26:14) Kino byo kikekalapo kya lusekelo!
21, 22. Kikekala byepi pakachi ka anweba ne bakasangulwa?
21 Mu Paladisa, aba bakasangulwa baketubula bintu bimo byaubiwe myaka ya kala byo twabula kuyuka ne. Enoka ukalondolola byo achinchikile pa kusapwila mambo a Yehoba ku bantu babujile kwakamwa Lesa. (Yuda 14, 15) Nowa ukashimikizha byo kyajinga pa kufika bwato. Abalahama ne Sala bakalondolola byo baumvwine pa kufuma mu muzhi wa Ula mo baikajilenga bulongo ne kuya na kwikala mu matente. Akifwanyikizhai Eshita saka alondolola byo achinchikile ne kwimenako bantu banji kuba’mba Hamane abule kwibonauna. (Eshita 7:1-6) Fwanyikizhai Yona saka abena kushimikizha byo ajinga munda mwa jisabi jikatampe moba asatu nangwa Yoano Mubatishi saka abena kulondolola byo aumvwine pa kubatizha Yesu. (Luka 3:21, 22; 7:28) Kine bintu byawama byo tukafunda byavula bingi!
22 Mu kimye kya kulama kwa kwa Kilishitu kwa Myaka Kiumbi Kimo, kampe mukekalako na jishuko ja kukwasha bakasangulwa kufunda ‘maana a kumuyuka Lesa.’ (Byambo bya Mana 2:1-6) Ano moba byo kyawamapo kumona bantu saka bekala na maana a kumuyuka Yehoba Lesa ne kuba monka mo ayila! Akifwanyikizhai lusekelo lo mukekala nalo Yehoba byo akemupesha kuba’mba mufunjishe bantu bajingako kala ne kumvwina byo mukamba!
23. Twafwainwa kubanga ka?
23 Mapesho o tuji nao luno atweba bakalume ba Yehoba kafwako muntu nangwa umo wakonsha kwiabala ne. (Salamo 40:5) Kikatakata tusanta bingi pa bintu bya ku mupashi bitubila Lesa. (Isaya 48:17, 18) Kechi na mambo na byo tuji ne, twayai twingilenga na muchima yense mwingilo wazhila byo tubena kupembelela juba jikatampe ja Yehoba.
Musakukumbula’mba Ka?
• “Juba ja Yehoba” jo ji ka?
• Nanchi mwakonsha kutengelela jimo byepi juba ja Yehoba?
• Juba jikatampe ja Yehoba byo jafwenya kala pepi, ñanyi lupimpu lo twafwainwa kuba?
• Bi ka byo mulanguluka kuba panyuma ya juba ja Yehoba?
[Kipikichala pa peja 14]
Yesu watengelejile jimo meseko
[Kipikichala pa peja 17]
Byo jikekalapo jishuko kukwasha bakasangulwa kwikala na maana a kumuyuka Yehoba!