Abya Mwakonsha Kwabukila ku Makedonya Nyi?

BYO ajinga pa kiito kya muzhi wa Toloasa mu Asha Maina, mutumwa Paulo wamwene kimwesho. Mwanamulume mwina Makedonya wamusashijile’mba: “Abukilai muno mu bushiya mu Makedonya, mwitukwasheko.” Byo ekimwene kino kimwesho, Paulo ne bakwabo mo baendelanga balangulukile’mba, ‘Lesa wibechile’mba, bakebasapwile mambo awama’ bena Makedonya. Ki ka kyafuminemo? Lidiya ne ba mu nzubo yanji baikalanga mu Filipai, muzhi mukatampe wa mu Makedonya, baitabijile. Kabiji ne bakwabotu baikalanga mu kibunji kya Loma mu Makedonya nabo baitabijile. —Byu. 16: 9-15.

Bakamonyi ba kwa Yehoba lelo jino nabo baji na muchima wa uno mutundu. Bavula bengijisha mali abo bene kuvilukila ku mapunzha kwabula basapwishi bavula ba Bufumu. Kya kumwenako, Lisa wakebelenga busapwishi kwikala kintu kikatampe mu bwikalo bwanji. Wafumine ku kyalo kya Canada ne kuvilukila mu kyalo kya Kenya. Kabiji ba Trevor ne Emily bena Canada nabo bayile ku kyalo kya Malawi ko bakengijilenga mwingilo wa busapwishi. Ba Paul ne Maggie bafumine ku England ne kuya na kwikala ku Musela wa Africa, mambo bamwene kutambula penshonyi kwikala jishuko ja kubilamo byavula mu mwingilo wa Yehoba. Nanchi ne anweba muji na muchima wa kwipana nyi? Abya mwakonsha kuvilukila kungi nyi? Umvwe ibyo, ñanyi mafunde a mu Baibolo akonsha kwimukwasha kumona umvwe mwakonsha kuviluka?

Ipimai Anwe Bene

Kintu kitanshi kyo mwafwainwa kulangulukapo ke ene mambo o mukebela kuvilukila. Mukambizho mukatampe ye aambile Yesu ke wa kuba’mba: “Ukamutemwa Nkambo Lesa wobe na muchima wobe yense, ne na mweo wobe yense, ne na mana obe onse.” Nkebelo ine ya kuyila na kwingijila mu nyaunda ingi yafwainwa kwimena pa kutemwa Lesa ne kusakisha kulondela mukambizho wa kulenga baana ba bwanga. Yesu watwajijile’mba: ‘Mukambizho wa bubiji waesakana nanji yeye uno amba, Ukamutemwa mukwenu pamo byonka byo witemwa obe mwine.’ Butemwe bwa kutemwa bakwetu bumwekela mu kukeba kwibakwasha. (Mat. 22: 36-39; 28: 19, 20) Kwingijila mu kyalo kingi kuji bingi na nkito, kabiji kikebewa kwikala na muchima wa kwipana. Kechi kuyatu na kukaya ne. Mwafwainwa kutundaikwa na butemwe. Ba Remco ne Suzanne bafumine ku Netherlands, kabiji pa kino kimye babena kwingijila mu Namibia baambile’mba, “Butemwe bo bwitulengela kwikala kuno.”

Kalama wa mwanzo mu Namibia aye Willie waambile’mba: “Bonse babena kwingijila mu byalo bingi kechi bayilenga na mulanguluko wa kuba’mba bakebalamanga ku balongo bo bakatana kokwa ne. Bayilenga na mulanguluko wa kukengijila pamo na balongo bakonkakwa ne kwibakwashako mu mwingilo wa busapwishi.”

Panyuma ya kwipima, ishikishai’mba: ‘Bintu ka byo nayuka byakonsha kunkwasha kuntu ko nkeba kuya? Nanchi ne musapwishi wingila bulongo nyi? Nayuka milaka inga? Abya nakonsha kufunda mulaka ungi nyi?’ Isambaipo na ba mu kisemi kyenu. Bulai bakulumpe mu kipwilo kyenu. Kabiji lombaipo kwi Yehoba. Kwipima kwa uno mutundu kwakonsha kwimukwasha kumona kana kya kine mwakonsha kuya na kwingijila ku kyalo kingi nangwa ne. —Monai kakitenguluzha kaamba’mba “Ipimai Anwe Bene.”

Kwa Kuya na Kwingijila

Paulo bamwichile kuya ku Makedonya mu kimwesho. Lelo jino, Yehoba kechi witutangijila mu mashinda a kukumya ne. Bino, kupichila mu uno magazini ne mu mabuku akwabo, bantu ba Lesa bayuka mapunzha mubena kukebewa bamwingilo. Onkao mambo, patanshi nembai mutanchi wa oo mapunzha. Inge kechi mwakonsha kufunda mulaka ungi ne, kabiji umvwe ku kyalo ko mukeba kuya kechi mukekajijila ne, ikalaitu konkako ko bamba mulaka ye mwayuka. Kepo mulanguluke pa bintu nabiji bitupa, ñendelo, bukikizhi, bwikalo ne nkiilo ya koko ko mukeba kuya. Mwakonsha kwisamba na babena kwingijila mu mapunzha angi kuba’mba bemubuleko bya kuba. Lombaipo. Vulukai’mba Paulo ne bakwabo mo baendelanga ‘bebakainye ku mupashi wazhila kusapwila mambo mu kyalo kya Asha.’ Nangwa bakebelenga kuya mu Bitinya, ‘mupashi wa Yesu kechi wibaswishishe ne.’ Ne anweba pakonsha kupita kimye pa kuba’mba mumone ko mwakonsha kuya na kukwasha. —Byu. 16: 6-10.

Pano mwayuka byo mwafwainwa kuba. Umvwe mubena kukeba kuya na kwingijila mu kyalo kingi, nembelai ku maofweshi a misampi a Bakamonyi ba kwa Yehoba aji mu byalo mo mukeba kuya. Nembai mingilo yo mwaingilapo kala nangwa yo mubena kwingila mu jibumba ja Yehoba kabiji ne mepuzho o mwakonsha kukeba mikumbu nabiji bwikalo bwa ku yoyo mpunzha, mazubo mwakwikala, bipatela ne makito ajiko o mwakonsha kutwela. Panai yoyo nkalata nangwa makalata enu ku kavoto ka mwingilo mu kipwilo kyenu. Nabo bakanemba nkalata ya kwimuswisha ne kwiitumina pamo na yenu ku maofweshi a misampi a mu byalo byo mukeba. Mikumbu yo mukatambwila ikemukwasha kumona kyalo kyo mwakonsha kuyako.

Willie ye twaji kutongola waambile’mba: “Aba bengila bulongo patanshi bakiiyila jimo ku kyokyo kyalo na kumwena jimo mpunzha yawama ko bakakonsha kwikala bulongo. Bamulume ne mukazhi bamo bamwene’mba kyakonsha kwibakatazha kwikala mu mpunzha ya ku muzhi. Onkao mambo, baikele mu kataunyi kacheche mwakebewenga basapwishi bino mwajinga bwikalo bwawamako bwa kwibalengela kwikala balusekelo.”

Kupita mu Makatazho Akwabo

Kwa kubula nangwa kuzhinaukatu ne, kufuma ku mpunzha yo waibijila ne kuya kungi kechi kintu kyapela ne. Lisa ye twaji kutongola waambile’mba, “Kikatazha bingi inge keumvwe mukose.” Ki ka kyamukwashishe? Kupwanañana na kipwilo kya ku mpunzha ko ayile. Wibikijile kikonkwanyi kya kukeba kuyuka mazhina a bonse. Pa kuba’mba obe kino, wafikanga bukiji pa kupwila kabiji ne kushala na kwisamba na balongo ne banyenga panyuma ya kupwila. Waingijilanga pamo na bakwabo mu mwingilo, kwibeta ku nzubo yanji, kabiji ne kulenga balunda. Waambile’mba: “Kechi nelangulusha pa kwiya kuno ne. Yehoba wampesha bingi.”

Panyuma ya kukomesha baana babo, ba Paul ne Maggie bafumine mu nzubo yabo mo baikajile myaka 30. Paul waambile’mba: “Kechi kitupelejile kusha bipe byetu ne. Kitukatezhe bingi kusha kisemi kyetu. Twajijile bingi byo twayilenga na ndeke. Twalangulukilenga’mba, ‘Kana ki ka kitukumpile.’ Bino twaketekejile mwi Yehoba. Kulenga balunda kwitulengejile kubula kubwelamo kwetu.”

Ba Greg ne Crystal bafumine ku Canada ne kuvilukila ku Namibia mambo bayukile kwamba mulaka wa Kizungu ye bamba mu kyokya kyalo. Pa lutwe kacheche, bamwene buneme bwa kufunda mulaka mukwabo wamba bantu bavula. Baambile amba “Kimye kimo twalefulwanga bingi. Nangwa byonkabyo, byo twafunjile mulaka ye bamba bavula, popo twayukile kisho kyabo byo kiji. Kwipwiluluka na balongo betu bakonka kuno kwitulengejile kwikala byonka bikala bonse.”

Kwikala byonka bikala bantu bo mwatana kwakonsha kulengela balongo bakonkako nabo kwimukasulukila. Jenny uvuluka bisemi byavilukijile ku kyalo kya Ireland, ko akomejile. Waambile’mba, “Bawamine bingi michima. Kya kine baishile na kwingila, kechi na kwibengijila ne. Bakosele ne kusangalala bingi kya kuba ne amiwa naubile byonka byo baubile.” Pa kino kimye Jenny ne bamwata wanji ke bamishonale ku Gambia.

Mapesho a Yehoba “Alengela Kunonka”

Paulo wasangalele bingi byo ayile na kwingijila mu Makedonya. Panyuma ya kupitapo myaka jikumi, wanembejile balongo ba mu Filipai’mba: “Amiwa nsanta kwi Lesa wami ponse po ne mulanguluka.” —Fili. 1: 3.

Ba Trevor ne Emily baingijilenga mu Malawi saka bakyangye kuya ku Sukulu wa Baibolo wa Gileada wa Watchtower, nabo basangalele. “Kimye kimo twalangulukanga namba kampe tubena kutamishatu, pano bino twajinga balusekelo. Twaingijilanga pamo ne kuyuka’mba Yehoba ubena kwitupesha.” Ba Greg ne Crystal bo twatongola kala baambile’mba, “Kafwako kintu kikwabo kyo twafwainwa kubanga ne.”

Kechi bonse bakonsha kuya na kwingijila ku kyalo kingi ne. Bamo bakonsha kuyatu ku mpunzha kwabula basapwishi bavula monka mu kyalo kyabo. Bakwabo nabo bakonsha kwingijilatu mu bipwilo biji kwipi na kwabo. Kintu kikatampe ke kwingijila Yehoba kwesakana na papela bulume bobe. (Kolo. 3:23) Inge mwauba bibye, mukamona kufika kwa bino byambo bya kuba’mba: “Mapesho a Yehoba —alengela muntu kunonka, kabiji mingilo yanji kechi inungako kintu ne.” —Mana. 10: 22.

[Kitenguluzha/Kipikichala pa peja 5]

Ipimai Anwe Bene

Pa kuba’mba mumone inge mwakonsha kuya na kwingijila ku kyalo kingi, akilangulukai pa ano mepuzho alondelapo, apa bino mulombepo ne kumona bulongo inge kya kine mwakonsha kuviluka. Mabulañano aji mu magazini a kala a Kyamba kya Usopa kya Kibemba akonsha kwimukwasha kuba bino.

•Abya nemuntu wa bumupashi nyi? —“Bya Kwikala wa Lusekelo” (October 15, 1997, peja 6)

•Nanchi nemusapwishi wingila bulongo nyi? —“Byo Mwafwainwa Kuba pa Kuba’mba Mwingile Bupainiya” (May 15, 1989, peja 21)

•Nanchi nakonsha kwikala kwalepa na kisemi ne balunda nami nyi? —“Kwingila Mwingilo wa Lesa kwa Kubula Kuvuluka ku Nzubo Javula” (May 15, 1994, peja 28)

•Abya nakonsha kufunda mulaka ungi nyi? —“Kwingila na Kipwilo mo Bamba Mulaka Ungi” (March 15, 2006, peja 17)

•Abya nji na mali a kukekwashishamo nyi? —“Mwakonsha Kuya na Kwingijila mu Kyalo Kingi Nyi?” (October 15, 1999, peja 23)

[Kipikichala pa peja 6]

Kwikala byonka bikala bantu bo mwatana kwakonsha kulengela balongo bakonkako nabo kwimukasulukila

[Kipikichala pa peja 7]

TAba baya na kwingijila kungi batokwa bingi