Nanchi Kine Mumwena Lusekelo mu Mambo a Lesa Nyi?

BA LORRAINE baambile’mba: “Byo natendekele kutanga Baibolo pa juba pa juba, namonanga nobe mwingilo wakosa bingi mu kifulo kya kundetela lusekelo. Kechi naumvwanga byo natanganga ne, kabiji javula natendekanga kulanguluka pa bintu bingi.”

Bakwabo baamba’mba, nabo byo batendekele kutanga Baibolo kechi bamwenangamo lusekelo ne. Pano bino batwajijile kutanga, mambo bayukile’mba kutanga Binembelo Byazhila ke kintu kyanema bingi mu bwikalo. Ba Marc baambile’mba: “Bya kutabataba byakonsha kwitupwishisha kimye kya kutanga Baibolo ne kya kwikelamo na lufunjisho lwa pa bunke. Nalombangapo bingi ne kwibikako pa kuba’mba ntangenga Baibolo pa juba pa juba.”

Mwakonsha kumwesha byepi amba mwanemeka Mambo a Lesa anembwa, Baibolo? Mwakonsha kwikala byepi na lusekelo lwa kutanga Baibolo? Akimonai ano mashinda alondelapo.

Bikonkwanyi ne Mashinda a Kulondela

Lombainga pa kutendeka kutanga Baibolo ne kutapo muchima. Lombai Yehoba kwimukwasha kwikala na mukoyo wa kutanga Mambo anji. Musashijilainga kwimukwasha kumvwisha ne kukwatankanya maana anji bulongo. (Sala. 119:34) Umvwe mwabula kuba bino, lufunjisho lwenu lwa Baibolo mukelubangatu mu bukifulumuya kabiji kikapelako mukaleka. Ba Lynn baambile’mba: “Kimye kimo ntangatu kya lubilo lubilo kabiji kino kindengela kubula kumvwa bishinka byonse. Javula kechi nkwatakanya bulongo bishinka bikatampe ne. Pano bino ndomba kuba amba ntekanyenga pa kutanga, kabiji kino kindengela kubula kulanguluka pa bintu bingi.”

Nemekainga byo mufunda. Yukai kuba’mba bumi bwenu bwaimena pa kumvwisha ne kwingijisha bukine bwa mu Baibolo. Onkao mambo, ibikishaingako kukeba bishinka byakonsha kwimukwasha ne kwibingijisha. Ba Chris baambile’mba: “Nkeba bishinka binkwasha kuyuka inge kengikale na miteeto ne milanguluko yatama. Kintekenesha bingi pa kumona bintu biji mu Baibolo ne mabuku etu byo binkwasha, nangwa kya kuba banembi kechi bangyuka ne.”

Ibikilainga bikonkwanyi byo mwakonsha kufikizha. Funjilaingako byavula ku bantu batongolwa mu Baibolo. Mwakonsha kutana bishinka byawama bya bantu bavula baambiwapo mu Baibolo mu buku wa Insight on the Scriptures nangwa mu Watch Tower Publications Index. Bintu byaamba peabo bikemukwashatu inge mwayuka bulongo kuba amba bano banabalume ne banabakazhi ba mu Baibolo kya kine bajingako.

Monaingapo mashinda a kulumbulwilamo Binembelo. (Byu. 17:2, 3) Ba Sophia byo byo boba pa kutanga. Baambile’mba: “Nkebesha bingi kufunda ne kumonapo mashinda a kwisambilamo na bantu mu mwingilo ne pa bimyetu bikwabo, pa kuba’mba ndumbululenga bulongo bukine bwa mu Baibolo. Jishinda jo balumbulwilamo bukine mu Kyamba kya Usopa jawama bingi kulondela.”—2 Timo. 2:15.

Fwanyikizhainga mashimikila a mu Baibolo. Kinembelo kya Bahebelu 4:12 kyaamba’mba: “Mambo a Lesa o omi.” Pa kutanga Binembelo, lekai Mambo a Lesa ekalenga mu muchima wenu kupichila mu kufwanyikizha mubena kumona bintu byamonanga bantu batongolwa mu Baibolo. Fwanyikizhainga mubena kuteleka ku bintu byo batelekanga kabiji ne kwiumvwa ku muchima byonka byo beumvwanga. Esakanyainga byo bapitangamo na byo mupitamo lelo jino. Funjilaiko ku byo baubanga na bintu bibamwekelanga. Kuba bino kukemukwasha kumvwisha ne kuvulukanga mashimikila a mu Baibolo.

Ikalaingapo na kimye kya kupesapesa binembelo byakatazha pa kuba’mba mumvwishe mo byatala. Ikalainga na kimye kyabaya kya kufunda. Mwakonsha kutana bwipuzho bwakonsha kwimulengela kukebelapo bishinka bikwabo. Pa kutanga, monainga byambo byo mwabula kuyuka, tangainga tubyambo twa panshi kabiji monainga ne byo bebyambapo mu binembelo bikwabo mu Baibolo. Kwingijisha byo mutanga kukemulengela kwikala na lusekelo lwa kutanga Mambo a Lesa. Ne anweba mukamba byonka byaambile nyimbi wa masalamo amba: “Naswana milaye yenu [Yehoba] myaka; Mambo mo mo asangalela muchima wami.”—Sala. 119:111.

Kange mupitengamotu kapambala pa kunengezha ne. Abanyai bulongo kimye kya lufunjisho lwa pa bunke na kimye kya kunengezhezhamo kupwila. Ba Raquel baambile’mba: “Javula nkoka bingi kya kukankalwa ne kumvwa byo mbena kutanga. Kwikala na kimye kicheche kya lufunjisho kwawama. Kunkwasha kumvwisha byo mfunda.” Ba Chris nabo baambile’mba: “Inge napitamotu lubilo, jiwi ja mu muchima jinkatazha mambo ndanguluka amba kafwako kyo nauba ne. Kechi bimfika pa muchima ne.” Onkao mambo, mutekanyenga pa kutanga.

Ikalai na muchima wa kukebesha kufunda mambo a Lesa. Mutumwa Petelo waambile’mba: “Mwikale nobe twana twa lukeke, musake mukaka wa muchima wawamatu wabula bujimbijimbi, emukomeshe, mufike ne ku lupulukilo.” (1 Pe. 2:2) Baana basemwatu na mujojo wa kukeba kwamwa. Pano bino, Binembelo byamba kuba amba twafwainwa kwikala na muchima wa kukebesha kufunda Mambo a Lesa. Inge ke mutange jipa jimo ja mu Baibolo pa juba pa juba mukekala na muchima wa kukebesha kufunda. Kintu kyo mwapachile patanshi mukatendeka kwikitemwa.

Langulukainga pa bibaba bya mu Baibolo. Kulanguluka pa byo tutanga nako kwitulengela kumwenamo byawama. Kuba bino kukemukwasha kukwatankanya bintu bya ku mupashi byo mufunda. Ne kikafumamo mukekala na maana a Lesa anema nobe mangalite, ko kuba amba kintu kyanema bingi.—Sala. 19:14; Mana 3:3.

Kwingijisha Bulongo Kimye

Kutwajijila kwikala na muchima wawama wa kukeba kufunda kechi kwapela ne, pano bino mufuma bintu byawama byavula bingi. Kuba bino kukemulengela kuyilako palutwe mu kumvwisha binembelo. (Hebe. 5:12-14) Maana ne milangwe byo mwikala nabyo na mambo a kufunda Binembelo byanembelwe na lutangijilo lwa mupashi, bikemulengela kwikala na lusekelo ne mutende. Maana a mu Mambo a Lesa anembelwe na mupashi kyo “kichi kya bumi” ku bonse beatanga ne kwiengijisha.—Mana 3:13-18.

Kutapo muchima kutanga Mambo a Lesa kwakonsha kwimulengela kwikala na muchima wa milangwe. (Mana 15:14) Uno muchima ukemukwasha kupana lujimuno lwaimena pa Baibolo mu jishinda jawama. Inge byo mutanga mu Binembelo ne mu mabuku afuma ku ‘kalume wakishinka kabiji wa maana’ ke bimutangijile pa kufuukula bintu popo mukamona buwame bwa Mambo a Yehoba anembelwe na lutangijilo lwa mupashi. (Mat. 24:45) Mukekala na mweno yawama pa bintu ne kuta muchima ku bintu bya ku mupashi. Kabiji bulunda bwenu ne Yehoba bukawama bingi.—Sala. 1:2, 3.

Kwikala na butemwe bukatampe pe Lesa kukemulengela kubulako bakwenu byo mwaitabilamo. Kuba bino nako mufuma byawama bingi. Ba Sophia luno bata muchima pa kulabijila binembelo byapusana pusana ne kwibingijisha bulongo kulengela bantu kuteleka ku byo bamba, kabiji ne kuwamishako ñingijilo yabo ya mwingilo wa bwina Kilishitu. Baambile’mba: “Kumona byambo bya mu Baibolo byo bifika bantu pa muchima kundetela bingi lusekelo.”

Nangwa byonkabyo, bulunda bwa pa muchima ne Yehoba yo mfweto ikatampe yakilamo kunema ifuma mu kuta muchima pa Mambo a Lesa. Kufunda Baibolo kwimulengela kuyuka bulongo mizhilo ya Lesa, butemwe, bumpanyi ne buchibamambo bwanji. Kafwako kyanema kukila pa kufunda Baibolo ne. Taingako muchima kufunda Mambo a Lesa. Kuba bino ko kuba amba mubena kwingijisha bulongo kimye.—Sala. 19:7-11.

[[Kitenguluzha/Kipikichala pa peja 5]

BIKONKWANYI NE MASHINDA A KWINGIJISHA PA KUTANGA MAMBO A LESA

▪ Lombainga pa kutendeka kutanga Baibolo ne kutapo muchima.

▪ Nemekainga byo mufunda.

▪ Ibikilainga bikonkwanyi byo mwakonsha kufikizha.

▪ Monaingapo mashinda a kulumbulwilamo Binembelo.

▪ Fwanyikizhainga mashimikila a mu Baibolo.

▪ Ikalaingapo na kimye kya kupesapesa binembelo byakatazha pa kuba’mba mumvwishe mo byatala.

▪ Kange mupitengamotu kapambala pa kunengezha ne.

▪ Ikalai na muchima wa kukebesha kufunda mambo a Lesa.

▪ Langulukainga pa bibaba bya mu Baibolo.

[Kipikichala pa peja 4]

Pa kutanga mashimikila a mu Baibolo fwanyikizhainga mubena kupita mu bintu byo bapitangamo batongolwa mu jojo jishimikila