Yesu byo Afunjishe pe Lesa

“Kafwako wayuka Mwana ne poso bonka Batata; nangwa wayuka Batata ne poso yenka Mwana, ne abo bantu bo aswa aye Mwana kwibasolwelaye.”—LUKA 10:22.

MWANA Lesa mubeji byo ajinga mwiulu, waikele myaka ya kukankalwa kubala na Shanji. (Kolose 1:15) Onkao mambo, uno mwana wayukile milanguluko ya Shanji, byo omvwa, ne mashinda anji. Uno mwana byo aishile kwikala muntu panopantanda, wakebeshe bingi kufunjisha bukine pe Shanji. Twakonsha kufunda byavula pe Lesa pa kumvwa byo aambile Mwana.

Jizhina ja Lesa Jizhina ja Lesa ja kuba’mba Yehoba janemene bingi kwi Yesu. Uno Mwana ye batemenwe kwi Shanji wakebelenga bakwabo kuyuka jizhina ja shanji ne kwijingijisha. Jizhina ja kwa Yesu jilumbulula’mba “Yehoba ye lupulukilo.” Bufuku kasa akyangye kufwa, Yesu walombele kwi Yehoba amba: “Amiwa nebayukisha jizhina jenu.” (Yoano 17:26) Kwakubula nangwa kuzhinaukatu ne, Yesu waingijishe jizhina ja Lesa ne kwijiyukanyikisha ku bantu. Nga pano banteleki ba kwa Yesu bafwainwe kuyuka byepi bukine pe Yehoba kwakubula kuyuka Jizhina janji ne byo jilumbulula?a

Butemwe bwa Lesa Yesu waambile mu lulombelo lwanji kwi Lesa amba: “Tata, ... anweba mwantemenwe amiwa ne panopantanda kasa pakyangye kulengwa.” (Yoano 17:24) Yesu wasolwele butemwe mu mashinda avula panopantanda bo bamutemenwe kwi Lesa byo akijinga mwiulu.

Yesu wamwesheshe kuba’mba butemwe bwa Yehoba bwanema bingi. Waambile’mba: “Lesa byo ebatemwisha ba panopantanda, wapaine Mwananji yenkawa umo amba, bonse bamwitabila kechi bonaike ne, poso amba bekale na bumi bwa myaka.” (Yoano 3:16) Kyambo kya Kingiliki kyatuntululwa’mba “panopantanda” kechi kilumbulula ino “ntanda” mwikala bantu ne. Kilumbulula bene bantu. Onkao mambo, Lesa watemwa bingi bantu kya kuba wapaine mwananji ye atemwisha pa kuba’mba bantu bamuketekela bakuulwe ku bundengamambo ne lufu ne kukekala na bumi bwa myaka ne myaka. Kechi twakonsha kuyuka papela buno butemwe ne.—Loma 8:38, 39.

Yesu waambishetu kino kishinka kuba’mba Yehoba watemwa bingi bapopweshi banji pa muntu pa muntu. Yesu wafunjishe amba Yehoba uji nobe kafunga wayuka bulongo mikooko yanji yonse kabiji yanema bingi. (Mateo 18:12-14) Yesu waambile’mba kafwako kañonyi kakonsha kapona panshi kwakubula Yehoba kuyuka ne. Kabiji waambile’mba “nsuki yenu ya ku mitwe, yonse beibala.” (Mateo 10:29-31) Umvwe Yehoba uji na bulume bwa kuyuka amba kañonyi kamo kaeleka kufuma mu kinsa, wakonsha kukankalwa byepi kuyuka ne kuta muchima bapopweshi banji pa muntu pa muntu? Umvwe Yehoba wakonsha kubala nsuki ku mutwe wetu, wakonsha kukankalwa byepi kuyuka bintu bibena kwitukatazha mu bwikalo bwetu?

Shetu wa mwiulu Byonka byo twafunda mu mutwe wafumako, Yesu ye Mwana Lesa yenkawa umo. Kwakubula nangwa kuzhinauka ne, uno mwana ye batemwisha javula waichilenga Yehoba ne kwamba pe aye amba “Batata.” Mu byambo bitanshi byo aambile mu nzubo ya Lesa kasa akiji na myaka 12 watelele Yehoba amba “Batata.” (Luka 2:49) Kyambo kya kuba’mba “Batata” kitanwa pepi na 190 mu Mambo Awama. Yesu javula waambilenga pe Yehoba amba “Shenu,” “Tata wetu” ne “Tata.” (Mateo 5:16; 6:9; 7:21) Yesu byo akasulukile kutela shanji mu jino jishinda, wamwesheshe amba bantu bandengamambo kabiji bambulwakulumbuluka bakonsha kwikala na bulunda bwa pa muchima na Yehoba.

Wa lusa kabiji ulekela mambo Yesu wayukile’mba bantu bambulwakulumbuluka bakebwa kwibamwesha lusa kwi Yehoba. Mu kishimpi kyanji kya mwana witayaikile, Yesu wapashañenye Yehoba ku nsemi wamulume wa lusa, ulekela mambo mwananji walapila ne kumutambwila. (Luka 15:11-32) Byambo bya kwa Yesu bitubula’mba Yehoba utala mu muchima wa muntu walapila ne kumubila lusa. Yehoba ukebesha bingi kulekelako mambo muntu walapila. Yesu waambile’mba: “Nemwambila namba, byonkabyo ne lusekelo byo lukekala mwiulu pa ndengamambo umo walapila, lwa kukila pa bantu makumi atanu na ana ne batanu na bana baoloka, babula kusaka lulapilo.” (Luka 15:7) Ñanyi wakonsha kubula kukeba kufwenya kwipi na Lesa wa luno lusa?

Umvwa milombelo Byo ajinga mwiulu saka akyangye kwiya panopantanda, Yesu wimwenejile Yehoba amba Lesa ‘umvwa milombelo’ kabiji ne kuba’mba usekela mu milombelo ya bapopweshi banji bakishinka. (Salamo 65:2) Onkao mambo, kimye kya mwingilo wanji Yesu wafunjishe bantu bamutelekelenga bya kulomba ne bintu bya kulombapo. Wibabujile kuba’mba “ke kulomba kilombelombe” ne. Kabiji wakambizhe banteleki banji kulomba’mba kyaswa muchima wa Lesa “kyubiwe pano panshi, byonka byo kyubiwa mwiulu.” Ne atweba twakonsha kulomba kajo ka pa juba pa juba, kwitulekelako mambo kabiji ne bya kushinda meseko. (Mateo 6:5-13) Yesu wafunjishe’mba Yehoba uteleka na kifyele ku milombelo ya bakalume banji, kabiji ukumbula milombelo yabo yo balomba na lwitabilo.—Mateo 7:7-11.

Yesu wakebeshe bingi kufunjisha bukine pe Yehoba ne byo aji. Bino wafunjishe ne pa jishinda Yehoba jo akapimpwilamo bwikalo bwa bantu ne kufikizha nkebelo yanji ya ino ntanda ne bantu bajimo. Kino kyo kyajinga kishina kya busapwishi bwa kwa Yesu.

[Tubyambo twa mushi]