Yehoba Umvwa Kujila kwa Bayanji
BYONKA byaambile Mfumu Solomone wa maana wa bena Isalela ba kala, ‘bimye ne bintu bitusolomokelatu bitufikila bonse.’ (Sapwi. 9:11) Kintu kya malwa nangwa lweseko lukatampe lwakonsha kulengela bwikalo bwetu kutama. Kyakumwenako, kufwa kwa mulongo wetu wa mu kisemi kwakonsha kwituvulañanya bongo. Mu milungu ne bañondo balondelapo twakonsha kwikala bingi na bulanda ne kupopomenwa. Milanguluko ya muntu yakonsha kulubankana kya kuba ke amone nobe kechi wafikilamo kulomba kwi Yehoba ne.
Muntu uji mu luno lukatazho, ukebewa kumutundaika, kumukwasha ne kumutemwa. Nyimbi wa masalamo Davida wajinga bingi na luketekelo byo aimbile amba: “Yehoba wibakwachisha bonse bapona, ne kwibenuna bonse banyeñamina panshi.” (Sala. 145:14) Baibolo witubula amba: ‘Meso a Yehoba apitañana pano pa ntanda ponse amba: ebamweshe bulume bwanji abo bamuketekela na muchima yensetu.’ (2 Moba 16:9) Aye ‘wikala na yewa uji na muchima walajika ne na yewa wipelula, mu kusangula muchima wanji awa wipelula, mu kusangula muchima wa yewa uji na muchima walajika.’ (Isa. 57:15) Yehoba ukwasha ne kutekenesha byepi yewa uji na muchima walajika kabiji wipelula?
‘Byambo Byayila Monka Mwayila Bintu Byamweka’
Jishinda jimo Yehoba jo akwashañenamo pa kimye kyafwainwa ke kupichila mu balongo betu bena Kilishitu. Bena Kilishitu bebafundako ‘kukosesha ba michima yapungila.’ (1 Tesa. 5:14) Byambo bya kulangulukilako ne butemwe byaamba bakwetu ba mu lwitabilo byakonsha kukosesha muntu kimye kyo aji na bulanda ne kupopomenwa. Byambo bya lutekenesho bya misambo nangwatu icheche byakonsha kukwasha bingi muntu walefulwa. Bino byambo byakonsha kufuma ku muntu wachinchikapo makatazho a mu milanguluko. Nangwa mukwenu wapitapo kala mu bino bintu wakonsha kwitubulako bya kuba na lolo lukatazho. Yehoba wakonsha kukosesha muyanji kwingijisha ano mashinda aambiwapo kala.
Akilangulukai pa kyakumwenako kya mukulumpe mu kipwilo mwina Kilishitu wasongweletu katataka wa jizhina ja Alex, awo wafwishishetu mukazhanji kwakubula kuketekela byo akolelwenga kikola kibula kubukwa. Kalama umo wenda wa kifyele wibikijile kikonkwanyi kya kwisamba byambo bya lutekenesho ne ba Alex. Uno kalama naye wafwishishe mukazhanji, bino wasongwele jibiji. Walumbulwijile ba Alex makatazho o apichilemo byo amukonyangezhe. Watundaikwanga bingi inge waya na bakwabo mu mwingilo ne kutanwa ku kupwila kwa kipwilo. Pano inge wabwela ku nzubo yanji waumvwanga bingi mukose. Ba Alex baambile amba: “Kyantekeneshe bingi kuyuka amba kyajingatu bulongo byo neumvwinenga bino kabiji ne kuba amba bakwetu nabo bapichilemo.” Kya kine, ‘byambo byayila monka mwayila bintu byamweka’ byakonsha kutekenesha bingi muntu mu kimye kya bulanda.—Mana 15:23.
Mukulumpe mukwabo mu kipwilo kya bena Kilishitu wayukilepo bamo bafwishishe benakwabo, wibatundaikile bingi ba Alex. Waambile mu butemwe kuba amba Yehoba wayuka byo twiumvwa kabiji ne bintu byo tukeba. Uno mulongo waambile amba: “Umvwe kimye kya kulutwe muntu wafwisha watana kuba amba ubena kukeba kusongola, Yehoba wabikako lunengezho lwa kuba’mba uno muntu wafwainwa kusongola.” Kya kine kuba’mba kechi bonse bafwisha benakwabo bakonsha kutwela jibiji mu masongola kulutwe na lwendo nangwa kya kuba baji na muchima wa kukeba kutwela mu masongola ne. Pano bino byo balangulukilenga pa byambo byaambile uno mulongo, ba Alex baambile amba: “Umvwe bakuvululamo kuba amba luno ke lunengezho lwa Yehoba, kikukasululako ku milanguluko yatama yo wakonsha kwikala nayo ya kuba’mba wakonsha kubula kwikala wakishinka ku mwina kobe nangwa ku lunengezho lwa Yehoba pa kusongola jibiji kulutwe na lwendo.”—1 Ko. 7:8, 9, 39.
Nyimbi wa masalamo aye Davida wapichile mu meseko ne makatazho avula, waambile amba: “Meso a Yehoba aji pa baoloka, ne matwi anji ashinkukila kujila kwabo.” (Sala. 34:15) Kya kine, Yehoba wakonsha kukumbula milombelo ya kujila kwa bayanji pa kimye kyafwainwa kupichila mu byambo bya maana ne bya milangwe bibambila bakwabo bena Kilishitu baji na lusa kabiji bakoma ku mupashi. Luno lunengezho lwanema kabiji lukwashañana bingi.
Bukwasho Kupichila mu Kupwila kwa Bwina Kilishitu
Kyapela bingi ku muntu wapopomenwa kwikala na milanguluko yabula kufwainwa yakonsha kumulengela kwitolwela kufuma ku bakwabo. Pano bino, Byambo bya Mana 18:1 bitujimunako amba: ‘Awa wipatula ku bakwabo ukeba kuba bisaka muchima wanji mwine, kabiji ulengulula maana onse alumbuluka.’ Ba Alex baswile kino kishinka byo baambile amba: “Umvwe wafwisha mwina kobe, utendeka kulanguluka milanguluko yabula kufwainwa.” Bavuluka byo beshikishenga abo bene amba: “Kana nafwainwe kubila bintu mu jishinda jikwabo nyi? Abya nafwainwe kumuta muchima ne kumuteleka nyi? Kechi nasakilenga kwikala bunke nangwa kufwilwa ne. Kyakatazha bingi kuleka kulanguluka bino, mambo pa juba pa juba uvuluka kuba amba washala bunke.”
Kyakila pa byonse, awa walajika muchima ukebewa kupwanañana na bakwabo bawama. Kuno kupwanañana kwikalako pa kupwila kwa kipwilo. Inge ketupwanañane, twisamba pa bintu byawama bya Lesa bitukosesha.
Kupwila kwa bwina Kilishitu kwitukwasha kubula kwikala bapopomenwa. Byo tuteleka ne kulanguluka languluka pa bibaaba bya mu Baibolo, bitulengela kutesha muchima pa bintu byakilamo kunema, ko kuba’mba, kutumbijika bumfumu bwa Yehoba ne kuzhijika jizhina janji, kechi kutatu muchima pa buyanji bwetu ne. Kabiji kunungapo, kimye kyo tubena kutambwila mikambizho ya ku mupashi, tukoselako pa kuyuka amba nangwa kya kuba bakwetu kechi bayuka bulanda bo tuji nabo ne, nangwa kubula kuyuka byo tubena kwiumvwa, Yehoba aye wayuka. Wayuka amba “bulanda buji mu muchima bulengesha ne muchima kulajika.” (Mana 15:13) Lesa wa kine ukeba kwitukwasha, kabiji kino kitutundaika bingi ne kwitupa bulume bwa kutwajijila kwikala bakosa.—Sala. 27:14.
Mfumu Davida byo ajinga mu lukatazho lukatampe na mambo a balwanyi banji, waambile kwi Lesa amba: “Mupashi wami munda wapungila; ne muchima wami munda wapelelwatu.” (Sala. 143:4) Makatazho apwisha bulume bwa muntu ne kulengelatu muchima wanji kupelelwa. Lumanamo lwakonsha kwishila mu musango wa kubela nangwa kwikala na kikola kibula kupwa bukiji. Twafwainwa kuketekela amba Yehoba uketukwasha kuchinchika. (Sala. 41:1-3) Nangwa kya kuba Lesa kechi ubuka bantu mu jishinda ja kukumya ano moba ne, bino upana maana ku yewa ubena kuyanda ne kumukosesha pa kuba’mba ayuke mwakubila na makatazho o abena kupitamo. Vulukainga amba Davida walombanga kwi Yehoba umvwe ke apite mu meseko akatampe. Waimbile amba: “Mbena kuvuluka moba a kukala. Ndangulukalanguluka byubilo byenu byonse; mpimapima mingilo ya maboko enu.”—Sala. 143:5.
Bino byambo byanembwa na mupashi byo biji mu Mambo a Lesa, kimweshatu patoka kuba’mba Yehoba wayuka byo twiumvwa. Bino byambo bimwesha amba uteleka ku misashijilo yetu. Inge twatambwila bukwasho bwa Yehoba, ‘aye witukosesha.’—Sala. 55:22.
“Lombai na Kubula Kuzhikilwa”
Yakoba 4:8 waamba amba: “Fwenyai kwipi ne Lesa, kabiji ne aye ukafwenya kwipi ne anweba.” Jishinda jimo ja kufwenyeshamo kwipi ne Lesa ke kulomba. Mutumwa Paulo witukambizha ‘kulomba na kubula kuzhikilwa.’ (1 Tesa. 5:17) Nangwa kya kuba kitukatazha kutela bintu byo tubena kwiumvwa, “aye mwine mupashi witulombela na mibinzo ya kubula kukonsha kwamba.” (Loma 8:26, 27) Yehoba wayuka byo twiumvwa.
Monika uji na buno bulunda ne Yehoba, waamba’mba: “Lulombelo, kutanga Baibolo ne lufunjisho lwa pabunke byankwasha kuyuka amba Yehoba ke Mulunda nami wa pa muchima. Wafwenya bingi kwipi ne amiwa kya kuba unkwasha mu bwikalo bwami kimye kyonse. Kintekenesha bingi kuyuka amba nangwa kya kuba nakankalwa kulumbulula byo neumvwa, aye uyuka bino. Nayuka kuba amba lusa ne mapesho anji byo byayayaya.”
Onkao mambo, twayai twibikishengako kutambwila byambo bya lutekenesho bifuma ku bakwetu bena Kilishitu, kwingijisha lujimuno lwawama ne bintu byalutundaiko byo tumvwa pa kupwila kwa bwina Kilishitu ne kubuula Yehoba mu lulombelo bintu byonse bitukatazha. Bino byonse ke lunengezho lwa Yehoba lwa pa kimye pafwainwa byo amwesheshamo kuba amba wituta muchima. Na mambo a bintu byo bapichilemo, ba Alex baamba amba: “Umvwe twaingila lubaji lwetu ne kwingijisha bintu byonse byo etupa Yehoba Lesa pa kuba’mba tukose ku mupashi, tukekala na ‘bukata bwine bwa bulume’ bwa kushinda meseko o twakonsha kupitamo.”—2 Ko. 4:7.
[Kitenguluzha/Kipikichala pa peja 18]
Lutekenesho ku Bayanji
Mu masalamo muji bintu byavula byapichilemo bantu kabiji ne milaye yavula ya kuba’mba Yehoba uteleka kujila kwa bayanji bekala na bijikila. Akimonai bino byambo byalondelapo:
“Mu kupelelwa kwami namwichile Yehoba, ne kumutamina Lesa wami: Ne aye waumvwine jiwi jami mu nzubo yanji yazhila, ne kutama kwami kwa kumutamina kwafikile mu matwi anji.”—Sala. 18:6.
“Yehoba uji kwipi na bonse balajika michima, kabiji wibapulusha bonse ba mipashi yalapila.”—Sala. 34:18.
“[Yehoba] ye ubuka balajika muchima, ne kukasa pa bilonda byabo.”—Sala. 147:3.
[Kipikichala pa peja 17]
Byo kitekeneshapo kutambwila ‘byambo byayila monka mwayila bintu byamweka’ mu kimye kya bulanda!