Fwenyai Kwipi Ne Lesa

Lutekenesho ku Balajika Michima

‘YEHOBA kechi wakonsha kuntemwa ne.’ Bino byo byambo byaambile mwanamukazhi mwina Kilishitu wajinga na binyenge pa myaka yavula. Aye wasuminijilwe amba Yehoba wajinga kwalepa ne aye. Nanchi kine Yehoba uji kwalepa na bapopweshi banji baji na binyenge nyi? Byambo bya lutekenesho bitanwa mu byambo byaambile nyimbi wa masalamo Davida, byanembwa mu Salamo 34:18.

Davida wayukile bintu byatama byakonsha kufumamo inge mupopweshi wakishinka wa kwa Yehoba keamaname. Davida byo akijinga mwanyike, waikalangatu bwikalo bwa kususuta, byo bamupupijilenga kwi mfumu Saulo wajinga na kichima wakebeshenga kumwipaya. Davida wakafyamine ku mpunzha ko alangulukilenga amba Saulo kechi wakonsheshe kufikako ne, mu muzhi wa Gata wa balwanyi banji ku mpunzha ya bena Filishitiya. Pano bino byo bamuyukile, Davida wapulukiletu tiki kupichila mu kubepekezha kwikala mukonye. Davida wasanchijile Lesa byo amupokolwele, kabiji kino kyo kyalengejile kuba’mba anembe ne Salamo 34.

Nanchi Davida waitabijile amba Lesa uji kwalepa na bantu balefulwa na mambo a kumanama nangwa aba balanguluka amba kechi wibata muchima nenyi? Davida wanembele amba: “Yehoba uji kwipi na bonse balajika michima, kabiji wibapulusha bonse ba mipashi yalapila.” (Kyepelo 18) Twayai tumone bino byambo byo bitutekenesha ne kwitupa luketekelo.

“Yehoba uji kwipi.” Buku umo waamba’mba, bino byambo ke “jishinda ja kwambilamo’mba Nkambo watako muchima ne kulamawizha, kimye kyonse winengezha kukwasha ne kupokolola bantu banji.” Kikosesha bingi kuyuka amba Yehoba ulamawizha bantu banji. Umona byo babena kupitamo mu bino “bimye byakatazha,” kabiji wayuka byo bomvwa.—2 Timoti 3:1; Byubilo 17:27.

“Bonse balajika michima.” Mu bisho bimo, byambo bya kuba’mba “balajika michima” bingila ku bantu bamona’mba kechi bebatemwa ne. Shayuka umo waambile’mba, nyimbi wa masalamo byo anembele bino byambo, wibitazhizhenga ku “bulanda bwikalapo na bantu bonse.” Kya kine, nangwatu bapopweshi bakishinka ba Lesa bimye bimo bakonsha kwikala na makatazho abaya akonsha kwibalengela kulajika muchima.

“Bonse ba mipashi yalapila.” Bantu balefulwa bakonsha kwimona amba ke batutu, kya kuba bimye bimo luketekelo lwabo lupwa. Buku wa bantuntuluzhi ba Baibolo waamba’mba bino byambo byakonsha kutuntululwa amba, “aba balanguluka amba kechi bakamonapo byawama ne.”

Nanchi Yehoba ubapo ka pa bantu “balajika michima” kabiji “ba mipashi yalapila”? Abya wikala kwalepa ne abo, ne kulanguluka amba kechi wafwainwa kwibatemwa ne kwibata muchima nenyi? Ine! Byonka biji nsemi wa butemwe ulama ne kutekenesha mwananji uji na lukatazho, ne Yehoba naye uji pepi na bapopweshi banji bamujijila amba ebakwashe. Aye ukebesha kwibatekenesha ne kukwasha boba baji na michima yalajika ne mipashi yalapila. Wakonsha kwibapa maana ne bulume bukebewa pa kuchinchika meseko onse o bakonsha kupitamo.—2 Kolinda 4:7; Yakoba 1:5.

Abya kechi mwakonsha kutemwa kuyuka byo mwakonsha kufwenya kwipi ne Yehoba nenyi? Uno Lesa wa lusa walaya amba: “Amiwa ngikala . . . na yewa uji na muchima walajika ne na yewa wipelula, mu kusangula muchima wanji awa wipelula, mu kusangula muchima wa yewa uji na muchima walajika.”—Isaya 57:15.