Kupana na Muchima wa Lusekelo
PA MAMBO a kupana, mutumwa Paulo wanembele’mba: “Bonse pa muntu pa muntu bobe monka mo bafukwila mu michima yabo,” kabiji wanungilepo amba: “Kechi bapane na butanyi ne, nangwa na mambo a kukanjikizha ne: mambo Lesa watemwa upana na lusekelo.” (2 Ko. 9: 7) Yehoba kechi ukanjikizha muntu kuba’mba kanatu atundaike mpopwelo ya kine ne. Ukeba bakalume banji kumwesha amba bakeba kwingila kupichila mu kwipana abo bene ne kupana na lusekelo. Mwapita bwikalo bwa bantu, bantu banji bakeba kuba bino na kizaku. Monai bino bya kumwenako bisatu.
Yehoba byo afumishe bena Isalela mu Ijipita, wibambijile kulenga tente wa lusambakeno. Kwakebewenga bipe bya kwingijisha, onkao mambo bena Isalela bebambijile kupana bino bintu. Kino kyalengejile “bonse bajinga na michima yasumininwa” kuleta ngolode, siliva, bya kwikobaika kobaika ne bintutu bikwabo. Bantu bapaine bingi kya kuba babijika ne kubijika amba kyapwa lekai kupana. —Lupu. 35: 5, 21; 36: 6, 7.
Nzubo ya Lesa byo yakebewenga kwiishimika mu myaka yalondejilepo, bantu ba Lesa bajinga jibiji na jishuko ja kukwasha mpopwelo ya kine. Mfumu Davida wapaine bupe bwabaya bingi ku uno mwingilo ne kwambila bantu nabo ku ba’mba bapaneko bupe. Bantu nabo befuukwijile kupana. Kya kine, bupe bo bapaine bwa ngolode ne siliva kwa kubula kubajilako bintu bikwabo ne, bwakijile pa madola 100 bilyonyi inge mu mali a ano moba. Bantu basangalele bingi pa bupe bo bapaine kwi Yehoba na muchima wa lusekelo. —1 Moba. 29: 3-9; 2 Moba. 5: 1.
Baana ba bwanga batanshi ba kwa Kilishitu nabo bamwesheshe muchima wa kupana na lusekelo. Pa juba ja Pentekosita mu 33 C.E., bantu nobe 3,000 babatizwe, kabiji bavula mwi abo kechi bajinga bangikazhi ba mu Yelusalema ne. Pa kuba’mba aba bakajijilwe bashale mu yewa muzhi na kufunjilapo bikwabo pa mambo a lwitabilo lo baikele nalo, bena Kilishitu bapaine bupe bwa kwibakwasha. Balongo bapoteshe bipe byabo ne kuleta mali ku batumwa pa kuba’mba bakwashishemo boba bakajijilwe. Yehoba byo atemenwepo pa kumona lolwa lwitabilo ne butemwe! —Byu. 2: 41-47.
Lelo jino, bena Kilishitu batwajijila kutundaika mpopwelo ya kine kupichila mu kwifuukwila kupana na lusekelo kimye, bulume ne mali abo. Kakitenguluzha kalondelapo kaambapo mashinda amo o mwakonsha kupainamo.
[Kitenguluzha pa peja 18, 19]
MASHINDA AFUUKULAPO BAMO KUPAINAMO
MIBINGU YA KWITEMENWA YA MWINGILO WA NTANDA YONSE
Bamo banengezhapo mwaba wa mali a kubika mu ka kibokoshi ka mibingu panembwa’mba: “Mwingilo wa Ntanda Yonse.”
Pa ñondo pa ñondo, bipwilo bituma ano mali ku ofweshi wa Bakamonyi ba kwa Yehoba ukwasha mu byalo byabo. Mibingu ipanwa mu kwitemenwa yakonsha kutumwa ku Watch Tower Bible and Tract Society of Pennsylvania, Box 33459, Lusaka 10101. (Mibingu ipanwa mu kwitemenwa yanembwa panshi po nayo yafwainwa kutumwa ku ofweshi wa musampi wa Bakamonyi ba kwa Yehoba wa mu kyalo kyenu.) Macheki atumwa kwingijisha keyala waambiwapo kala afwainwa kupanwa ku “Watch Tower.” Kabiji ne bipetu bikwabo nabyo byakonsha kupanwa. Kwikala ne kunembako nkalata ipitu ya kumwesha’mba buno bupe bo napana kechi nkebutambula ne.
LUNENGEZHO LWA KUPANA MALI LWAIMENA PA MIZHILO
Mali akonsha kupanwa ku Watch Tower and Tract Society of Pennsylvania a kwingijisha ntanda yonse. Nangwa byonkabyo, umvwe ano mali akebewa, akonsha kubwezhiwa kwi anweba. Umvwe mukeba kuyukilapo byambo bikwabo, mwane tuminai ku Ofweshi Utala pa Mali kupichila mu kwingijisha keyala waambiwapo kala nangwa kutumako foni kupichila mu kwingijisha ino nambala, (021) 1 272062.
BUKWASHO BWA KUNENGEZHEZHA JIMO
Kununga pa kupana bupe bwa kubula kutambula jibiji, kuji ne mashinda akwabo a kupainamo mali mu kukwasha mwingilo wa Bufumu wa ntanda yonse. Ano mashinda avwangamo:
Kwivimbila: Kipamo kya Watch Tower Bible and Tract Society of Pennsylvania kyakonsha kutongolwa kuba’mba kyo kyafwainwa kutambula mali a kwivimbila kwa bumi nangwa a penshonyi.
Kufisha Mali ku Kipao: Mali aji ku kipao, bipepala bya kufishishapo mali ku kipao, nangwa mali a muntu watambula penshonyi akonsha kunengezhiwa nangwa kupanwa kimye kya lufu lwanji ku Watch Tower Bible and Tract Society of Pennsy lvania, kwesakana na mizhilo ikebewa ku kipao.
Bipe Nangwa Mali a Muntu pa Kampanyi ne Mali a Muntu o Akongwesha Kampanyi: Byakonsha kupanwa ku Watch Tower Bible and Tract Society of Pennsylvania kuba’mba ke bupe bwapanwa kwa kubula kutambula jibiji ne.
Bishimikwa ne Mpunzha: Bishimikwa nangwa mpunzha byakonsha kupanyiwa kupichila mu bupe bwa kubula kutambula jibiji, kya kumwenako nzubo yapanwa yakonsha kwikala mu maboko a Watch Tower, bino saka bakikalamo abo bene beipana myaka ya bumi bwabo bonse. Tuminai ku ofweshi wa musampi uji mu kyalo kyenu saka mukyangye kupana kishimikwa nangwa mpunzha.
Bupe bwa pa Mwaka: Bupe bwa pa mwaka ke lunengezho lulengela muntu kutwala mali nangwa kusungisha mali ku kipamo kimo kingijisha Bakamonyi ba kwa Yehoba. Pano awa wapana oo mali, nangwa muntu mukwabo ye batongola ku mwine wapana mali wafwainwa kutambulanga mali atongolwa pa mwaka pa mwaka mu bumi bwanji bonse. Awa mwine wapana oo mali wafwainwa kutambulanga mali asubukapo mu yewo mwaka monka mwayila bupe bwa pa mwaka.
Buswe ne Mali Afiwa ku Kipamo: Bipe nangwa mali akonsha kupanwa ku Watch Tower Bible and Tract Society of Pennsylvania kupichila mu kunemba buswe kwesakana na mwayila mizhilo, nangwa kipamo kya Watch Tower Bible and Tract Society of Pennsylvania kyakonsha kutambulanga bobo bupe. Kipamo kibena kupana bupe ku bupopweshi nakyo kyakonsha kuba ke kifumyemo mali a musonko wakyo.
Monkatu mwatala byambo bya kuba’mba “bukwasho bwa kunengezhezha jimo,” uno mutundu wa bupe bwa kwitemenwa bukebewa boba babena kwibupana kwinengezhezha jimo. Pa kuba amba tukwashe bantu bakeba kumwenamo mu mwingilo wingila Bakamonyi ba kwa Yehoba kupichila mu bukwasho bwa kunengezhezha jimo, kwanengezhiwa buloshuwa wa mu Kizungu ne Kisipanishi uji na mutwe wa kuba’mba, Bukwasho bwa Kunengezhezha Jimo bwa Kukwashishamo Mwingilo wa Bufumu wa Ntanda Yonse. (Charitable Planning to Benefit Kingdom Service World wide) Uno buloshuwa wanembelwe kubulañenamo mashinda apusana pusana a kupainamo mali luno nangwa kimye kya lufu. Panyuma ya kutanga uno buloshuwa ne kwisamba na boba bakwashañana mu bya misonko ne kuyuka bingila misonko, bavula kibalengela kukwasha mingilo ya mu bupopweshi bwetu ne kukwasha mingilo ingila bantu mwaya ntanda, kabiji kino kibalengela kumwenamo mfweto. Uno buloshuwa mwakonshatu kwikala nanji kupichila mu kwipuzha ku Ofweshi Utala pa Mali. (Treasurer’s Office)
Umvwe mukeba kuyukilapo bikwabo, mwakonsha kwipuzha ku Ofweshi Utala pa Mali, kupichila mu kunemba nkalata nangwa kutumako foni.
Treasurer’s Office
Watch Tower Bible and Tract Society of Pennsylvania
Box 33459, Lusaka 10101
Nambala ya lamya: (021) 1 272062