Kwashainga Banabalume Kukoma Ku Mupashi

“Kufuma lelo usakukwatanga bantu bomi.”—LUKA 5:10.

1, 2. (a) Banabalume baubanga byepi Yesu byo ebasapwilanga? (b) Mu uno mutwe tusakwisamba pa ka?

KIMYE kyo basapwijilenga monse mu Ngalilea, Yesu ne baana banji ba bwanga bakanjijile bwato kuya ku mpunzha kwa bunke. Pakuba mabumba ebalondejile lwa panshitu. Bonse baishile pa joja juba pa kwibabala “bajinga banabalume 5,000 kufumyako banabakazhi ne baana babacheche.” (Mat. 14:21) Pa kimye kikwabo, jibumba ja bantu jaishile kwajinga Yesu, mambo bakebelenga kubukwa ne kuteleka byo aambilenga. Pa bano pajinga ne “banabalume 4,000 kufumyako banabakazhi ne baana babacheche.” (Mat. 15:38) Kyamweka banabalume bo bavujile pa bantu baishile kwi Yesu kabiji bakebeshenga kuteleka ku byo afunjishenga. Kabiji wafwainwa wayukile kuba’mba banabalume bavula bakatangako muchima, mambo panyuma ya kuba kyakukumya kya kukwata masabi avula, Yesu waambijile mwaananji wa bwanga Shimona amba: “Kufuma lelo usakukwatanga bantu [nangwa’mba banabalume] bomi.” (Luka 5:10) Yesu watazhizhe mu kuba’mba mwingilo ye apele baana banji ba bwanga wipasha na wa kukwata masabi, onkao mambo wakonsheshe kwibakwasha kutana bantu bakatangako muchima ku bukine kabiji pa bano pakekalanga ne banabalume bavula.

² Ne lelo jino banabalume bavula batako bingi muchima ku Mambo a mu Binembelo o tusapwila. (Mat. 5:3) Nangwa byonkabyo, banabalume bavula babwela panyuma kabiji kechi banunguluka ku mupashi ne. Pano twakonsha kwibakwasha byepi? Nangwa kya kuba Yesu kechi waikajikile mukwekele wa kufumpila banabalume ne, bino waambilepo bingi pa bintu byakunzhile banabalume bajingako mu oa moba. Kwesakana na byo aubanga, twayai tumone byo twakonsha kukwasha banabalume kuyuka bya kuba mu bino bintu bisatu lelo jino: (1) Mwakumwena bya mu bwikalo, (2) Kuchiina bantu, ne (3) Kwiumvwa kubula kufikilamo.

Mwakumwena bya mu Bwikalo

3, 4. (a) Banabalume bavula bata muchima pa ka? (b) Mambo ka banabalume bamo o batela muchima pa kumona mwakwikela kukila bintu bya ku mupashi?

³ Munembeshi umo waambijile Yesu amba: “Mufunjishi, nsakwimulondelanga konse ko mubena kuya.” Pano bino Yesu byo amukumbwile’mba, “Mwana muntu kechi uji ne na pa kushamina mutwe ne,” munembeshi kyamukankamikile bingi. Baibolo kechi waambapo’mba uno mwanamulume waikele mwana wa bwanga wa kwa Yesu ne, mambo kyamweka waakaminwe’mba nkajanga ka, kabiji nkekalanga pi?—Mat. 8:19, 20.

⁴ Banabalume bavula bata muchima ku bintu bya ku mubiji kukila bintu bya ku mupashi. Kufunda kufika palepa ne kufola mikama ya mali byo bintu bilangulukapo banabalume bavula. Balanguluka’mba mali akebewa bingi mu bwikalo kukila bukwasho bufuma mu kufunda Binembelo ne kwikala balunda na Lesa. Bakonsha kumwesha lusekelo mu bifunjisha Baibolo, pano bino “bya kutabataba bya buno bwikalo ne bulume bwa bujimbijimbi bwa bunonshi” palutwe kacheche bibalengela kubula kutako muchima. (Mako 4:18, 19) Vulukai Yesu byo akwashishe baana banji ba bwanga kuyuka bya kutangizhako mu bwikalo bwabo.

5, 6. Ki ka kyalengejile Andeleo, Petelo, Yakoba ne Yoano kutangizhako mwingilo wa kusapwila kukila mwakumwena bwikalo?

⁵ Andeleo ne mulongo wanji Shimona Petelo baingijilanga pamo mu busulu bwa kukwata masabi. Uno ye mwingilo waingilangapo Yoano ne mulongo wanji Yakoba ne shabo, aye Zebede. Busulu bwabo bwabayile kya kuba batwezhezhe ne bankito. (Mako 1:16-20) Andeleo ne Yoano byo baumvwine nkuwa pe Yesu kwi Yoano Mubatizhi, bashiinwe amba batana Mesiasa. Andeleo wakabujile mulongo wanji Shimona Petelo, kampepo ne Yoano naye wakabujileko mulongo wanji Yakoba. (Yoa. 1:29, 35-41) Mu bañondo balondejilepo, bano bonse bana bayilenga ne Yesu na kusapwila mu Ngalilea, Yudea ne mu Samaliya. Panyuma ya kupitapo moba babwelele ku busulu bwabo bwa kukwata masabi. Bamwesheshe lusekelo mu bintu bya ku mupashi, pano bino pa kyokya kimye kechi bayukile’mba mwingilo wa kusapwila ye wanemene kukila bintu byonse ne.

⁶ Pa kimye kikwabo, Yesu waichile Petelo ne Andeleo kuba’mba bamulondele ne kwikala “bakukwata bantu.” Pano baubilepo byepi byo bebechile? “Ponkapotu bashile makonde abo kebamulondele.” Yakoba ne Yoano nabo byo byo baubile. “Ponkapotu abo bashile bwato ne shabo, kebamulondele.” (Mat. 4:18-22) Ki ka kyalengejile bano banabalume kutendeka mwingilo wa kimye kyonse? Nanchi lusekelo lwabo lwaishiletu ponkapa nyi? Ine! Mambo pa bañondo bafumineko, bano banabalume batelekele byaambile Yesu, kumona byo aubilenga byakukumya ne kizaku kya bololoke, kabiji bamwene ne bantu byo batemenwe pa byo ebasapwijilenga. Ne kyafuminemo lwitabilo ne luketekelo lwabo mwi Yehoba lwakosele!

7. Twakonsha kukwasha byepi bo tufunjisha Baibolo kwikala na luketekelo lwa kuba’mba Yehoba uji na bulume bwakukwasha bantu banji?

⁷ Twakonsha kulondela byepi byaubanga Yesu pa kuba’mba tukwashe bo tufunjisha Baibolo kuketekela mwi Yehoba? (Mana 3:5, 6) Mfunjishisho yetu yo yakonsha kwibalengela kuba bino. Kimye kyo tubena kufunjisha, twafwainwa kwamba pe Lesa byo etulaya kumona mapesho avula inge twatangizhako bintu bya Bufumu patanshi. (Tangai Malakai 3:10; Mateo 6:33.) Nangwa kya kuba twakonsha kwingijisha binembelo byavula pa kulumbulula Yehoba byo amwena bantu banji bya mu bwikalo, bino twafwainwa kumona’mba byubilo byetu byayilamo na byo tubena kufunjisha. Kwibashimikizha bo tufunjisha Baibolo byo twapitamo mu bwikalo kwakonsha kwibalengela kukinka manungo mwi Yehoba. Kabiji twakonsha ne kwisamba nabo bintu byapichilemo bamo byanembwa mu mabuku etu.a

8. (a) Mambo ka o kyanemena ubena kufunda Baibolo ‘kutompa ne kumona byo awama Yehoba’? (b) Twakonsha kukwasha byepi ye tufunjisha Baibolo kwimwena mwine Yehoba byo awama?

⁸ Kutanga ne kuteleka ku mashimikila aamba pa bantu bo bakipeshapo kwi Yehoba kechi byo byonkatu bilengela kwikala na lwitabilo lwakosa ne. Ufunda Baibolo wafwainwa mwine kwimwena buwame bwa Yehoba. Nyimbi wa masalamo waimbile’mba: “Mutompai, mumone byo awama aye Yehoba: Ye mwine wa lusekelo awa wamuketekela.” (Sala. 34:8) Twakonsha kukwasha byepi ye tufunjisha Baibolo kuyuka’mba Yehoba wawama? Twambe’mba muntu ubena kufunda Baibolo uji na lukatazho lwa bya mali kabiji ubena kukeba kushinda muteeto watama, nabiji kupepa, kisela kya kuchika, nangwa kukizhamo kutoma malwa. (Mana 23:20, 21; 2 Ko. 7:1; 1 Timo. 6:10) Nanchi kumufunjisha kulomba bukwasho bwa Lesa pa kuba’mba ashinde muteeto watama kechi kwakonsha kumukwasha kumona buwame bwa Lesa nenyi? Kabiji akilangulukai ne pa kyakonsha kubiwa inge twatundaika ye tufunjisha Baibolo kutangizhako bintu bya ku mupashi kupichila mu kwikalako na kimye kya kufunda Baibolo, kunengezha kupwila ne kutanwa ku kupwila kwa bwina Kilishitu mulungu ne mulungu. Inge ke emwene mwine Yehoba byo abena kumupesha pa kwibikishako kwanji, lwitabilo lwanji popo lwakonsha kukoselako!

Kuchiina Bantu

9, 10. Mambo ka Nikodema ne Yosefwa mwina Alimatea kyo babujile kukeba kumwesha’mba batemenwe bingi bintu byo baumvwine kwi Yesu? (b) Mambo ka banabalume bamo lelo jino o bakankazhamina kulondela Kilishitu?

⁹ Na mambo a kuchiina bakwabo, banabalume bamo bakankazhama kulondela bulongo Kilishitu. Nikodema ne Yosefwa mwina Alimatea kechi bakebele kumwesha’mba batemenwe byo baumvwine kwi Yesu ne, mambo bachiine bakwabo Bayudea byo bakonsheshe kwibambila ne kwiboba inge bayuka. (Yoa. 3:1, 2; 19:38) Kechi kyatamine kuba bino ne. Bantangi ba bupopweshi bakizhizhemo ne kukizhamo kushikwa Yesu kya kuba palutwe bonse bamwesheshe lwitabilo mwi aye bebapangile mu nshinagoga.—Yoa. 9:22.

¹⁰ Mu mapunzha amo lelo jino, inge muntu wamwesha lusekelo lukatampe mwi Lesa, Baibolo nangwa bupopweshi, bakonsha kumubika mu kyuya ku bakwabo mo bengijila, balunda nanji nangwa bakwabotu. Mu mapunzha akwabo, muntu inge wabula bakwabo amba ubena kukeba kupimpula bupopweshi, wakonsha kwibika mu kizumba. Moyo wa kuchiina bantu ubaya bingi kikatakata inge awo muntu mushilikale, uji mu bya bumulwila ntanda nangwa inge uji na kifulo mu kimasamasa. Kyakumwenako, mwanamulume umo mu Germany waambile’mba: “Bakamonyi byo musapwila kufuma mu Baibolo bya kine. Pano inge naikala Kamonyi lelo, kisakuya nkuwa kya kuba kesha bantu bonse jo jashi jo bakambangapotu. Bakwetu ba ku nkito, bantu mu ino nyaunda, ne bakwetu ba mu kabungwe mo tuji na kisemi kyami bakammona byepi? Kechi nakonsha kuchinchika bino byonse ne.”

11. Yesu wakwashishe byepi baana banji ba bwanga kushinda moyo wa kuchiina bantu?

¹¹ Nangwa kya kuba batumwa ba kwa Yesu bonse bachinchikile, nabo kimye kimo bachinanga bantu. (Mako 14:50, 66-72) Yesu wibakwashishe byepi kutwajijila kubula kuchiina bakwabo nangwa kya kuba bebazakamishanga. Yesu wafunjishe baana banji ba bwanga kuyuka bya kuba na lumanamo lo bakonsheshe kutalañana nalo. Waambile’mba: “Mukasekele umvwe bantu bemushikwa, kwimukana, kwimunena mwenga ne kwimwambila amba mwi babi pa mambo a Mwana muntu.” (Luka 6:22) Yesu wabujile jimo baana banji ba bwanga kuba’mba bafwainwe kuketekela kwibendeleka ku bantu. Bafwainwa kutalañana na myendeleko na “mambo a Mwana muntu.” Kabiji Yesu wibalayile ne kuba’mba Lesa ukebakwasha kikulutu baketekela mwi aye kwibakwasha ne kwibakosesha. (Luka 12:4-12) Kunungapo, Yesu watundaikile bakatataka kupwanañana na baana banji ba bwanga ne kwikala balunda nabo.—Mako 10:29, 30.

12. Ñanyi mashinda o twakonsha kukwashishamo bakatataka kubula kwikala na moyo wa kuchiina bantu?

¹² Ne atweba twafwainwa kukwasha bo tufunjisha Baibolo kushinda moyo wa kuchiina bantu. Luno lukatazho lukepako inge kya kuba muntu wayukila jimo bintu byo akonsha kupitamo. (Yoa. 15:19) Kyakumwenako, mambo ka akubujila kukwasha ubena kufunda Baibolo kunengezha bya kukumbula bulongo mepuzho akonsha kumwipuzha bakwabo mo bengijila nangwa bantu bakwabotu kwingijisha Baibolo? Kechi wafwainwa kwikalatu mulunda netu ne, bino twakonsha ne kumuyukisha ku bakwetu ba mu kipwilo, kikatakata inge pajipo bamo bekala bwikalo bwipashako na bwanji. Ne kyakila pa byonse, twafwainwa kumufunjisha kulomba kimye kyonse kufuma panshi ya muchima. Kuba bino kwakonsha kumukwasha kufwenya kwipi ne Lesa ne kumulengela kuketekela Yehoba kwikala Kibwe kyanji kya kufyamamo.—Tangai Salamo 94:21-23; Yakoba 4:8.

Kwiumvwa Kubula Kufikilamo

13. Kwiumvwa kubula kufikilamo kulengela byepi bamo kwinyantanyanta kwingilako mingilo ya ku mupashi?

¹³ Banabalume bamo benyantanyanta kwingilako mingilo ya ku mupashi mambo kechi bayuka kutanga bulongo nangwa kampe bamamata pa kwamba, nangwa baji na bumvu. Kabiji banabalume bamo nabo kibakatazha bingi kwamba pa mvula bantu. Bakwabo nabo bamona nobe kufunda, kukumbulapo pa kupwila kwa bwina Kilishitu nangwa kubulako bakwabo byo baitabilamo kwakatazha bingi. Mulongo umo waswile kino kishinka byo aambile’mba: “Byo najinga mwanyike, mu mwingilo wa busapwishi napelawizhanga kuya ku kinzhilo, ne kubepa nobe mbena kukonkonsha, kabiji nafumangako bukiji kuchiina kuñumvwa nangwa kummona. . . . Naumvwanga ne wa munda kuu inge baamba’mba tubena kuya na kusapwila ku nzubo ku nzubo.”

14. Mambo ka baana ba bwanga ba kwa Yesu o bakankejilwe kufumya mu ndemona?

¹⁴ Akilangulukai baana ba bwanga ba kwa Yesu byo beumvwine kubula kufikilamo byo bakankelwe kubuka kalombwana wajinga na ndemona. Bashanji yewa kalombwana bayile kwi Yesu ne kumwambila’mba: “[Mwanami wamulume] uji na kishimu kabiji wakolwa, javula uponena mu mujilo ne mu mema, naji kumuleta ku baana benu ba bwanga, bino abo bajikukankalwa kumubuka.” Yesu wamupangilemo awa ndemona mwi aye, ne kalombwana wabukilwe. Baana banji ba bwanga baishile ne kumushikisha’mba: “Mambo ka atweba o twaji kukankelwa kumupangamo ndemona?” Yesu wibakumbwile’mba: “Mambo a kalwitabilo kenu kacheche. Kine nemwambila namba: Umvwe mwaikala na lwitabilo nobe luchacha wa masitate, mukambila iwe mutumba amba, ‘Fuma papo uye popa,’ ne aye ukafumapo kabiji kafwako kyo mukakankalwa ne.” (Mat. 17:14-20) Kwikala na lwitabilo mwi Yehoba kulengela kushinda mikiika yabaya nobe mitumba. Kyakonsha kwikala byepi inge muntu wavulama kino kishinka kabiji watendeka kuketekela mu bulume bwanji pa kuba bintu. Muntu waketekela mu bulume bwanji inge wakankalwa kuba bintu bimo wakonsha kwiumvwa kubula kufikilamo.

15, 16. Twakonsha kukwasha byepi ubena kufunda Baibolo kubula kwiumvwa amba kechi wafikilamo ne?

¹⁵ Jishinda jawama kukwashishamo muntu wiumvwa kubula kufikilamo ke kumutundaika kuketekela mwi Yehoba kechi kwita muchima ne. Petelo wanembele’mba: “Ipelulainga munshi ya maboko a Lesa kuba amba akemutumbijike mu kimye kyafwainwa, saka mutaya bijikila byenu pe aye.” (1 Pe. 5:6, 7) Pa kuba’mba ye tufunjisha Baibolo obe bino twafwainwa kumukwasha kukoma ku mupashi. Muntu watemwa Lesa unemeka bingi bintu bya ku mupashi. Utemwa bingi Mambo a Lesa kabiji umwesha “kipangwa kya mupashi” mu bwikalo bwanji. (Nga. 5:22, 23) Kabiji utemwa bingi kulomba kwi Lesa. (Fili. 4:6, 7) Kabiji uketekela Lesa kumupa bulume pa kuba’mba akonshe kwingila mingilo yanji na kuchinchika.—Tangai 2 Timoti 1:7, 8.

¹⁶ Bantu bamo bo tufunjisha Baibolo nabo bakebewa kwibakwasha kutanga, bya kwisamba na bantu, nangwa kwamba. Bakwabo nabo bakonsha kulanguluka’mba kechi bafikilamo kwingijila Lesa ne, na mambo a bintu byatama byo baubanga saka bakyangye kuyuka Yehoba. Mu bino bintu byonse, bano bantu bakebewa bingi kwibatemwa ne kwibatekenya. Yesu waambile’mba: “Bantu batuntulu kechi bakeba shayuka wa michi ne, poso aba bakolwa.”—Mat. 9:12.

‘Kwatainga’ Banabalume Bavula

17, 18. (a) Twakonsha kukwasha byepi banabalume bavula mu mwingilo? (b) Tukafunda pa ka mu mutwe walondelapo?

¹⁷ Tuji na luketekelo lwa kuba’mba banabalume bavula bakatambwila mambo awama aji mu Baibolo. (2 Timo. 3:16, 17) Pano twakonsha kusapwila byepi banabalume bavula mu mwingilo? Ke kupichila mu kwikalako na kimye kyabaya kya kusapwila mabanga, ku mpelo ya mulungu pa kulemba juba nangwa mu bimye bya moba a kukokoloka banabalume bavula lo batanwa pa mazubo. Inge kyakonsheka twakonsha kwambila bo twatana pa nzubo kuba’mba tukeba kwisambako na banabalume pa nzubo. Twayai tusapwilenga busapwishi bwa kushukilwa ku banabalume bo twingila nabo ne boba baji na bakazhi babo bo tupwila nabo mu kipwilo kyetu.

¹⁸ Pa kusapwila ku bantu bonse, twakonsha kuketekala’mba bantu bamwesha lusekelo bakatambwila mambo awama. Twayai tutekenyenga bonse bakeba kufunda bukine ne kwibakwasha. Pano twakonsha kukwasha byepi banabalume babatizhiwa kununguluka ne kufikilamo kwingilako mingilo ya mu jibumba ja Lesa? Mutwe walondelapo ukakumbula buno bwipuzho.

[Tubyambo twa mushi]

Musakukumbula’mba Ka?

• Mwakonsha kukwasha byepi banabalume kutangizhako bintu bya ku mupashi?

• Mwakonsha kukwasha byepi bakatataka kubula kulondela byuba bakwabo?

• Ki ka kyakonsha kukwasha bamo kubula kwiumvwa’mba kechi bafikilamo ne?

[Caption pa peja 25]

Nanchi mumonapo bimye bya kusapwila banabalume mambo awama nyi?

[Caption pa peja 26]

Mwakonsha kukwasha byepi ye mufunjisha Baibolo kuyuka bya kushinda meseko?