Mepuzho Afuma Ku Batanga

Nanchi kutamba bya mulekese kwatama kya kuba mwina Kilishitu bakonsha ne kumupangilapo mu kipwilo nyi?

▪ Ee, bakonsha kumupanga. Kino kibena kumwesha ene mambo o kyanemena kwibikako kuleka kutanga ne kutamba bya mulekese, mu mabuku, bipikichala bya mu magazini, mu mafilimu, mavidyo ne pa intaneti.

Bya mulekese byakumbanatu ntanda yonse. Intaneti yalengela bya mulekese kukumbana kukila byo kyajinga kala kabiji yalengela bantu bavula kutendeka kwibitamba. Bakulumpe ne banyike bamo batamba bya mulekese pa intaneti kwa kubula kuketekela. Bakwabo nabo bakebatu bene kwibitamba, bamona nobe kechi byatama ne, mambo bakonsha kwibitanga nangwa kwibitamba mu bufyamfya mu nzubo nangwa mu ofweshi. Mambo ka bena Kilishitu o bafwainwa kwibichinuzhukilanga?

Tutana kishinka kyanema mu lujimuno lwapaine Yesu lwa kuba’mba: “Yense utwajijila kutala mwanamukazhi na lwiso, wauba nanji kala bukende monka mu muchima wanji.” (Mat. 5:28) Kya kine, kwilaala kwa bamulume ne mukazhi baji mu masongola kujitu bulongo kabiji kwibaletela lusekelo. (Mana 5:15-19; 1 Ko. 7:2-5) Pano bino, muno kechi mo mwatala kutamba bya mulekese ne. Bino mwavwangwa kwilaala kwa bantu babula kwisongola kulengela kwikala na milanguluko yatama iji mu lujimuno lwapaine Yesu. Kwa kubula nangwa kuzhinaukatu ne, kutanga nangwa kutamba bya mulekese kwapusana na mukambizho wa Lesa wa kuba’mba: “Ipayai bisakasaka mibiji yenu pano pa ntanda: bulalelale, bubipisho, kusakasaka kubindankanya muchima, kusakasaka kubi ne lwiso, ko kupopwela bankishi.”—Kolo. 3:5.

Pano ibyepi inge kya kuba mwina Kilishitu watambilepo bya mulekese jimo nangwa jibiji? Lukatazho lwanji lwakonsha kwesakana na lolwa lwajingapo ne nyimbi wa masalamo Asafwa waambile’mba: “Pakuba amiwa, nashi nkasenduke; Ne maulu ami ashi akatezhimuke.” Mwina Kilishitu wakonsha kwikala byepi na jiwi ja mu muchima jatoka ne kwikala mutende ne Lesa inge kya kuba ke atambe bipikichala bya mulekese bya banabalume nangwa banabakazhi nangwa bamulume ne mukazhi babena kwilaala? Asafwa kechi waikele mutende ne, mambo waambile’mba: “Juba jonse namanyikilwe, ne kufundwa lukelo lonse, mo bukila, mo bukila.”—Sala. 73:2, 14.

Mwina Kilishitu uji na luno lukatazho wafwainwa kulabamo ne kukeba bukwasho bwa Lesa. Buno bukwasho butanwa mu kipwilo, mambo binembelo byaamba’mba: “Umvwe muntu kaye mu jishinda jingi kwa kubula aye mwine kuyuka, anweba mwakoma ku mupashi mwafwainwa kumwalulula muntu wa byonka bino saka mwakoka muchima. Bino saka mujimuka.” (Nga. 6:1) Mukulumpe mu kipwilo umo nangwa babiji bakonsha kumukwasha kubikapo ne ‘lulombelo lwa lwitabilo lwakonsha kulengela muntu wakolwa kukosa, kabiji wakonsha kulekelwa mambo.’ (Yako. 5:13-15) Aba bo bakwasha kuleka kutamba bya mulekese batana kuba’mba kufwenya kwipi ne Lesa kwibakwasha bingi byonka byo kyajinga kwi Asafwa.—Sala. 73:28.

Nangwa byonkabyo, mutumwa Paulo waambile’mba bamo balengele mambo kechi balapijile “ku bubipisho bwabo, bulalelale ne byubilo bya kwizozola byo baubilenga”a ne. (2 Ko. 12:21) Kwesakana na kyambo kya Kingiliki kilumbulula “bubipisho,” Shayuka aye Marvin R. Vincent wanembele’mba kilumbulula “kwikala na biko na mambo a byubilo bya bunya.” Kyatama bingi kuba’mba kutamba bya mulekese bimo kwakilamo kutama kukila ne kutamba bantu bajitu mulekese nangwa kutamba mwanamulume ne mwanamukazhi babena kwilaala. Bya mulekese bimo byakilamo kutama ke byobya byavwangamo kwilaala kwa banabalume nangwa banabakazhi bonka bonka, kulenga tumabumba twa kwilaala, kwilaala na banyama, kutambisha banyike bya mulekese, bantu bavula kulaala na mwanamulume nangwa na mwanamukazhi kya kumukanjikizha, kukabisha banabakazhi, kwibashinkila mu mazubo na kwibalenga mambo nangwa kwibamanyika. Bantu bamo bajingako mu moba a kwa Paulo ‘milanguluko yabo yajinga mu mfishi’ kabiji ‘kechi bajinga na bumvu ne, kabiji bepananga kuba byubilo bya kwizozola mu kuba bubipisho bonse na lwiso.’—Efi. 4:18, 19.

Kabiji Paulo waambile ne pa “bubipisho” mu Ngalatiya 5:19. Shayuka wa ku Britain waambile’mba, “kyakonsha kulumbulula kikatakata lwiso lonse lwabula kufwainwa.” Bena Kilishitu bonse bafwainwa kuyuka kuba’mba bya mulekese byonse byo twaambapo peulu bya bunya, kabiji byakonsha kulengela bantu kwikala na “lwiso lwabula kufwainwa.” Paulo wapezhezheko mu Ngalatiya 5:19-21 byo aambilenga pa bantu boba bubipisho amba, “aba bebyuba kechi bakaswana bufumu bwa Lesa ne.” Inge kya kuba muntu waikala na muteeto wa kutamba bya mulekese bya bunya, bya mulekese bimwesha kwilaala kwatama, kampe pa kimye kyabaya kabiji wabula kulapila ne kukana kwikileka, kechi wakonsha kutwajijila kwikala mu kipwilo kya bwina Kilishitu ne. Bafwainwa kumupanga mu kipwilo pa kuba’mba kipwilo kikale kya butooto ne na byubilo byawama.—1 Ko. 5:5, 11.

Kyawama bingi kuyuka’mba bamo bajinga na muteeto wa kutamba bya mulekese bya bunya, bayile na kukeba bukwasho bwa ku mupashi ku bakulumpe mu kipwilo pa kuba’mba bapimpule bwikalo bwabo. Yesu waambijile bena Kilishitu ba ku Saladisa amba: “Ukoseshe bintu byashalapo byajinga pepi kufwa . . . vulukanga bintu byo watambwile ne kumvwa kabiji saka wibilama ne kulapila. Umvwe saka ubula kulaba ne kunkenkenta, . . . kechi ukayuka nangwatu pacheche kimye kyo nkeshilamo kwi obewa ne.” (Lum. 3:2, 3) Twakonsha kulapila ne kuchinuzhuka bizumba biji mu kutamba bya mulekese.—Yuda 22, 23.

Onkao mambo, kyanema bingi kuba’mba atweba bonse pa muntu pa muntu tufuukulepo kubula kutamba bya mulekese. Kya kine, twafwainwa kuchinuzhuka kutamba bya mulekese byonse po byapela.

[Tubyambo twa mushi]

[Mabulañano pa peja 30]

Mwina Kilishitu uji na luno lukatazho wafwainwa kulabamo ne kukeba bukwasho bwa Lesa