Anweba Banabalume, Ikalai Na Butemwe Bwa Kilishitu

PA JUBA japeleleko ja bumi bwanji panopantanda, Yesu waambijile batumwa banji bakishinka amba: ‘Mukambizho mupya nemupa anweba, namba mwitemwe anwe bene na bene; byonka byo nemutemwa amiwa, ne anweba mwitemwe anwe bene na bene. Pa kyo kino po po bakayukila bonse amba anweba mwi baana bami ba bwanga, inge mwitemwe anwe bene na bene.’ (Yoa. 13:34, 35) Kya kine, bena Kilishitu ba kine bafwainwa kwitemwa bene na bene.

Byo aambile mu kushinkamika ku banabalume ba bwina Kilishitu, mutumwa Paulo wanembele’mba: “Anweba banabalume, temwai bakazhi benu, byonka byo atemenwe Kilishitu kipwilo, ne kwipana mwine na mambo a akyo.” (Efi. 5:25) Nanchi mwanamulume wa bwina Kilishitu wakonsha kwingijisha byepi lujimuno luji mu kino Kinembelo mu masongola anji, kikatakata inge mukazhanji waikala kalume wipana kwi Yehoba?

Kilishitu Watemenwe Kipwilo

Baibolo waamba’mba: “Kyafwainwa banabalume nabo kutemwa bakazhi babo bene pamo nobe mibiji yabo abo bene. Awa watemwa mukazhanji, witemwa ne aye mwine: mambo kafwako muntu nangwa umo ushikwapo mubiji wanji mwine ne; kana kumujisha ne kumulela bulongo, byonka byo oba Kilishitu na kipwilo.” (Efi. 5:28, 29) Yesu watemenwe bingi baana banji ba bwanga ne kwibalama bulongo. Nangwa kya kuba bajinga babula kulumbuluka, wibatekenye ne kwibobila lusa. Byo akebeshe “amba epekyo aye mwine ke kipwilo kya lukumo,” watele muchima pa byubilo byawama byajinga na baana banji ba bwanga.—Efi. 5:27.

Byonkatu Kilishitu byo atemenwe kipwilo, ne mwanamulume naye wafwainwa kutemwa mukazhanji mu byambo ne mu byubilo. Mukazhi ye batemwa jonse ku mwatawanji umvwa bingi bulongo ne kwikala wa lusekelo. Pano mwanamukazhi uji na byonse byo akeba mu nzubo yawama wakonsha kwikala kwa kubula lusekelo inge kechi bamuta muchima ku mwatawanji ne.

Nanchi mwanamulume umwesha byepi amba watemwa mukazhanji? Ubula bakwabo amba awe ye mukazhami mu jishinda ja mushingi ne kumutakaika ku bantu pa mambo a bintu byawama byo oba. Inge kya kuba mukazhanji waingila bulongo mu kukwasha kisemi, mwatawanji ubula bakwabo pa bino bintu byawama byo auba. Umvwe baji kwa bunke, mukazhi umona’mba mwatawanji wamutemwa. Kumukwata, kuseka, kumukumbata, ne kwenda nanji bimweka nobe bintu bicheche, pano bino byanema bingi ku mwanamukazhi.

“Aye Kechi uba Bumvu pa Kwibatela’mba, Balongo Bami Ne”

Kilishitu Yesu kechi ‘waubanga bumvu kutela [baana banji bashingilwe] amba, balongo bami ne.’ (Hebe. 2:11, 12, 17) Umvwe ne anweba mwi banabalume ba bwina Kilishitu, vulukai kuba’mba mukazhenu naye ke nyenga wa bwina Kilishitu. Kwipana kwanji kwi Yehoba kwanema bingi kukila luchipo lwanji lwa masongola, kikale wabatizwe saka mwisongola kala nangwa ne. Kimye mulongo uji na jashi pa kupwila kwa kipwilo kyo abena kutongola mukazhenu amba akumbulepo, umutela amba “Nyenga.” Ne anweba nenuwa ke nyenga yenu, kechi ku Nzubo ya Bufumu konka ne, bino ne ku nzubo. Kyanema bingi kumubila lusa ne kumutekenya kimye kyo muji ku nzubo byonkatu byo kikala inge muji ku Nzubo ya Bufumu.

Inge mujipo na mingilo ikwabo mu kipwilo, kimo kimye kyakonsha kwimushupa bingi pa kuba’mba mwesakanye mingilo ya kipwilo ne mitembo ya kisemi. Pano inge bakulumpe mu kipwilo ne bankwasho bakwatankana ne kufunjisha bakwabo bya kwingila bulongo mingilo mu kipwilo kyakonsha kwimupako kimye kya kwikala na nyenga awo waikala mukazhenu wimukeba kya kine kine. Yukai kuba’mba, kuji balongo bavula bingi bakonsha kwingila yoyo mingilo ya kipwilo yo muji nayo, pano mukazhenu ke wenutu bunke.

Kabiji yenu mutwe wa mukazhenu. Baibolo waamba’mba: “Mutwe wa banabalume bonse ye Kilishitu; kabiji mutwe wa mwanamukazhi ye mulume wanji.” (1 Ko. 11:3) Pano mwakonsha kwingijisha byepi bumutwe bwenu? Twakonsha kwibwingijisha mu butemwe, kechi kupichila mu kwambapo javula pa byambo byanembwa mu kino kyepelo ne kukambizha’mba mukazhenu emunemekenga ne. Jishinda jawama kwikelamo na bumutwe bwawama ke kwikala byonka byajinga Yesu Kilishitu pa kulama mukazhenu.—1 Pe. 2:21.

“Anweba mwi Balunda Nami”

Yesu watelele baana banji ba bwanga amba balunda nanji. Wibambijile’mba: “Pano kechi nemutele namba bazha ne; mambo muzha kechi wayuka kyuba nkambo yanji ne: pakuba amiwa nemutela namba balunda nami; mambo bintu byonse byo naumvwine kwi Batata, nebilumbulula kwi anweba.” (Yoa. 15:14, 15) Yesu ne baana banji ba bwanga baumvwañananga bingi. Kabiji baubilanga bintu pamo. ‘Yesu ne baana banji ba bwanga’ bebechile pamo ku kijiilo ku Kena. (Yoa. 2:2) Bajinga na mapunzha o batemenwe kuyako, nabiji ku bujimi bwa Ngesemani. Baibolo waamba’mba: ‘Yesu ko ko akelelwenga ne baana banji ba bwanga.’—Yoa. 18:2.

Mukazhi wafwainwa kumvwa’mba ke mulunda wa kine kine na mwatawanji. Byo kyanemapo kuba’mba anweba banabalume ne anweba banabakazhi mwiyowenga bwikalo pamo! Ingijilainga Lesa pamo. Temwai kufunjila Baibolo pamo. Ikalainga, kwenda, kwamba, ne kujiila pamo. Kechi mwikaletu bamulume ne mukazhi kwapwa ne, bino ikalai ne balunda bawama.

“Aye Wibatemenwe ne ku Mpelo”

Yesu ‘watemenwe baana banji ba bwanga ne ku mpelo.’ (Yoa. 13:1) Banabalume bamo bakankalwa kwikala byonka byajinga Kilishitu mu luno lubaji. Bakonsha ne kusankilapo ‘mukazhabo wa katoto,’ ne kukwamamo mwanyike.—Mala. 2:14, 15.

Bakwabo nabiji ba Willi, balonda byajinga Kilishitu. Na mambo a kubelabela kwa bakazhi ba ba Willi abo ba Editha bakebelenga bingi kwibalama bulongo pa myaka yavula. Pano nga ba Willi baumvwine byepi pa mambo a kino? Baambile’mba: “Kimye kyonse mona’mba bakazhi bami ke bupe bwampa Lesa kabiji nebatemwa bingi. Myaka yapitapo 60, nalayile’mba nkebalama bakazhi bami mu bimye byawama ne byatama. Kechi nkalubamo uno mulaye ne.”

Anweba banabalume ba bwina Kilishitu, ikalai na butemwe bwa Kilishitu. Temwai bakazhi benu baji na moyo wa kwakamwa Lesa, mambo ke banyenga kabiji balunda nenu.

[Kipikichala pa peja 20]

Nanchi bakazhi benu bo balunda nenu ba kine kine nyi?

[Kipikichala pa peja 20]

‘‘Twajijilai kutemwa bakazhi benu’