Fwenyai Kwipi Ne Lesa

Bakote byo Bakekala Jibiji ke Banyike

ÑANYI pe atweba watemwa bintu bifuma mu bukote nabiji mikafi, kubula kumona bulongo, kuleka kumvwisha ne lukanko lwa maulu? Mwakonsha kwipuzha amba: ‘Mambo ka Lesa o etulengejile kuba’mba tukeyowenga myaka ya bwanyike bwetu, pano bino mwafumatu kuyanda na makatazho eya na mambo a bukote?’ Mambo awama ke a kuba’mba Lesa kechi wakebelenga amba tuyandenga ne. Pakuba wanengezha kuba’mba tukekalenga kwakubula kukota. Akimonai byambo byo aambijile mushakulu Yoba, biji mu Yoba 33:24, 25.

Akilangulukai pa byamwekejile Yoba, muntu wakishinka ye batemenwe kwi Yehoba. Satana wazhinaukilenga bukishinka bwa kwa Yoba pa kwamba amba wingijila Lesa mambo a kuba’mba umwenamo byawama, bino Yoba kechi wayukile bino ne. Yehoba byo ayukile’mba Yoba wakonsheshe kushinda kabiji ne kuba’mba aye mwine Yehoba uji na bulume bwa kupwisha bubi, waswishishe Satana kweseka Yoba. Kepo Satana ‘amumanyikile Yoba na bipote byatumbile mubiji yense kufuma mu ngayo ya maulu anji kufika ne pa lumbwichi.’ (Yoba 2:7) Mubiji wa kwa Yoba wakumbene mapila ne kikoba kyanji kyaubiletu, apa papwa, apa pasabika, kabiji kyaalukile ke kifita ne kulalaika. (Yoba 7:5; 30:17, 30) Abya mwakonsha kufwanyikizha byo amanamine nyi? Nangwa byonkabyo, Yoba watwajijile na bukishinka, ne kwamba amba: “Kufika ne ku juba jo nkafwa nkakakachila ku kino namba: Nabinga.”—Yoba 27:5.

Pano bino Yoba waubile ne kilubo kikatampe. Byo amwene kuba’mba keakebe kufwa, watendekele kwitumbijika mwine, “wibingishishe mwine, kechi wamubingishishe Lesa ne.” (Yoba 32:2) Wakumwambilako Lesa aye Elihu wamubukijile bukaji Yoba. Pano bino Elihu wabujile ne Yoba mambo awama afumine kwi Lesa amba: “Mukasululaiko [Yoba], mumukanye kwikila mu Kalengwa [kilende], mambo namona kya kumukula, mubiji wanji aluke ke pamo nobe wa mwanyike, kabiji bulume bwa bunsongwalume bwanji bubwelemo.” (Yoba 33:24, 25) Bino byambo byalengejile Yoba kwikala na luketekelo. Kechi wafwainwe kutwajijila na kuyanda kufika ne ku lufu ne. Umvwe Yoba walapijile, Lesa wakonsheshe kutambwila kitapisho kyanji kya kumukula ne kupwisha makatazho onse o apichilengamo.a

Yoba wikepeshe ne kuswa kilubo, kabiji walapijile. (Yoba 42:6) Yehoba watambwijile kitapisho kya kwa Yoba, kuvweta pa bundengamambo bwanji, kabiji Lesa wamubukile ne kumupesha. Yehoba “wapesheshe bwikalo bwanji Yoba bwapeleleko kukila butanshi.” (Yoba 42:12-17) Akifwanyikizhai Yoba byo aumvwine kimye kyo bamupesheshe, kumubuka kikola kyatama ne mubiji wanji byo aikajile “pamo nobe wa mwanyike.”

Bukuzhi bwa kwa Yoba bwaswile Lesa bwaingijiletu kimye kicheche mambo Yoba watwajijile kwikala mbulwakulumbuluka kabiji kulutwe na lwendo wafwile. Atweba luno tuji na kitapisho kyakila mu kunema. Yehoba mu butemwe wapaine Mwananji, aye Yesu, kwikala bukuzhi bwetu. (Mateo 20:28; Yoano 3:16) Bonse baitabila mu buno bukuzhi baji na luketekelo lwa kukekala myaka ne myaka mu paladisa pano pa ntanda. Mu ntanda ipya ibena kwiya, Lesa ukalengela bantu bonse bakishinka kubula kukota. Mambo ka a kubujila kufunda byavula pa byo mwafwainwa kuba pa kuba’mba mukamoneko kimye bakote kyo bakamona mibiji yabo ‘kwaluka ke pamo nobe ya banyike’?

[Tubyambo twa mushi]