Bantu Batanga Magazini Etu Bepuzha’mba
Nanchi Bufumu Bwa Lesa Buji Mu Muchima Wa Muntu Nyi?
Bantu bavula lelo jino betabizha’mba mukumbu wa buno bwipuzho ke wa kuba’mba ee. Kya kumwenako, buku wa The Catholic Encyclopedia waamba’mba: “Bufumu bwa Lesa bulumbulula’mba . . . Lesa ubena kulamina mu michima yetu.” Bantangi ba bupopweshi javula byo byo bafunjisha. Nanchi Baibolo kine ufunjisha’mba Bufumu bwa Lesa buji mu michima ya bantu nyi?
Bamo balanguluka’mba Yesu mwine ye wafunjishenga’mba Bufumu bwa Lesa buji monka mukachi ka michima ya bantu. Yesu waambile’mba: “Talai, bufumu bwa Lesa buji [pakachi, NW] kenu.” (Luka 17:21) Mu ma Baibolo amo kino kyepelo kyatuntululwa’mba: “Bufumu bwa Lesa buji monka mwi anweba” nangwa’mba “mukachi kenu.” Nanchi ino ntuntulwilo yayilamo na byambo byaambile Yesu nyi? Nanchi kine wikitazhizhe mu kuba’mba Bufumu bwa Lesa buji mu michima ya bantu nyi?
Patanshi, akilangulukai muchima wa muntu byo aji. Umvwe Baibolo ke ambe pa muchima wa bukifwanyikizho, ulumbulula mwine muntu wa mukachi, mufuma milanguluko ya muntu, byubilo ne ndangulukilo yanji. Mulanguluko wa kuba’mba kintu kyakilamo kuwama nabiji Bufumu bwa Lesa kiji monka mu michima ya bantu ne kuba’mba kibalula ne kwibalengela kunemekwa, wakonsha kumvwanyika bingi bulongo. Abya nanchi kujipo bishinka bya kulengela kuketekela kino nyi?
Baibolo witubula’mba: “Muchima wa muntu uji na bujimbijimbi kukila bintu byonse, kabiji watamishatu.” (Yelemiya 17:9) Yesu aye mwine waambile’mba: “Mukachi, mu michima ya bantu, mo mulupuka milanguluko yabipa, ne bulalelale, ne bwivi, ne kwipayañana, ne bukende, ne bya lunkumbwa, ne bubi.” (Mako 7:20-22) Akilangulukai pa kino: Nanchi bya malwa byubiwa mu ino ntanda lelo jino, kechi bifuma mu michima ya bantu ya bundengamambo nenyi? Pano nga Bufumu bwa Lesa bwalumbuluka bwakonsha kufuma byepi mu ino michima? Kwambatu kine, byonka makuyu byo akonsha kubula kufuma ku tupwasasa, ne Bufumu bwa Lesa nabo kechi bwakonsha kufuma mu michima ya bantu ne.—Mateo 7:16.
Kya bubiji, akilangulukai bantu Yesu bo aambijilenga bino byambo byanembwa mu Luka 17:21. Mu kyepelo kitanshi tutangamo’mba: ‘Byo bamwipangwizhizhe ku Bafaliseo amba, Bufumu bwa Lesa nanchi bukafika ñanyi mwaka? aye wibakumbwile.’ (Luka 17:20) Bafaliseo bajinga balwanyi ba kwa Yesu. Kabiji Yesu waambile’mba aba bakamfutumfutu kechi bakatwela mu Bufumu bwa Lesa ne. (Mateo 23:13) Umvwe kya kuba Bafaliseo kechi bakonsheshe kutwela mu Bufumu bwa Lesa ne, nanchi Bufumu bwakonsheshe kwikala mu michima yabo nyi? Kechi kyakonshekele ne! Pano nanchi Yesu pa kwamba bino byambo wibitazhizhe mu ka?
Pa kutuntulula bino byambo byaambile Yesu, ma Baibolo avula aingijisha byambo bipashako na byobya byaingijishiwa mu ntuntulwilo ya Baibolo wa New World Translation. Ma Baibolo amo aamba’mba Bufumu buji “mwenu” nangwa’mba “pakachi kenu.” Nga Bufumu bwa Lesa bwajinga byepi pakachi ka bantu ba pa kyokya kimye kuvwangakotu ne Bafaliseo? Yesu ye watongwelwe kwi Yehoba Lesa kwikala Mfumu wa buno Bufumu. Byo aji Mfumu Watongolwa, Yesu wajinga pakachi ka bano bantu. Wafunjishenga pa mambo a Bufumu bwa Lesa ne kuba bya kukumya, kwibamweshako pacheche buno Bufumu byo bukoba. Onkao mambo, kyakonsha kwambiwa’mba Bufumu bwajinga pakachi kabo.
Kwambatu kine, Binembelo kechi byaambapo’mba Bufumu bwa Lesa buji mu michima ya bantu ne. Byaamba’mba buno Bufumu ke kafulumende wa kine, ukaleta lupimpu lukatampe panopantanda, byonka byaambijile jimo bangauzhi.—Isaya 9:6, 7; Danyela 2:44.