“Mambo a Lesa ... Engila”
1 Mutumwa Paulo wanembele’mba, “Mambo a Lesa o omi, ne kwingila engila.” (Hebe. 4:12) Wikitazhizhe muka? Mambo a Lesa aji mu Baibolo aji na bulume bwa kwalula bantu. Maana ajimo apimpula bwikalo bwa bantu ke bwawama. Apana lutekenesho ne luketekelo luleta bantu kwi Yehoba Lesa Upana Bumi, akwasha ne bantu bakishinka kutatula kwenda mu jishinda jiya ku bumi bwa myaka. Onkao mambo, pa kuba kino, twafwainwa kutanganga Baibolo kimye kyo tubena kusapwila bantu.
2 Tangai Kinembelo Kimye Kyonse kyo Mubena Kusapwila: Javula kimweka nobe basapwishi bavula pa kwisamba na mwina nzubo kechi batanga Baibolo ne. Nanchi nenuwa byo byo muba nyi? Mambo akuba bantu bavula bamweka nobe kechi baji na kimye kyabaya kya kwisamba nabo ne, apo kampe nenuwa mwatendeka kisela kya kutambikatu mabuku nangwa kwambapotu pa kinembelo kwakubula kwikitanga. Tubena kutundaika basapwishi bonse kwesekanga na ngovu kutanga nangwa vesi imotu mu Baibolo kimye kyo babena kusapwila mambo awama, mambo jino jishinda jakonsha kukwasha muntu kushiinwa’mba mambo etu awama afuma mu Baibolo.
3 Nangwa kya kuba kechi bonse batanga Baibolo ne, bavula beinemeka. Nangwatu bantu babula kimye bakonsha kutelekako pacheche Mambo a Lesa inge twiatanga. Umvwe twatanga kinembelo kyafwainwa ne kwikilumbulula bulongo mu ngipipishilo, bulume bwa mambo a Yehoba bwakonsha kwalula nteleki. Mwakonsha kukwatankanya byepi byambo byenu bitanshi na vesi yo mukeba kutanga mu Baibolo?
4 Esekai Kino mu Mwingilo wa Magazini: Mukulumpe mu kipwilo wenda, wafwainwa kweseka na ngovu kutanga Binembelo kimye abena kutambika magazini. Wafwainwa kusenda Baibolo mucheche mu pokochi. Umvwe watambika magazini ne kwambapo pacheche pa mutwe umo, kwakubula kukankazhama wafwainwa kuzhikula Baibolo ne kutanga vesi yakwatankana bulongo na yewo mutwe. Kampe wakonsha kushikisha’mba, “Mubena kulangulukapo’mba ka pa uno mulaye ubena kwitukosesha bibye?” kepo ne kutanga kinembelo kyo ayukila jimo.
5 Monai’mba mubena kutangila pamo na nteleki vesi imo nangwa abiji kufuma mu Baibolo. Kwingila kwayo kwakonsha kushinkula jishinda ja kukokela bantu bavula kwi Lesa.—Yoa. 6:44.