JISHIMIKILA JA BWIKALO

“Namwene, Bino Kechi Nebyumvwine mo Byayila Ne”

Byashimikizha ba Olivier Hamel

Najingatu na myaka ibiji mu 1975 kimye kitanshi bamama kyo bamwene’mba nji na lukatazho. Bamama byo bandelele, balunda nabo bataile kintu panshi kyavumine bingi ne kuba kyongo kikatampe. Bamama bamwene kuba’mba kechi nabazhimukile ne. Nafikizhe myaka isatu, kwa kubula kuyuka kwamba. Bansemi kibapezhezhe bingi maana dokotala byo ebabujile’mba ne kibulu.

Saka nkijitu mwanyike, bansemi bami masongola apwile, Bamama bajinga na mwingilo wa kulama amiwa ne bakolojami babakazhi ne babalume bunke. Pa kyokya kimye, mu France babibulu kechi bafunjile byonka byo bafunda luno ne, kabiji mashinda o baingijishanga alengelanga buyanji kubayilako. Nangwa byonkabyo, kufumatu ku bwanyike bwami najinga na mashuko abujile babibulu bavula. Lekai nshimikizhe byo kyajinga.

Pa myaka yavula, bafunjishi bavula baitabijile kuba’mba baana ba bibulu bafwainwa kufunda kupichila mu kutala pa kanwa ne kumona bibena kuvwevweta byatunwa. Mu France, monakomejile, mulaka wa kwamba na maboko bamukainye mu masukulu. Baana ba bibulu bavula be bakasanga maboko kunyuma kimye kyo babena kufunda.

Byo nakijingatu mwanyike, naikalanga kimye kyabaya na dokotala ufunjisha bya kwamba. Wankwatanga ku mubanga nangwa ku mutwe ne kundengela kubwezhabwezhapo byambo byo nabulanga kumvwa. Kechi nesambanga na banyike bakwetu ne. Ano moba ajinga a buyanji bingi kwi amiwa.

Byo nafikizhe myaka itanu na umo, bantumine ku sukulu wa ba bibulu. Kyo kyajinga kimye kitanshi kyo nesambilepo na ba bibulu bakwetu. Kuno nako kechi baswishanga kwamba na maboko ne. Inge waingijishatu maboko pa kwamba mu sukulu, ko kuba’mba basa kukukokola nangwa ku kukoka nsuki. Nangwa byonkabyo, kwa bunke twisambanga na maboko. Kyapeleleko, natendekele kwisamba na bakwetu. Po patendekejile myaka ina ya lusekelo.

Nangwa byonkabyo, byo nafikizhe myaka jikumi, bantwajile pa sukulu pajinga baana bamba ne kumvwa. Kino kyanshinkile bingi bulaka. Nalangulukilenga namba baana ba babibulu bonse bafwa pano yami yenka nashalapo. Byo balondejile muzhilo wa kwa dokotala, wachinanga’mba kwandapo kyapwilamotu kwa kubula kwamba, ba mu kisemi kyami kechi bayukile kwamba na maboko ne kabiji kechi banswishanga kukaya na baana ba babibulu ne. Mbena kuvuluka kimye kyo twafwakashijile dokotala, watujile buku wa mu mulaka wa kwamba na maboko pa desiki. Byo namwene bipikichala pa nkupiko, natongweleko munwe ne kwamba namba, “Mbena kukeba yewo buku.” Bukiji bukiji dokotala wamufile buku.a

NATENDEKA KUFUNDA BUKINE

Bamama betufunjishe mafunde a bwina Kilishitu. Betusendanga ku kipwilo kya Mérignac kya Bakamonyi ba kwa Yehoba, ku bwipi na Bordeaux. Byo nakijinga mwanyike, kechi naumvwanga byaambiwanga pa kupwila ne. Nangwa byonkabyo, bavula bebikangako bingi kunembela bishinka. Butemwe ne kunta muchima kwabo kwamfikile bingi pa muchima. Pa nzubo, bamama bamfunjishanga Baibolo, pano bino kechi naumvwanga byo bamfunjishanga ne. Naumvwine byonka biumvwine ngauzhi Danyela, awo panyuma ya kutambwila bungauzhi waambile’mba: “ne byumvwinetu, bino kechi nebyumvwine mo byayila ne.” (Danyela 12:8) Kwi amiwa kyajinga’mba “Namwene, bino kechi ne byumvwine mo byayila ne.”

Nangwa byonkabyo, bukine bwa mu Baibolo bwatendekele kujimba mizhazhi mwi amiwa. Nanemekele byo naumvwanga kabiji ne bikangako kwibingijisha mu bwikalo bwami. Kabiji nafunjilanga ne ku byubilo bya bakwetu. Kyakumwenako, Baibolo witutundaika kwikala batekanya. (Yakoba 5:7, 8) Kechi nayukile kutekanya byo kulumbulula ne. Pano bino, kupichila mu kumona bena Kilishitu bakwetu byo bamweshanga kino kyubilo, naishile kuyuka kutekanya byo kulumbulula. Kwambatu kine, namwenamo bingi mu kupwila kwa bwina Kilishitu.

KULEFULWA NE BYAWAMA BYAFUMAMO

Juba jimo, saka nkyangye kufikizha myaka 20, namwene babibulu bakyanyike saka besamba mu mulaka wa kwamba na maboko. Natendekele kukaya nabo mu bufyamfya kabiji natendekele kufunda Mulaka wa Kwamba na Maboko wa ki French. Natwajijile kutanwa ku kupwila kwa bwina Kilishitu, konataine Kamonyi wa kyanyike wantemenwe bingi. Wibikangako bingi kwisamba ne amiwa kabiji bulunda bwetu bwakosele. Nangwa byonkabyo, kwamwekele kintu kyankolele bingi ku muchima. Stéphane bamutaile pa kazhima na mambo a kukana kwimvwanga mu nkondo. Kino kyampezhezhe bingi maana. Stéphane byo ajinga mu kaleya, kyandefwile kya kuba kwashajiletu pacheche kuleka kutanwa ku kupwila kwa bwina Kilishitu.

Byo papichile bañondo 11, Stéphane bamufumishe mu kaleya kabiji wabwelele ku nzubo. Fwanyikizhai byo kyankumishe Stéphane byo atendekele kwisamba ne amiwa mu mulaka wa kwamba na maboko. Kechi ne kiswile ne! Ki ka kyamwekele? Stéphane wafunjile Mulaka wa Kwamba na Maboko wa ki French mu kaleya. Inge namona Stéphane byo abena kwingijisha maboko ne mubiji, naumvwanga bingi bulongo.

PANO NAUMVWISHA BUKINE BWA MU BAIBOLO

Stéphane watendekele kumfunjisha Baibolo. Kufumatu kyo kya kimye natendekele kukwatankanya bukine bonse bo nafunjile. Byo nakijinga lukeke, natemenwe bingi kutamba bipikichala biji mu mabuku etu, kwesakanya baji mu bipikichala ne kukeba bishinka byonse pa kubatu’mba ñumvwishe jishimikila. Nayukile pe Abalahama “lukunwa,” ne “jibumba jikatampe,” bino byo bandondolwejile mu mulaka wa kwamba na maboko popo nayukile mo byatala. (Ntendekelo 22:15-18; Lumwekesho 7:9) Kyamwekeshetu patoka kuba’mba pano po natana mulaka mwine, mulaka wa kyami kyami.

Byo natendekele kumvwa byonse byaambiwenga pa kupwila, muchima wakasulukile kabiji nakebelenga kufunjilapo byavula. Na mambo a kuba Stéphane wankwashanga, nayukile byavula bya mu Baibolo, kabiji mu 1992 nepaine kwi Yehoba Lesa ne kubatizhiwa. Nangwa kya kuba nayukile byavula, nakijinga na bumvu kabiji kyankatazhanga bingi kwisamba na bantu mambo ku bwanyike kechi nesambanga na bantu ne.

KWIBIKAKO KUPWISHA BUMVU

Mu kuya kwa moba, kajibumba ka babibulu ko najingamo bekavwangile na kipwilo kya mu Pessac, kyajinga mu Bordeaux. Kino kyankwashishe bingi kabiji kyandengejile kuyilako palutwe mu bukine. Nangwa byonkabyo, nakijinga na lukatazho lwa kwisamba na bantu, balunda nami babujile bibulu batangako bingi muchima ne kumona kuba’mba naumvwa byonse. Bamulume ne mukazhi bamo, ba Gilles ne ba Elodie, bebikangako bingi kwisamba na amiwa. Javula bansendanga ku nzubo kwabo inge twafuma na kupwila, bajinga balunda bawama. Byo kiletapo lusekelo kwikala pa bantu balondela mashinda a kwa Lesa!

Mu kino kipwilo mo nataine Vanessa. Natemenwe byo ajinga na lusa ne kuyuka mwakubila na bintu. Kechi wamonanga’mba bukibulu bulengela kukankalwa kwisamba ne, wibumona’mba jishinda ja kufunjilamo kwisamba na bibulu. Wankubwile bingi muchima, kabiji mu 2005 twisongwele. Nangwa kinkatazha kwisamba bulongo, Vanessa wankwasha kupwisha bumvu ne kwisamba saka na kasuluka. Namusanchila bingi pa byo ankwasha mu mingilo yami.

BUPE BUKWABO BWAFUMA KWI YEHOBA

Mwaka ye twisongwele, bangichile ku ofweshi wa musampi wa Bakamonyi ba kwa Yehoba waikela mu Louviers mu kyalo kya France na kufunda mwingilo wa buntuntuluzhi. Lelo jino, musampi ubena kwingila bingi na ngovu kulupula mabuku a mu Mulaka wa Kwamba na Maboko wa ki French pa DVD. Bino byo kwakijinga mwingilo wabaya kulutwe, jibumba ja bantuntuluzhi jakebelenga bamwingilo bavula.

Amiwa ne Vanessa twiumvwine kuba’mba kwingijila pa musampi ke jishuko bingi kabiji bupe kufuma kwi Yehoba Lesa, pano bino twajinga na moyo. Ki ka kikobiwa ku jibumba jetu ja mu mulaka wa kwamba na maboko? Nga nzubo yetu kikekala byepi? Vanessa ukatana nkito nyi? Yehoba wapaine mukumbu wa makatazho onse mu jishinda jawama. Namwene Yehoba byo etutemwa ne byo atemwa babibulu.

KWITUKWASHA KU BANTU BAKWATANKANA

Byonji mu mwingilo wa kutuntulula, nakonsha kukwasha babibulu kumvwisha bukine. Kabiji kindetela bingi lusekelo kumona ba mwingilo bakwetu byo bebikako kukeba kwisamba ne amiwa. Bacheche besamba ne amiwa na maboko pa kuba’mba bafunde ne kukeba kumfika pa muchima. Kechi ñumvwa mukose nangwa pachechetu ne. Buno butemwe bumwesha byakwatankana bantu ba Yehoba.—Salamo 133:1.

Mbena kumusanchila Yehoba kuba’mba pa kupwila, kimye kyonse kwaikalanga muntu wa kunkwasha. Kabiji namusanchila ne pa mwingilo mucheche ye najinga nanji wa kukwasha babibulu bakwetu kuyuka Mulenga witutemwa ne kufwenya kwipi ne aye. Mbena kupembelela kimye kyo bakafumyapo byonse bilengela kukankalwa kwisamba, bonse po bakambanga ‘ñambilo yafwainwa’—bukine pe Yehoba Lesa ne byo akeba—po tukekala mu kisemi kya kwatankana.—Zefwaniya 3:9.

[Tubyambo twa mushi]

[Kipikichala pa peja 10]

Byo najinga na myaka itanu

[Kipikichala pa peja 11]

Stéphane wankwashishe kumvwisha Baibolo

[Kipikichala pa peja 12]

Mukazhami Vanessa unkwasha bingi

[Kipikichala pa peja 12]

Mbena kwamba jashi ja Baibolo mu Mulaka wa Kwamba na Maboko wa ki French

[Kipikichala pa peja 12]

Mbena kwingijila ku Dipatiment ya Buntuntuluzhi pa ofweshi wa musampi