Fwenyai Kwipi ne Lesa

“Lesa wa Bukwasho Bonse”

2 Kolinda 1:3, 4

BINTU byavula byubiwa mu bwikalo, nabiji kuyanda, kufichishiwa ku muchima kabiji ne kushala bunke, byakonsha kulengela muntu kwikala na binyenge ne kwiumvwa kupelelwa. Pa bimye bya uno mutundu, mwakonsha ke mulanguluke’mba, ‘Nakonsha kufumya kwepi bukwasho?’ Byambo byanembele mutumwa Paulo biji mu 2 Kolinda 1:3, 4 bimwesha Yehoba Lesa kwikala nsulo ya bukwasho bonse bo tukeba.

Mu kyepelo 3, Lesa watelwa’mba, “Shanja bya lusa.” Kino kyatala muka? Kyambo kya Kingiliki kyatuntululwa’mba “bya lusa” kyakonsha kulumbulula kumvwina lusa bakwenu babena kuyanda.a Buku umo wamba’mba kino kyambo kyakonsha kutuntululwa’mba “kumvwinanga bantu lusa” nangwa “kwibata muchima.” “Lusa” lo lulengela Lesa kukwasha bantu. Kuyuka kino kyubilo amba ke lubaji lwa bumuntu bwa Lesa, kwitulengela kukeba kufwenya kwipi ne aye, nanchi kechi ibyo nenyi?

Kabiji Paulo wamwesha Yehoba kwikala “Lesa wa bukwasho bonse.” Mu bino byambo, Paulo waingijisha kyambo kyavwangamo “mulanguluko wa kutekenesha muntu uji mu lukatazho nangwa bulanda kabiji ne mulanguluko wa kukwasha muntu kupichila mu kumubilapo kintu kimo.” Buku wa The Interpreter’s Bible walumbulula’mba: “Tukwashatu muntu ubena kuyanda umvwe twamukosesha kuchinchika makatazho o abena kupitamo.”

Mwakonsha ke mwipuzhe’mba, ‘Nanchi Lesa witukwasha byepi ne kwitukosesha kuchinchika makatazho o tupitamo?’ Uba bino javula kupichila mu Mambo anji, Baibolo, kabiji ne kupichila mu jishuko jo etupa ja lulombelo. Paulo witubula’mba Lesa mu butemwe witupa Mambo anji kuba’mba “mu bukwasho bwa binembelo twikale na luketekelo.” Kunungapo, kupichila mu milombelo ya kufuma panshi ya muchima twakonsha kwikala na “mutende wa Lesa ubula kuyukanyika.”—Loma 15:4; Filipai 4:7.

Nga Yehoba ukwasha bantu kufika pa kipimo ka? Paulo waamba’mba Lesa “witukwasha mu bya malwa byetu byonse.” (2 Kolinda 1:4) Kikale tubena kupita mu lukatazho lwa byepi nangwa byepi, Lesa wakonsha kwitukosesha ne kwitupa bulume bwa kuchinchika lolo lukatazho. Nanchi kuyuka bino kechi kwakonsha kwitutekenesha nenyi?

Lesa kechi ukwashatu muntu umo ne. Paulo watwajijila kwamba’mba Lesa witukwasha’mba “tukonshe kwibakwasha bamona bya malwa, nangwa bya byepi nangwa bya byepi, na bonkabwa bukwasho bo etukwasha nabo aye Lesa.” Umvwe twatambwila bukwasho bwa kuchinchika bya malwa, twakwashiwa kuba’mba ne atweba tumvwinenga bakwetu lusa kabiji ne kukwasha boba bakebewa bukwasho.

Byo aji “Lesa wa bukwasho bonse,” Yehoba kechi witukwasha kya kupwisha makatazho o tupitamo onse ponkapotu ne. Nangwa byonkabyo, twafwainwa kushiinwa na kino: Umvwe twamulomba bukwasho, wakonsha kwitukosesha kuchinchika bulanda nangwa makatazho akwabo o twakonsha kutalañana nao mu bwikalo. Uno Lesa wa lusa, kine ye yenka ye twafwainwa kupopwela ne kutota.

[Tubyambo twa mushi]