Kwingijila Lesa na “Muchima umo, ne Mweo Umo”
BAYUDEA ne bantu baalukile ne kutambwila mambo awama bakonkenejile kwajinga baana ba bwanga ba kwa Yesu Kilishitu. Jajinga juba ja Kijiilo kya Pentekosita, kabiji bano benyi baishile ku Yelusalema kufuma ku mapunzha a mwalepa nabiji ku Loma waikejile ku muzhika ne Pataliya waikejile ku musela. Bano bantu baumvwinenga milaka yapusana pusana. Bino, baana ba bwanga ba kwa Yesu baambilenga kwi abo bajinga bena Ngalilea. Benyi bamo bakuminye ne kwipuzha’mba: “Mambo ka ne atweba bonse, pa muntu pa muntu, ke tumvwe mu milaka yetu yo twasemenwamo?”—Byu. 2:8.
Mutumwa Petelo waimene ne kulondolola kyalengejile’mba akya kya kukumya kyo bamwenenga kikaleko. Bantu batambwijile mambo awama ponkapotu. Bantu bavula babatizhilwe! (Byu. 2:41) Kipwilo kyakomenenga bingi bukiji, kabiji kyakwatankene. Nembi wa Baibolo aye Luka washimwine’mba: “Jibumba ja baitabila bajingatu na muchima umo, ne mweo umo.”—Byu. 4:32.
Bantu bavula babatizhilwe pa juba ja Pentekosita mu 33 C.E. bakebele kushalako pacheche mu Yelusalema na kufunjilapo bintu bikwabo pa lwitabilo lwabo. Bino kechi benengezhejile jimo amba bakashale ne. Onkao mambo, kwajinga kupanako mali. Bamo ba mu lwitabilo befuukwijile abo bene kupotesha bipe byabo ne kuleta mali ku batumwa kuba’mba bakwashe boba bakebewenga bukwasho. (Byu. 2:42-47) Uno byo ajingapo muchima wawama wa butemwe ne bumpanyi!
Bena Kilishitu kimye kyonse bekala na uno muchima wa butemwe ne bumpanyi. Lelo jino, kipwilo kya bena Kilishitu kyatwajijila na kwingijila Yehoba saka kyakwatankana na “muchima umo, ne mweo umo.” Bena Kilishitu pa muntu pa muntu befuukwila kwingijisha kimye, bulume, ne mali abo pa kuba’mba basapwile mambo awama ne kutumbijika bintu bya Bufumu bwa Lesa.—Monai kabokoshi kaamba’mba: “Mashinda Afuukulapo Bamo Kupainamo.”
[Kitenguluzha pa peja 6, 7]
MASHINDA AFUUKULAPO BAMO KUPAINAMO
MIBINGU YA KWITEMENWA YA MWINGILO WA NTANDA YONSE
Bamo banengezhapo mwaba wa mali a kubika mu kabokoshi ka kubikamo mibingu panembwa’mba: “Mwingilo wa Ntanda Yonse.”
Pa ñondo pa ñondo, bipwilo bituma ano mali ku ofweshi wa Bakamonyi ba kwa Yehoba ukwasha mu byalo byabo. Mibingu ipanwa mu kwitemenwa yakonsha ne kutumwatu konka ku Watch Tower Bible and Tract Society of Pennsylvania, Box 33459, Lusaka 10101, nangwa ku ofweshi wa musampi wa Bakamonyi ba kwa Yehoba uji mu kyalo kyenu. Macheki atumwa ku keyala waambiwapo kala afwainwa kupanwa ku “Watch Tower.” Kabiji ne bipetu bikwabo nabyo byakonsha kupanwa. Kwikala ne kunembako nkalata ipitu ya kumwesha’mba buno bupe bo napana kechi nkebutambula ne.
LUNENGEZHO LWA KUPANA MALI LWAIMENA PA MIZHILO
Mali akonsha kupanwa ku Watch Tower and Tract Society of Pennsylvania a kwingijisha ntanda yonse. Nangwa byonkabyo, umvwe ano mali akebewa, akonsha kubwezhiwa kwi anweba. Umvwe mukeba kuyukilapo byambo bikwabo, mwane tuminai ku Ofweshi Utala pa Mali kupichila mu kwingijisha keyala waambiwapo kala nangwa kutumako foni kupichila mu kwingijisha ino nambala, (021) 1 272062.
LUNENGEZHO LUKWABO LWA KUPAINAMO BUPE
Kununga pa kupana bupe bwa kubula kutambula jibiji, kuji ne mashinda akwabo a kupainamo mali mu kukwasha mwingilo wa Bufumu wa ntanda yonse. Ano mashinda avwangamo:
Kwivimbila: Kipamo kya Watch Tower Bible and Tract Society of Pennsylvania kyakonsha kutongolwa kuba’mba kyo kyafwainwa kutambula mali a kwivimbila kwa bumi nangwa a penshonyi.
Kufisha Mali ku Banki: Mali aji ku banki, bipepala bya kufishishapo mali ku banki, nangwa mali a muntu watambula penshonyi akonsha kunengezhiwa nangwa kupanwa kimye kya lufu lwanji ku Watch Tower Bible and Tract Society of Pennsylvania, kwesakana na mizhilo ikebewa ku banki.
Bipe Nangwa Mali a Muntu pa Kampanyi ne Mali a Muntu o Akongwesha Kampanyi: Byakonsha kupanwa ku Watch Tower Bible and Tract Society of Pennsylvania kuba’mba ke bupe bwapanwa kwa kubula kutambula jibiji ne.
Bunonshi: Bunonshi bwakonsha kupanyiwa kupichila mu bupe bwa kubula kutambula jibiji, nangwa inge nzubo yo ibena kupanwa, ke kulamako mpunzha imo ya boba bapana bupe, bakonsha kutwajijila na kwikalapo mu myaka ya bumi bwabo. Tuminai ku ofweshi wa musampi uji mu kyalo kyenu saka mukyangye kupana kishimikwa.
Bupe bwa pa Mwaka: Bupe bwa pa mwaka ke lunengezho lulengela muntu kutwala mali nangwa kusunga mali ku kipamo kimo kingijisha Bakamonyi ba kwa Yehoba. Pano awa wapana oo mali, nangwa muntu mukwabo ye batongola ku mwine wapana mali wafwainwa kutambulanga mali atongolwa pa mwaka pa mwaka mu bumi bwanji bonse. Awa mwine wapana oo mali wafwainwa kutambulanga mali asubukapo mu yewo mwaka monka mwayila bupe bwa pa mwaka.
Buswe ne Mali Afiwa ku Kipamo: Bipe nangwa mali akonsha kupanwa ku Watch Tower Bible and Tract Society of Pennsylvania kupichila mu kunemba buswe kwesakana na mwayila mizhilo, nangwa kipamo kya Watch Tower Bible and Tract Society of Pennsylvania kyakonsha kutambulanga bobo bupe bupanwanga. Kipamo kibena kupana bupe ku bupopweshi nakyo kyakonsha kuba ke kifumyemo mali a musonko wakyo.
Monkatu mwatala byambo bya kuba’mba “lunengezho lukwabo lwa kupainamo bupe,” uno mutundu wa bupe bwa kwitemenwa bukebewa boba babena kwibupana kwinengezhezha jimo. Pa kuba’mba tukwashe bantu bakeba kumwenamo mu mwingilo wingila Bakamonyi ba kwa Yehoba kupichila mu bukwasho bwa kunengezhezha jimo, kwanengezhiwa buloshuwa wa mu Kizungu ne Kisipanishi uji na mutwe wa kuba’mba, Lunengezho lwa Kukwashishamo Mwingilo wa Bufumu wa Ntanda Yonse. (Charitable Planning to Benefit Kingdom Service Worldwide) Uno buloshuwa wanembelwe mu kupana byambo byaamba pa mashinda avula a kupainamo mali luno nangwa kimye kya lufu. Panyuma ya kutanga uno buloshuwa ne kwisamba na boba bakwashañana mu bya misonko ne kuyuka bingila misonko, bavula kibalengela kukwasha mwingilo wa mu bupopweshi bwetu ne kukwasha mingilo ingila bantu mwaya ntanda, kabiji kino kibalengela kumwenamo mfweto yabo. Uno buloshuwa mwakonshatu kwikala nanji kupichila mu kwipuzha ku Ofweshi wa Lunengezho Lwa Kupainamo Bupe. (Treasurer’s Office)
Umvwe mukeba kuyukilapo bikwabo, mwakonsha kwipuzha ku Ofweshi wa Lunengezho Lwa Kupainamo Bupe, kupichila mu kunemba nkalata nangwa kutumako foni, kwingijisha keyala walondelapo, nangwa mwakonsha kwipuzha ku ofweshi wa musampi uji mu kyalo kyenu.
Treasurer’s Office
Watch Tower Bible and Tract Society of Pennsylvania
Box 33459, Lusaka 10101
Nambala ya lamya: (021) 1 272062