Fwenyai Kwipi Ne Lesa

‘Anweba Yehoba, . . . Mwangyuka’

“KINTU KIKATAMPE kyakonsha kukatazha ke kuyuka’mba kafwako wakuta muchima nangwa kuyuka byo ubena kumvwa ne.”a Nanchi ne anweba byobyo mumvwa nyi? Abya mwakiumvwapo kuba’mba kafwako wimuta muchima nangwa kuyuka byo mubena kupitamo ne byo mubena kwiumvwa ne nyi? Inge ibyo, mwakonsha kutana lutekenesho mu bino byambo: Yehoba wata bingi muchima bapopweshi banji kya kuba umona byonse byo babena kupitamo pa juba pa juba. Byambo bya kwa Davida biji mu Salamo 139 bimwesha buno bukine.

Byo ayukile’mba Lesa wamutemwa, Davida waambile’mba: “Anweba Yehoba, mwantalatala ne kungyuka.” (Kyepelo 1) Apano Davida waingijisha kyambo kyawama bingi. Kyambo kya Kihebelu kyatuntululwa amba “mwantalatala” kyakonsha kulumbulula kupoya jibwe ja buneme (Yoba 28:3), kwendela ntanda (Mitonyi 18:2), nangwa kukebesha ne kupalanguzha bishinka pa mambo aubiwa (Mpitulukilo ya mu mizhilo 13:14). Kya kine, Yehoba wituyuka bingi bulongo kya kuba kiji nobe upalanguzha mbaji yonse ya bwikalo bwetu. Davida byo aingijishe kyambo kya kuba’mba ‘mwangyuka,’ kitufunjisha kuba’mba Lesa wayuka bakalume banji bonse pa muntu pa muntu. Wibapesapesa ne kwibayuka bonse.

Davida waambilapo ne bikwabo pe Lesa byo apalanguzha amba: “Mwayuka byo naikala ne byo naimana; Mwayuka milanguluko yami byo iji kwalepa.” (Kyepelo 2) Mu jishinda jikwabo twakonsha kwamba’mba Yehoba uji “kwalepa,” wikala mwiulu. Nangwa byonkabyo, uyuka byo twikala, kampe panyuma ya kwingila juba jonse, kabiji ne byo tubuka lukelo ne byo tuba pa juba pa juba mu bwikalo bwetu. Kabiji wayuka ne milanguluko yetu ne byo tukeba kuba. Abya Davida waumvwine moyo pa kuyuka amba Yehoba upesapesa byonse byo oba nyi? Ine, waumvwine bulongo pa kumupesapesa mu jino jishinda. (Byepelo 23, 24) Mambo ka o aumvwijile bino?

Davida wayukile’mba Yehoba uji na mulanguluko wawama pa kupalanguzha bapopweshi Banji. Davida waambilenga pa mulanguluko wa Lesa byo anembele’mba: “Mutalatala jishinda jami ne kulala kwami, Kabiji mwayuka mashinda ami onse.” (Kyepelo 3) Moba onse, Yehoba umona ‘mashinda etu,’ ko kuba’mba bilubo byetu ne bintu byawama byo tuba. Nanchi uta muchima pa bilubo byetu nangwa pa bintu byawama nyi? Kyambo kya Kihebelu kyatuntululwa’mba “mutalatala” kyakonsha kulumbulula “kupepula” nangwa “kululula” byonka byuba njimi pa kululula kajo ne kufumyako makunzhi pa kuba’mba kushaletu kajo. Kyambo kya kuba’mba “mwayuka” kijitu pamo na kyambo kya Kihebelu kyatuntululwa’mba “kunemeka.” Pa kutalatala bapopweshi banji kumona bintu byo bamba ne byo boba pa juba pa juba, Yehoba wanemekako byawama byo boba. Mambo ka? Wanemeka bingi kwibikako kwabo mu kukeba kumutokesha pa muchima.

Salamo 139 witufunjisha kuba’mba Yehoba wata bingi muchima bapopweshi banji. Wibapesapesa ne kwibalamawizha moba onse a bwikalo bwabo. Onkao mambo, wayuka makatazho o bapitamo, kabiji wayuka ne byo kibakola ku muchima kimye kyo babena kupita mu makatazho. Nanchi kechi mukeba kupopwela Lesa wata muchima bantu banji ne nyi? Umvwe mukeba, mwakonsha kuketekela amba: Yehoba “kechi wakonsha kuvulama mingilo yenu ne butemwe bo mwamwesha jizhina janji ne.”—Bahebelu 6:10.

[Tubyambo twa mushi]