MUKIVULUKA NYI?

Nanchi mwatanga magazini a katataka a Kyamba kya Usopa nyi? Monai inge mwakonsha kukumbula ano mepuzho:

Nanchi kuzhikula Baibolo ne kutanga kinembelo kitanshi kufikilapo meso ko kuba ka, kabiji bena Kilishitu bafwainwa kwikumona byepi?

Ke kuzhikula Baibolo ne kutanga kinembelo kitanshi kufikilapo meso na mulanguluko wa kuba’mba byambo biji pa kyokyo kinembelo musa kutanwa bukwasho bo babena kukeba. Bena Kilishitu bakine kechi boba bya lubuko ne. Abo bafunda Baibolo pa kuba’mba bekale na maana alumbuluka ne kuyuka lutangijilo lwa Lesa.—12/15, jipa 3.

Nga “ntanda” ikapita yo ika?

“Ntanda” ikapita ke bantu baji mu ntanda babula kuba kyaswa muchima wa Lesa. (1 Yoa. 2:17) Ntanda ne bantu bakishinka kechi bakonaika ne.—1/1, mapa 5-7.

Nangwa kya kuba wafwile kala, Abela wamba byepi kwi atweba? (Hebe. 11:4)

Uba bino kupichila mu lwitabilo. Twakonsha kufunjilako kwi aye ne kulondela lwitabilo lwanji. Lwitabilo lwanji lwakosa ke kyubilo kyo twafwainwa kwikala nakyo atweba bonse.—1/1, jipa 12.

Ñanyi bintu bimo byo twafwainwa kubula kuswisha kwitufumya kwi Lesa?

Bintu bimo ke bino: Nkito, makayo ne bya kisangajimbwe byo tusala, kupwanañana na mulongo wetu wapangiwa mu kipwilo, kwingijisha bya kulengalenga byakatataka, kwakamwa na mambo a butuntulu bwetu bwa mubiji, kutemwisha mali ne kwitota kumwekela mu kunemekesha bifulo nangwa kumona nobe twayuka byavula kukila bakwetu.—1/15, mapa 12-21.

Twakonsha kufunjilako ka ku kwipelula kwa kwa Mosesa?

Mu kifulo kya kwitota, Mosesa wakinkile manungo mwi Lesa. Kechi twafwainwa kuleka bulume, kifulo, nangwa maana a kuyuka bintu kwitulengela kwilundumika ne, twafwainwa kuketekela mwi Yehoba. (Mana 3:5, 6)—2/1, jipa 5.

Aba bakasangulwa bakekala pi?

Kajibumba kacheche ka ba 144, 000 bakekala mwiulu. Nangwa byonkabyo, bavula bakasangulwa bakekala na bumi pano pa ntanda myaka ne myaka.—3/1, jipa 6.

Mu ñanyi jishinda bena Isalela mo babujile “mukanda wa mu muchima”? (Yele. 9:26)

Bajinga na michima yauluñana ne ya kusatuka ibalengejile kuma mashingo, ko kuba’mba kubula kuleka ndangulukilo yatama, byakusakasaka ne kuchinuzhuka bintu bibalengelanga kulengulula mikambizho ya Lesa. (Yele. 5:23, 24)—3/15, mapa 9-10.

Yesu wamwesheshe byepi bya kwikala bwikalo bwa lusekelo?

Wayukile kuba’mba kuba kyaswa muchima wa Lesa kyo kyo aikejileko. Watemenwe bingi Shanji ne bantu. Kabiji wayukile kuba’mba Shanji wamutemwa kabiji ne kuba’mba waitabilwa kwi aye. Bino byo bintu bilengela kwikala bwikalo bwa lusekelo.—4/1, mapa 4-5.

Bañanyi baji mu lubaji lwa pano pa ntanda lwa jibumba ja Lesa?

Muji Jibumba Jitangijila, tuvoto twa misampi, bakalama benda, mabumba a bakulumpe, bipwilo ne Bakamonyi bonse pa muntu pa muntu.—4/15, jipa 29.

Mambo ka o twakonsha kwambila’mba Lesa kechi wakanamine pa kukambula bantu ne?

Yehoba kechi umwenamo lusekelo mu lufu lwa ndengamambo ne. (Ezi. 33:11) Bintu byo aubile kala bimwesha’mba Lesa ujimwina jimo bantu saka akyangye kuleta lonaiko. Kino kitulengela kuketekela kuba’mba tukapuluka lukabisho lukeya.—5/1, mapa 5-6.

Nanchi bena Isalela baipayanga bambanzhi kupichila mu kwibakobeka ku bichi nyi?

Ine. Bisaka bikwabo byo byaubanga bino, kechi bena Isalela ne. Kimye kyanembejilwenga Binembelo bya Kihebelu, bangubabibi patanshi bebepayanga kupichila mu kwibasa mabwe. (Levi 20:2, 27) Apa bino kitumbi baya na kwikikobeka pa kichi pa kuba’mba kikale kya kujimunako bakwabo.—5/15, jipa 13.

Mambo ka mu ntanda kyo mwabujila mutende?

Nangwa kya kuba bantu babena kuba bintu byawama byavula, pano bino kechi balengelwe kuba’mba baketangijilenga abo bene ne. (Yele. 10:23) Satana ye ubena kutangijila ino ntanda. Onkao mambo, bantu kechi bakaleta mutende ne. (1 Yoa. 5:19)—6/1, jipa 16.