Bufumu Bwa Lesa Katatakatu Buketupokolole!

“Bufumu bwenu bufike. Kyaswa muchima wenu kyubiwe pano panshi, byonka byo kyubiwa mwiulu.”—MAT. 6:10.

1. Ñanyi lufunjisho lukatampe lwajinga lwa kwa Yesu?

YESU KILISHITU byo aambilenga Jashi janji ja pa Mutumba watongwelepo ne lulombelo lwapezhezheko lufunjisho lwanji lukatampe. Wafunjishishe baana banji ba bwanga kulomba kwi Lesa amba: “Bufumu bwenu bufike. Kyaswa muchima wenu kyubiwe pano panshi, byonka byo kyubiwa mwiulu.” (Mat. 6:9-13) Yesu “wayile na kupitañana mu mizhi ikatampe ne icheche na kusapwila, ne kwibabula mambo awama a bufumu bwa Lesa.” (Luka 8:1) Kilishitu wakambizhizhe baana banji ba bwanga amba: ‘Sambilai kukebesha bufumu ne bololoke bwa Lesa.’ (Mat. 6:33) Byo mubena kufunda uno mutwe, mumonepo mashinda amo mo mwafwainwa kwingijishisha bino byambo mu mwingilo wenu wa kusapwila. Kya kumwenako, monai mo mwakonsha kukumbwila ano mepuzho: Nanchi mambo a Bufumu anemena mwepi? Nga bantu bafwainwa kupokololwa ku ka? Kabiji Bufumu bwa Lesa buketupokolola byepi?

2. Mambo awama a Bufumu anema byepi?

² Yesu waambijile jimo amba: “Ano mambo awama a bufumu akasapwilwa panopantanda ponse mwa kwibashimwina ba mu mikoka yonse ya bantu; bino ke ku mpelo.” (Mat. 24:14) Mambo awama akilamo kunema ke oa aamba pa Bufumu bwa Lesa. Anema bingi panopantanda! Mu bipwilo bya Bakamonyi ba kwa Yehoba kukila 100,000, bakalume ba kwa Lesa pepi na mamilyonyi atanu na abiji bengila mwingilo mukatampe wa kusapwila ne kulumbulwila bakwabo amba Bufumu bwaikajikwa kala. Kwikajikwa kwabo ke mambo awama mambo bulumbulula amba Lesa walenga kafulumende mwiulu ukalama ino ntanda. Kupichila mu buno Bufumu, kyaswa muchima wa Yehoba kikobiwa panopantanda byonka byo kyubiwa mwiulu.

3, 4. Kyaswa muchima wa Lesa byo kikobiwa panopantanda ki ka kikamwekela bantu?

³ Kyaswa muchima wa Lesa byo kikobiwa panopantanda ki ka kikamwekela bantu? Yehoba “ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne.” (Lum. 21:4) Bantu kechi bakakolwanga nangwa kufwa na mambo a bundengamambo ne bumbulwakoloka bo baswana ne. Aba bafwa Lesa bo avuluka baji na jishuko ja kukekala na bumi bwa myaka ne myaka, mambo Baibolo walaya’mba: “Kukekala lusanguko lwa baoloka ne babula koloka.” (Byu. 24:15) Kechi kukekala nkondo, bikola, ne bipowe bya nzala jibiji ne, kabiji ntanda ikalulwa ke paladisa. Nangwatu banyama bashinta bakekala mutende na bantu ne na banyama bakwabo.—Sala. 46:9; 72:16; Isa. 11:6-9; 33:24; Luka 23:43.

⁴ Na mambo a ano mapesho awama akobiwa na Bufumu, bungauzhi bwa mu Baibolo bwatekeneshañana pa mambo a bwikalo bwa kulutwe amba: “Bakimote bakaswana ntanda. Kabiji bakasangalela mu kuvula kwa mutende.” Pano ki ka kikamwekela bantu boba bubi? Binembelo bitubula’mba: “Pakishala pacheche ne babi bakekala ke kafwako.” Bino aba “bamupembelela Yehoba, bakaswana ntanda.”—Sala. 37:9-11.

5. Ki ka kikobiwa ku bintu bya ino ntanda?

⁵ Pa kuba’mba bino byonse bikobiwe, bintu bya ino ntanda nabiji makafulumende, bupopweshi bwa bubela ne bya bunonshi byafwainwa kufumishiwapo. Kabiji kino kyo kikoba kafulumende wa mwiulu. Ngauzhi Danyela watundaikilwe na mupashi kwamba bino byambo amba: “Mu moba a boba bamfumu [bajiko luno] aye Lesa wa mwiulu ukaleta bufumu [bwa mwiulu] bo bakabula konauna myaka ne myaka, nangwa pachechetu ne, kabiji abwa bufumu kechi bakebupana ku mutundu ungi ne. Kabiji bukalalaula buno bufumu bonse [bwa ano moba] ne kwibupwishatu shata! Pakuba abo bukekala myaka ne myaka.” (Da. 2:44) Bufumu bwa Lesa, ko kuba’mba kafulumende mupya wa mwiulu, bo bukalamanga bantu panopantanda. Kukekala “bya mwiulu bipya ne ntanda ipya, mo bwaikala bololoke.”—2 Pe. 3:13.

Kupokololwa Kwafwainwa Kubiwa Lonka Luno

6. Baibolo walondolola byepi bubi bwa mu ino ntanda yatama?

⁶ Satana, Adama ne Evwa byo basatukijile Lesa, ne kukeba’mba befuukwilenga abo bene kyatama ne kyawama, baletejile bantu malwa akatampe. Byo papichile myaka 1,600 Muyulo wa ntanda yonse saka akyangye kubiwa ne, ‘bubi bwa bantu bwatamishe pano pa ntanda, ne milanguluko yonse ya mu michima yabo yajingatu yatama kikuputu.’ (Nte. 6:5) Panyuma ya kupitapo myaka nobe 1,300, Solomone wamwene byubilo byo byatamine ne kunemba’mba: “Nalangulukile namba aba bafwa kala bashukwa kukila boba bakiji na bumi; bino wakila bonse babiji mu kushukwa ye yewa ukyangye kusemekwapo, wabula kumona byatama byo boba pano panshi.” (Sapwi. 4:2, 3) Myaka 3,000 yapitapo ibena kwitufikizha mu ano moba etu, kimye bubi kyo bwasampukila ne pakatele.

7. Mambo ka kupokololwa na Lesa kyo kubena kukebewa lonka luno?

⁷ Nangwa kya kuba’mba bubi bwaubiwa pa myaka yavula bingi, pano bino kupokololwa kupichila mu Bufumu bwa Lesa kubena kukebewa bingi kukila ne byo kyajinga kala. Bintu byaubiwa mu myaka 100 yapitapo byatama bingi, kabiji bibena kuyatu na kutaminako. Kya kumwenako, Kipamo Kitala pa Bibena Kubiwa mu Ntanda kyashimuna’mba: “Inge twauba’mba twesakanyeko, bantu bafwile mu nkondo yajingako mu kitota kya myaka [kya bu 20] bavujile bingi kukila bafwile mu makondo onse ajingako kutatula mu kitota kya myaka kitanshi AD kwiya kufika mu 1899.” Kutatula mu 1914 bantu kukila 100 milyonyi bafwa mu makondo. Buku umo wasopelela’mba bantu kufika ku 60 milyonyi bo bafwile mu Nkondo ya Kibiji ya Ntanda yonse. (Encyclopedia) Byalo bimo byo biji na bilwilo bya nkondo byashinta, kyapela bingi kwipaya bantu bavula panopantanda. Kabiji nangwatu kya kuba bantu bailako palutwe mu bya sayansi ne michi ya mu kipatela, pa mwaka pa mwaka baana kukila mamilyonyi atanu bafwa na mambo a kipowe kya nzala.—Monai kitango 9 mu buku wa Nanchi Baibolo Kine Ufunjisha’mba Ka?

8. Bukalama bwa bantu pa myaka yavula yapitapo bwamwesha ka?

⁸ Bantu baeseka na ngovu kukeba kupwisha bubi, pano bino bapulwilamotu mabula. Bipamo bya bumulwila ntanda, busulu, ne bupopweshi byakankalwa kuletela bantu mutende, bwikalo bwawama, ne butuntulu bwa mubiji. Mu kifulo kya kupwisha muzema wa makatazho abena kupitamo bantu, bino bipamo bibena kunungapo akwabo. Kwakubula nangwa kuzhinaukatu ne, myaka yavula yapitapo ya bukalama bwa bantu yamwesha amba: ‘Muntu mwine na maana anji kechi wakonsha kusalulula jishinda jawama kuyamo ne, aye mwine muntu kechi uji na bulume bwa kwenda monka mwafwainwa ne.’ (Yele. 10:23) Ee kine, muntu wauba “bunkambo pa muntu mukwabo mu kumuyanjisha.” (Sapwi. 8:9) Kabiji “bilengwa byonsetu bibenakubinza ne kumvwa misongo pamotu.”—Loma 8:22.

9. Bena Kilishitu baketekela kumona ñanyi byubilo mu ano ‘moba apelako’?

⁹ Baibolo waambijile jimo pa ano moba etu amba: “Mu moba akapelako kukeya bimye byakatazha.” Panyuma ya kulondolola byubilo bya mu moba a kupelako mu bukalama bwa bantu, bungauzhi bwaambapo’mba: “Bantu batama ne ba bujimbijimbi bakayangatu na kutama.” (Tangai 2 Timoti 3:1-5, 13.) Bino byo byaketekela bena Kilishitu, mambo “byonse bya panopantanda biji mu bulume bwa kwa aye mubi,” Satana. (1 Yoa. 5:19) Bino mambo awama ke a kuba’mba Lesa katatakatu akapokolole bonse bamutemwa. Bakapokololwa kufuma ku ino ntanda ibena kutaminakotu.

Nsulo Yaketekelwa Kupokololañana

10. Mambo ka Yehoba kyo aikela Nsulo yawama ipokolola bantu?

¹⁰ Kimye kyo mubena kusapwila mambo awama, londolwelai bantu amba Yehoba ye Nsulo yawama ikapokolola bantu. Aye bunke bwanji ye uji na bulume bwa kupokolola bakalume banji mu lukatazho luji lonse. (Byu. 4:24, 31; Lum. 4:11) Twasumininwa amba Yehoba ye ukapokolola bantu banji ne kufikizha nkebelo yanji, mambo wachipa’mba: “Kine, byonka byo nalangulukile, byo byonka bikamweka.” Byambo byanji “kechi bikabwelatu byatu kwi [aye] ne.”—Tangai Isaya 14:24, 25; 55:10, 11.

11, 12. Lesa walaya kupana ka ku bakalume banji?

¹¹ Yehoba walaya amba ukapokolola bakalume banji kimye kyo akonauna babi. Kimye kyo atuminenga ngauzhi Yelemiya kwamba na kuchinchika ku bangubabibi, Lesa wamwambijile’mba: “Kechi wibachine bantu ne.” Mambo ka? “Amiwa nji nobe mu kukupokolola.” (Yele. 1:8) Nangwatu kimye Yehoba kyo aonawine mizhi ya Sodoma ne Gomola yatamine, watumine bamalaika babiji kuba’mba bafumye Lota ne kisemi kyanji mu yoya mizhi. “Ponkapo Yehoba wanokesheshe pa Sodoma ne Gomola kibiliki ne mujilo.”—Nte. 19:15, 24, 25.

¹² Yehoba wakonsha kupokolola bantu boba kyaswa muchima wanji mwaya ntanda. Byo aonawine ntanda ya kala ibi na Muyulo, “walamine Nowa, musapwishi wasapwijilenga bololoke, ne bakwabopo batanu na babiji.” (2 Pe. 2:5) Kabiji Yehoba ukapokolola baoloka kimye kyo akonauna ino ntanda ibi. Byambo Byanji byaamba’mba: “Mukebai Yehoba anweba bakimote bonse ba mu ntanda, . . . Kebai bololoke, kebai bukimote; apo kampe mukafiwa mu juba ja bukaji ja Yehoba.” (Zefwa. 2:3) Panyuma ya lonaiko lwa ntanda yonse, ‘baoloka bakekala mu ntanda, bino babi bakebafumyamo.’—Mana. 2:21, 22.

13. Nga bakalume ba Yehoba bafwa bakapokololwa byepi?

¹³ Nangwa byonkabyo, bakalume bavula ba Lesa bafwa na mambo a kukolwa, kwibepaya, ne ku bintutu bikwabo. (Mat. 24:9) Pano nga bano bantu bakapokololwa byepi? Byonka byo kyaambiwapo kala, “kukekala lusanguko lwa baoloka.” (Byu. 24:15) Kino byo kitekeneshapo kuyuka’mba kafwako kintu nangwa kimo kikakanya Yehoba kupokolola bantu banji ne!

Kafulumende Waoloka

14. Mambo ka kyo twaketekela amba Bufumu bwa Lesa ke kafulumende waoloka?

¹⁴ Mu busapwishi bwenu, mwakonsha kulondolwela bantu amba Bufumu bwa Yehoba bwa mwiulu ke kafulumende waoloka. Kino kya kine mambo bumwesha byubilo byawama bya Lesa nabiji bololoke ne butemwe. (Mpitu. 32:4; 1 Yoa. 4:8) Lesa wapana Bufumu kwi Yesu Kilishitu, mambo ye wafwainwa kulama ino ntanda. Kabiji Yehoba ukeba ba 144,000 bena Kilishitu bashingwa kufuma panopantanda ne kuya mwiulu na kulamina ntanda pamo na Kilishitu.—Lum. 14:1-5.

15. Londololai bukalama bwa Bufumu bwa Lesa byo bwapusana na bwa bantu.

¹⁵ Bufumu bwa kwa Yesu ne ba 144,000 bwapusana bingi na bufumu bwa bantu bambulwakoloka! Bandamabyalo ba mu makafulumende a bantu bashinta kabiji balengela bangikazhi babo kutendeka kulwa makondo aipaya bantu bavula bingi. Kyo kine kintu Binembelo kyo bitujimwinako kubula kuketekela mu bantu “mwabulwa bukwasho ne.” (Sala. 146:3) Bino Kilishitu ukalama monka mwayila byubilo byanji byawama. Yesu waambile’mba: “Iyai ko nji, anweba bonse basulwila na mingilo ne kunemenwa, ne amiwa nkemukokolosha. Tambulai kikonkoji kyami ne kufunda kwi amiwa; mambo amiwa ne kimote ne kukoka pa muchima: ne anweba mukamona kukokoloka kwa michima yenu. Mambo kikonkoji kyami kyawama, ne kisendwa kyami kyapela.”—Mat. 11:28-30.

Katatakatu Moba Apelako Akapwe!

16. Ano moba apelako akapwa byepi?

¹⁶ Ino ntanda iji mu moba apelako, nangwa’mba ‘mpelo ya buno bwikalo’ yatendekele mu 1914. (Mat. 24:3) Katatakatu “malwa akatampe” atongwele Yesu akamweke. (Tangai Mateo 24:21.) Ano malwa akatampe akonauna ntanda yonse ya kwa Satana. Bino nga ano malwa akatampe akatendeka byepi? Kabiji akapwa byepi?

17. Baibolo waamba kuba’mba malwa akatampe akatendeka byepi?

¹⁷ Malwa akatampe akatendeka kya kubazhimukilatu. Ee, ‘juba ja Yehoba’ jikeya mu kimye kya kubula kuketekela ne, ‘byo bakamba’mba, kwatalalatu, byonse byaikala bulongo.’ (Tangai 1 Tesalonika 5:2, 3.) Malwa aambijilwe jimo akeya mu kimye kyo bakalanguluka bantu amba baya bapwishe makatazho akatampe. Konaunwa kya kubazhimukilatu kwa “Babilona Mukatampe,” bufumu bwa ntanda yonse bwa bupopweshi bwa bubela ku kakankamika bantu. Bamfumu ne bantu bakwabo bakakumya bingi pa kumona Babilona Mukatampe waonaunwa.—Lum. 17:1-6, 18; 18:9, 10, 15, 16, 19.

18. Yehoba ukoba byepi kimye bantu banji kyo bakebalukuka kwi Satana?

¹⁸ Mu kimye kyakatazha kukekala “biyukilo mu juba, ne mu ñondo, ne mu tubangabanga” ne “kiyukilo kya Mwana muntu mwiulu.” Po po ‘tukenuka, ne kwinuna mitwe yetu; mambo bukuzhi bwetu ke buji pepi.’ (Luka 21:25-28; Mat. 24:29, 30) Satana nangwa’mba Gogi ukalukuka bantu ba Lesa na nzhita yanji. Bino Yehoba waambapo kutazha ku boba bakalukuka bakalume banji bakishinka amba: “Awa wimukozha anweba wauba nobe wamukozha Yehoba pa kantu ka pa jiso janji.” (Zeka. 2:8) Onkao mambo kulukukañana kwa kwa Satana kechi kukengila ne. Mambo ka? Mambo Nkambo Yehoba ukafikena kumuchibankanya ne kupokolola bakalume banji.—Ezi. 38:9, 18.

19. Mambo ka kyo twakonshesha kwikela na luketekelo kuba’mba nzhita ya Lesa ikonauna bintu byonse byuba Satana?

¹⁹ Umvwe Lesa waonauna mikoka ya bantu, po po ‘bakayuka’mba aye ye Yehoba.’ (Ezi. 36:23) Ukatuma nzhita yanji, ko kuba’mba biumbi ne biumbi bya bilengwa bya ku mupashi bikatangijilwa na Kilishitu Yesu konauna bufumu bonse bwa kwa Satana panopantanda. (Lum. 19:11-19) Umvwe twavuluka amba kimye kimo malaika umotu waipaile balwanyi ba kwa Lesa “biumbi kitota kimo ne biumbi makumi atanu na asatu ne biumbi bitanu,” twakonsha kwikala na luketekelo bingi kuba’mba nzhita ya mwiulu ikapelawizhatu konauna byonse byuba bufumu bwa kwa Satana panopantanda kimye malwa akatampe kyo akafika pa kankomo pa Amagedonyi. (2 Mfu. 19:35; Lum. 16:14, 16) Satana ne bandemona banji bakebakasa myaka kiumbi kimo. Kikapelako bakonaunwa.—Lum. 20:1-3.

20. Yehoba ukoba ka kupichila mu Bufumu?

²⁰ Ne mu jino jishinda mwiulu ne ntanda bikawamishiwa, kabiji bantu baoloka bakekala myaka ne myaka panopantanda. Yehoba ukamwesha kuba’mba ye Mupokolweshi Mwine. (Sala. 145:20) Kupichila mu Bufumu bwanji, ukatumbijika bumfumu bwanji, kuzhijika jizhina janji, ne kufikizha nkebelo yanji ikatampe panopantanda. Ikalai na lusekelo mu mwingilo wenu wa kusapwila mambo awama ne kukwasha ‘baji na michima ya bukishinka ya kukeba bumi bwa myaka’ kuyuka’mba katatakatu Bufumu bwa Lesa bukebapokolole!—Byu. 13:48.

Mubena Kukivuluka Nyi?

• Yesu walumbulwile byepi mwanemena Bufumu?

• Mambo ka kupokololwa kyo kubena kukebewa bingi luno kukila ne kala?

• Bi ka byo twakonsha kuketekela kumweka mu kimye kya malwa akatampe?

• Yehoba wimwesha byepi kuba’mba ye Mupokolweshi Mwine?

[Bipikichala pa peja 12]

Mambo a Lesa aambijile jimo mwingilo mukatampe wa kusapwila mu moba etu

[Kipikichala pa peja 15]

Byonka Yehoba byo apokolwele Nowa ne kisemi kyanji netuwa uketupokolola

[Kipikichala pa peja 16]

Yehoba “ukashimuna mipolo yonse . . . ; ne lufu kechi lukekalako jibiji ne.”—Lum. 21:4