Chinuzhukainga Kwingijisha Baibolo mu Bingelekezha

“MAMBO a Lesa o omi kabiji aji bingi na bulume.” (Hebe. 4:12) Pa kwamba bino byambo, mutumwa Paulo wamwesheshe amba mambo a Lesa aji na bulume bwa kufika bantu pa michima ne kupimpula bwikalo bwabo.

Nangwa byonkabyo, bantu batendekele kumwena mungi bulume bwa byambo biji mu Baibolo kimye bunsatuki bwaambijilwe jimo kyo bwatendekele panyuma ya lufu lwa batumwa. (2 Pe. 2:1-3) Mu kuya kwa moba, bantangi ba machechi batendekele kwamba’mba bulume bwa bingelekezha bwafumanga mu Mambo a Lesa. Shayuka wa bya bupopweshi aye Harry Y. Gamble wanembele pa mambo a “kwingijisha binembelo bya bwina Kilishitu mu bya bulozhi.” Waambile kuba’mba mu myaka kitota kya busatu, Origen Fwaza wa mu Chechi waambile’mba, “inge muntu waumvwatu byambo byazhila mu matwi anji, byakonsha kumukwasha: umvwe byambo bya bulozhi biji na bulume, pano nga Mambo a Lesa azhila akonsha kupela pi?” John Chrysostom wajingako ku mpelo ya myaka kitota kya buna wanembele’mba, “Diabola kechi wakonsha ne kwisulwa malwa kuya mu nzubo muji Baibolo ne.” Kabiji wanembele ne kuba’mba bamo bakobeka munshingo byepelo bimo bya mu Baibolo kuba’mba bibazhikijilenga. Shayuka Gamble wanungilepo kuba’mba Augustine, wafunda bya bupopweshi bwa ba Katolika waambile’mba, “inge mutwe ubena kukola wafwainwa kushamina ku buku wa Mambo awama a kwa Yoano kuba’mba mutwe aleke kukola.” Onkao mambo, mabuku a mu Baibolo beengijishenga mu bya bulozhi. Nanchi mwafwainwa kumonanga Baibolo amba kizhimba nangwa’mba muchi wa mashuko wakonsha kwimuzhikijila ku byatama nyi?

Jishinda jikwabo jatama jingijishishamo bantu Baibolo ke jino. Bazhikula buku, kikatakata Baibolo ne kutanga kinembelo kitanshi kufikilapo meso na mulanguluko wa kuba’mba abyo byambo biji pa kyokyo kinembelo bisakunengezha lutangijilo lubena kukebewa nangwa kwibabula bikamweka kulutwe. Kyakumwenako, Shayuka aye Gamble waambile’mba kimye kimo Augustine waumvwine jiwi ja mwana wa mucheche jibena kwamba mu nzubo ya bamukinkalankulo amba: “Tolai mutange, tolai mutange,” Augustine walangulukile’mba uno ke mukambizho wafuma kwi Lesa kuba’mba azhikule Baibolo ne kutanga kinembelo kitanshi kyo asakumona.

Abya mwaumvwapo kala bantu inge babena kupita mu makatazho balomba kwi Lesa apa bino bazhikula Baibolo na luketekelo lwa kuba’mba kyepelo kitanshi kyo basakumona kisakwibakwasha kuyuka mwa kubila na lukatazho nyi? Nangwa kya kuba bakeba bukwasho, pano bino, jino kechi jo jishinda bena Kilishitu jo bafwainwa kutainamo bukwasho bwa mu Binembelo ne.

Yesu walayile baana banji ba bwanga amba ukebatumina “nkwasho, mupashi wazhila.” Watwajijile kwamba’mba: “Ukemufunjisha bintu byonse ne kwimuvululamo bintu byonse byo nemubujile.” (Yoa. 14:26) Onkao mambo, tutana bukwasho bwa mu Baibolo kupichila mu kwingijisha byo tufunda, kechi kubatu amba ponka po nsakuzhikula po paji bukwasho ne.

Kwingijisha Baibolo mu jishinda ja bingelekezha kwasampukila ne pa katele. Nangwa byonkabyo, Mambo a Lesa akanya kuba bya lubuko. (Levi 19:26; Mpitu. 18:9-12; Byu. 19:19) “Mambo a Lesa o omi kabiji aji bingi na bulume,” nangwa byonkabyo, twafwainwa kwiengijishanga bulongo. Maana alumbuluka a kuyuka Baibolo o awamisha bwikalo bwa bantu, kechi kwingijisha Baibolo mu bingelekezha ne. Kwikala na ano maana kwakwasha bavula kwikala na byubilo byawama, kuleka bwikalo bwa kwitayaika, kwikala bulongo mu bisemi, ne kulenga bulunda bwawama na Mwine wanembele Baibolo.