Mepuzho Kufuma Kubatanga
Nanchi kinembelo kya Ezikyo 18:20 kyaamba’mba, “mwana kechi amaname na mambo a bubi bwa shanji ne,” kikasa na kya Kulupuka 20:5 kyaamba’mba, Yehoba ‘utwika baana mambo a bashabo’ nyi?
Ine, kechi bikasa ne. Kinembelo kimo kyaamba pa musango wa bubi bwakonsha kushinkamana mwine muntu, kikwabo kyaamba pa bubi bwa muntu byo bwakonsha kuletelela ne ba mu kisemi kyanji.
Ezikyo kitango 18 ubena kwamba pa bubi bushinkamana mwine muntu wibuba. Kyepelo 4 kyaamba’mba: “Awa muntu ulenga mambo ye ukafwa.” Ibyepi ku muntu ‘waoloka, kabiji uba byaoloka monka mwayila mizhilo’? “Ukekalanga na bumi.” (Ezi. 18:5, 9) Umvwe muntu wafika pa kimino kyo akonsha kwiubila mwine bintu, yense bamuchibila mambo ‘monka mwayila byubilo byanji.’—Ezi. 18:30.
Twakonsha kumvwisha jino jifunde umvwe twamona byaubile mwina Levi wa jizhina ja Kola. Bena Isalela byo bajinga pa lwendo lwabo lwa mu kiselebwa, Kola watendekele kushikwa mwingilo wanema Yehoba ye amupele. Byo akebelenga kwingila mingilo yaingilanga bañanga, Kola ne balunda nanji basatukijile ba Mosesa ne Alona baimenangako Yehoba. Na mambo a kukeba kino kifulo mu bwitote—kyabujile kwibafwainwa—Yehoba waipayile Kola ne bakwabo mo basatukijile. (Bala. 16:8-11, 31-33) Bino baana ba kwa Kola kechi basatukileko ne. Lesa kechi wibapelemo mambo na mambo a bubi bwa shabo ne. Bukishinka bwabo kwi Yehoba bwibalengejile kupuluka.—Bala. 26:10, 11.
Pano ibyepi pa lujimuno luji mu Kulupuka 20:5, luji pa Mikambizho Jikumi? Monai kyo babena kwambapo. Yehoba waikajikile lulayañano lwa Mizhilo na mukoka wa bena Isalela. Panyuma ya kumvwa lulayañano lonse byo lwajinga, bena Isalela baitabile’mba: “Byonse byaamba Yehoba tukebyuba.” (Lupu. 19:5-8) Onkao mambo, mukoka yense waikele ke wanema kwi Yehoba. Mu jino jishinda, byambo biji mu Kulupuka 20:5 byashinkamene mukoka yense.
Bena Isalela byo baikalanga bakishinka kwi Yehoba, mukoka yense waikalanga bulongo ne kumona byawama. (Levi 26:3-8) Pano bino, mukoka wa bena Isalela byo asatukilanga Yehoba ne kutendeka kupopwela balesa babubela, wafumyangapo mapesho ne luzhikijilo lwanji pe abo; kabiji kino kibalengelanga kumona byakatazha. (Mito. 2:11-18) Bino kwajinga bamo batwajijilanga kulama bulumbuluke bwabo ne kulama mikambizho ya Lesa nangwa kya kuba bavula ba mu mukoka bapopwelanga balesa bangi. (1 Mfu. 19:14, 18) Kyamweka aba bakishinka bayanjilanga kumo na mambo a bubi bwaubanga bakwabo, pano bino Yehoba wibamweshanga butemwe bubula kwaluka.
Bena Isalela byo bakizhizhemo kuzhilulula mafunde anji kya kuba jizhina janji kebejendeleke ku bantu ba mu mikoka, Yehoba wafuukwilepo kukambula bantu banji kupichila mu kwibatwala mu buzha mu Babilona. Kino kyavwangilemo kumanyika muntu pa muntu kabiji ne bonsetu pamo. (Yele. 52:3-11, 27) Baibolo waamba’mba, bubi bwa bena Isalela bwabayile bingi kya kuba kisemi kya busatu, kya buna, nangwa kukilapo, nakyo kyamanaminanga kumo na mambo a bubi bwa bashakulu babo monka mwaambila Kulupuka 20:5.
Kabiji mu Mambo a Lesa muji ne mashimikila aamba pa bisemi bya bantu byamanamanga na mambo a bubi bwa bansemi babo. Ñanga mukatampe aye Eli wafichishe Yehoba pa muchima na mambo a kuswisha baana banji “bancha” kutwajijila kwikala bañanga. (1 Sam. 2:12-16, 22-25) Eli byo anemekele baana banji kukila Yehoba, Lesa wakambizhe’mba kisemi kya kwa Eli kechi kikengilapo mwingilo wa buñanga ne, kabiji kino kyamwekele kutendeka na munkanununa wanji aye Abiata. (1 Sam. 2:29-36; 1 Mfu. 2:27) Kabiji jifunde jiji mu Kulupuka 20:5 bejilumbulula bulongo ne mu byaubile Gehazi. Byo ajinga kalume wa kwa Elisha, waingijishe kifulo kyanji kutama kuba’mba atambule bintu kufuma kwi Kinemanga mwina Silya aye Nemani ye babukile. Yehoba wamuchibijile mambo kupichila mwi Elisha amba: “Mbumba ya kwa Nemani isakukutuntulukila obewa, ne ba mu kisemi kyobe kikupu.” (2 Mfu. 5:20-27) Onkao mambo, kisemi kya kwa Gehazi kyamanamine na mambo a bubi bwanji.
Byo aji Mulenga kabiji Upana Bumi, Yehoba uji na lūsa lwa kumona lumanyiko lo akonsha kumanyika muntu. Bintu byaambiwapo kala bimwesha’mba baana nangwa bisaka byakonsha kumanama na mambo a bubi bwa bashakulu babo. Nangwa byonkabyo, Yehoba umvwa ‘kujila kwa boba bo bamanyika’ kabiji ne bantu balulukila kwi aye wakonsha kwibatala bulongo ne kwibamwesha byawama.—Yoba 34:28.
[Kipikichala pa peja 29]
Kola ne balunda nanji bansatuki, bafwile na mambo a bubi bwabo