Mambo ka Umvwa Milombelo kyo Aswishisha Buyanji?

NANGWA kya kuba balomba, bamo bazhinauka inge Lesa koaji. Mambo ka o bazhinaukila? Kyamweka bazhinauka na mambo a buyanji bwavula mu ntanda. Nanchi mwakilangulukapo kala pa ene mambo Lesa o aswishisha buyanji nyi?

Nanchi Lesa walengele bantu kuba’mba bekale byonka byo baji luno, bambulwa kulumbuluka ne kuba’mba bayandenga nyi? Kyakonsha kwitukatazha bingi kunemeka lesa utemwa umvwe bantu ke bayande. Pano akilangulukai pa kino: Inge mwatana motoka wakatataka waonaika lubaji lumo, nanchi mwakonsha kwamba’mba byobyo bamulengele nyi? Ine! Muyuka’mba bamulengeletu “mutuntulu” paji muntu waonawinepo.

Kyo kimotu, inge mwamona byalengwa bilengwa, mwalanguluka ne pa malwañano ne mazhikakanwa atamisha bwikalo bwa bantu, mulangulukapo’mba ka? Baibolo ufunjisha’mba bamulume ne mukazhi batanshi Lesa wibalengele balumbuluka, beletelejiletu bene mu kuya kwa moba. (Mpitulukilo ya mu mizhilo 32:4, 5) Kyawamakotu ke kya kuba’mba Lesa ukabuka bantu ku bumbulwa kulumbuluka kabiji bantu bamukokela bakekala balumbuluka. Pano mambo ka o abanjila bibye?

Mambo ka o Abanjila Bibye?

Ene mambo aimena pa wafwainwa kulama bantu. Yehoba kechi walengele bantu amba bakelamenga abo bene ne. Aye ye wafwainwa kwikala Kalama wabo. Baibolo wamba’mba: “Mwine muntu kechi uji na bulume bwa kwenda monka mwafwainwa ne.” (Yelemiya 10:23) Kyataminekotu, bamulume ne mukazhi batanshi basatukijile bukalama bwa Lesa. Mizhilulwila yabo ibalengejile kwikala bandengamambo. (1 Yoano 3:4) Ne kyafuminemo baelele bulumbuluke bwabo ne kwiletelela abo bene ne ba mu kikota kyabo pamo.

Yehoba waswisha bantu kwilama abo bene pa myaka yavula bingi, kabiji byaubiwa mu bwikalo bwa bantu kufumatu ne kala bimwesha’mba bakankalwa kwilama abo bene. Bimwesha’mba makafulumende a bantu aletatu buyanji. Kafwako muntu wakonsha kufumyapo makondo, malwañano, nshiji nangwa bikola ne.

Lesa Ukafumyapo Byepi Bundengamambo?

Baibolo walaya kuba’mba Lesa katataka akalete ntanda ipya mukekala bololoke. (2 Petelo 3:13) Aba bonkatu befuukwilapo abo bene kutemwa bakwabo ne kuba kyaswa muchima wa Lesa bo bakekalamo.—Mpitulukilo ya mu mizhilo 30:15, 16, 19, 20.

Baibolo wamba ne kuba’mba, mu “juba ja kije” jafwenya kala pepi, Lesa ukafumyapo buyanji ne bonse baleta buyanji. (2 Petelo 3:7) Lesa watongola Yesu Kilishitu kwikala Kalama wa bantu balukokelo. (Danyela 7:13, 14) Bukalama bwa kwa Yesu bukoba ka? Baibolo waamba’mba: “Bakimote bakaswana ntanda. Kabiji bakasangalela mu kuvula kwa mutende.”—Salamo 37:11.

Byo aji Mfumu wa mwiulu, Yesu ukafumyapo byatama byonse, kuvwangako ne bikola, bukote ne lufu, byaishile kimye bantu kyo basatukijile Yehoba “nsulo ya bumi.” (Salamo 36:9) Yesu ukabuka bonse bakokela bukalama bwanji. Mu bukalama bwanji, ino milaye ya mu Baibolo yalondelapo ikafika:

◼ “Kafwako nangwa umo wikala mu yewa muzhi ukamba’mba: Nakolwa, ne; ne bantu bakekalamo mambo abo akalekelwa.”—Isaya 33:24.

◼ “[Lesa] ukebashimuna mipolo yonse ku meso abo, ne lufu, mabingo, kujila nangwa misongo kechi bikekalako jibiji ne. Bintu bya kala byapichijila.”—Lumwekesho 21:4.

Nanchi kechi kitutekenesha kuyuka’mba katatakatu Lesa akafikizhe milaye yanji ya kufumyapo buyanji nenyi? Onkao mambo, twafwainwa kwikala na luketekelo kuba’mba umvwa milombelo nangwa kya kuba waswisha buyanji.

Lesa koaji. Umvwa milombelo yenu, mibinzo ne bulanda bwenu. Kabiji ukebesha bingi kukemumona saka mwasangalala kimye kikapwa luzhinauko ne buyanji.