Lesa ye Ñanyi?
BUNO bwipuzho mwakonsha kwibukumbula mba ka? Bamo bamba’mba bamuyuka Lesa bulongo—kuba’mba ye mulunda nabo wa pa muchima. Bakwabo nabo balanguluka’mba Lesa ke mulongo wabo wikala kwalepa. Baitabila’mba ko aji, pano bino bayukakotu bicheche pe aye. Umvwe mwaitabila mwi Lesa, mwakonsha kukumbula’mba ka ano mepuzho aji panshipo?
1. Nanchi Lesa muntu wa kine nyi?
2. Nanchi Lesa uji na jizhina nyi?
3. Nanchi Yesu ye Lesa wa Bulume Bonse nyi?
4. Nanchi Lesa wanta muchima nyi?
5. Nanchi Lesa utambwila mpopwelo yonse nyi?
Umvwe mwaipuzha bantu ano mepuzho, bakonsha kwimupa mikumbu yapusana pusana. Onkao mambo, kechi twakonsha kukumya kuba’mba bantu baketekela mu bishimitu ne kwikala na mweno yatama pe Lesa ne.
Ene Mambo Mikumbu o Yanemena
Yesu Kilishitu byo aambilenga na mwanamukazhi ye asambakene ku mushima, wamwesheshe ene mambo o kyanemena kuyuka bukine pe Lesa. Uno mwanamukazhi mwina Samaliya waitabile’mba kine Yesu wajinga ngauzhi. Pano bino, kuji kintu kimo kyamukatezhe bingi ku muchima. Bupopweshi bwa kwa Yesu bwapuseneko na bwanji. Byo ambile pa kino kintu kyamwikele ku muchima, Yesu waambijile uno mwanamukazhi’mba: “Anweba mubenakupopwela kyo mwabula kuyuka.” (Yoano 4:19-22) Kyamweka Yesu wafunjishenga’mba bantu bonse betela’mba bena Lesa, kechi bonse bamuyuka kya kine ne.
Nanchi byambo byaambile Yesu bimwesha’mba kafwako wakonsha kuyuka Lesa kya kine nenyi? Ine. Yesu watwajijile kwambila uno mwanamukazhi’mba: “Bakebapopwelanga Batata bapopweshi ba kine na Mupashi ne na bukine: mambo bo bo bakeba Batata amba, Bampopwele.” (Yoano 4:23) Nanchi ne anweba muji pa boba bapopwela Lesa “na Mupashi ne na bukine” nyi?
Kyanema bingi kwi anweba kumona’mba mwakumbula buno bwipuzho. Mambo ka? Yesu wamwesheshe ene mambo o twafwainwa kwikela na maana alumbuluka byo alombele’mba: ‘Buno bo bumi bwa myaka, namba bafundenga maana a kwimuyuka, anweba, Lesa yenka wa kine, ne Yesu Kilishitu ye mwatumine.’ (Yoano 17:3) Ee kine, jishuko jenu ja bwikalo bwa kulutwe jaimena pa kuyuka bukine pe Lesa!
Nanchi kyakonsheka kuyuka bukine pe Lesa nyi? Ee kyakonsheka! Pano, mwakonsha kwibutana byepi buno bukine? Yesu witongwele’mba: “Amiwa ne jishinda, ne bukine, ne bumi: ka paji wiya kwi Batata ne, poso pe amiwa.” (Yoano 14:6) Kabiji waambile ne kuba’mba: “Kafwako wayuka Batata ne poso yenka Mwana, ne abo bantu bo aswa aye Mwana kwibasolwelaye.”—Luka 10:22.
Onkao mambo, mashinda a kuyukilamo Lesa atanwa mu bintu byafunjishenga Yesu Kilishitu, Mwana Lesa. Kabiji Yesu witulaya’mba: ‘Anweba inge mukelwe monka mu mambo ami, abya kine mwi baana bami ba bwanga; ne anweba mukebuyuka bukine, ne abo bukine bukemukasulula ke baana ba bene.’—Yoano 8:31, 32.
Pano, nga Yesu wakonsha kukumbula’mba ka ano mepuzho atanu aji ku ntendekelo?
[Kipikichala pa peja 4]
Nanchi mupopwela Lesa ye mwabula kuyuka kya kine nyi?