Bufumu nangwa’mba kafulumende kechi wafwainwa kwikala mu uno mubiji wa muntu ne

Nanchi Bufumu bwa Lesa Buji mu Muchima Wenu Nyi?

Mukumbu wa mu Baibolo

Ine, Bufumu bwa Lesa kechi buji mu michima ya bena Kilishitu ne.a Baibolo wamwesha buno bufumu ko buji, byo ebutela’mba “bufumu bwa mwiulu.” (Mateo 4:17) Bishinka byalondelapo byalumbulula Baibolo byo amwesha’mba uno ke kafulumende wa kine kabiji ubena kulama mwiulu.

Bufumu bwa Lesa buji na bakalama, bangikazhi ne mizhilo, kabiji bukoba kyaswa muchima wa Lesa mwiulu ne pano pa ntanda.—Mateo 6:10; Lumwekesho 5:10.
Kafulumende wa Lesa nangwa’mba Bufumu, bukalama bantu bonse “ba mu mitundu yonse ne ba mu mikoka yonse ne ba njimi yonse” baji pano pa ntanda. (Danyela 7:13, 14) Lesa ye uji na luusa lwa kulama, kechi bangikazhi banji ne.—Salamo 2:4-6; Isaya 9:7.
Yesu walayile batumwa banji ba kishinka kulama pamo nanji mu Bufumu bwa mwiulu ne “kwikala pa matanda.”—Luka 22:28, 30.
Bufumu bwa Lesa bukonauna balwanyi.—Salamo 2:1, 2, 8, 9; 110:1, 2; 1 Kolinda 15:25, 26.

Baibolo byo alumbulula’mba bufumu bulama mu muchima wa muntu kechi ufunjisha’mba Bufumu bwa mwiulu buji mu muchima wa muntu ne. Bino walumbulula’mba “mambo a Bufumu” nangwa’mba “mambo awama a Bufumu” akonsha kwalula michima yetu.—Mateo 13:19; 24:14.

Byambo bya kuba’mba “bufumu bwa Lesa buji mukachi kenu” bilumbulula ka?

Bantu bamo kechi bayuka kuji Bufumu bwa Lesa ne, na mambo a byo batuntulula Luka 17:21 mu ma Baibolo amo. Buku wa Lesa wamba’mba “bufumu bwa Lesa buji mukachi kenu.” Pa kuba’mba tumvwishe mwatala kino kyepelo, twafwainwa kuyuka kintu kyo baambapo.

Bantangi babupopweshi bamo bamukaine Yesu — Bufumu bwa Lesa kechi bwajinga mu michima ya boba bantu bakosele michima ne

Yesu waambijilenga Bafaliseo ko kuba’mba jibumba ja bantangi ba bupopweshi bamukaine, kabiji baumvwañene kumwipaya. (Mateo 12:14; Luka 17:20) Nanchi kijitu bulongo kulanguluka’mba Bufumu bwajinga mu michima ya boba bantu bakosele michima nyi? Yesu wibambijile’mba: ‘Mu michima yenu mwayula na bukamfutumfutu ne bubi.’—Mateo 23:27, 28.

Ma Baibolo akwabo atuntulula bulongo byambo byaambile Yesu pa Luka 17:21 amba: “Bufumu bwa Lesa buji pano pamo ne anweba.” (Contemporary English Version) “Bufumu bwa Lesa buji pakachi kenu.” (Binembelo bya Ntanda Ipya bya Kingiliki bya Bwina Kilishitu) Bufumu bwa mwiulu bwajinga “pamo” nangwa’mba “pakachi” ka Bafaliseo, mambo Yesu ye batongwele kwi Lesa kwikala Mfumu, wajinga pamo nabo.—Luka 1:32, 33.

a Bupopweshi bwavula bwa bena Kilishitu bufunjisha’mba Bufumu bwa Lesa buji mu muchima wa muntu. Ku Kipwilo kya Southern Baptist kyajingako mu United States, baambile’mba Bufumu bwa Lesa butangijila “michima ya bantu ne bwikalo bwabo.” Ne Papa Benedict XVI naye byobyo anembele mu buku wa kuba’mba Jesus of Nazareth. Wanembele’mba, “Bufumu bwa Lesa bwiya umvwe watambula mambo a Lesa.”