Nanchi Lesa Wanta Muchima Nyi?
Bantu javula bakumbula’mba:
▪ “Lesa wakila mu kunema kechi wakonsha kutako muchima ku makatazho ami ne.”
▪ “Namona kuba’mba Lesa kechi wanta muchima ne.”
Nga Yesu waambilepo’mba ka?
▪ “Lelo tuñonyi tutanu, kechi tupotwa na tufaladina tubijinyi? Kabiji mwi ato ka muji kamo kalubiwa ku meso a Lesa ne. Pakuba nsuki yenu yonse ya ku mutwe beibala. Kange mube moyo ne; pakuba mwanema kukila tuñonyi twavula.” (Luka 12:6, 7) Kwa kubula nangwa kuzhinaukatu ne, Yesu wafunjishe kuba’mba Lesa wituta bingi muchima.
▪ “Byonkabi kechi mubambishe michima yenu’mba, lelo tusakuja ka? Nangwa’mba, Lelo byo tusakuvwala ibi ka? Mambo bino byonse bisaka Bagentila. Pakuba Shenu wa mwiulu wayuka’mba, bino byonse mwibifwainwa.” (Mateo 6:31, 32) Yesu wasumininwe kuba’mba Lesa wayuka byo tukeba.
BAIBOLO kine waamba’mba Lesa wituta muchima. (Salamo 55:22; 1 Petelo 5:7) Umvwe wituta muchima, mambo ka bantu kyo babena kuyanjila lelo jino? Inge Lesa wa butemwe kabiji wa bulume bonse, mambo ka o abujila kufumyapo buyanji?
Uno mukumbu wavwangamo bukine bwabula kuyukanyikwa ku bantu bavula bwa kuba’mba Satana Diabola ye ubena kulama ino ntanda ibi. Kimye kyo amwesekele Yesu, Satana wamumwesheshe bufumu bonse bwa panopantanda ne kwamba’mba: “Nkemupa lusa lwa bino byonsetu ne lukumo lwabyo, mambo byapanwa kwi amiwa, ne kwi yewa ye naswa, mpanabyo.”—Luka 4:5-7.
Ñanyi walengele Satana kalama wa ino ntanda? Bansemi betu batanshi ba Adama ne Evwa, byo baumvwijile Satana ne kufutukamo Lesa mu jishinda jikwabo, basajilepo Satana kwikala kalama wabo. Kufuma kimye kyo basatukile, Yehoba Lesa mu butekanye bwanji wapana kimye kya kumwesheshamo’mba bukalama bwa kwa Satana bwakankalwa. Yehoba kechi ukanjikizha bantu kumwingijila ne, pano bino witushinkwila jishinda ja kubwelelamo kwi aye.—Loma 5:10.
Na mambo a kuba Lesa wituta muchima, wabikako lunengezho lwa kuba’mba Yesu etupokolole ku bukalama bwa kwa Satana. Mu kimye kya kulutwe, Yesu ‘ukamuvuluñanya ke watu awa wajinga na bulume bwa lufu, ko kuba’mba, Diabola.’ (Bahebelu 2:14) Inge wauba bino, ‘ukonauna mingilo ya Diabola.’—1 Yoano 3:8.
Paladisa ukabwela panopantanda. Pa kyokya kimye, “Lesa ukashimuna mipolo yonse ku meso abo [bantu]; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne. Bintu bitanshi byapichijila.”—Lumwekesho 21:4, 5.a
[Tubyambo twa mushi]
a Umvwe mukeba kuyukilapo byavula pa ene mambo Lesa o aswishisha buyanji, monai kitango 11 mu buku wa Nanchi Baibolo Kine Ufunjisha’mba Ka? wanembwa na Bakamonyi ba kwa Yehoba.
[Mabulañano pa peja 8]
Paladisa ukabwela panopantanda