Nanchi Mumwena Lusekelo mu ‘Kupana na Muchima Yense’ Nyi?
BENA KILISHITU batanshi mu Filipai bayukanyikilwe na mambo a muchima wabo wa bumpanyi wa kutundaika mpopwelo ya kine. Mu nkalata yo ebanembejile, mutumwa Paulo wanembelemo’mba: “Kimye kyonse namusanchila bingi Lesa byo nemuvuluka mu milombelo yami ya misashijilo yo nemulombelako anweba bonse. Na lusekelo nemulombelako anweba bonse namisashijilo mambo mwalengela mambo awama kwenda bulongo kufumatu kimye kitanshi kufika ne kino kimye.” (Fili. 1:3-5) Paulo wavulukile Lidiya ne kisemi kyanji byo babatizhiwe kabiji ne byo batwajijile kwibasashijila pamo na bakwabo kuba’mba bafikile mu nzubo yabo.—Byu. 16:14, 15.
Byo papichile kimye kicheche, kipwilo kyo balengeletu katataka mu Filipai kyamutumijile Paulo bya bupe bimye bibiji byo aikele mu Tesalonika na bakwabo ba mu lwitabilo palepele makilomita 160. (Fili. 4:15, 16) Panyuma ya kupitapo myaka icheche, balongo bena Filipai ne bena Makedonya bamanaminenga kabiji “bajinga bayanji,” baumvwine lumanamo lwapichilengamo bena Kilishitu mu Yelusalema kabiji bakebele mashinda mwakwibakwashisha. Paulo waitabizhe kino’mba “bapaine kukila ne pa bintu byo bajinga nabyo.” Nangwa byonkabyo, Paulo wanembele’mba: “Betusashijila na mukoyo pa mambo a kupana bya bupe.”—2 Ko. 8:1-4; Loma 15:26.
Byo papichile myaka jikumi panyuma ya kuba bena Filipai batambwila bwina Kilishitu, batwajijile kumwesha muchima wabo wa bumpanyi. Byo baumvwine’mba Paulo bamukasa mu Loma, batumine Epafolodita kuya ku kyalo kwalepele makilomita 1,287 kutwajila bukwasho uno mutumwa. Kyamweka bena Filipai bakebelenga kukwasha Paulo pa kuba’mba atwajijile kukosesha balongo ne kusapwila, nangwatu kimye kyo bamukashile.—Fili. 1:12-14; 2:25-30; 4:18.
Lelo jino, bena Kilishitu bakine bekimona kwikala jishuko bingi kutundaika mwingilo wa kusapwila Bufumu ne kulenga baana ba bwanga. (Mat. 28:19, 20) Batundaika bintu bya Bufumu kwingijisha kimye kyabo, bulume ne mali abo. Mu kitenguluzha muji mashinda amo o mwakonsha kwingijisha kutundaikilamo mwingilo wa Lesa.
[Kakitenguluzya pa peja 22, 23]
MASHINDA AFUUKULAPO BAMO KUPAINAMO MIBINGU
MIBINGU IBINGULWA KU MWINGILO WA NTANDA YONSE
Bavula banengezhapo mwaba wa mali a kubika mu ka kibokoshi ka mibingu panembwa’mba: “Mwingilo wa Ntanda Yonse.”
Pa ñondo pa ñondo, bipwilo bituma ano mali ku ofweshi wa Bakamonyi ba kwa Yehoba ukwasha mu byalo byabo. Mibingu ya mali apanwa mu kwitemenwa yakonsha kutumwa ku Watch Tower Society, Attention Treasury, P.O. Box 33459, Lusaka 10101, nangwa ku ofweshi wa musampi wa Bakamonyi ba kwa Yehoba ukwasha kyalo kyenu. (Mibingu ipanwa mu kwitemenwa yanembwa panshi po nayo yafwainwa kutumwa ku ofweshi wa musampi wa Bakamonyi ba kwa Yehoba ukwasha kyalo kyenu.) Macheki atumwa kwingijisha keyala waambiwapo kala afwainwa kupanwa ku “Watch Tower Society.” Kabiji ne bipetu bikwabo nabyo byakonsha kupanwa. Kwikala ne kunembako nkalata ipitu ya kumwesha’mba buno bupe bo napana kechi nkebutambula ne.
LUNENGEZHO LWA KUPANA MALI LWAIMENA PA MIZHILO
Mali akonsha kupanwa ku Watch Tower Bible and Tract Society of Pennsylvania a kwingijisha ntanda yonse. Nangwa byonkabyo, umvwe ano mali akebewa, akonsha kubwezhiwa kwi anweba.
BUKWASHO BWA KUNENGEZHEZHA JIMO
Kununga pa kupana bupe bwa kubula kutambula jibiji, kuji ne mashinda akwabo a kupainamo mibingu mu kukwasha mwingilo wa Bufumu wa ntanda yonse. Ano mashinda avwangamo:
Kwivimbila: Kipamo kya Watch Tower Bible and Tract Society of Pennsylvania kyakonsha kutongolwa kuba’mba kyo kyafwainwa kutambula mali a kwivimbila kwa bumi nangwa a penshonyi.
Kufisha Mali ku Kipao: Mali aji ku kipao, bipepala bya kufishishapo mali ku kipao, nangwa mali a muntu watambula penshonyi akonsha kunengezhiwa nangwa kupanwa kimye kya lufu lwanji ku Watch Tower Bible and Tract Society of Pennsylvania, kwesakana na mizhilo ikebewa ku kipao.
Bipe Nangwa Mali a Muntu pa Kampanyi ne Mali a Muntu o Akongwesha Kampanyi: Bino bintu byakonsha kupanwa ku Watch Tower Bible and Tract Society of Pennsylvania kuba’mba ke bupe bwapanwa bukabula kubwezhiwa nangwa amba ba Watch Tower Bible and Tract Society of Pennsylvania kuba amba bo Bakatambula buno bupe inge mwine Wafwa.
Bishimikwa ne Mpunzha: Bishimikwa nangwa mpunzha byakonsha kupanwa kupichila mu bupe bwakubula kutambula jibiji, kyakumwenako, awa wapana nzubo wakonsha kukitwajijila kwikalamo myaka ya bumi bwanji bonse.
Bupe bwa pa Mwaka: Bupe bwa pa mwaka ke lunengezho lulengela muntu kutwala mali nangwa kusungisha mali ku kipamo kimo kingijisha Bakamonyi ba kwa Yehoba. Pano awa wapana oo mali, nangwa muntu mukwabo ye batongola ku mwine wapana mali wafwainwa kutambulanga mali atongolwa pa mwaka pa mwaka mu bumi bwanji bonse.
Buswe ne Mali Afiwa ku Kipamo: Bipe nangwa mali akonsha kupanwa ku Watch Tower Bible and Tract Society of Pennsylvania kupichila mu kunemba buswe (will) kwesakana na mwayila mizhilo, nangwa kipamo kya Watch Tower Bible and Tract Society of Pennsylvania kyakonsha kutambulanga bobo bupe. Kipamo kibena kupana bupe ku bupopweshi nakyo kyakonsha kuba ke kifumyemo mali a musonko wakyo.
Monkatu mwatala byambo bya kuba’mba “bukwasho bwa kunengezhezha jimo,” ano mashinda a kupainamo bupe bwa kwitemenwa bukebewa boba babena kwibupana kwinengezhezha jimo. Tuminai ku ofweshi wa musampi uji mu kyalo kyenu saka mukyangye kupana buno bupe bwaimena pa mizhilo nangwa saka mukyangye kupana bukwasho bwa kunengezhezha jimo.