Ingijishainga Bulongo Baibolo
1. Mwakonsha kuba byepi pa kwinengezha kuya mu mwingilo wa mu bujimi?
1 Kikale tubena kulanguluka kushajika buku wa byepi nangwa wa byepi mu mwingilo, kyanema bingi kusalapo kinembelo kilengela muntu kulangulukapo ne kwisamba na boba bakonsha kuteleka. (Hebe. 4:12) Kutangapo kinembelo kimo kiji mu buku ye mubena kukeba kushajika kyakonsha kwimulengela kutendeka kwisamba muyewo buku. Mu mapunzha amo, basapwishi bekitana kwikala kyawama kusenda Baibolo mu maboko abo kimye kyo babena kusolomoka muntu nangwa umvwe baji mu mwingilo wa ku nzubo ne nzubo.
2. (a) Twakonsha kutendeka byepi mwisambo wetu na kinembelo? (b) Mitwe ka ya mu Binembelo iletela bantu ba mu nyaunda yenu lusekelo?
2 Tendekelaipo na Kinembelo: Basapwishi bamo batendekelapo mwisambo wabo kupichila mu kushikisha jipuzho japela ja mu kinembelo kya mu Baibolo kyo basakutanga. Kino kilengela kutatula ponkapotu kwisamba Mambo a Lesa. Nanchi ano mashinda alondelapo a kutendekelamo mwisambo akonsha kwingila bulongo mu nyaunda yenu nyi?
◼ “Umvwe mwajinga na bulume bwa kuba bino, nanchi mwakonsha kuletako luno lupimpu nyi?” Tangai Lumwekesho 21:4.
◼ “Mambo ka o tubena kwikela mu bino bimye byakatazha?” Tangai 2 Timoti 3:1-5.
◼ “Nanchi mwalanguluka amba kimasamasa kyetu kyakonsha kuwama umvwe yense walondela uno mukambizho nyi?” Tangai Mateo 7:12.
◼ “Abya mwalanguluka amba baana benu bakeyowa bwikalo bwalondololwa pano nyi?” Tangai Masalamo 37:10, 11.
◼ “Nanchi mulanguluka amba juba jikafika bino byambo po bikafikizhiwa nyi?” Tangai Isaya 33:24.
◼ “Abya mwamuyuka kafulumende ukapimpulwa watongolwa pano nyi?” Tangai Danyela 2:44.
◼ “Nanchi mwakilangulukapo kala kushikisha Lesa jino jipuzho nyi?” Tangai Yoba 21:7.
◼ “Abya kyakonsheka kukamona jibiji batemwe betu bafwa nyi?” Tangai Yoano 5:28, 29.
◼ “Nanchi bafu bayuka bibena kuba bantu bomi nyi?” Tangai Musapwishi 9:5.
3. Twakonsha kukwasha byepi bantu kuba’mba bomvwishe kinembelo kya mu Baibolo kyo twatanga?
3 Londololai, Ambai kya Kumwenako, ne Kulumbulula: Umvwe muntu uji na lusekelo lwa kukeba kwisamba, kechi mwafwainwa kupupumina kupwisha mwisambo ne, anweba mutekenyai kuba’mba mulondolole, mwambe kya kumwenako, ne kulumbulula kinembelo kyo mwatanga pa kuba’mba awo muntu ekyumvwishe. (Ne. 8:8) Umvwe bantu baumvwa ne kulondela bifunjisha Mambo a Lesa, kyakonsha kwibalengela kupimpula bwikalo bwabo mu jishinda ja kukumya.—1 Tesa. 2:13.
4. Twakonsha kwingijisha byepi bulongo Baibolo pa kubwelako?
4 Twajijilai kwingijisha bulongo Baibolo byo mubena kubaisha mujojo wa yewo muntu. Mwakonsha kwingijisha jino jonka jishinda umvwe mubena kubwelako: (1) Salai kinembelo kyafwainwa. (2) Shikishai jipuzho japela kwesakana na kinembelo, apa bino mutange kinembelo. (3) Londololai, ambai kya kumwenako ne kwikilumbulula. Monai’mba kimye kyonse kyo mwabwela ku yewo muntu mwamufunjishapo bimo byakatataka bya kumunungilako maana mu Mambo a Lesa. Mu kuba bino mwakonsha kubazhimukakotu mwatendeka kufunjisha lufunjisho lwa Baibolo!