Nanchi Mwanengezhako Kimye kya Kwikelamo na Lufunjisho lwa Baibolo Nyi?

MWAKA wapwa, Jibumba Jitangijila jabijikile pa mambo a kupimpulwa kwa mutanchi wa kupwila kwa kipwilo pa kuba’mba twikalengako na kimye kya lufunjisho lwa Baibolo ne kwisamba na kisemi. Umvwe mwi ba mutwe wa kisemi, monai kuba’mba mwanengezha bulongo kutangijila lufunjisho lwa Baibolo lwa kisemi kimye kyonse kuba’mba bena kwenu ne baana benu bonse pamo bamwenengamo. Bamulume ne mukazhi babula baana, bafwainwa kwingijisha kikye kimye kufunjilamo Baibolo pamo. Balongo bakatanda ne banyenga bazhike babula mitembo ya mu kisemi, nabo bafwainwa kwingijisha kikye kimye kwikelamo na lufunjisho lwa Baibolo lwa pa bunke.

Bavula basanta bingi pa mambo a luno lunengezho lwa kwikala na kimye kya Kupopwela kwa Kisemi. Kya kumwenako, mukulumpe mu kipwilo wa jizhina ja Kevin wanembele’mba: “Atweba bonse mu kipwilo twasanta bingi kabiji twakankalwa ne kya kwamba. Byo tuji bakulumpe mu kipwilo, twisambile pa byo twakonsha kwingijisha bino bimye bya mabanga kwikelamo na lufunjisho lwa bisemi byetu byonka byaamba Jibumba Jitangijila.”

Jodi uji na bamwatawanji bakulumpe mu kipwilo wanembele’mba: “Tuji na baana babakazhi basatu, baji na myaka ya kusemwa 15, 11 ne 2. Po twavilukijiletu ku kipwilo kya kwamba na maboko. Kikebewa kimye kyabaya bingi ne kwibikako pa kubatu’mba tunengezhe kupwila konse. Pano luno na mambo a luno lupimpu, tuji na kimye kikwabo kya mabanga kyo twikelamo na kupopwela kwa kisemi!

Ba John ne JoAnn, bamulume ne mukazhi bengila mwingilo wa bupainiya bwa kimye kyonse banembele’mba: “Lufunjisho lwetu lwa Baibolo lwa kisemi kechi lwaikalangako kimye kyonse ne, mambo twaingilangako ne mingilo ikwabo ya kipwilo. Luno lunengezho lwakatataka ke bupe bwafuma kwi Yehoba bubena kwitukwasha bingi ku mupashi umvwe twaingijisha kino kimye byonka byo kyafwainwa kwingila.”

Tony, mulongo katanda wa myaka ya kusemwa nobe 25, wabikile juba ja pa Kibiji mabanga kwikala ja lufunjisho lwa pa bunke. Moba akwabo a mukachi ka mulungu wiengijisha kunengezhezhamo kupwila. Nangwa byonkabyo, Tony waamba’mba: “Ndotatu juba ja pa Kibiji amba jifike.” Mambo ka? “Aja juba mabanga janema bingi kwi amiwa ne Yehoba.” Tony walumbulula’mba: “Pa maawala nobe abiji, mfunda mitwe ikosesha bulunda bwami ne Yehoba. Kwikala na kimye kyabaya kya lufunjisho kundengela kulanguluka pa byepelo byo ntanga mu Baibolo.” Ki ka kibena kufumamo? “Lujimuno lwa Yehoba lumfika bingi pa muchima kukila kala.” Nanchi waambapo kya kumwenako nyi? “Mu buku wa Insight, natangilemo bulunda bwajinga pakachi ka kwa Davida ne Yonafwanyi. Nafunjile byavula pa mambo a muchima wa kwa Yonafwanyi wa kubula kwitemwa. Kino kya kumwenako kyanji kyankwashishe kuyuka byo kilumbulula kwikala mulunda wa kine. Ntonga bingi kuba’mba jino juba ja pa Kibiji mabanga jifike kayukileko byavula!”

Kwa kubula nangwa kuzhinaukatu ne, bakalume ba Yehoba bonse bakamwenamo pakatampe kupichila mu kwingijisha bulongo kimye kya lufunjisho lwa Baibolo ne kupopwela kwa kisemi.