Mambo ka o Twafwainwa Kunemekela

Bakikulumpe?

KU MUKUZHO wa kitulu kya California, ku U.S.A., kuji kichi kyo bakopa bipikichala byavula bingi kukila bichi byonse mwaya ntanda. Kino kichi kitelwa amba Kichi kya Sipulesi. Kyashimunwa kuba’mba kino kichi kyabanda kukila pa myaka 250. Pa kuba’mba kino kichi kyawama kikose, bekita bingi muchima mu mashinda avula. Kyakumwenako, bekikosesha na ntambo ne na mabwe kunshi yakyo.

Kino Kichi kya Sipulesi kyakonsha kwituvululamo pa mambo a bena Kilishitu bakikulumpe bo tuji nabo, bamwesha muchima wa kuchinchika. Jishinda jimo janema jo bobilamo bino ke kupichila mu kusapwila mambo awama. Ngauzhi Yoela waambijile jimo amba “bakote” bakashimunanga byambo biji mu Baibolo. (Yoe. 2:28-32; Byu. 2:16-21) Akilangulukai pa maola avula bano bantu o bataya kukwasha bakwabo kufunda “mambo awama a bufumu”! (Mat. 24:14) Bano basapwishi bakikulumpe bamo bachinchika meseko ne makatazhotu akwabo pa myaka yavula bingi. Umvwe kino Kichi kya Sipulesi kyayukanyikwa amba kyabanda bingi kabiji bekikosesha na mabwe ne na ntambo, ko kuba’mba ne atweba twafwainwa kunemeka ne kupa mushingi bakikulumpe bo tuji nabo.

Yehoba Lesa wakambizhe bantu banji bakukala amba: “Umushingike mukote wa mvwi ne kunemeka kilungi kyanji.” (Levi 19:32) Lelo jino mu bakalume ba Yehoba, muji byakumwenako byawama bingi bya bantu bakishinka ‘baenda na Lesa’ pa myaka yavula. (Mika 6:8) Byo batwajijila kwingijisha mafunde a mu Binembelo, mutwe wabo wa mvwi wikala ke “munchinya wa lukumo.”—Mana 16:31.

Mutumwa Paulo wakambizhe Timoti wakyanyike amba: “Kechi ukalukila mukulumpe ne.” Mu kifulo kya kuba bino, Timoti wafwainwe ‘kumusashijila nobe shanji’ ne ‘banabakazhi bakulumpe nabo nobe bainanji.’ (1 Timo. 5:1, 2) Timoti wafwainwe ‘kushingika’ mukote wa mvwi. Onkao mambo, Yehoba ukeba atweba kumwesha uno munema mu ñambilo.

Loma 12:10 waamba amba: “Mu buneme namo sa mwinemeka anwe bene na bene.” Bakalama mu kipwilo banemeka bena Kilishitu bakikulumpe. Bino ne atweba bonse twinemeka atweba bene na bene.

Kya kine, ba mu kisemi baji na mwingilo wanema wa kunemeka bansemi ne bankambo yabo. Byonkatu biji kyokya Kichi kya Sipulesi, bantu bamonapo mashinda a kwikikwashishamo pa kuba’mba kikose, kabiji batwajijila kwikikosesha. Onkao mambo ne atweba twafwainwa kumonapo mashinda a kunemekelamo bansemi ne bankambo yetu bakota. Kyakumwenako, kwibateleka kuketulengela kubula kwiubila bintu kwakubula kuyuka byo babena kulanguluka ne.—Mana 23:22; 1 Timo. 5:4.

Bakikulumpe bo tuji nabo banema bingi kwi Yehoba. Kechi wibalekelela ne. (Sala. 71:18) Lesa wakine wibakosesha pa kuba’mba batwajijile kumwingijila mu bukishinka. Ne atweba twayai tutwajijile kutundaika ne kunemeka bakikulumpe.

[Bipikichala pa peja 7]

Byonkatu Kichi kya Sipulesi byo bekikosesha, ne bakikulumpe byo byo bakeba kwibanemeka ne kwibapa mushingi

[Byambo bya Muntu Ungi]

American Spirit Images/age fotostock