‘Twayai Tupane Milambo kwi Yehoba’
UMVWE kya kuba muntu wimubila lusa ne kwimukwasha, mumwesha byepi amba mwasanta? Akimonai bakulumpe ba nzhita mu Isalela byo bamwesheshe lusanchilo panyuma ya kulwa nkondo na bena Mijanyi. Ino nkondo beilwile panyuma ya kuba bena Isalela balenga mambo a kupopwela Baela wa ku Peola. Lesa wakwashishe bantu banji kushinda nkondo kabiji bashilikale 12,000 baabene bipukulwa na bena Isalela. Kwesakana na byakambizhe Yehoba, bashilikale bena Isalela bapainepo bipe bimo ku bañanga kabiji ne bena Isalela bakwabo nabo bapainepo bimo ku bena Levi.—Bala. 31:1-5, 25-30.
Pano bino, bano bakulumpe banzhita bakebelenga ne kuba bintu bikwabo. Bamubujile Mosesa amba: “Bakalume benu babalaula bantu ba nkondo bonka baikala mu bipanyi byetu bo tukambizha, bino ka paji nangwa umo watayikamo mwi atweba ne.” Bafuukwilepo kupana milambo ya ngolode ne bintutu bikwabo bya buneme kwikala ke milambo ya Yehoba. Bino byonse bya buneme bya ngolode byo bapaine byanemene makilogalamu 190.—Bala. 31:49-54.
Ne lelo jino bantu bakeba kumwesha lusanchilo pa bintu bibobila Yehoba. Kabiji bakalume ba Lesa bepana kechi bo bonka bakeba kumwesha luno lusanchilo ne. Akimonai kino kyakumwenako kya kwa dalaivwa wa sakya watwajilenga benyi bavula ku kibanza kya ndeke ne kwibabwezha bayilenga na kutanwa ku kukonkana kwa byalo kwaikejile mu muzhi wa Bologna mu Italy, mu mwaka wa 2009. Na mambo a kuba uno dalaivwa wamwesheshe muchima wawama ne kwendesha bulongo motoka, aba bakanjijile mu uno motoka wanji bamunembejile nkalata ya kumusanchila ne kumubikilamo mali a nsubu pamo ne buku wa Nanchi Baibolo Kine Ufunjisha’mba Ka? Byo atambwijile bino bintu, Dalaivwa wakumbwile amba: “Natambwila na lusekelo ino nkalata ne buku, pano bino mbena kubwezha ano mali mambo nkeba kubingulako pa kuba amba mutwajijile na mwingilo ye mubena kwingila. Nangwa kya kuba kechi ne Kamonyi wa kwa Yehoba ne, mbena kukeba kubingulako mambo nemwena na meso amba muba bintu mu butemwe.”
Inge mukeba kumwesha lusanchilo pa bintu byonse bimubila Yehoba, jishinda jimo jo mwakonsha kubilamo bino ke kupichila mu kubingulako ku mwingilo wa ntanda yonse ubena kwingila Bakamonyi ba kwa Yehoba. (Mat. 24:14) Mashinda afuukulapo bamo kupainamo mibingu aji mu kakitenguluzha.
[Kitenguluzha pa peja 20, 21]
MASHINDA AFUUKULAPO BAMO KUPAINAMO MIBINGU
MIBINGU IBINGULWA KU MWINGILO WA NTANDA YONSE
Bavula banengezhapo mwaba wa mali a kubika mu ka kibokoshi ka mibingu panembwa’mba: “Mwingilo wa Ntanda Yonse.”
Pa ñondo pa ñondo, bipwilo bituma ano mali ku ofweshi wa Bakamonyi ba kwa Yehoba ukwasha mu byalo byabo. Mibingu ya mali apanwa mu kwitemenwa yakonsha kutumwa ku Watch Tower Society, Attention Treasury, P.O. Box 33459, Lusaka 10101, nangwa ku ofweshi wa musampi wa Bakamonyi ba kwa Yehoba ukwasha kyalo kyenu. (Mibingu ipanwa mu kwitemenwa yanembwa panshi po nayo yafwainwa kutumwa ku ofweshi wa musampi wa Bakamonyi ba kwa Yehoba ukwasha kyalo kyenu.) Macheki atumwa kwingijisha keyala waambiwapo kala afwainwa kupanwa ku “Watch Tower Society.” Kabiji ne bipetu bikwabo nabyo byakonsha kupanwa. Kwikala ne kunembako nkalata ipitu ya kumwesha’mba buno bupe bo napana kechi nkebutambula ne.
LUNENGEZHO LWA KUPANA MALI LWAIMENA PA MIZHILO
Mali akonsha kupanwa ku Watch Tower Bible and Tract Society of Pennsylvania a kwingijisha ntanda yonse. Nangwa byonkabyo, umvwe ano mali akebewa, akonsha kubwezhiwa kwi anweba.
BUKWASHO BWA KUNENGEZHEZHA JIMO
Kununga pa kupana bupe bwa kubula kutambula jibiji, kuji ne mashinda akwabo a kupainamo mibingu mu kukwasha mwingilo wa Bufumu wa ntanda yonse. Ano mashinda avwangamo:
Kwivimbila: Kipamo kya Watch Tower Bible and Tract Society of Pennsylvania kyakonsha kutongolwa kuba’mba kyo kyafwainwa kutambula mali a kwivimbila kwa bumi nangwa a penshonyi.
Kufisha Mali ku Kipao: Mali aji ku kipao, bipepala bya kufishishapo mali ku kipao, nangwa mali a muntu watambula penshonyi akonsha kunengezhiwa nangwa kupanwa kimye kya lufu lwanji ku Watch Tower Bible and Tract Society of Pennsylvania, kwesakana na mizhilo ikebewa ku kipao.
Bipe Nangwa Mali a Muntu pa Kampanyi ne Mali a Muntu o Akongwesha Kampanyi: Bino bintu byakonsha kupanwa ku Watch Tower Bible and Tract Society of Pennsylvania kuba’mba ke bupe bwapanwa bukabula kubwezhiwa nangwa amba ba Watch Tower Bible and Tract Society of Pennsylvania kuba amba bo Bakatambula buno bupe inge mwine Wafwa.
Bishimikwa ne Mpunzha: Bishimikwa nangwa mpunzha byakonsha kupanwa kupichila mu bupe bwakubula kutambula jibiji, kyakumwenako, awa wapana nzubo wakonsha kukitwajijila kwikalamo myaka ya bumi bwanji bonse.
Bupe bwa pa Mwaka: Bupe bwa pa mwaka ke lunengezho lulengela muntu kutwala mali nangwa kusungisha mali ku kipamo kimo kingijisha Bakamonyi ba kwa Yehoba. Pano awa wapana oo mali, nangwa muntu mukwabo ye batongola ku mwine wapana mali wafwainwa kutambulanga mali atongolwa pa mwaka pa mwaka mu bumi bwanji bonse.
Buswe ne Mali Afiwa ku Kipamo: Bipe nangwa mali akonsha kupanwa ku Watch Tower Bible and Tract Society of Pennsylvania kupichila mu kunemba buswe (will) kwesakana na mwayila mizhilo, nangwa kipamo kya Watch Tower Bible and Tract Society of Pennsylvania kyakonsha kutambulanga bobo bupe. Kipamo kibena kupana bupe ku bupopweshi nakyo kyakonsha kuba ke kifumyemo mali a musonko wakyo.
Monkatu mwatala byambo bya kuba’mba “bukwasho bwa kunengezhezha jimo,” ano mashinda a kupainamo bupe bwa kwitemenwa bukebewa boba babena kwibupana kwinengezhezha jimo. Tuminai ku ofweshi wa musampi uji mu kyalo kyenu saka mukyangye kupana buno bupe bwaimena pa mizhilo nangwa saka mukyangye kupana bukwasho bwa kunengezhezha jimo.